Tausaga Mulimuli Ane
Mataupu 13
Tausaga Mulimuli Ane
1, 2. (a) O ā faafitauli atonu e mapuna aʻe pe a mavae ona tuua e fanau le aiga? (e) Pe o faapefea ona taumafai nisi e faafoeina faafitauli o le olaga matua?
Afai o le a lē faatutumuina o tatou olaga i ni galuega, faaletino po o le faalemafaufau, o le a oo ina tatou paie. O le a foliga mai e pei ua gaogao le olaga ma o le a tatou lē manonofo. O lenei faafitauli e mapuna aʻe i nisi taimi i tagata faaipoipo pe a matutua a latou fanau ma tuua le aiga. Mo latou tausaga e tele ua mavae, sa faatumulia lo latou olaga i tiute tauave o le avea ma matua. Nei la o lenei galuega uma atoa ma le tiute tauave o le tausia o se aiga ua faafuasei lava ona oo mai i lona iʻuga.
2 I le ma lea, a o mavae atu tausaga, o le a amata foi ona tutupu suiga faaletino. O le a aliai mai ni maanuminumi, amata ona sinā le lauao ma valavala, ma o gagase ma tiga sa lei matauina muamua ua faaalia mai nei. O le mea moni ona ua oo ina tatou matutua. I le teena o le faafesagai ma mea moni, ua faia ai e nisi tagata ni taumafaiga valea e faamaonia ai o loo tutusa pea lo latou talavou e pei lava ona sa latou i ai muamua. Ua tei lava ua latou auai ma le malosi tele i gaoioiga ma isi tagata—ua faataalise atu i pātī, po o le aafia tele foi i taaloga. O lenei tiotio faafuasei i mea e fai ua maua ai se mea e faia, peitai pe e aumaia ai ea se faamaliega tumau? Pe o le a aumaia ai ea i se tasi se faalogona o loo manaomia moni o ia ma ua mafua ai ona i ai moni ni uiga lelei i lona olaga?
3. A o ono maua le faafiafiaina i malologa ma evaevaga, o le ā e tatau ona taumamao mai ai?
3 E moni lava o malologa ma evaevaga e ono faafiafiaina ai. Ma i tausaga mulimuli mai o lou soifuaga atonu o le a e mauaina ua i ai taimi e te faia ai nisi mea sa le mafai ona e faia a o laiti lau fanau. Peitai o le faatagaina o le sailigā—fiafiaga e avea ma faanaunauga autu e mafai ona aumaia ai faafitauli mataʻutia.—2 Timoteo 3:4, 5; Luka 8:4-8, 14.
O LE MATAGOFIE O LE FAAMAONIA O LE FAAMAONI
4, 5. O le ā e mafai ona iʻu i ai pe a lagona e se tagata ua matua, e tatau ona ia faamaonia o loo uaʻi atu pea le isi ituaiga i a te ia po o loo aulelei pea o ia mo le isi ituaiga?
4 I lenei taimi o le olaga, e lē toaitiiti ni tagata e foliga mai e faapea e tatau ona latou faamaonia o loo uaʻi atu pea le isi ituaiga i a i latou. Atonu o le a latou amata i le faamasani atu i se isi ma se uiga o le fia alu i a i se faatasiga a lautele po o se isi lava mea. Ae maise lava i tamaloloa, ua latou auai i ni “fai faiga” faaulugalii ma fafine talavou, ma i lenei taimi o le “tū fou tau amioga” e i ai foi fafine e toatele ua latou sailia le taliaina o i latou i le faia o nisi “fai faiga” faaulugalii e ese mai i a latou faaipoipoga. E ui ina lē taumatea ua leva tausaga talu ona faaipoipo, ae o nisi ua amata ona latou sapasapaia ni manatu e uiga i le amataina o se “olaga fou” ma se paaga fou faaipoipo. Atonu e taumafai i latou e taʻu amiotonuina le mea o loo latou faia i lo latou faasino mai o mea sese a a latou paaga—a o masani lava ona latou faamāmāina o latou lava sese, e aofia ai ma le aunoa ma so latou faamaoni, e le gata i a latou lava paaga a e faapea foi i mataupu silisili amiotonu.
