Tausia pea ona Tatalaina Laina o Fesootaiga
Mataupu 11
Tausia pea ona Tatalaina Laina o Fesootaiga
1, 2. O le ā le uiga o le fesootaiga, ma ai se ā e tāua ai?
O le fesootaiga e sili atu i le na o le tautala. E pei ona faaupuina e Paulo: Afai e lē malamalama lē o faalogologo i au upu, o le mea moni, “e tautala atu outou i le gaogao.” (1 Korinito 14:9) Pe o paʻi atu ea mea o e tautala atu ai i lau fanau, ma pe o e malamalama moni i mea o loo latou taumafai e taʻu atu i a te oe?
2 Mo le fesootaiga moni, e tatau ona i ai se faaalia o ni mafaufauga, manatu ma faalogona mai le tasi mafaufau i le isi. Afai e ono mafai ona taʻua le alofa o le fatu po o le autu o le olaga fiafia i le aiga, e mafai la ona taua faapea o le fesootaiga, o lona totoola. O le lepetia i lalo o fesootaiga i le va o paaga faaipoipo o lona uiga o le a tupu mai ai se faalavelave; o le a faapena foi ona mataʻutia, pe afai e lē sili atu, pe a oo mai i le tulaga lea tau i le va o matua ma fanau.
UIA O SE UIGA O LE VAAI MAMAO
3. I le ā le vaitaimi o le olaga o se tama itiiti e ao ai i matua ona faatalitalia faafitauli i fesootaiga?
3 O le tulaga e sili ona faigata i laina o fesootaiga i le va o matua ma a latou fanau e oo mai lea, e lē i uluai tausaga o le olaga o se tama itiiti, peitai i le vaitaimi i le va o lona tama itiiti ma lona matua—tausaga “talavou.” E tatau i matua ona iloa o lea le tulaga o le a oo i ai. E lē o se manatu moni mo i latou le faatalitalia faapea, e talu ai ona faapea e lē afaina tele uluai tausaga o olaga o a latou fanau i ni faalavelave, e lē faapea ai la o le a tutusa foi ma tausaga o mulimuli mai. Ua mautinoa lava o le a oo mai faafitauli, ma o le fesootaiga lelei ma le manino e mafai ona avea ma ki mo le foia po o le faaitiitia o nei faalavelave. I le matauina o lenei mea, e manaomia ai e matua ona vaavaai atu i luma, mafaufau mamao, auā “E sili ona lelei o le iuga o se mea i lona amataga.”—Failauga 7:8.
4. Pe e tatau ea i fesootaiga uma a le aiga ona faia faatalanoaga? Faamatala.
4 E tele mea e aofia i le faavaeina, atiina aʻe ma le tausia pea o laina o fesootaiga ia faagaoioia. I le faagasologa mai o tausaga, e mafai e se tane ma lana avā ona atiina aʻe se talitonuga loloto, se faatuatuaga ma se malamalamaga tutusa ua faigofie ai ona la fesootai e tusa lava pe e leai ni upu—na o sina pupula, sina lau fofoga ataata po o na o sina paʻi atu e mafai ai ona taʻu maia ni mea e tele mo i laʻua. E tatau ona la tepa taulai atu i le atiaʻeina o lea lava faavae malosi mo fesootaiga ma la la fanau. A o lei malamalama se pepe i le tautala, e faafesootai atu e matua i a te ia faalogona o le malu puipuia ma le alofa. A o tutupu aʻe tamaiti, afai e galulue faatasi, taaalo faatasi a e sili ai le tapuai faatasi o se aiga, o lona uiga o le a faamautuina laina o fesootaiga. E ui i ia mea ae o le tausia ona tatalaina pea o laina o fesootaiga e manaomia ai taumafaiga moni ma le atamai.
UUNAIAINA LAU TAMA IA TAUTALATALA MAI
5-7. (a) Ai se ā e lelei ai i matua le faaeteete e tusa ma le taofia o se tama itiiti mai le tautala? (e) Pe e mafai faapefea ona aʻoaʻoina tamaiti, e matua, e uiga i le faaaloalo ma le manatu mo isi?
