Ua Mavae Le Aso o Le Faaipoipoga
Mataupu 3
Ua Mavae Le Aso o Le Faaipoipoga
1. Pe e mafai faapefea i le ituaiga o felagolagomaiga e pei ona faamatalaina mai i le Failauga 4:9, 10 ona aogā i le faaipoipoga a se tasi?
UA TUANAI lau faaipoipoga, ma ua nonofo nei oulua ma lau paaga o se aiga fou. Pe ua atoa ea lo lua fiafia? Ua e lē toe toatasi nei ae ua i ai sau aumea e te faatuatua i ai, e te lua au faatasi i ou fiafiaga atoa foi ma ou faafitauli. Pe ua e iloa ea ua moni le Failauga 4:9,10 i le tulaga o e i ai?—“E sili ona lelei o le toalua i le toatasi; auā ua ia te i laua le taui lelei i la la galuega. Auā afai e paū le tasi e faatuina o ia i luga e lē la te toalua; oi talofa foi i le ua toatasi pe a paū auā e leai sē la te toalua e faatu ia te ia i luga.” Pe o faasilisilia ea i lau faaipoipoga lelei ituaiga o felagolagomaiga? E masani lava ona alu ai se taimi ma se taumafaiga mo lenei tuufaatasiga fiafia o ni tagata se toalua. Peitai i le tele o faaipoipoga, e faanoanoa lava e faapea atu, ua lē taitai ona faia ai lenei taumafaiga.
2, 3. (a) O ā mea moni o le olaga e tatau ona faafesagaʻia ina ua tuanai le aso o le faaipoipoga? (e) Ai se ā ua alagā tatau ai le faatalitalia o le faia o ni fetuutuunaiga ina ua mavae ona faaipoipoina o se tasi?
2 I tala faafagogo tau le alofa, o le faafitauli, e masani lava ona faigata le aumaia ia faatasi ē ua alofa faavalea le tasi i le isi. Peitai a mavae lea ona la ola fiafia ai lava lea e faavavau. I le olaga moni, o le ola fiafia mulimuli ane, mai lea aso i lea aso ua na aumaia se luʻitau moni. A mavae fiafiaga o le aso o le faaipoipoga ona oo mai ai lea o gaoioiga o aso fai pea o le olaga; ala usu i taeao, alu e fai galuega, fai faatauga, kukaina o mea ai, fufuluina o ipu, faamamāina o le fale, ma galuega uma faapena.
3 O le va fealoaloai tau le faaipoipoga e manaomia le fetuutuunai. Na ulu atu uma i ai oulua ma ni faamoemoega ma ni mafaufauga mo le lelei atoatoa sa lei mafai ona faatinoina ma sa lē o ni mea moni. A lē taulau ni ia faamoemoega atonu o le a i ai se faalēfiafia ina ua tuanai ni nai vaiaso. Peitai, ia e manatua, ua e faia se suiga tele i lou olaga. Ua e lē o toe nofo toatasi nei po o lou mau faatasi foi ma lou aiga sa outou faatasi i aso uma ua mavae o lou olaga. Ua lua faatasi nei ma se tagata fou, lē atonu o le a e iloaina mulimuli ane ua e lē malamalama lelei i ai e pei ona sa ē manatu ai muamua. Ua fou nei lau faasologa, atonu ua fou foi lau galuega, ua ese foi lau tupe faasoasoa ma ua i ai foi uo fou ma tau-usoga e tatau ona faamasani i ai. O le manuia o lau faaipoipoga ma lou fiafia e faalagolago lea i lou loto naunau e fetuutuunai.
PE E FAIGOFIE ONA E GAUAʻI?
4. O ā mataupu silisili mai le Tusi Paia e ono mafai ona fesoasoani i se tagata faaipoipo ia faia ni fetuutuunaiga? (1 Korinito 10:24; Filipi 4:5)
4 O nisi, ona o le manatu faamaualuga, ua faigata tele ai ona gauaʻi. Peitai, e pei ona fai mai le Tusi Paia, “E muamua le faamaualuga i le malaia; e muamua foi le loto faasiasia i le pau.” O le tausisi i le loto maaa e ono tutupu mai ai mala. (Faataoto 16:18) Sa fautuaina e Iesu le tatau i se tasi ona lolo atu ma gauaʻi ina o ia fetalai afai e manao se tasi i “lou ofu tino, ia e tuu atu foi i ai ma lou ofu tele” ma afai e manao se tasi “lua te o ma ia i le maila e tasi, ina o ia oulua ma ia i maila e lua.” Na i lo le lua fefinauaʻi ma se tasi ua pele i a te oe, ua fesili mai faapea le aposetolo o Paulo: “Ai se ā e te le tuu atu ai oe e avea ma sē ua sēsē?” (Mataio 5:40, 41; 1 Korinito 6:7, NW) Afai ua mafai e Kerisiano ona laa atu i se tulaga mamao ina ia tausia le filemu ma isi, ma le mautinoa lava ua tatau i tagata e toalua ua faaipoipoina ma ua ulu le alofa, ona mafai ona fetuutuunai ina ia mafai ai ona manuia lo la faiā fou.