5 Atonu latou te iloa na fetalai Iesu: “Ai se faatea i lana avā, a o lei mulilua ia [po o le faitaaga, porneia: O lona uiga, le amioga matagā lava i le va o tagata e lei faaipoipo], ma fai avā i se tasi, ua mulilua ia.” E ui lava ina sa faaalia i inei e Iesu e lē saʻo le faateaina o se paaga a se tasi i soo se mafuaaga po “ona o mea uma,” ae ua latou malilie lava e faaaoga soo se mafuaaga mo le tatalaina o faaipoipoga ua faatagaina mai e tulafono faalelalolagi. (Mataio 19:3-9) Ona latou sagai atu ai lea e aumai se paaga fou, e masani lava o se tasi sa latou aafia i ai a o lei taitai faagasolo feuiaiga mo le tatalaina o le faaipoipoga. A o latou iloa lelei le mea o fai mai ai le Afioga a le Atua e uiga i nei amioga, ae atonu latou te mafaufau e faapea i le alofa mutimuti vale tele o le Atua o le a “malamalama” o ia.
6. Pe faapefea ona manatu Ieova le Atua e uiga i le lē faaaloalo i le feagaiga o le faaipoipoga?
6 Ina ia tau mamao mai le tosina atu i nei mafaufauga amio leaga, ua lelei tele mo i tatou ona mafaufau i le mea na fetalai ai Ieova i a Isaraelu, e ala i lana perofeta o Malaki: “Ua ... faia e outou o lenei mea, o loo liloia ai le fata faitaulaga o Ieova i loimata, o le tagi, ma le auega; o le mea lea ua le toe silafia [e talia ma faamaonia] ai la outou taulaga, e le talileleia foi mai o outou lima. A ua outou fai mai, Ai se a foi? Auā o Ieova, o ia ua fai ma molimau ia te oe ma lau avā sa e fai a o ē taulealea, o le ua e faaʻoleʻole i ai; a o ia sa lua mafuta, o le avā foi o ia o lau feagaiga.... O lenei, ia faaeteete outou i o outou loto, ina neʻi faaʻoleʻole se tasi i lana avā na fai a o taulealea. Auā ou te ʻinoʻino i le alei, ua fetalai mai ai Ieova le Atua o Isaraelu.” (Malaki 2:13-16) Ioe, o le faaʻoleʻole i le paaga faaipoipo a se tasi, le lē faaaloalo i le feagaiga o le faaipoipoga—o nei mea e matua taʻuleagaina e le Atua; e faaleagaina ai le va feagai ai o se tasi ma Le Foai Ola.
7. Ai se ā ua le taʻitaʻiina atu ai i se fiafiaga le lē faaaloalo i le feagaiga o le faaipoipoga?
7 Pe o le auala ea lenei i se olaga e sili atu ona lelei? E faigata tele ona faapena. Soo se faaipoipoga fou e ulu atu i ai tagata faapena ua taatia lea i luga o se mafuaaga maluelue. Mo se tasi o mea, ua latou faaalia, e oo lava i lenei faiā tāua tele, ua lē o faatuatuaina ai i latou. E moni atonu ua vaaia se uiga maoae faaletagata i le paaga fou sa lei maua i le paaga muamua. Peitai ina ia aumaia lea tulaga, ua latou sueina lo latou lava fiafiaga e tusa lava pe aumaia ai le tiga ma le loto momomo i le paaga muamua. O le mea moni ua lē o se uiga lenei e galue mo le fiafiaga tau i le faaipoipoga.
8. I le faaipoipoga, o le ā e sili atu ona tāua na i lo le lālelei faaletino?
8 O le matagofie o le tumau i le faamaoni atu i se paaga faaipoipo, e matuā sili mamao atu i soo se lālelei faaletino. O le lālelei faaletino e matua le alofia lava lona mou atu i le mavae atu o tausaga, peitai o le matagofie o le tuutoina atu ma le faamaoni e tuputupu aʻe pea i le gasolo atu o tausaga. Ina ia sailia le fiafiaga o le tasi tagata ma loto malie e faamuamua ona faanaunauga na i lo ou lava, o le a mafai ai ona aumaia le faamaliega tumau, auā e moni lava “e sili le manuia o le na te foai atu, i le manuia o le na te talia mai.” (Galuega 20:35) Afai ua faaipoipo ni tagata se toalua mo ni tausaga se tele, ma afai ua la fetautalatalai ma talitonu le tasi i le isi, afai ua la au faatasi i galuega ma ni sini ma ni faamoemoega, o aso faigata ma aso lelei—ma ua faia nei mea uma i le alofa—o lona uiga o le a matuā auau faatasi o la olaga, ma matuā tuufaatasia. O le a tali tutusa lava i laʻua—i le mafaufau, i faalogona ootia ma le faaleagaga. O le alofa faavalea atonu sa faatauasoina ai i laʻua i o la sese a o lei faaipoipo, o le a oo ina suia i le naunau loloto mai le fatu ma o le a uunaia ai i laʻua taitoatasi e vaai i vaivaiga o le isi o se avanoa lelei e fesoasoani ai e faatumuina se manaoga. I lo la va, ua i ai nei se faalogona o le fetalitonuaʻi moni, se faalogona o le saogalemu, i le iloa lelei o le a tu le tasi mo le isi e tusa lava po o a ni faafitauli e tulaʻi mai. Mo i laʻua e foliga mai ua na o se mea ua masani ai le faamaoni o le tasi i le isi. E pei ona taʻua i le Mika 6:8: “Sole, ua faaali atu e ia ia te oe le mea lelei; se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa [faamaoni], ma ia feooai ma lou Atua ma le loto faamaulalo?”