5 O le muagagana faaanamua e faapea “e tatau i tamaiti ona vaaia a e lē faalogoina.” E moni—e i ai taimi. E manaomia ai e tamaiti ona aʻoaʻoina, e pei ona fai mai le Afioga a le Atua, e i ai ‘se taimi e faalologo ai, ma le taimi e tautala ai.’ (Failauga 3:7) Peitai e matuā naunau tele tamaiti ina ia manatu atu i a i latou, ma e tatau i matua ona puipui faasaga i le faaleagaina o le faaalia ma le saoloto o manatu i se uiga e le tatau ai. Aua neʻi faatalitalia le tali atu a le tama itiiti laitiiti i mea e tutupu e faapea o le a tutusa ma se tagata matua. E vaai le tagata matua i se mea e tasi ua na o se vaega e tasi o le vaaiga lautele o le olaga. E ono mafai ona oo atu le naunau tele i le tama itiiti ma o le a faapea ai ona aafia atoatoa i ni mea o loo maua mai ai loa lava le fiafia i ai, ma ua iʻu ai ina toeitiiti lava faagaloina e ia o isi mea. Atonu o le a alu atu i le atoa se tama itiiti i le fale ma taʻu atu ma le naunau fiafia se mea na tupu i lona tamā po o lona tinā. Afai o le a momotu faafuasei e le matua le tama itiiti ma le ita “Filemu ia!” po o le faia foi o se isi faaupuga ita, e ono solipalaina le loto mu o le tama itiiti. Atonu o le tautalatala faatamaitiiti e foliga mai e leai se mea tele e taʻu mai ai. Peitai, o le faalaʻeiʻauina o faamatalaga e tutupu aʻe i le tulaga faalenatura mai lau fanau, atonu o le a e taofia ai i latou mulimuli ane i le olaga mai le taofia i a i latou lava o mea e te manao ai ma e manaomia lou iloaina.
6 O le ava ma le faaaloalo e fesoasoani mo fesootaiga lelei. E tatau i tamaiti ona aʻoaʻoina ia faaaloalo, ma e tatau i matua ona faataatia le faaaʻoaʻoga mo i latou i lo latou lava fesootaiga ma fanau faapea foi i isi auala. E tatau le aʻoaʻiga ma e ao lava ina tuuina atu pe a manaomia, e tusa lava pe oo i se tulaga mamafa. (Faataoto 3:11, 12; 15:31, 32; Tito 1:13) E ui i ia mea, afai o le a avea ma masani le vavaeeseina o le fanau, faifai pea ona faasaʻoina, po o le tulaga leaga foi o le taʻufaatauvaaina po o le tauemuina foi e se matua pe a latou tautala, atonu o le a latou tuumuli—po o lo latou o atu foi i se isi tagata pe a latou mananao e talanoa. E ui i lea, a oo ina matua se atalii po o se afafine o le a faapena foi ona moni lenei tulaga. Ai se ā e lē faia ai lenei mea—i le faaiʻuga o lenei aso, faatali ma toe autalu a oulua talanoaga ma lou atalii po o lou afafine, ma fesili i a te oe lava: Pe fia ni taimi sa ou tautala ai i ni mea e faaalia ai le talisapaia, le faalaʻeiʻau, faaviivii po o le viia? I le isi itu, pe faafia ni taimi sa ou taʻua ai ni mea e tuufaafeagai ma nei tulaga, e pei ua agaʻi atu ai e faatoilaloina o ia, lea ua pei e faaali mai ai se faagaulēmalie, le toatamai po o le ita tele? Atonu e te maofa i se mea o le a taʻu mai e lau autaluga i a te oe.—Faataoto 12:18.
7 O le onosai faamatua ma le lē gaoiā e manaomia pea. E gauai atu fanau i le faatopelau ona faia o mea. Atonu e vave tele ona tautala mai i mea o i o latou mafaufau, atonu pe o le a faasalavei ane i se talanoaga a tagata matutua. E mafai e se matua ona otegia malosi se tagata talavou. Peitai o nisi taimi atonu e sili atu ona atamai le faalogologo ma le faaaloalo, o i ina o le a aumaia ai se faaaʻoaʻoga o le lē gaoiā ma a mavae ona avatu sina tali puupuu, ia faamanatu atu ma le agalelei i le tama itiiti o le manaoga ia faaaloalo ma manatu mo isi. O i inei foi atonu o le a toe faatatauina ai le fautuaga “ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita.”—Iakopo 1:19.
8. Pe e ono mafai faapefea e matua ona faalototeleina a latou fanau e o atu i a i latou mo le taʻitaʻiga?
8 E te manao ia i ai i lau fanau le faalogona faagaeetia o le saili atu i lau taʻitaʻiga pe a i ai ni o latou faafitauli. E mafai ona e faalototeleina i latou ia faia lena mea i lou faaali atu o loo e sailia foi le taʻitaʻiga i le olaga ma e i ai se tasi o loo e vaavaai atu i ai ma le usiusitai. I le taʻua o se auala sa ia faamautuina ai se fesootaiga lelei ma lana fanau a o iti lava, sa faapea mai se tasi tamā:
“Toeitiiti lava o po uma e fai ai a matou tatalo ma le fanau i le taimi e momoe ai. O le taimi lea latou te i ai i o latou moega, ma ou te tootuli ifo i o latou tafatafa ma ou fusia i latou i ou lima. Ou te faia le tatalo ma e masani lava ona latou mulimuli mai i a te aʻu. O se masani i a i latou le feāsogi mai i a te aʻu ma faapea mai, ‘Tamā, matou te alolofa i a te oe,’ ma ua faaalia mai ai se mea i o latou fatu. I le mafanafana i lo latou moega ma le malu puipuia i lima o lo latou tamā, atonu o le a latou faamatala se faafitauli totino o loo manaomia ai se fesoasoani pe na o le faaalia foi lava o le alofa.”