5. Pe e ono manatu saʻo po o le lē saʻo faapefea se tasi e uiga i lana paaga faaipoipo?
5 Ua i ai avanoa i soo se mea mo se tasi ia fiafia po o le lē fiafia foi. O lē fea o le a e nofo uta i ai? Pe o le a e taulaʻi atu ea i le tulaga e talia po o le teena? Atonu o le a manatu le avā fou: ‘Talu ai ua ma faaipoipo nei, o fea o i ai lena tagata uiga alofa sa masani ona ia aveina aʻu i nofoaga mananaia ma faaalu taimi faatasi ma aʻu? Ua lē o toe gaoioi o ia. E lē o toe manatu mamafa mai i a te aʻu. Ua lē o ia moni lava o le tagata sa ou iloaina muamua!’ Ia po o malamalama ea le avā ma talisapaia o lenei ua galue malosi le tane ina ia avea ma lē tausi lelei i lona aiga? Ma pe ua matauina ea e lenei tane fou le galue mamafa o lana avā e saunia mea ai ma faamamā mea uma, ma e i ai taimi e lē lavā ai ma ua le lava ai se taimi e faaaogaina ia taumafai ai e laufofoga fiafia? Pe ua ia fai ifo ea i a te ia lava: ‘O le ā le mea ua tupu i lena tamaitai talavou fiafia na ou faaipoipo i ai? Ua sui o ia talu nei ona ua i a te ia lana tamaloa’?
6. A matuā galulue le tane ma le avā ia manuia la la faaipoipoga, pe faapefea i lea tulaga ona aafia ai lo la faiā o le tasi i le isi?
6 E tatau i a i laʻua uma ona manatu faatagata matua ma iloa lelei e leai se taimi o soo se tasi o i laʻua uma ma se malosi e faia ai mea uma sa faia a o lei faaipoipo. O le taimi lenei e tatau ai ona faaalia le faigofie ona gauaʻi atu ma talia le tiute tauave o le faia ia solo lelei le faaipoipoga. E mafai e le tagata e toatasi ona faaleagaina le faaipoipoga, a e manaomia i laʻua uma ina ia mafai ona solo lelei le faaipoipoga. O le faia o le faaipoipoga ia solo lelei o se taumafaiga fitā. O le taumafaiga fitā o le faataunuuina lea o se mea e ui lava ina i ai ni tulaga faigata. A au faatasi oulua i lenei taumafaiga, o lona uiga ua tuuina atu se vaega o oulua taitoatasi i lenei taumafaiga. O lenei taumafaiga au faatasi atoa ma lo la sini e tasi ua na fusia faatasi oulua; ma avea ai le toalua o oulua ma tino e tasi. I le faagasologa o le taimi o le a mafai ona atiina aʻe se fusi o le alofa e sili atu i soo se mea na e faalogoina muamua a o e mafaufau e faaipoipo, ma i se fiafiaga tutusa faapenei o le a avea ma mea fiafia le fetuutuunai e tusa ma o la eseesega.
7. Afai e tatau ona faia faaiʻuga, o le ā le taimi e lelei ai ona lolo atu?
7 O le a mou atu le faamaualuga a o tuputupu aʻe le alofa, ma ua i ai se fiafiaga e lē gata i le foai atu a e faapea foi i le talia mai, ma lolo atu pe afai e leai se mataupu silisili o aafia ai, ae o ou lava manaoga totino. Atonu o le faatauina o ni mea o le fale, po o le faaaluina foi o se malologa. Pe a faaalia le naunau mo le fiafiaga o le isi o le a amata loa ona ofi atu le ulugalii i upu a le aposetolo o Paulo: “Aua neʻi taitasi ma vaavaai i ana lava mea, a ia taitasi ma vaavaai i mea a isi.”—Filipi 2:4.
O SE VAAIGA PALENI O FAIGA FAAULUGALII
8, 9. O le ā le vaaiga faale-Tusi Paia e uiga i faiga mafana a ē ua faaipoipoina?
