Mataupu 4

O Se Tane ua Na Maua Le Faaaloalo Loloto

1, 2. Pe e maua faapefea le faaaloaloga, ma pe faapefea ona faataʻitaʻia lelei mai lenei mea i le tulaga e uiga i a Iesu Keriso?

E LE maua le faaaloaloga i le na ona faatonuina o se tasi ia faaaloalo atu i a te oe. E tatau ona e mauaina le faaaloaloga i le auala e te tautala atu ai ma i gaoioiga e te faia ma i le uiga moni o loo e i ai.

² Ua faataʻitaʻia mai lenei mea i le tulaga e uiga i a Keriso Iesu. Na maua e ia le faaaloaloga o se aʻoaʻo e ala i lana auala sa aʻoaʻo atu ai. Ina ua uma lana Lauga i luga o le Mauga “ona matuā taufaiofo ai lea o le motu o tagata i lana mataupu.” O le ā na maua ai e ia lenei faaaloaloga? Ona o lona faalagolago i le Afioga a le Atua le Tusi Paia ae e lē i manatu o isi tagata. O lana pule atoa e mai i a Ieova le Atua ma lana Afioga o le upu moni. Sa maua e Iesu le faaaloaloga mai ana uo ma ona fili, i lona galue ia mauaina.—Mataio 7:28,29; 15:1-9; Ioane 7:32,45,46.

3. O le ā le matafaioi ua tuuina atu e le Efeso 5:33 i se avā, ma o le ā o loo manaomia mai le tane i lenei mea?

³ “O le fafine foi ia ava o ia i lana tane,” o le faatonuga lena ua aumaia i le Efeso 5:33. Peitai e ao foi i le tane ona matuā maelega ia tatau i ai lea faaaloaloga; a lē o lea, o le a faigata tele i lana avā ona usiusitai i lana faatonuga. Pe e mafai faapefea e se tane ona faataunuuina lona tofiga e pei ona otootoina mai e le Tusi Paia ina ia maua ai lea faaaloaloga?

 I LE FAATAUNUUINA O LE TULAGA ULU MA LE TONU

4. O le ā le tulaga ua tofia ai le tane e le Tusi Paia?

⁴ Ua tofia e le Tusi Paia le tane i le tulaga o le ulu i le fuafuaga tau le faaipoipoga i le faapea mai: “O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foi o le ulu ia o le ekalesia, o ia foi o le faaola o le tino. O lenei, faapei ona usiusitai o le ekalesia ia Keriso, ia faapea foi fafine i a latou lava tane i mea uma lava.”(Efeso 5:22-24) Pe o le a fesoasoani moni ea lenei fuafuaga i le fiafiaga o le au aiga? Ua tautala atu ma le lē taofiofia nisi fafine faasaga i le mea ua latou faamatalaina faapea o le pule alofa faapito a le tane, o le uiga o lea mea o le gugutu ma le vaai faamaualuga o nisi o tane agaʻi i o latou tulaga i le va feagai ai ma fafine. Peitai sei o tatou faapea atu mai le amataga lava, ua lē o faamaonia e aʻoaʻoga a le Tusi Paia sea pule alofa faapito a le tane.

5. O le ā e tatau i le tane ona aloaʻia e uiga i le tulaga ulu, ma o faaaʻoaʻoga a ai e tatau ona mulimuli ai?

⁵ Ua faamamafaina e le Tusi Paia le mea moni e lē na o le fafine a e faapea foi i le tane ona i lalo o le tulaga ulu. I le liliu atu i le Tusi Paia i le tusi o 1 Korinito, mataupu e 11, fuaiupu e 3, ua tatou maua ai upu nei sa tusi atu ai le aposetolo o Paulo i le faapotopotoga i Korinito: “A ou te loto ina ia outou iloa, o le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea.” O Keriso o le ulu lea o le tane, ma e mai le Atua ma Keriso o ni faaaʻoaʻoga ma faiaʻoga e tatau i a te oe le tane ona aʻoaʻoina mai ai pe faapefea ona faataunuuina le tulaga ulu.