I taimi o taumafataga ma isi foi taimi afai o le a lē avea au tatalo—na o se mea e masani ai—peitai ua faamamafaina, ua sau mai le fatu ma ua atagia mai ai se faiā patino moni ma Le na Foafoaina oe ma lou Tamā faalelagi, o le a mafua i lenei tulaga ona fesoasoani tele mo se va feagai ai mamā ma lau fanau.—1 Ioane 3:21; 4:17,18.
O TAUSAGA O LE SUIGA O LE OLAGA
9. O le ā e ono mafai ona taʻua e uiga i faafitauli ma manaoga o le au talavou pe a faatusatusa atu i tulaga o fanau laiti ifo?
9 O le laa mai i le tasi tulaga o le tuputupu aʻe i le isi o se taimi lea o le suiga o le olaga, o se taimi lea ua lē o toe tama itiiti ai lou atalii po o lou afafine peitai e lei oo lelei ina tagata matua. Ua i ai nei i tino faatalavou se fesuiaiga, ma o lea tulaga ua aafia ai faalogona ootia o faafitauli ma manaoga o le au talavou e ese ia mai le vaitaimi a o lei laa atu i le talavou. O le mea lea e tatau ai ona fetuutuunai lo latou tagofia o na faafitauli ma manaoga, auā o se mea e aogā mo le vaitaimi a o lei laa atu i le talavou, atonu o le a lē fetaui pea lava ma e ua oo atu i le olaga talavou. E i ai le manaoga mo le avatuina atili o ni mafuaaga, ma o lea tulaga ua valaauina ai se faateleina o fesootaiga, a e lē o le faaitiitia.
10. (a) Ai se ā ua lē lava ai faamalamalamaga faigofie e faatatau i le tulaga tau i ituaiga mo le au talavou? (e) Pe e ono mafai faapefea i matua ona oo atu i ni talanoaga ma le la tama e uiga i tulaga tau i ituaiga?
10 O faamatalaga faigofie e te avatu i lau tama laitiiti e uiga i le tulaga tau i tane ma fafine mo se faaaʻoaʻoga, o le a lē fetaui ma manaoga o ē ua talavou. Ua latou faalogoina le uunaiga faaleituaiga, peitai o le mā ua masani lava ona taofia ai i latou mai lo latou o atu i lo latou tamā po o le tinā ma ni fesili. E tatau lava i matua ona tau solomua, ae o le a lē faigofie lenei mea vagana ua latou ati aʻe ma faatumauina laina lelei o fesootaiga, ae maise lava le avea o i latou o ni uo mafana a a latou fanau, i galuega ma taaloga. O le alu ese atu o le sua o le tino mai le tama po o le maʻimāsina o le teine o le a faaitiitia lona lē lelei pe afai sa faamalamalamaina muamua. (Levitiko 15:16,17; 18:19) Atonu e laga e se tamā a o savalivali ma lona atalii le mataupu e uiga i le taalo i lona totoga sā, ma taʻua ai o le toatele o taulelea talavou ua fetaiai ma ni faafitauli tau i lenei tulaga, ma fesili ai, ‘O faapefea mai oe e tusa ai ma lenei tulaga?’ po o le ‘Pe ua e iloa ea o se faafitauli lenei i a te oe?’ E mafai lava e nisi talanoaga faaleaiga ona tagofia ai faafitauli faapena mo le au talavou, i le aofia ai uma o le tamā ma le tinā e avatuina la la fautuaga fesoasoani i se auala filemu ae e faaali saʻo atu.
MALAMALAMAGA I MANAOGA O LE AU TALAVOU
11. I ā auala ua eseese ai le au talavou mai i e matutua?
11 “O le poto o le mea sili lea, ia maua le poto; o mea uma e te maua ia maua mai ai le atamai.” (Faataoto 4:7) I le avea ma matua, ia atamai i auala o le tama itiiti, faaalia le malamalama e uiga i o latou faalogona. Aua neʻi galo i a te oe le tulaga sa e i ai a o e talavou. Ia manatua foi, a o i ai uma lava e ua matutua nei i le tulaga talavou ma latou iloa lelei le tulaga sa i ai, e leai lava se tagata talavou ua iloa le tulaga o le avea ma tagata matua. O lē ua talavou e lē toe manao e faia atu i a te ia e pei ona faia i se tama itiiti, peitai e lē o ia o se tagata matua ma e lei oo ina tutupu mai i a te ia ni faanaunauga se tele tau i tagata matutua. O loo tele pea lona taimi taalo ma e manaomia ai pea e ia se taimi.