TAMAITI UA MATUTUA—O SE FAIĀ FOU
9-11. (a) Pe o se fuafuaga ea a le Atua ia tumau pea i le faiga e tasi le faiā a matua ma fanau i le olaga atoa? (e) O le ā le sootaga o i ai i lenei mea ma le fautuaga atonu e avatuina e matua i a latou fanau matutua? (i) A oo ina faaipoipo a latou fanau, o le tulaga ulu a ai e tatau i matua ona faaaloaloina?
9 E ui lava o le tane ma le avā o le a faatasi i aso uma o lo la olaga, ae ua lē o le fuafuaga lena a Lē na Foafoaina mea mo matua ma a latou fanau. E moni a o tutupu aʻe lau fanau sa latou manaomia oulua i aso uma. E lē gata ona sa i ai manaoga faaletino e tatau ona faatumuina, ae sa manaomia foi ni taʻiala. Afai latou te lei tali atu loa lava i se mea na e taʻuina atu, atonu sa e maumauaʻi i ni mea mo lo latou lava lelei. Peitai ina ua faavaeina o latou lava aiga, ua i ai loa sina suiga i la outou faiā. (Kenese 2:24) E lē o le uiga o lenei mea e faapea ai ua suia o oulua faalogona i a i latou, peitai ua i ai nei se fesiitaiga o tiute tauave. O lea la o le auala o loo e faia ai mea mo i latou ua manaomia ona suia.
10 E i ai taimi atonu latou te manaomia ai pea lava le fautuaga. Ma o se faamaoniga o le atamai le faalogo atu i fautuaga lelei mai i a i latou e sili atu ona i ai le poto masani i le olaga. (Faataoto 12:15; 23:22) Peitai a ofoina atu fautuaga i atalii ma afafine ua ola lava i latou, o se uiga poto le faia i se auala e faaalia ai ua e aloaia le mea moni, o le faia o faaiʻuga ua palasi atu nei i a i latou.
11 E tāua tele lenei tulaga pe afai ua latou faaipoipo. E i ai ni atunuu o loo i ai ni aganuu ua leva tele, ua tuuina atu ai le faatoanofotane i le vaaiga a le tinā a lana tane. I isi nofoaga, e aafia tele tāuaiga i mataupu fai faaleaiga. Peitai pe o lea ea tulaga e iʻu moni i se fiafiaga? Ua silafia e Le na Foafoaina le aiga le mea e sili, ma ua ia faapea mai: “E tuua ai e le tane lona tamā ma lona tinā, a e faatasi ma lana avā.” (Kenese 2:24) O le tiute tauave mo le faia o faaiʻuga ua paʻū atu nei, e lē i luga o matua o le tane, e lē o i luga o matua o le avā, ae i luga o le tane. Fai mai le Afioga a le Atua: “O le tane o le ulu ia o le avā, pei o Keriso foi o le ulu ia o le ekalesia.” (Efeso 5:23) O le fiafiaga i le faia o mea ma lau fanau ua matutua ma a latou fanau mulimuli ane, o le a faateleina pe a i ai le faaaloaloga mo lenei fuafuaga.
FIAFIA I LE FAIA O MEA MO ISI
12. (a) A mavae ona faavaeina e a latou fanau o latou lava aiga, pe e ono faamautuina atili faapefea e matua le alofa o le tasi i le isi? (e) O ā isi mea atonu la te faia ina ia faateleina atili ai le uiga lelei o o la ola?