8 Ua lē faatauvaa i le Tusi Paia feusuaiga faaulugalii. I faaupuga tau mafaufauga ua faaalia ai se faalogona maualuga e tatau i lenei tulaga ona aumaia i le tane ma le avā, ua na faamamafaina foi e tatau i faiga faaulugalii ona faamuta mai i le tane ma le avā. O lenei vaega ua maua lea i le Faataoto 5:15-21,NW:
“Ia e inu vai ai lou lava vailepa, ma vai e tafe mai ai lou lava vaieli. Pe e ao ea ona faasalalau solo ou vaipuna, ma ou vaitafe i malae? Ia fai mo oe ia vai, na o oe lava; a e aua le faatasi ma oe tagata ese. Ia manuia lou vaipuna, ma ia e fiafia i lau avā na fai a o ē taulealea. Ia pei o le aila pele o ia ma le ʻoti o le vao e matagofie; ia mālie oe i ona susu i aso uma; aua le aunoa ona e matuā fiafia i lou alofa ia te ia. Loʻu atalii e, pe se a foi le mea e te fiafia ai i le fafine ese; ma e fusi le fatafata o le fafine ese? Auā o loo i luma o fofoga o Ieova o ala o le tagata; na te fuatia foi ona ala uma.”
9 A e ui i lea, o se mea sese le soonafaia ma le faamamafaina o le feusuaiga e ulugalii seia oo atu i le tulaga ua pei ai e faalagolago le manuia o le faaipoipoga i le olaga feusuai o le ulugalii, po o faatumuina ai foi o vaivaiga mataʻutia i isi vaipanoa o lo la faiā. O le tafe mai o mataupu tau i faiga faaulugalii mai tusi, ata tifaga ma fefaatauaiga—o le tele o ia mea ua fuafuaina ia faaosofia ai tuinanauga o le alofa faavalea—ua avea ai faiga faaulugalii peiseai ua faapena lona tāua tele. Peitai ua le faapena le manatu o le Afioga a le Atua, ae ua fautuaina le lē gaoiā ma le pulea o le loto i matata uma o le olaga. E oo lava i le faaipoipoga, o le lē taofiofi e ono mafai ona taʻitaʻia atu ai i ni amioga o le a faaitiitia ai le tāua o le faiā tau le faaipoipoga.—Kalatia 5:22, 23; Eperu 13:4.
10. O ā ni mea e mafaufauina e ono mafai ona fesoasoani ai i se ulugalii faaipoipo e faia se fetuutuunaiga i faiga aiga faaleulugalii?
10 O le fetuutuunai e uiga i faiga faaulugalii e masani lava ona faigata ma atonu o le a faaaluina ai se taimi pe a uma ona faaipoipo. Ua masani ona faapena ona o le leai o se malamalama ma le lē taulau ona iloaina e le tasi o manaoga o lana paaga. O le uluai talanoa i se uo faaaloaloina ua faaipoipo e ono mafai ona fesoasoani. E lē gata ina eseese le faiga o le tane ma le fafine a e eseese foi o la faalogona. O le magafagafa e uiga i le manaoga o le fafine ia alofaina faapelepele e tāua tele. Peitai e lē tatau lava ona i ai se lagona sese faapea o le feusuaiga faaulugalii o se mea e maasiasi ai. E lē tatau foi ona avea ma taimi o ni faigā taua po o le faamalosi ai e pei ona faapena i nisi tamaloloa. “Ia avatu le tane i le avā le agalelei e tatau ai,” ua fai mai ai faapena le Tusi Paia ma “ia faapea foi le avā i le tane.” Ma i le faia faapena ua talafeagai ai le mataupu silisili faale-Tusi Paia lenei: “Aua le saili se tasi i lona lava lelei, a ia taitasi ma saili i le lelei o le isi.” Afai ua i ai le alofa faapena ma le naunau ia faamalieina itu e lua, o le a faia la se fetuutuunaiga lelei.—1 Korinito 7:3; 10:24.
LĒ MALILIE FAATASI E AUNOA MA LE FETUATUANAI
11-13. Afai e i ai eseesega o manatu, o le ā e ao ina teuina i o tatou mafaufau ina ia le oo atu le feeseeseaiga i ni maseiga mataʻutia?
11 E leai ni tagata se toalua i le lalolagi e tutusa pau. E maʻoti le eseesega o tagata taitoatasi. O lona uiga o lea mea e leai foi ni tagata se toalua e malilie faatasi i mea uma. O le tele lava o mataupu e lē tasi i ai se taofi o ni mataupu taatele, peitai o nisi o i latou e mataʻutia. E i ai aiga e vave lava ona pisapisao ona o le le tasi o se maliliega, ma o le a oo ai ina fetuleiaʻi, felafoai lima ma fetogi solo mea, o se tasi o le ulugalii atonu o le a tuua le aiga mo ni aso po o vaiaso, ia pe na ona lē fetautalatalaʻi foi o le tasi i le isi. E mafai lava ona la lē malilie faatasi i se mea e aunoa ma le faatupuina o nei mea. E faapefea? I le faafetaiaʻia o se mea autu moni faapitoa.