12. Pe faapefea i le au talavou ona mananao i le auala e faia ai i latou e o latou matua?
12 E i ai ni mea faapitoa e manaomia faapitoa lava e le au talavou mai matua i lenei laasaga o le olaga. Latou te mananao ina ia malamalama e uiga i a i latou; ua sili atu lo latou mananao i lo se isi lava taimi, ina ia aloaia i latou o ni tagata taitoatasi; latou te manaomia taʻiala ma faatonuga e maumauai ma o loo amanaia lo latou tuputupu aʻe i le avea ma tagata matua, ua latou mananao tele ia faalogoina o loo manaomia i latou ma talisapaia.
13. Pe e ono tali atu faapefea tamaiti talavou i tulaga e faasaina e matua, ma ai se ā?
13 E le tatau i matua ona faateʻia talu ai le aliai mai o sina faatautee agaʻi i mea ua faasaina ai i le taimi o le talavou. Ua mafua lea ona o le agaʻi atu o le talavou i le tulaga tu toatasi o le a oo i ai mulimuli ane ma le faanaunauga masani o le faalauteleina atu o ana gaoioiga ma filifiliga. O pepe e lei mafaia se mea, latou te manaomia le tausiga tutumau faamatua, o tamaiti laiti latou te manaomia se puipuiga faaeteete, peitai a o latou matutua aʻe o le a faalauteleina foi lo latou lau fanua o galuega, ma o le a faateleina ai foi noataga ma i latou e i tala atu o le liʻo faaleaiga ma faapea ona faamalosia ai. O le tau aapa atu i le tu toatasi e ono faafaigata ai ni taualumaga ma se atalii po o se afafine. E le mafai ona faatagaina e matua la la pule ia lē amanaia pe faatoilaloina—mo le lelei o la laʻua lava fanau. Peitai la te mafai ona faafetaiaia ma le atamai ma faatumauina fesootaiga pe a la teuina i le mafaufau po o a mea ua uunaia nei amioga atonu e faalēlelei.
14. Pe e ono mafai faapefea e matua ona faafoeina ma le lelei faanaunauga o se tama itiiti mo se tu toatasi e sili atu?
14 I le fesagai ai ma le naunautai o lo la atalii po o le afafine mo le sili atu ona tu toatasi, o le ā la o le a faia e matua? O lena naunau ua pei o le sipulini o loo taofia i le lima. A faamamulu faafuasei o le a lele atu ma le masau e le mafai ona faatonutonuina i se mea e lei fuafuaina. O le taofiumiina o le a oo ina e matuā vaivai ma faavaivaia ai foi. Ae peitai a tuutuumalie atu i se auala pulea o le a iʻu ina tu i lona tulaga tatau.
15. O le ā ua faaalia ai o le tuputupu aʻe o Iesu i le tagata matua sa i lalo o le faatonutonuga faamatua?
15 Ua tatou maua se faaaʻoaʻoga o sea tuputupu aʻe agaʻi i le tu toatasi i le tulaga e uiga i a Iesu o se taulealea talavou. I tausaga a o lumanai ona laa atu i lona talavou, fai mai le faamatalaga faasolopito i le Luka 2:40: “Ua tupu le tama, ma ua malosi lona loto, ua tumu i le poto; ua ia te ia foi le alofa o le Atua.” E le taumatea e tele naunau se vaega na faia e ona matua i lona atiina aʻe, auā e ui lava ina sa lelei atoatoa o ia, ae sa lei otometi lona atamai. Sa la saunia pea tulaga faaleagaga mo lona aʻoaʻoina e pei ona faaauau ona faapea mai le faamatalaga. I le 12 o ona tausaga a o i ai le aiga i Ierusalema i le tausamiga o le Paseka, sa alu atu ai Iesu i le malumalu ma auai i ni talatalanoaga ma aʻoaʻo faalotu i ina. E manino lava sa faatagaina e matua la la tama e 12 tausaga mo ni gaoioiga saoloto. Sa la tuua Ierusalema e aunoa ma le iloaina ua la tuua o ia, ae la o, atonu pe sa manatu o loo o mai faatasi o ia ma uo ua toe taliu po o aiga foi. I le tolu aso mulimuli ane sa la maua atu o ia i le malumalu, e le faapea o tau aʻoaʻo i e matutua i a te ia, ae “o loo faalogologo ia te i latou, ma taufesili ia te i latou.” Sa faasino atu e lona tinā le mafatiaga na oo ifo i o la mafaufau ma sa tali atu Iesu ma le ava e tatau ai, faapea lava o ia ua la iloa le mea e maua ai o ia ina ua latou sauni e o. E ui lava ina sa ia faatinoina sina saolotoga e gaoioi ai, a e fai mai le tala e talu mai ona mavae o lea taimi, “ua anaana o ia ia te i laʻua,’ ma faafetaui atu o ia i a la taʻiala ma puipuiga a o ulu atu o ia i ona tausaga talavou, “Ua tupu le poto ma le tino o Iesu, ua alofagia o ia e le Atua atoa ma tagata.”—Luka 2:41-52.