6. O le ā e mafai ona aʻoaʻoina e tane e uiga i le tulaga ulu mai i a Ieova le Atua ma Iesu Keriso?

⁶ O le tulaga ulu o Ieova i luga aʻe o Keriso sa faia i le alofa ma le agalelei, ma o le tali atu i ai a Iesu, “Loʻu Atua e, ou te fiafia e fai lou finagalo.” (Salamo 40:8; Eperu 10:7) O le tulaga ulu foi o Iesu Keriso e alofa. Sa fetalai atu o ia i ē o le a avea ma ona soo:  “O aʻu lē agamalu ma le loto maulalo; ona maua lea e outou o le malologa mo outou agaga.” (Mataio 11:29) O i latou o sui o lana faapotopotoga, ia ua faatusaina e le Tusi Paia i se faatoanofotane, ua maua lava e i latou le faamalosiaga moni i lalo o lona tulaga ulu. Ua na lē gaoioia i latou ma le faasauā, ae ua matuā faaali atu e ia lona alofa. O le ituaiga o tulaga ulu lea e tatau i le tane ona faia i lana avā: “O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai e ia ia te ia e fai mona sui;...O loo faapea ona tatau ona alolofa o tane i a latou lava avā, faapei o latou lava tino; o lē alofa i lana avā, o loo alofa o ia ia te ia lava; auā e leai lava se tasi e ita i lona lava tino; a e peitai na te fafaga ma tausi atu i ai, faapei o le Alii foi ona tausi i le ekalesia;...ia taitasi outou ma alofa i lana lava avā faapei o ia lava ia te ia; o le fafine foi ia ava o ia i lana tane.” (Efeso 5:25-29,33) Afai e te faataatia le faaaʻoaʻoga o le gauai atu i le tulaga ulu o Keriso, o le a lē o se mea faigata la—o le mea moni e mafai ona avea ma fiafiaga—mo lau avā le i ai o le faaaloaloga loloto mo lou tulaga ulu o lana tane.

7, 8. Ia taʻu mai nisi o auala ua lē o taulau ona faia ai e nisi o tane le tulaga ulu tatau.

⁷ O le faafitauli tele e talu ai le lē lelei atoatoa ma le manatu faapito na fanau mai ma le tagata, e i ai taimi e ui lava ina naunau le tane ia avea ma ulu faaaloalogia o le aiga, ae ua le taulau ona faaalia le alofa moomia ma le magafagafa mo lana avā. Ua masani pea ona faapea mai se avā e lē alofa lana tane i a te ia, ma e pau lava le mea e popole ia i ai o lona fiafiaga ma le faamalieina o ia. E le gata i lea ua finau mai foi nisi avā faapea ua pule malosi a latou tane. Atonu ua mafua mai lenei tulaga talu ai taumafaiga a le avā e faoa le pule a le tane, a e teena e le tane. Pe atonu foi pe sa ola aʻe le tane i se oganuu e toatele ai tane pule sauā. E tusa lava po o le a le mafuaaga, ae o lea  faaaoga seseina o le tulaga ulu o le a lē mauaina ai se faaaloaloga a se tasi.

⁸ I le isi itu, na i lo le faaaoga seseina o le tulaga ulu, o nisi tane ua latou lafoaia le tulaga ulu. Ua latou faamatuu uma atu le faia o faaiʻuga i a latou avā. Po o le fai atu foi i le avā e ‘⁠aua le soona faatatopea i latou,’ ae ua latou matuā faifaiaga lava ma afāina ai mea tau le aiga. Atonu latou te lē paie pe faifaiaga, peitai afai o le a latou lē mataala faalemafaufau o le a tutusa lava iʻuga o le a oo i ai ma i latou o loo faamatalaina i le Faataoto 24:33,34: “Seʻi toe itiiti sina moe, toe itiiti se matamoe, toe itiiti se piilima e taoto ai. A e oo mai lou mativa e pei o le malaga; ma lou le tagolima pei o le tagata ua sauni lana auupega.”