12 O i tatou uma lava e lē lelei atoatoa, e tofu uma ma masei, ma e ui lava ina i ai faamoemoega sili, ae ua aliali mai pea vaivaiga. Sa iloa lelei e le aposetolo o Paulo le moni o lenei mea i lenei tulaga: “Auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia.” (Roma 7:19) Ua tuu faasolo mai i a i tatou le agasala mai o tatou uluai matua. Ma ua le taea e lo tatou malosi le lelei atoatoa. O lea la “O ai ea se faapea, Ua ou faamamāina loʻu loto; ua teʻa aʻu ma aʻu agasala?—Faataoto 20:9; Salamo 51:5; Roma 5:12.
13 Ua tatou talia o tatou lava vaivaiga ma faia ni faamolemolega mo i latou. Pe e le mafai ea ona tatou talia ma faia ni faamolemolega mo a tatou paaga faaipoipo? Atonu e leai se faaletonu o lo tatou ioe faapea o tatou o tagata agasala, ae pe tatou te tau punipuni ea ma faatuatuai e ioe i se agasala faapitoa? Ma pe ua i a i tatou ea le poto e malamalama ai o lenei faatuatuai e ioe ua sese o se tulaga lava lea e i tagata, e aofia ai a tatou paaga faaipoipo, ma pe ua tatou faapalepale ea ona o ia tulaga? Ua faapea mai le faataoto faagaeeina: “O le māfaufau o le tagata e faagesegese ai lona ita; o lona viiga foi lea, ina ua le manatua lona agaleagaina.” E le taumate o oe, pei foi o le tele o isi tagata, ua au faatasi ma le mataupu silisili lenei o le “tulafono faaauro.” Sa taʻua lea e Iesu i lana Lauga taʻutaʻua i le Mauga: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.” O le toatele o tagata na ona tautala ai, a e toaitiiti lava latou te faataunuuina. O lona faaaogāina ma le naunau o le a foia ai faafitauli o le va fealoaloaʻi o tagata, e aofia ai ma tulaga faafitauli tau i le faaipoipoga.—Faataoto 19:11; Mataio 7:12.
14, 15. (a) O le ā le iʻuga e ono mafai ona oo i ai pe a faatusatusa e se tasi lana paaga faaipoipo i se uiga maulalo i se isi tagata? (e) O ā mataupu ua lē tulaga atamai ona faia i ai ni faatusatusaga i nisi taimi?
14 O i tatou uma taitoatasi e mananao ia manatu mai ma faia i a i tatou o ni tagata soifua. Afai e faatusatusaina tatou e se tagata i se isi faapea e lē lelei o tatou uiga ma e maulalo lo tatou atamai, pe faapefea ona tatou tali atu? E masani lava ona tatou lagona le tiga po o le ita. O le mea moni tatou te fai atu, ‘ae e lē o aʻu o lena tagata. O aʻu lava ia o AʻU!’ O ia faatusatusaga e masani lava ona lē faagaeetia ai se tasi, talu ai tatou te mananao ia faia mai i a i tatou i se auala malamalama.
15 Ina ia faataʻitaʻia le manatu: Pe e faaalia ea e oe le tane, le agaga faafetai mo mea taumafa ua sauniunia e lau avā, pe o e tomumu e lē lelei lana kuka e pei o lea o lou tinā? Pe faapefea ona e iloa po o le ā le lelei sa i ai le kuka o lou tinā ina ua faatoa faaipoipo o ia? Atonu pe e sili atu lau avā na i lo ia. Ia avatu i lau avā le avanoa e faamasani ai i ona tiute fou seia oo ina atamai ai. Ma o oe le avā, pe e te faameo ea e lē tutusa le tupe o loo aumaia e lau tane fou ma lea o lou tamā? O le ā le totogi sa maua e lou tamā ina ua faatoa uma ona faaipoipo? E le afaina lena tulaga. O le mea tāua o le fesoasoani o loo e avatu i lau tane. Pe e te ala aʻe e fai lana mea ʻai o le taeao a o lei usu e fai galuega, ina ia lagona ai e ia o loo e lagolagoina ma talisapaia ana taumafaiga? Pe e tauaʻi misa ea oulua ona o au tau aiga, po o le lē au faatasi foi i faiga uo e tatau ona ati aʻe, po o tafaoga foi ma faafiafiaga o le a auai? O nei tulaga atoa foi ma isi feeseeseaiga e ono tutupu mai. Pe o le a faapefea ona e faafoeina?