16. A fetaiai matua ma faafitauli a se talavou, o le ā e tatau ona teuina i le mafaufau?
16 E faapea foi la i matua ona tatau ona tuu atu i atalii po o afafine talavou sina tu toatasi, ma faateleina mālie aʻe a o latalata atu ina tagata matutua, ma tuu atu latou te faia faaiʻuga patino i lalo o le taʻitaʻiga ma le vaaiga faamatua. A tutupu mai mea faigata, o le malamalama i le pogai o le a fesoasoani i matua ia alo ese mai le faamamafaina o nai mea laiti. O le tele o taimi ua le o fouvale ma le loto i ai se talavou faasaga i ona matua, ae o loo taumafai o ia e faatinoina sina gaoioiga tu toatasi e aunoa ma lona iloaina pe faapefea ona faia. O lea, atonu e faia e matua ni mea sese, atonu po o le faamamafaina o nei mea faatauvaa ma le sese. Afai e le mamafa tele se mataupu, ia faatuanai. Ae afai e mamafa, ia mausali. ‘Aua neʻi faapilia le namu aua foi le foloina le kamela.’—Mataio 23:24.
17. O ā mea moni e ao i matua ona faautagia pe a avatuina ni taofiofiga i fanau talavou?
17 E mafai ona fesoasoani matua i le faaauauina o se faiā matagofie ma o latou atalii ma afafine talavou i le faaalia o le paleni i tulafono ua latou tuuina atu i a i latou. Ia manatua e ui lava ina o le “poto mai lugā e muamua ona mamā,” e faapea foi ona “ganagofie” ma e “tumu i le alofa,” “e le faatagā fai.” (Iakopo 3:17) E i ai ni mea ua faaalia e le Tusi Paia e matuā lē talia lava, e aofia ai le gaoi, faitaaga, ifo i tupua ma isi sese matuiā. (1 Korinito 6:9,10) I isi mea e tele, o le saʻo po o le sese atonu e faalagolago i le telē po o le lautele ua oo atu i ai se mataupu. E lelei le mea taumafa peitai afai tatou te ʻaai tetele o le a avea tatou ma tagata ʻai faaatuatuvale. E faapena foi i nisi ituaiga o faafiafiaga e pei o siva, taaloga, faia o ni pati po o nisi tulaga faapena. O le tele o taimi e lē o le mea ua faia ae o le auala ua faia ai ma ē o loo auai. O lea, e pei lava ona tatou le taʻuleagaina le ʻai ae o le uiga moni o loo tatou manatu i ai o le ʻai faaatuatuvale po o le ʻai tele, e faapea foi i matua ona le mananao ia taʻuleagaina ni gaoioiga faaautalavou pe afai o le mea moni o tetee i ai o le soona fai anoaʻi lea pe ona o ni uiga le moomia atonu o le a ono mafai ona totolo mai i totonu.—Ia faatusatusa le Kolose 2:23.
18. Pe e ono lapataia faapefea e matua a latou fanau e uiga i a latou au mea?
18 E i ai i tagata talavou uma lava le faalogona o le manaomia o le i ai o ni uo. E toaitiiti lava nisi “e sili ona lelei o latou uiga,” peitai, pe e lē o i ai ea foi i lau fanau ni o latou uiga vaivai? Atonu e te manao e faasāina lo latou auau faatasi ma nisi talavou talu ai le iloa atonu o le a tupu mai ai se leaga tele. (Faataoto 13:20; 2 Tesalonia 3:13,14; 2 Timoteo 2:20,21) I isi atonu o le a e vaaia i a i latou ni mea e te manao i ai ma ni mea foi e te le fiafia ai. Na i lo le vavaeesea atoatoa o se tasi ona o ni tulaga lē lelei, atonu e te manao e faaalia lou talisapaia i lau fanau mo uiga lelei o a latou uo a o faasino atu foi le manaomia o le faautauta lelei i itu e vaivai ai, ma apoapoaiina ai lo lua atalii po o le afafine ia faamaonia o se malosi mo le lelei i na vaega mo le aogā tumau o le uo.
19. I le talafeagai ma le mataupu silisili o loo faataatia mai i le Luka 12:48, pe e mafai faapefea ona fesoasoani i fanau ia maua le vaaiga saʻo o le saolotoga?