9, 10. A faia faaiʻuga e afaina ai le aiga, o manatu o ai e ao i le tane ona mafaufauina?

⁹ O le a e maua le faaaloaloga mai lau avā pe afai o le a e faaalia lou tutumau ma le malosi atoa ma le mafai ona faia o faaiʻuga. Peitai e le o lona uiga o le a faapea ai ua lē tatau ona fesiligia se tasi o lou aiga po o le lē manatu mamafa foi i se manatu o lau avā talu ai ona e faapea e eseese ma lou taofi. I le tau amatamataga o tusitusiga a le Tusi Paia ua tatou faitau ai i se faafitauli mataʻutia i le aiga o Aperaamo ma Sara e aafia ai la la tama o Isaako ma le tama a la la auauna teine o Akara. Sa fautuaina e Sara se vaifofo e lei tala feagai ma faalogona o Aperaamo e uiga i le mataupu. Peitai sa taʻu atu e le Atua i a Aperaamo: “Ia e usiusitai i ai i lana upu.”—Kenese 21:9-12.

¹⁰ E le faapea, mai i lenei mea, o le a tatou manatu ai e tatau i le tane ona gauai atu i manaoga uma a lana avā. Peitai e aogā tele ona talanoaina ma ia o faaiʻuga e afāina ai le aiga, ma apoapoaiina ai o ia e faaalia, ona manatu ma faalogona ma le saoloto. Ia tatalaina pea laina o fesootaiga, ia faigofie pea lava ona talanoa atu i a te oe ma fuafua lelei ona manaoga i faaiʻuga e te faia. Aua lava neʻi e fia posi pe sauā i lou faataunuuina o lou tulaga ulu, ae ia faaalia le loto maulalo. E te lē   lelei atoatoa, o le a e faia ni mea sese, ma a oo ina e faia mea sese, e te manaomia foi ia malamalama le mafaufau o lau avā. A tutupu mai nei tulaga, o le avā e loto maulalo lana tane o le a faigofie ona faaaloalo i lona tulaga ulu na i lo lē e faamaualuga lana tane.

O LE AVEA MA LĒ TAUSI LELEI

11, 12. (a) O le ā le tiute tauave o le tane e tusa ai ma le tapenaina o mea faaletino e manaomia o le olaga? (e) Pe faapefea i le uiga moni e ala i taumafaiga tuu faatasi ona faia ai nei sauniuniga?

¹¹ O le tiute tauave a le tane o le aumaia o mea faaletino e manaomia e lona aiga. Ua faaalia mai lea mea i le Timoteo Muamua 5:8: “A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo.” Ina ia ola ai i aso nei i le tele o atunuu, e manaomia se tupe tele, ma o oe la o se tane e tatau ona faia faaiʻuga o loo pulea ai pe faapefea ona faafetaiaʻia lenei manaoga. Atonu o le a e iloaina e lē gata i le aumaia o tupe o loo e galue ai mo le aiga, a e manaomia foi ona lua galueaiina faatasi ma lau avā le tupe faasoasoa e te lua malamalama faatasi i ai. O lona uiga moni o lea mea o le i ai lea o se fuafuaga e pulea lelei ai le tupe faaalu. O le a fesoasoani lea i a te oulua ia ola e tusa ma mea ua i a te oulua, ma e tele se mea na te faia ia alofia ai ituaiga o finauga e mapuna aʻe i nisi taimi pe a oo ina uma le fasi tupe a le aiga a o lei oo mai le isi aso totogi.