16. O le ā ua sese ai le mafaufauga faapea o le misa mataʻutia e fesoasoani e faaleleia ai faafitauli?
16 Ua manatu nisi tagata suesue i le mafaufau o ona po nei, e faapea, e aoga le feʻainaʻi e faaleleia ai faafitauli. Fai mai lo latou mafaufauga e ati aʻe le manatu toilalo, ma aumaia ai se malosi e mulimuli ane ona pasae lea i se misa mataʻutia. I le taugā aasa o lenei feʻainaʻiga ma le ita, o le a luai mai ai le lē malie ua leva ona taofiofia i ni faamatalaga ma ua faaalialia ai—ua faapena lenei mafaufauga. Seia oo ina tupu lenei mea, o le a taofia pea le lē malie i totonu e faavevela ma saveʻu ai, ia ona pupuna ai loa lea ma oso i tua i se taimi mulimuli ane. Peitai o loo i ai se tulaga mataʻutia tele atonu o lenei pasae aʻe o le aasa o le ita o le a faapogaia oe e tautala i ni mea e te lei mafaufauina, ma atonu foi e tutupu mai ai ni manuʻa o le a lē mafai ona togafitia. Atonu o le a e matuā faaleagaina le tasi tagata ma ua faatuina ai pa pupuni o le a le toe mafai ona e sopoia mulimuli ane. E pei ona lapatai mai le Faataoto 18:19: “O le tagata ua agaleagaina e lona uso, e sili o ia ona faigata i le ʻolo; o misa foi o uso e tusa ia ma faamaufaalava o le ʻolo.” O le fautuaga matagofie ma le mautu o loo maua i le Tusi Paia e faapea: “Ina tuu ai ia le misa, manū ua le tupu tele.”—Faataoto 17:14.
IA FETAUTALATALAI!
17. O le ā atonu e mafai ona faia ia taofia ai le tuputupu aʻe o feeseeseaiga i totonu o le tagata lava ia ma oo atu ai i se tulaga e pasae ai?
17 E sili mamao atu le talanoaina o feeseeseaiga pe a tutupu mai na i lo le faaputu i totonu i a te oe seia oo ina pasae aʻe. O le atugaluga i se mea ua sese e foliga mai i le tele o taimi ua peiseai ua leaga naua na i lo le tulaga moni o loo i ai. Ia talanoaina loa lava i le taimi nei pe ia faagaloina. Pe e na o se faamatalaga faapasi taimi? Ia, faapasi la. Pe o manaomia ai ea se talanoaina? Pe ua faia ea e lau paaga se mea e pagatia ai oe? Aua le taʻuvaleaina; ia taumafai e lagaina le mataupu i se tulaga faafesili, po o le faia foi o se manatu o le a tatalaina ai se talanoaga. Mo se faaaʻoaʻoga, atonu e te faapea atu: ‘Pele ea, o loo i ai se mea ou te le o malamalama ai. Faamata e mafai ona e fesoasoani mai i a te aʻu?’ Ona e faalogologo lea. Ia taumafai e malamalama i le manatu o le isi tagata. Ia matau lelei i le lapataiga a le Faataoto 18:13: “O le na te tali atu i le upu, a o lei faalogo i ai, e fai lea mona valea, ma mea e faamāina ai o ia.” E leai se tasi o i tatou e fiafia i ai pe a vave faia e se isi se faaiʻuga lē saʻo e uiga i a i tatou. O lea la, na i lo le taalise ona tali atu, ia taumafai e iloa le pogai po o le mafuaaga o loo i tua o se gaoioiga. Faia ia pei o le fautuaga o loo aumaia i le Faataoto 20:5 “O le atamai i le loto o le tagata, o le vai loloto lea; a o le tagata faautauta, na te utufia mai ai.”
18. O le ā atonu o le a fesoasoani i a i tatou ia aveeseina ai faalogona lē aogā?
18 Pe e te lolo atu ea i le fesuisuiai o lou mafaufau ma ou faalogona? E faigata tele ona ola faatasi ma se tagata faapena. Ua faapea mai nisi o nei tulaga e le mafai ona oo atu i ai lo tatou malosi e pulea ai, ona o loo pulea e le mafaufau. Pe moni pe sese lena manatu, ae o faalogona ua pei o se faamaʻi sosolo. Atonu pe faafiafiaina i tatou po o le faaatuatuvaleina foi e i latou o loo tatou aganuu faatasi. E mafai e musika ona faatupuina ituaiga o faalogona eseese i a i tatou. E mafai foi e ni tala ona faia lenei mea. O mafaufauga tatou te teuina i o tatou mafaufau e afaina ai le auala o le faalogona. Afai o le a mafaufau pea lava i mea lē aoga o le a tupu lou atuatuvale, i lou gaoioi ma le loto i ai o le a mafai ona faamalosi le mafaufau e manatunatu i mea aoga ma le lelei tumau. Ia mafaufau i na mea. (Filipi 4:8) Afai e faigata i a te oe lena mea, ia taumafai la se galuega toaga faaletino—fai ni galuega mamafa e pei o le lalafoina o le vao po o le fufuluina o le fola o le fale; alu e fesavaliai solo i le fanua, a e sili atu ai ona e alu e faia se galuega e fesoasoani ai i se isi tagata—soo se mea lava o le a faatosina ese atu ai lou mafaufau ma lou malosi i ai. E sili mamao atu ona lelei o le fafagaina o se faalogona lelei na i lo le tausia o se faalogona leaga. Ma o le a sili atu ai ona malie ma fiafia mo oe ae maise foi mo lau paaga!