19 O le tasi o auala e fesoasoani ai i le atalii po o le afafine talavou ia atiina aʻe se vaaiga saʻo agaʻi i le faateleina o le saolotoga, o le fesoasoani lea i ai ia iloa e ia o le tele o avega tauave e o mai faatasi ia ma le tele o le saolotoga. “O le ua foaiina atu i ai o mea e tele, e sueina atu foi ia te ia o mea e tele.” (Luka 12:48) O le tele o le faaali mai e le fanau o le faatuatuaina o i latou, o le tele foi lena o le tatalaina atu e matua o le faatuatuaga i a i latou.—Kalatia 5:13; 1 Peteru 2:16.
FAAOOINA ATU O LE FAUTUAGA MA LE FAASAʻOGA
20. O le ā e ese mai le malosi po o le pule i le fanau, e manaomia ia taofia ai le lepetia o fesootaiga?
20 Afai e fautuaina oe e se tasi peitai e lē malamalama i lou tulaga, o le a e manatu faapea e leai se uiga moni o lana fautuaga. Afai ua i a te ia le mana e faamalosia ai oe e mulimuli i ana poloaiga, atonu o le a e teena lea o se mea ua lē tonu. E tatau i matua ona teuina i le mafaufau “o le loto o le ua mafaufau, ua saili lea i le poto,” ma “le tagata atamai e tupu lona malosi.” (Faataoto 15:14; 24:5) Atonu ua i a te oe le malosi i luga o lau fanau, peitai afai e faamalosia i le poto ma le malamalama, o le a sili atu la ona e lelei i le fesootai ma i latou. O le lē taulau ona faaalia o le malamalama pe a faasaʻoina tagata talavou, e ono mafai ona taʻitaʻiina atu ai lea i se “va o tupulaga” atoa ma le lepetia i lalo o fesootaiga.
21. Pe e tatau faapefea i matua ona faafoeina fanau ua aafia i mea sese mataʻutia?
21 O le ā o le a ē faia pe afai o le a aafia lou tama i se tulaga faigata, faia se mea sese mataʻutia po o le faia foi o se leaga ua faateia ai oe? E le tatau lava ona e faagalogaloina le sese. (Isaia 5:20; Malaki 2:17) Peitai ia iloaina o le taimi lenei o taimi uma ua manaomia ai e lou atalii po o le afafine le fesoasoani malamalama ma le taʻitaʻiga poto. I le pei o Ieova le Atua, atonu e te ono faapea atu, ‘sau ia sei o ta faasaʻosaʻoina nei mataupu; e mataʻutia tele le tulaga ua i ai, peitai e mafaia lava ona faaleleia.’ (Isaia 1:18) O le avaavau ma le ita po o le taʻuvaleaina e ono tapunia ai fesootaiga. E toatele naunau tagata talavou ua sese o latou auala ua faapea mai: ‘E lē mafai ona ou talanoa i ou matua—auā o le a ita tele i a te aʻu.’ Ua faapea mai le Efeso 4:26: ”Afai ua e ita, aua neʻi avea le ita ma mea e taʻitaʻiina atu ai oe i le agasala.” (New English Bible) Ia taofiofi ou faalogona ootia i totonu a o e faalogologo atu i le mea o fai mai ai lou atalii po o lou afafine. Ona avea ai lea o lou faalogologo lelei ma mea e faafaigofie ai ona talia o le faasaʻoga ua e avatu.
22. Ai se ā e lē tatau ai i matua ona aumaia se manatu faapea ua la lē mafaia se mea i le la fanau?
22 Atonu ua lē na o se faatasi ae o se vaitaimi o tulaga faigata, o se ata o le faaalia mai o ni uiga le moomia. E ui lava ina ua tatau le aʻoaʻiga, e lē tatau lava i matua ona taʻu atu i upu po o le agaga e faapea ua la lē mafaia se mea i le tama itiiti. O lou onosai o le a avea lea ma fua o le loloto o lou alofa. (1 Korinito 13:4) Aua neʻi faafetauia le leaga i le leaga, peitai ia faatoilaloina i le lelei. (Roma 12:21) E na o le leaga e tupu mai pe afai o le a faalumaina se talavou i luma o isi i faamatalaga faapea e “paie” e “fouvale,” “e leai se aogā,” po o le “e lē o toe i ai se faamoemoe.” E lē uma le faamoemoe o le alofa. 1 Korinito 13:7) E ono mafai ona oo atu se talavou i le avea ma se ua lafoaiina ma iʻu ai ina tuua le aiga. E ui lava ina matuā leai se auala e talia ai sea gaoioiga, a e mafai e matua ona tatalaina pea le auala mo lona toe foi mai. E faapefea? I le faaalia la te teena, e lē o ia, ae o lona auala. E mafai pea ona la faaauau ona faaali atu i a te ia lo la talitonuga o loo i a te ia pea ni uiga lelei ma lo la faamoemoe o le a iʻu ina manumalo nei uiga lelei. Afai o le a faamaonia o lea le tulaga, o ia, o le a pei o le atalii faamaumau oa o le faataoto a Iesu, o le a mafai ona toe foi atu agaʻi i le aiga faatasi ma le faamaoniga o lona toe taliu atu ma le salamo o le a lē talituālimaina.—Luka 15:11-32.