¹² E ui lava ina o le tane, i le tele o tulaga, na te aumaia tupe mo le tausiga o le aiga a e le tatau ona faagaloina e maua mai lenei tupe i taumafaiga au faatasi. Afai ua manatu oe le tane o loo e faia toatasi lenei mea, sei e faatali lava la ma fuafuaina pe o le ā le tau mo oe pe afai o le a e totogia lē o le a na faia faatauga mo oe, se faia kuka, se fuluipu, se tausi fale, se teuteu fale, se tausi tama ma tulaga uma faapena. O le tulaga masani lava, ua faasaoina lea alagā tupe e lau avā e ala i le faia o galuega, ma o le mea moni   o lana vaega lea i le lua paaga tau le faaipoipoga. Ma afai na te tausia ni faamaumauga se tele o tupe faaalu e mafai la ona e faaopoopo atu i ai le “failau tusi”i le lisi e pei ona uluai taʻua. Ua matuā moni lava le Faataoto 18:22: “O le ua maua le avā [lelei], ua maua e ia le mea lelei.”

13. A oo i mea faitino, o le ā le vaaiga e ao i ulugalii faaipoipo ona alo ese mai ai, ma pe e mafai faapefea i lenei mea ona aogā i a i latou?

¹³ I le aumaia o mea faaletino e i ai pea lava le mataʻutia—mo oe ma lau avā—o le palasi atu i se mafaufauga faameafaitino atoa ma le vaaiga lea i le olaga. E itiiti ni mea latou te mafai ona ‘faavaivaia ai’ le faavae o le fiafiaga faaleaiga i se tulaga tele na i lo lenei. “Auā tatou te leʻi au mai lava se mea e tasi i le lalolagi, ua mautinoa foi tatou te le mafai ona ave ese ai o se mea,” fai mai ai le tusitala o le Tusi Paia o Paulo. O lea la, “Afai ua maua e i tatou o mea e aai ai ma mea e oofu ai, ia gata ai o tatou manao. A o e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia. Auā o le manao i tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le upu o le faatuatua, ua tuʻia ai ua ati i latou e i latou i puapuaga e tele.” E tusa lava po o le ā ni mea totino e ona aumaia e auala mai i le manao i mea faitino, e lē mafai lava ona totogia ai le tiga o le vaai atu i le va feagai ai o aiga ua faavaivaia ma malepe i lalo. E matuā māmāsagia le tele o mea faitino i le tulaga faaleagaga ma le mafaufau pe a le iloa.—1 Timoteo 6:7-10.

14. O le ā e fuaina ai pe o mea faitino e sili atu le tāua i le olaga o se tasi?

¹⁴ O le manao i mea faitino o le naunau tele lea i mea faitino e lē na o le i ai o ia mea totino. E mafai e se tasi ona mativa ae manao i mea faitino, po o le mau oloa ma naunau i mea faaleagaga. E faalagolago lava i le mea o i ai lona fatu. Na fetalai Iesu: “Aua tou te  toloʻaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai. Auā o le mea ua i ai lo outou oa, e i ai atoa foi ma o outou loto.”—Mataio 6:19-21.

15, 16. E lē gata i le tausia lelei i mea e moomia i la le tino, o ā isi mea e tatau i le tane ona faia ina ia mafai ona faatumauina se aiga fiafia?

¹⁵ O se tane na te saunia lelei mea e manaomia faaletino o le a manatu i nei lapataiga faale-Tusi Paia ma e lē gata i le saunia o mea moomia moni i le itu faaletino, ae o le a tuuina atu foi le taimi i le faia o sauniuniga faaleagaga mo lona aiga. O le ā le lelei o le faaaluina o se taimi umi i galuega faalelalolagi ia maua mea faaletino o le olaga ma e lē lava ai lou taimi ma lou malosi o totoe e ati aʻe ai lou aiga i se auala faaleagaga? Ina ia mafai ona maua le atamai e faafetaiaʻia ai ma le manuia faafitauli o le olaga, e tatau ona faaaluina le taimi ia ati aʻe i le aiga se tuutoina atu malosi i mataupu silisili saʻo. O le faia o se nofoaga i lou olaga mo le faitauina ma le talatalanoa faatasi e uiga i le Afioga a le Atua o le a na mafaia ona fai o lena mea, e faapei foi ona mafaia i le tatalo faatasi. I le avea o se ulu o le aiga, ua paʻū atu la i a te oe le tane, lou taʻimua i lenei faiga. O le tau e tusa ma lou taimi ma taumafaiga o le a lē taitai ona faatusaina i aogā o le a maua mai ai. O le a lē mafai ona lē taulau folafolaga a le Atua: “Ia e manatua o ia i ou ala uma, ona faatonuina ai lea e ia lava ou ala.”—Faataoto 3:6.