19. Pe e tatau faapefea ona faafoeina ma le malamalama lelei e se tasi faalogona o lana paaga faaipoipo?
19 E ui i lea, e i ai taimi e tutupu mai ai ni mea o le a e matuā faanoanoa ai, po o le afaina foi o oe i se maʻi mataʻutia po o se tiga. Ia po o le tulaga e uiga i lau avā, o ona maʻi masina ma le maʻitaga e matuā suia ai le malosi o loo pulea ai neura ma faalogona o le fafine. E ono faia e se fafine lona maʻi masina e aunoa ma lona iloaina. O se mea tele lea e tatau ona teuina i le mafaufau o le tane ina ia lē oso ai i le ita ae ia faaalia e ia le malamalama lelei. I tulaga faapitoa faapenei ua tatau ai lava i a i laʻua uma le tane ma le avā ona matauina lelei le mafuaaga moni mo soo se fesuiaiga o uiga po o gaoioiga ma tali atu ai i se auala e atiina aʻe ai. “O le loto o le ua poto, e poto ai lona gutu; e faaopoopoina ai foi le poto i ona laugutu.” Ma, “O le uo moni e alofa o ia i taimi uma lava, ma o se uso ua fanaua e laveai i taimi o puapuaga.”—Faataoto 16:23; 17:17, NW.
20-22. (a) Ai se ā ia taumamao ai mai le fuā lē tatau? (e) O le ā e ono mafai ona faia ia avatu ai i le paaga faaipoipo a se tasi le faalogona saogalemu?
20 Pe e fuā lau paaga faaipoipo? E tatau i se tasi ona fuā i lona taʻu leleia ma le taʻu leleia foi o lana faaipoipoga. E pei lava ona amataina e se mea o loo latalata i fatu gaʻo le tātāina o le fatu, e faapea foi la i le fuā ona laga i se tasi le lagona e puipuia ai se mea e pele i a te ia. O le tuu faafeagai o le fuā o le faaleogalua lea, ma e lē tatau ona tatou faaleogalua i a tatou faaipoipoga.
21 Peitai e i ai foi le isi ituaiga o fuā, le fuā lea e aumaia e le tulaga lē mautū ma saogalemu ma e fafagaina e mafaufauga eseese. O le ituaiga o fuā lea na te faaliliuina atu ai le faaipoipoga ia pei o se fale puipui lē lelei o le a lē mafai ai ona ola le talitonu ma le alofa moni. “E le losilosi le alofa” i se uiga faapena, o le tele o le fuā “e pala ai ivi.”—1 Korinito 13:4; Faataoto 14:30.
22 Afai ua i ai i lau paaga se mafuaaga tatau e lagona ai se lē malu puipuia ona o le fuā, e tatau loa lava ona faateaeseina lea mafuaaga mai i a te ia. Afai e lē o i ai se mafuaaga moni, ia fai la mea uma e te mafaia e ati aʻe ai le faatuatuaga o lau paaga fuā e ala i upu ae maise ai i au gaoioiga. Ia taumafai e paʻi atu i lona fatu!
23. O le ā e tatau ona mafaufauina pe afai e manatu se tasi e sailia le fesoasoani a tagata mai fafo i le foia o faafitauli tau le faaipoipoga?
23 Pe e mafai ea e tagata mai fafo ona fesoasoani i le faaleleia o eseesega i le va o tagata faaipoipo? Atonu e mafai, ae peitai e lē tatau ona valaauina vagana ua malilie uma i ai le ulugalii. Muamua lava, “Ia fai la oulua finauga ma lē lua te tuaoi; a e aua le faaali atu le upu faalilo a le tasi tagata.” (Faataoto 25:9) E i ai se tulaga mataʻutia o le valaauina o ni isi o au aiga e fai ma faamasino. Atonu o le a faaituau. Ua faapea mai le Tusi Paia ma le atamai: “E tuua ai e le tane lona tamā ma lona tinā, a e faatasi ma lana avā.” (Kenese 2:24) Ua faatatau foi lea lava fuaitau i le avā i le va feagai ai ma ona matua ma lana tane. Na i lo le talosaga atu i matua po o tau aiga ia fesoasoani mai pe fai ma faamasino ma au ma le tasi o i laʻua faasaga i le isi, e tatau lava i le tane ma le avā ona tutu faatasi, ma iloa lelei e tasi lava o la faafitauli o loo aafia uma ai ma manaomia ai ona la foia faatasi. O le valaaulia o tagata mai fafo e aunoa ma le malie i ai o le tasi o i laʻua o le a faatauvaa ai i laʻua uma i le vaaiga a isi. Afai o le a saoloto lo lua fetautalatalai, i le faamaoni ma le alofa, o le a leai la se mafuaaga e lē mafai ai ona foia e oulua lava o oulua faafitauli. E mafai ona fesili i isi tagata taʻumatuaina mo se fautuaga, peitai o le iʻuga mulimuli e palasi tonu atu lava lea i a te oe ma lau paaga.