O SE FAALOGONA O LE AOGA O TAGATA TAITOATASI
23. Ai se ā ua tāua ai mo le au talavou le lagona faapea o i latou o ni sui tāua o le aiga?
23 O tagata soifua uma lava e manaomia sina aloaia, le taliaina ma le faamaoniaina, atoa ma le lagona o loo tutusa i latou ma isi. Ina ia maua le taliaina ma le faamaoniga e manaomia, e lē mafai e se tasi ona tu toatasi naua. E tatau lava ona i ai o ia i tuaoi o amioga ua faamaonia e le vaega lea ua ia au atu i ai. O le au talavou, o loo i le taisefulu ma ona tupu o tausaga, latou te lagonaina lea manaoga o se tasi o le aiga. Fai ia lagona e i latou o nisi e tāua o le liʻo o le aiga, o loo fesoasoani i lona tulaga solo lelei, ma ia tuu atu foi i ai ia auai i nisi o fuafuaga ma faaiʻuga a le aiga.
24. O le ā e tatau ona taumamao ai matua mai le faia ina ia aua neʻi loto leaga le tasi tama itiiti i le isi tama itiiti?
24 Fai mai le aposetolo, “Aua neʻi avea i tatou ma ē mitamita vale, aua neʻi feluiai, aua neʻi felosiai.” (Kalatia 5:26) O se viiga mai se matua pe a lelei se mea ua faia e se atalii po o se afafine, o le a fesoasoani e taofiofia lea agaga mai le tuputupu aʻe; peitai o le fefaatusatusaai o se talavou i se tulaga lē lelei ma se tasi ua masani ona faasilisilia, o le a faatupuina ai se matauʻa ma le loto leaga. Fai mai le aposetolo, “A ia taitoatasi ma faamasino i lana lava galuega, ona ia te ia lea o se mea e mitamita ai ia te ia lava, a e le o se tasi.” (Kalatia 6:4) E manao le talavou ia talia o ia ona o lona lava tulaga o i ai ma mea na te mafaia ona fai, ma e tatau i matua ona alolofa i a te ia ona o ia lava mea.
25. Pe e mafai faapefea e matua ona fesoasoani i fanau ia atiina aʻe se lagona o loo aogā i latou?
25 E mafai e matua ona fesoasoani i lo la atalii po o le afafine ia atiina ae se lagona o loo aogā i le aʻoaʻoina ia tauaveina matafaioi o le olaga i matata eseese. Sa le aʻoaʻo mai la la fanau mai le pepe meamea, i le faamaoni, le moni ma le faia ma le tonu i isi; ua atiina aʻe i latou i luga o uluai faavae i le faaalia pe faapefea i nei uiga ona faatatauina i le sosaiete o le fanau a tagata. E aofia ai le tauaveina o matafaioi o se galuega ma le faatuatuaina. I le ‘tuputupu aʻe’ o Iesu ‘i le poto’ o se tagata talavou ma le manino lava sa aʻoaʻoina sana matata i tafatafa o lona tamā fai o Iosefa, auā e oo lava ina ua oo o ia i le 30 o ona tausaga ma amataina lana galuega talaʻi o le Malo, sa taʻua pea o ia e tagata faapea “o le tufuga.” (Mareko 6:3) I le vaitaimi o le talavou, ae maise lava tama, e tatau ona latou aʻoaʻoina le uiga o le galulue ma faamalieina lē e ona le galuega po o le tagata faatau, e tusa lava pe na o sina galuega faatauvaa e pei o le alu i ni feau. E mafai ona faaalia i a i latou o le maelega, ma i le avea ma tagata galue mamafa ma le faatuatuaina o le a latou maua ai le faaaloaloga i a i latou lava atoa ma le faaaloaloga ma le talisapaia mai isi; e lē gata ai o i latou o se viiga mo latou matua ma aiga a e faapea ai foi ona latou “viia ai i mea uma lava talu o i latou le mataupu a le Atua lo tatou Faaola.”—Tito 2:6-10.
26. O le ā le tū faaanamua ua faamaonia ai o se afafine sa avea ma sui tāua tele o se aiga?
26 O afafine foi e mafai ona latou aʻoaʻoina matata tau i le tausia ma le teuteuina o aiga ma maua ai le talisapaia ma le viia e lē gata i totonu a e faapea foi i fafo o le aiga. O le aogā tāua o se afafine i lona aiga ua faataʻitaʻia mai lea i faiga sa faia i taimi o le Tusi Paia i le faatatauina o se tau pe a tuuina atu se afafine i le faaipoipoga. E lē taumatea o lea lava tulaga sa manatu i ai o se totogi lea mo auaunaga o le a lē toe mauaina e le aiga.—Kenese 34:11,12; Esoto 22:16.