¹⁶ O se tane e vaavaai atu i Le na Foafoaina mea na te faatonuina ona laasaga, na te talisapaia le paleni o le fautuaga ua maua i le Failauga 7:12: “Auā ua fai le poto ma mamalu, ua fai foi tupe ma mamalu, a o le aoga lenei o le poto ua maua, e ola ai e ua i ai.” O lea, i le avea o sē tausi lelei, e galue malosi o ia ia maua mai mea faaletino e manaomia e lona aiga. E ui  i lea e tuu atu lona faamoemoe, e le i luga o le “oloa e faaletumau, a o le Atua soifua.” Ua na faataatia le faaaʻoaʻoga i le tuuina atu o le faamamafaga autu i mea faaleagaga, ina ia mafai ai e i laʻua uma ma lana avā ona la “fetagofi atu i le ola e faavavau.” (1 Timoteo 6:17-19) O taumafaiga a se tane ia faia nei sauniuniga, i le faaletino ma le faaleagaga, o le a maua mai ai e ia le faaaloaloga a se avā mataʻu i le Atua.

I LE FAAALIA I A TE IA O LE AVA

17-19. Pe e ono faatatauina faapefea le fautuaga a le Tusi Paia e avatu le “ava” i le avā i le fesootaiga ma feusuaiga faaulugalii?

¹⁷ Ua tautala le aposetolo o Peteru i tane e uiga i a latou avā ma taʻu atu i a i latou “ia ava i le avā, auā o le ipu ia ua sili ona vaivai ia te oe.”(1 Peteru 3:7) I lenei lava fuaiupu e tasi ua faasino mai e Peteru o oe le tane o loo mau faatasi ma lau avā, e tatau ona avatu i a te ia lea ava e tusa ai “ma le poto.”

¹⁸ O lenei tulaga ua mautinoa lava le faatatau i feusuaiga faaulugalii. O le tele o le leai o ni faalogona mafana i avā e mafua mai lava lea i tane latou te le amanaia tulaga o loo fau aʻe ai se fafine i le tino ma faalogona ootia. “Ia avatu le tane i le avā le agalelei e tatau ai,” peitai ia faia ‘e tusa ai ma le poto, ia ava i a te ia auā o le ipu ia e sili ona vaivai,’ o le fautuaga lena a le Afioga a le Atua. (1Korinito 7:3) Afai e te ‘avatu moni ia te ia le ava’ o le a e lē saua ma tautū i ou manaoga po o le tausisi i le faamalieina o ou lava faalogona e tusa lava pe afai atonu o loo ia vaivai tele, ia pe o loo i ai foi i taimi faigata o le masina. (Ia faatusatusa Levitiko 20:18.) Ma a oo ina faia lua faiga aiga o le a e lē tausisi naua i lou lava faafiafiaga ma lē amanaia ai ona manaoga. I lenei vaega o le olaga e masani lava ona tuai le tali atu a se fafine na i lo se tane. Ua i a te ia se manaoga faapitoa mo uiga faapelepele ma le alofa naunau. I le taʻuina atu i le tane ia “avatu i le avā le agalelei e tatau ai,” ua tuuina atu  ai e le Tusi Paia le faamamafaga i le foai atu, ae lē o le taliaina.