24, 25. O le ā e ono faia e se tasi pe afai ua faalavelave le loto faamaualuga mai le foia o se faafitauli tau le faaipoipoga?
24 “Aua le faasili le manatu o se tasi i le mea ua tatau ona manatu ai,” o le fautuaga lena a le aposetolo o Paulo. (Roma 12:3) Ona ia faaopoopo mai lea e faapea: “Ia tausolomua ona ava le tasi i le tasi.” (Roma 12:10) O nisi taimi pe afai o le a afaina lo tatou loto faamaualuga o le a fesoasoani lena e iloa moni ai ua lē matuā soona lapopoa naua i tatou. O le mea moni lava e lē telē i tatou pe a faatusatusa atu i le lalolagi, ae o le lalolagi foi ua na o sina mea itiiti i lo tatou aiga o paneta, ma e itiiti lava lea pe a faatusatusa atu i le vateatea. I le silafaga a Ieova “o atu nuu uma ua peiseai ua leai...; ua matuā leai lava i latou i lona manatu ma ua matuā faatauvaa lava.” (Isaia 40:17) O manatu faapena e fesoasoani ai ia magafagafa, ia iloa lelei ai o le a lē afāina nei mea tāua talu ai ni feeseeseaiga mulimuli ane ai.
25 O nisi foi taimi atonu e fesoasoani ni uiga malie e taofia ai tatou mai lo tatou manatu mamafa i a i tatou lava. O lou mafaia ona e ata i a te oe lava o se faailoga lea o lou tagata matua ma o le a faaleleia ai le tele o tulaga faalētonu i le olaga.
“INA LAFO IA LAU MEA E ʻAI I LUGA O LE VAI”
26, 27. O ā mataupu silisili mai le Tusi Paia e tatau ona faatatauina pe afai e lē tali atu le paaga faaipoipo a se tasi i taumafaiga ia foia ni feeseeseaiga i auala filemu, ma ai se ā?
26 A e faapefea pe afai o le a lē tali atu lau paaga i au taumafaiga ia foia ma le filemu o oulua feeseeseaiga? Ia mulimuli i le fautuaga a le Tusi Paia: “Aua le taui atu le leaga i le leaga i se tasi.” O Iesu lo tatou faaaʻoaʻo e tatau ona tatou mulimuli i ai. “O le sa agateleina, a e lei toe agatele atu.” O le faiga taatele i tagata o le taui atu lea i isi e pei ona faia mai foi i a i latou. Peitai afai o le a e uia lea auala o lona uiga ua e faatagaina isi tagata e faaliliuina oe, ma faia oe i le tulaga e i ai oe. O le mea moni, ua latou faia oe ia pei o i latou. O le faatagaina o lenei mea ia tupu o lou faafitia lea o oe lava, lou tulaga ma mataupu silisili o loo pele i a te oe. Na i lo lena, ia faataʻitaʻi i a Iesu o lē sa taofi mau ma le faamaoni i lona tulaga, sa lei mafai ona suia o ia i vaivaiga o tagata sa siomia ai o ia: “Afai e le faamaoni i tatou; e faamaoni pea lava ia, e le mafaia e ia ona faafiti ia te ia.”—Roma 12:17; 1 Peteru 2:23; 2 Timoteo 2:13.
27 Afai e lava lou malosi e taofia ai le leaga i le lelei, o le a ono mafai la ona e amataina se gasologa lelei. “O le tali filemu e liliueseina ai le ita.” (Faataoto 15:1) O le tali filemu e lē sau mai se vaivaiga a e mapuna aʻe mai le malosi, ma o le a lagonaina e lau paaga lea tulaga. Talu ai le toatele naunau o tagata latou te taui atu e pei ona faia mai i a i latou, o lou faia o se mea lelei atonu o le a liua ai le gasologa o mea mai le leaga i le lelei. E i ai ni mau ua faasino mai ai lenei mea: “O ia foi lē faasūsū i nisi, e faasūsūina lava o ia.” “Auā o le fua tou te fuaina atu ai, e fuaina mai ai ia te outou.” “Ina lafo ia lau mea e ʻai i luga o le vai; auā a mavae aso e tele e te toe maua.” (Faataoto 11:25; Luka 6:38; Failauga 11:1) Atonu e alu se taimi faatoa aliaʻi mai se seleselega lelei o lau amio lelei mai lau paaga. E le mafai ona e totoina se laau i le asō ae fua mai taeao. E ui i lea, “o le mea e luluina e le tagata, o le mea lava lea e seleseleina mai ai e ia;...Aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.”—Kalatia 6:7-9.