12 E i ai se manaoga o loo i a i tatou uma ia lagona o loo aoga tele o tatou olaga, ma o loo i ai uiga lelei. O le faamalieina o lenei manaoga e tāua tele mo lou lava olaga solo lelei. I le ese mai ai i lau fanau, o loo i ai isi e toatele e mafai ona e fesoasoani i o latou olaga ia faatumuina se manaoga. A e faapefea lau lava paaga faaipoipo? A o tutupu aʻe lau fanau, sa faaalu le tele o oulua mafaufau i a i latou. Nei la ua oulua maua le avanoa e faia ai mea mo le tasi i le isi i se auala totino. E mafai ona fesoasoani lenei mea mo le faamautuina o la oulua faiā. Peitai ai se ā e faamuta mai ai au galuega agalelei mai lou lava aiga? E mafai ona e faalautele atu i le avatuina o ni fesoasoani i tuaoi o ē mamaʻi po o lou faaaluina foi o se taimi faatasi ma e ua matutua lava ma o loo tuua na o i latou, ia po o le saunia foi o le fesoasoani i mea faitino i soo se auala e mafaia mo tagata latou te manaomia ona e lē o so latou lava faatamala. (2 Korinito 6:11, 12) Ua taʻua e le Tusi Paia Toreka o se fafine sa alofagia tele ona o “galuega lelei ma mea alofa” sa na faia mo fafine ua feoti a latou tane. (Galuega 9:36, 39) Ua avatuina le faamalo i ē agalelei atu i tagata puapuagatia. (Faataoto 14:21) Ua aofia ai i le Tusi Paia ‘le tausia o ē mātua oti ma fafine ua leai ni a latou tane i o latou puapuaga,’ ma o se vaega lea o le tapuaiga e fiafia i ai le Atua. (Iakopo 1:27) Ma ua apoapoai mai foi le Tusi Paia i a i tatou uma: “Aua le galo ia te outou ona agalelei ma alolofa atu; auā o taulaga faapena e fiafia ai le Atua.”—Eperu 13:16.
13. O le ā le mafuaaga e avea ai le fesoasoani i isi ma mea aogā?
13 Pe o lona uiga ea o le aafia atoatoa i gaoioiga faaletagata soifua o le ki lea mo le fiafiaga? O le mea moni, sei vagana o se mafuaaga faaleagaga, se faanaunauga ia faaaʻoaʻo i le Atua i le faaalia o le alofa, a lē o lena, e mafai ona taʻitaʻiina atu ai i se atuatuvalega. (1 Korinito 13: 3; Efeso 5:1, 2) Ai se ā? Auā e ono tupu mai se lē fiafia pe a lē talisapaia e tagata lou agalelei pe o lo latou taumafai foi e faamatapoto lou aao mafola.
14, 15. O le ā e faia ai le olaga ma fiafiaga moni ma le faamalie loto?
14 I le isi itu, a faaaoga moni e se tasi lona olaga i le auaunaga a le Atua, o lona faamaliega silisili e maua lea mai lona iloaina o le mea o loo ia faia e finagalo malie i ai Le na Foafoaina o ia. Ma o lona tomai e faia ai mea mo isi tagata e le faamuta mai lea i le tamaoaiga faitino. Ua i ai i a te ia “le tala lelei silisili a le Atua manuia,” o Ieova, atoa ma le faaeaga o le tufaina atu i isi. (1 Timoteo 1:11) Mai le Tusi Paia ua na iloa ai pe faapefea ona faafetaiaia faafitauli o le olaga i le taimi nei, ma po o le ā le faamoemoe matagofie o loo taofia e le Atua mo le lumanai. Ma maeu se fiafiaga o le faasoaina atu o lenei tala lelei i isi, ma faatepa atu i latou i le Puna o lea tala lelei, o Ieova le Atua! E pei ona fai mai le tusitala faagaeeina o le Salamo 147:1: “Ia outou vivii atu ia Ioa, auā e lelei ona fai pesega i lo tatou Atua; auā e matagofie, e ono lava le viiga.”
15 O lo tatou malamalama i le finagalo o Ieova i le fesootaiga ma le ola ma o lo tatou ava i a te ia o le a faatumalia ai o tatou lava olaga i uiga lelei. (Faaaliga 4:11) O le faamaliega moni o le a avea ma oe pe afai, e tusa ma le tele ua faatagaina atu e ou tulaga o i ai, o le a e auai atoatoa i le tufaina atu o upu moni mai le Tusi Paia i isi tagata. E ui lava ina atonu ua matutua lau fanau, ae e mafai ona e olioli i lou fesoasoani i ‘tamaiti faaleagaga’ ia tutupu aʻe. Ma a o e vaai atu i a i latou o tuputupu aʻe ia avea ma Kerisiano taʻumatuaina, o le a e lagona e pei ona sa i ai i le aposetolo o Paulo ina o ia tusi atu i nisi sa ia fesoasoani i ai: “Auā se a ea so matou faamoemoe, ma se fiafia, ma se pale e mitamita ai? E le o outou ea ...? Auā o outou lava o lo matou viiga ma lo matou olioli.’—1 Tesalonia 2:19, 20.