27. Ai se ā e tatau ai ona faaaogaina lelei avanoa tau i le aʻoaʻoina?
27 O avanoa mo aʻoaʻoga e tatau ona faaaogāina lelei ia faaauupegaina ai le au talavou mo le faafetauia o luʻitau o le olaga i lenei faiga o mea. O talavou faapenei o loo aofia i le apoapoaiga a le aposetolo “Ia aʻoaʻoina foi o latou uso ia faia e i latou galuega lelei [galuega faamaoni, New English Bible] e maua ai mea aoga, ina neʻi le fua mai i latou.”—Tito 3:14.
O LE PUIPUIGA O LE TULAFONO TAU AMIO MAMA A LE TUSI PAIA
28, 29. (a) O le ā le fautuaga ua aumaia e le Tusi Paia e uiga i au mea? (e) Pe e mafai faapefea e matua ona fesoasoani i a latou fanau ia utagia lenei fautuaga?
28 Ua malamalama lelei lava le mamafa i mafaufau o matua pe afai ona o tulaga ua i ai, atonu pe ona o le mea o latou mau ai po o aʻoga foi e o atu i ai a latou fanau, o le a faamalosia ai i latou ia auau faatasi ma nisi o le au talavou o e ua tuulafoaiina ma malaia. Atonu o le a matauina e matua le moni o le faamatalaga a le Tusi Paia o le ‘auau faatasi ma e amio leaga e leaga ai amio lelei.’ O lea o le a la lē fiafia ai e talia le faatauanau atu a le tama itiiti: ‘O le la e faia e isi tamaiti uma, ai se ā ua lē mafai ai ona ou faia e aʻu?’ Atonu e le o tagata uma o loo faia, a e tusa lava pe faia e tamaiti uma ua le lava lea mafuaaga e fai ai fua e lau tama pe afai e sese pe e lē poto. “Aua e te losilosi i tagata [po o tamaiti] leaga; aua foi e te fia toaga ia i latou. Auā ua mafaufau o latou loto i le sauaga; ua tautalatala o latou laugutu i mea e faatiga ai. Ua atiina ae le fale i le poto; a e faamausaliina i le faautauta.”—1 Korinito 15:33; Faataoto 24:1-3.
29 E le mafai ona e tosoina faatātā lau fanau i gasologa o le aʻoga po o le gasologa o le olaga. E ui i ia mea i le atiina aʻe o lou aiga i le atamai e mafai ona e auina atu ai ma i latou se faaputuga lelei o tulafono tau amio mamā ma mataupu silisili amiotonu ma le saʻo mo lo latou taʻitaʻiga. “O upu a e popoto e pei o tui ia.” (Failauga 12:10,11) I ona po anamua, o nei tui o ni laʻau uumi e maamaai pito. Sa faaaogaina e tui aʻi manu ina ia sagatonu i le mea e tatau ona agaʻi atu i ai. O upu atamai a le Atua o le a faaauau ona uunaia i tatou i le auala saʻo, ma afai tatou te sē, o le a taʻitaʻiina o tatou loto fuatia ifo ia uunaia i tatou ia suia o tatou ala. Mo le lelei tumau o lau fanau, ia auina atu lenei atamai faatasi ma i latou. Ia faaoo atu i a i latou i upu ma faaaʻoaʻoga. Faamautuina se faatulagana o mea tāua moni ma o le mea lena o le a sailia e lau fanau i isi o le a latou filifilia o ni uo totino.—Salamo 119:9,63.
30. Pe e mafai faapefea e matua ona saunia se tulafono tau amio mamā mai le Atua mo a latou fanau?
30 I nei mea uma lava, ia manatua o tulaga tāua tau amio mamā o le a sili mamao atu ona faatumauina pe a i ai se tulaga lelei i le aiga o loo faaaloalogia ai nei mataupu silisili ma mulimuli ai. Ia e i ai i uiga o loo e manao ia i ai i lau fanau. I totonu o lou lava fale, i totonu lava o le liʻo faaleaiga, ia e mautinoa ua malamalama lelei tagata matutua mai le vaaiga a lau fanau, ia alolofa, loto faamagalo, ia i ai sina saolotoga tatau ma sina tu toatasi, faatasi ai ma le faamasino tonu ma le fuafua tatau, atoa ma le faalogona o le taliaina ma le aafia ai e pei ona latou manaomia. I nei auala, taʻu atu i a i latou le tulafono tau amio mamā mai le Atua latou te o ma i latou i tala atu o le liʻo faaleaiga. E leai se tasi tofi e sili atu ona matagofie e te mafaia ona avatu mo i latou.—Faataoto 20:7.
[Fesili mo le Suʻesuʻega]