¹⁹ O lena ituaiga o foai ua tatau lava ona taofia mo na o le paaga faaipoipo a le tagata lava ia. E moni e toatele tane i aso nei ua faia ni “feusuaiga” ma isi fafine. Peitai i le iʻuga o le ā latou te maua? E na ona latou faatamaia ai le fiafiaga o lo latou lava aiga. Ua le taulau ona latou avatu i a latou avā o le ava, ma ua latou le aumaia ai la se faavae mo a latou avā ia faaaloalo atu i a i latou. E sili atu i lena ua latou le ava i le faaipoipoga lava ia, le fuafuaga na amataina e le Atua. I le vaai atu i le tele o le loto mafatia ua aumaia i lenei tulaga, ua malamalama lelei ai lava i le mafuaaga ua lapatai mai ai le Eperu 13:4: “Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.”

20. E pei ona faasino mai i le Efeso 5:28, i ā isi auala e tatau ona faaalia atu ai i le avā le āva?

²⁰ O le faaalia o le āva i le avā a se tasi e lē gata mai i feusuaiga faaulugalii. I isi foi mataupu, o le tane ua faaaloaloina moni na te faaalia le manatu maualuga mo lana avā. E lē faapea o lona tuu o ia i se nofoaga maualuga ma fai ai le tane ma ana pologa. A e pei ona tatou uluai faitauina muamua i le Efeso 5:28: “O loo faapea ona tatau ona alolofa o tane i a latou lava avā, faapei o latou lava tino; o lē alofa i lana lava avā, o loo alofa o ia ia te ia lava.” O se tane na te faia lenei mea ua mautinoa lava o le a na le faia i lana avā peiseai o ia o se tagata maulalo. I taimi o taumafataga o le a lē manatu ia o mea lelei uma lava e mo ia, a e faatotoe na o nai toegā mea ma le avā—e lē tatau ona faapena pe afai e alofa i a te ia ‘e pei o lona lava tino.’ Na i lona vaai ifo i ona lava foliga, e tatau ona sili atu ona manatu mamafa i lana avā, ma faia le mea na te mafaia e fesoasoani ai ia na maua le loto malie e uiga i ona laei. E lē tuʻia e se tane ia lava pe a lē taulau ona ia faia ni mea ia lelei e tusa ma lona manao. E lē faia foi faapena e se tane Kerisiano i lana avā pe a faapea  ua le atoatoa ona oo atu o ia i se tulaga na faatalitalia i nisi taimi. E matuā ese mamao lava, afai e i ai soo se tasi na te faia ni faiga saua i a te ia e tatau la ona fesoasoani faamaoni i a te ia. E alofa o ia i a te ia e pei o lona lava tino.

21, 22. Pe e mafai faapefea e se tane ona fesoasoani i lana avā ia maua le olioli i le faataunuuina o ona tiute?

 ²¹ A o talisapaia itu e tutusa ai o oulua manaoga, e manaomia foi ona e malamalama i eseesega faalemafaufau i lo lua va pe afai e te avatu le āva i lau avā. I se uiga faavae, e mananao fafine e galulue i lalo o se pulega pe afai e saʻo ona faia lea pulega. O le auala lenei na foafoaina ai i latou e Ieova. Na faia le fafine ia avea ma ‘fesoasoani mo le tamaloa, o sē faafiafia i a te ia.’ (Kenese 2:18) Peitai afai ua anoai naua le pulega, afai ua leai se avanoa e faia ai e ia lava se mea ma faaaoga ona lava tomai, o le a oo ina amata ona lagona e se fafine ua uunaieseina le olioli mai lona olaga, ma e ono tuputupu aʻe ai le lē fiafia.