IA FETUUTUUNAI PE A SUIA TULAGA
16, 17. (a) A oo atu i faafitauli, o le ā e tatau ona alofia? (e) E tusa lava pe afai ua le iloa se paaga a se tasi i le oti, o le ā e mafai ona fesoasoani i a te ia ia aua neʻi tuua na o ia i le faafesagai ai ma luʻi fou?
16 O le mea moni e oo mai le taimi e iloa ai e le tele o tagata ua latou lē toe mafai ona faia ni mea se tele e pei ona sa mafai ona latou faia muamua. Latou te manaomia ona fetuutuunai, ia malilie e faia ni fetuutuunaiga. A i ai ni faafitauli tau i le soifua maloloina e manaomia ona tagaʻi i ai. Peitai o se tulaga poto le paleni lelei, ia le saisaitia atoatoa i nei mea ma lē taulau ai i se tasi ona vaai i avanoa ua aumai e aso taitasi o le olaga. O le a i ai pea faafitauli, ma afai e i ai se mea mautu e mafai e se tasi ona faia i ai, o se uiga poto le faia loa. Peitai e leai se mea e maua i le popole, ma o le momoo e faapea maʻimau pe a na ese tulaga o i ai o le a le suia a i latou. O lea la, na i lo le moomoo i taimi ua mavae, taofi mau i avanoa o le taimi nei.
17 E faatatau foi lea lava tulaga e tasi i tausaga mulimuli ane o le olaga, pe afai e te toe oo ina nofo fua. Afai sa i a te oe se faaipoipoga fiafia, e le taumate e pele i a te oe le toe manatua o ni taimi matagofie. Peitai e faagasolo pea le olaga, ma o le taimi lenei e manaomia ai fetuutuunaiga. E i ai luʻi fou e tatau ona faafetauia, ma afai e te ola i se auala o loo faaali mai le faatuatua i le Atua, o le a lē tuua la na o oe i le faafetauia o ia tulaga.—Salamo 37:25; Faataoto 3:5, 6.
18-20. O ā mea moni e mafai ona aumaia ai ni uiga lelei i le olaga e oo lava i tausaga o mulimuli mai?
18 E ui lava i itu faalēmanuia tau le olaga, ae o loo tele pea tulaga e mafai ona aumaia le fiafiaga i a i tatou—o uo lelei, avanoa e faia ai mea mo isi tagata, le olioli i se taumafataga manaia, se lāgoto foliga matagofie, le tausagi o manu lele. I le ma lea, e ui lava ina atonu e lē o matuā lelei tulaga o tatou i ai nei, ae ua i a i tatou le faamaoniga a le Atua o le a na aumaia le iʻuga i le amio leaga ma o le a aveeseina mai le fanau a tagata faanoanoaga uma, le atuatuvale, o faamaʻi e oo lava i le oti.—Faaaliga 21:4.
19 E moni lava o le tagata sa manatu mamafa tele i mea faitino o le olaga, atonu o le a na iloaina e gaogao tausaga mulimuli ane o lona olaga. Ua faamatalaina e le tusitala o le tusi o Failauga iʻuga o sea olaga i le faapea mai: “E matuā faatauvaa, e faatauvaa mea uma lava.” (Failauga 12:8) Peitai e uiga i tagata o le faatuatua e pei o Aperaamo ma Isaako, ua fai mai le Tusi Paia na latou taunuu i le iʻuga o o latou olaga “ua tuu tuluʻi lona ola.” (Kenese 25:8; 35:29) O le ā na faia ai se eseesega? O nei tagata sa faatuatua i le Atua. Sa latou talitonu a oo i le taimi atofaina a le Atua o le a toe ola mai ē ua feoti, ma sa latou vaavaai atu i luma i le taimi o le a faavaeina ai e le Atua lava ia le pulega fou mo le fanau uma a tagata.—Eperu 11:10, 19.
20 I lou tulaga foi, afai e te lē faatagaina faafitauli o le taimi nei e faatauasoina oe i mea lelei e tele o loo i ou tafatafa ma le lumanai ofoofogia o loo taofia e le Atua mo ana auauna, o le a i ai ni uiga lelei o lou olaga, ma i aso taitasi o le a aumaia le loto malie i a te oe, e oo atu lava i tausaga o mulimuli mai.
[Fesili mo le Suʻesuʻega]
[Ata i le itulau 176]
O le tele o le mafuta faatasi o ni ola se lua, o le tele foi lea o le avea ma tino e tasi o i laua