28. O ā nisi o mataupu silisili matagofie ua maua i le Tusi Paia i le tusi o Faataoto e mafai ona fesoasoani e ati aʻe se olaga fiafia faaipoipoina, ma e faapefea?
28 O mau nei ma ni fesili e tatau ona mafaufau i ai tagata faaipoipo:
Faataoto 14:29: “O le ua faatoatoa, e tele lona mafaufau; a o le ua itagofie, e faaeaina i luga e ia le valea.” Afai e te tuu atu i a te oe se taimi e te mafaufau ai, pe e le masani ea ona e iloa e leai lava se mafuaaga lelei e ala ai ona ita?
Faataoto 17:17: “O le ua i ai le poto, e taofia e ia ana upu; o le ua agamalu foi, o le tagata faautauta lea.” Po o oe o se tagata faautauta ma taofiofi i upu e tiga ai le loto o lau paaga?
Faataoto 25:11: “O le upu ua fai faatatauina, o moli auro ia i ato ario togitogi faamamanuina.” O le upu e saʻo i le isi taimi e ono sese mo se tasi taimi. Pe o e malamalama ea pe o le ā le upu saʻo i le taimi saʻo?
Faataoto 12:18: “O i ai le soona tautala, e pei o tutuʻi i le pelu; a o laulaufaiva o e popoto e malolo ai.” A o lei e tautala pe e te faatali ea ma mafaufau po o le ā le tulaga o le a i ai lau paaga ona o au upu po o faamatalaga?
Faataoto 10:19: “O le tele o upu e le oge solitulafono ai; a o le ua taofi ona laugutu, o le tagata poto lea.” O nisi taimi pe afai e i ai se mea tatou te lē malilie ai o le a tatou tautala ai i ni upu e sili atu na i le mea na tatou manatu i ai, ma mulimuli ane tatou te toe faanoanoa ai. Pe o e puipui ea faasaga i lenei mea?
Faataoto 20:3: “E fai ma viiga o le tagata, ina ua nofo saʻo o ia e le faamisa; a o vale uma, latou te faatuputeleina.” E tatau ona toalua ina ia faia se finauga. Pe ua lava lou tagata matua e te taofi ai mai le finau atu?
Faataoto 10:12: “O le ʻinoʻino e faatupu ai musa; a o le alofa e ufiufi ai solitulafono uma lava.” Pe o le a e faaauau ea ona e toe lagaina aʻe finauga tuai, pe ua lava lou alofa i lau paaga e te faatuatuanai ai ia tulaga?
Faataoto 14:9: “E tauemu o e valelea i le agasala; a e fealofani ē ua amio saʻo.” Pe ua e faamaualuga ea naua ua le mafai ai ona e faamatuu atu ma sailia le filemu i lau faaipoipoga?
Faataoto 26:20: “A leai se fafie, e mate ai le afi; a leai foi se faatuaupua, e mavae ai le misa.” Pe e mafai ona e taofia le finau, pe o le mea e tatau ona e faia le upu mulimuli?
Efeso 4:26: “A outou ita, aua le agasala ai; aua neʻi goto le la o ita pea outou.” Pe e te mafaufau pea i a oulua feeseeseaiga ma faaumiumia ai le tulaga faanoanoa mo oe lava ma lau paaga?
29. O ā ni mataupu faavae e tatau ona teuina i le mafaufau pe a saili ia faatumauina se faaipoipoga fiafia?
29 O le fautuaga poto faatoa aogā lava pe afai e faatinoina. Ia faaaʻoaʻo loa. Ia faapea foi ona e naunau e faataʻitaʻi fautuaga ua avatu e lau paaga. Ia vaai pe aogā. O ai o le a tuuaia pe a i ai se mea o le a sese? E lē tāua lena itu. O le mea e tāua o le mafai faapefea ona faasaʻoina mea. Ia fetuutuunai, faaali feeseeseaiga, talanoaina faafitauli ma aua e te manatu tele i a te oe lava. Ia fetalatalanoaai! Afai e te ‘alofa i lau paaga e pei o oe lava,’ e le tatau la ona faigata tele le faafetaui atu i le va fealoaloai tau le faaipoipoga ma avea ai ma faiā fiafia.—Mataio 19:19.
[Fesili mo le Suʻesuʻega]