²² O le isi mea tāua moni e ao ina faautagia o faanaunauga masani ia o le fafine ia lagona i ona tino o loo manaomia o ia. O se tane loto fesoasoani e talisapaia e le toatele o avā, peitai a o lē e na ona tago atu tulei lana avā ae faia e ia se mea o fai, atonu o le a na iloa o le a sili atu le leaga e aumaia ai na i lo se lelei. Ua e faia se mea telē ia maua le faamaoni o lau avā pe a e agalelei ma agaga talisapaia ma faailoa atu i a te ia o loo manaomia tele o ia, o loo oulua galulue o se au, ma o mea uma o a “lua” mea ia, a e lē o “Aʻu’ ma “oe” po o “laʻu” ma “lau.” Pe ua e faailoa moni atu ea i lau avā le tele o lou talisapaia ma lou manaomia o ia? E te le faia lea mea i lou totogia o ia i se totogi; e tatau lava ona e faaalia lea i isi auala.

IA TALISAPAIA ONA UIGA TAU FAFINE

23. I le tautalaga lautele, e faapefea ona eseese tane ma fafine e tusa ai ma faalogona ootia?

²³ Na tusia e se fafine e suesue i uiga tau le mafaufau: “I se tulaga faavae, o fafine latou te faaaogaina o latou faalogona a o tamaloloa latou te mafaufau.” I le na o ia lava, e le sili ona lelei le tasi o ia uiga i le isi, pau le mea na o le eseese. Tatou te lē fiafia i tagata e leai ni o latou faalogona; tatou te lē mananao foi i tagata lē mafaufau. Ua mautinoa lava, ua i ai i fafine   le avanoa mo faalogona ma le tulaga e mafaufau ai, ma ua moni foi lea i le itu e uiga i tamaloloa. Peitai i le tautala i le tulaga aotele o faalogona ootia o se fafine e faigofie ona aliali mai, ae i se tamaloa e masani lava ona taumafai e faatoilaloina faalogona ootia i lona faasilisilia o le mea ua ia manatu o se auala saʻo ma le faatuatuaina e faafoeina ai mataupu. E ui lava ina moni e i ai ni tulaga e ese ai, ae o le tasi lea eseesega ua atoatoa ai le fiafia o le tasi i le isi. Faatasi ai ma ona uiga e faia aʻe i faalogona ootia, lona naunau tele i tagata, ua mafua ai ona masani ona ia tautala soo atu na i lo le tamaloa. Ma e manaomia e ia se tasi e tali mai i ana tala. O le tulaga lenei ua lē taulau ai le toatele o tane.

24. Ai se ā ua tāua ai i se tane ona faalogologo i lana avā ma talatalanoa ma ia?

²⁴ Pe e te talanoa ea i lau avā? E lē i le na o lau galuega, a e faapea foi i lana? Pe e te naunau ea i ai ma faaali atu i a te ia o lena lou faanaunauga? Sa faapefea mai ana galuega o le asō? O le ā se mea na tupu i tamaiti? Aua neʻi e sau i le fale ma fesili, ‘⁠O le ā la tatou mea ai?’ ma a uma loa ona e tausami, faalafi ou foliga i tua o le nusipepa ma e tali atu ma le tomumumumu i nai ana taumafaiga e te lua talanoa. Ia e naunau i lau avā, i ona manatu, i ana mea e fai, i ona faalogona e uiga i mea. Ia faaloto tele i a te ia i ana fuafuaga, faamalo i ai ona o le fai mea maea. Afai e taʻuleleia o ia ona o mea ua na fai, atonu o le a amata ona ia faia isi mea sa faatalalē i ai. E mafai ona avea le faitioga ma mea oona ma tupu ai le atuatuvale, peitai o le viiga moni e tuuina atu ina ua tatau ai ua avea ma mea e malolo ai ma faagaeetia ai le loto!-Faataoto 12:18; 16:24.

25, 26. (a) O le ā le feau e avatua e se mea alofa i se avā? (e) O le ā le ituaiga o foai e sili atu ona tāua i a te ia?

²⁵ Pe e te avatu ea mo ia ni mea alofa mai lea taimi i lea taimi? E le tau tuli i se mea taugatā—atonu pe na o sina mea itiiti o loo faapea atu, ‘Sa ou mafaufau mai  i a te oe.’ Ma pe e te faia ea lenei mea, e lē faapea ona o se tulaga faapitoa peitai i tulaga masani lava, ma le aunoa ma se isi lava mafuaaga ae ona o lou manao e faia faapena? O ni faateʻiga lelei faapena e masani lava ona avea ma fiafiaga. Pe e te lē fiafia ea pe a na faateʻia oe i lona saunia o se mea taumafa e te fiafia i ai? Fetaliaʻi i uiga lelei faapena, ma faafiafia ai o ia. O nai mea iti faapena, e uunaia e le alofa, e sili atu ona uigā na i lo mea alofa taugata faifai soo—atonu ua faia ma le lē fiafia—ua ofoina atu ona o le faapea o se tiute. “E alofa le Atua i le ua foai ma le loto malie.” (2 Korinito 9:7) E faapena foi i avā. E tusa lava pe e le o ni mea e ʻai faapitoa, ia manatua, “E sili ona lelei o le faaalumaga o laau ʻaina, a o i ai le alofa, i le povi ai le fale povi, a o i ai le ʻinoʻino.”—Faataoto 15:17.

²⁶ O le foai aupito sili o le foaiina atu lea o oe lava—lou taimi, lou malosiaga, le uaʻi atu o lou mafaufau ma ou manatu, ae maise lava i a te i latou e aupito latalata atu i lou fatu. Ua faafaigata i le toatele o tane lenei mea. O le faia o ni faaupuga alofa atonu e foliga mai o ni faiga valea ma e pei e lē faatama-tane. Peitai afai e te alofa i lau avā, o le a teuina i lou mafaufau le lagona e mafai ona i ai i se fafine mai lau pupula, sau paʻi atu atoa ma sau upu. Peitai o le lē i ai o na tulaga e telē sana avega mo le faaitaita i a te ia, le faavaivaia ma le lē fiafia. O lea, ia mulimuli i le faaaʻoaʻoga ua faamauina i le Tusi Paia i le Pese a Solomona. O le faaalia o le alofa ma le agalelei mo isi e lelei mo lē o loo ona faia. E taaina atu ma le lē taofia tagata i ē loto mafana. Ma o le ā ea le tagata mafana? O ia lea na faailoa atu ona faalogona ma lona lotomu i ē na te manatu i ai. O lea ituaiga o mafana e faasalafa; o le a toe taui atu i lē na foai mai ai.—Pese a Solomona 1:2,15; Luka 6:38.

27, 28. (a) O le ā atonu e fesili ai se tane i a te ia lava, e iloa ai pe o ia faafoeina lona tulaga ulu i le auala tatau? (e) Ai se ā ua lelei ai le manatu mamafa i lenei mataupu?

²⁷ Le tane e, fesili ia i a te oe lava: Pe o faigofie ea  ona faaaloaloina loʻu tulaga ulu e laʻu avā? Pe o oʻu alofa ea i a te ia e pei ona ou faia i a te aʻu lava? Pe o faaautū ea oʻu faanaunauga i loʻu lava faamaliega ma oʻu manaoga? O le ā le tele o loʻu amanaia o ona manaoga? Ae ou te lei faia faaiʻuga mo le aiga, pe ou te faalogologo ea i ona manatu ma faautagia ona manao? Pe ua faia ea aʻu faaiʻuga ma le manatu i le lelei mo ia? Pe ua ou avatu ea i a te ia le āva o le ipu e sili ona vaivai? Pe ma te talatalanoa ea ma ia, ma tatala atu loʻu fatu i a te ia?

²⁸ O le a lē mafai ona e oo atu i le fua o le lelei atoatoa. Peitai afai o le a e tuuina atu se taumafaiga maumauai ma le loto maulalo, e mafai ona e mautinoa o le a aogā tele mo oe le faia ia avea o se tane ua na maua le faaaloaloga loloto a lau avā ma le faamaoniga a le Atua.

[Fesili mo le Suʻesuʻega]

[Ata i le itulau 49]

E tele uiga tāua o nai mea iti