“Ina Neʻi Oo Mai le Faaosoosoga iā te Outou”

“Ia outou mataala ma tatalo, ina neʻi oo mai le faaosoosoga iā te outou.”—MATAIO 26:41.

O LE uluaʻi taimi lea na ia fesagaʻia ai se omiga faigatā faapea. Ua toe o se aga ona muta lea o le soifuaga faaletagata o Iesu Keriso, le Alo o le Atua. Na silafia e Iesu ua toeitiiti ona puʻea faapagota lea o ia, faasala i le oti ma tautau i se laau. Na ia silafia e so o se filifiliga ma gaoioiga na te faia, o le a aafia ai le suafa o lona Tamā. Na silafia foʻi e Iesu, o loo faalagolago iā te ia le faamoemoe o tagata mo le lumanaʻi. O le ā lana gaoioiga na faia a o fesagaʻi ma nei omiga?

² Na ō atu Iesu ma ona soo i le faatoʻaga o Ketesemane. O se nofoaga na fiafia tele i ai Iesu. Ina ua taunuu, na afio faaitiiti teisi atu Iesu mai le mea na iai ona soo. Ina ua na o ia, na ia liliu atu i lona Tamā faalelagi mo le malosi, ma sasaa atu lona loto e ala i le tatalo faatauanau—e lē na o le faatasi, ae faatolu ona tatalo. E ui ina atoatoa ona lelei, ae e leʻi manatu Iesu e faapea e mafai ona ia fesagaʻia omiga i lona lava malosi.—Mataio 26:36-44.

³ Ua tatou feagai foʻi ma omiga i aso nei. I mataupu na muamua atu o le polosiua lenei, na tatou iloiloina ai faamaoniga faapea o loo tatou ola i siʻui o lenei faiga amioleaga o mea. Ua faateteleina faaosoosoga ma omiga o le lalolagi a Satani. O filifiliga ma gaoioiga a so o se tasi o i tatou ua faapea mai e auauna i le Atua moni, e aafia ai lona suafa ma e matuā aafia ai foʻi lo tatou faamoemoe mo le ola i lana lalolagi fou. Tatou te alolofa iā Ieova. Tatou te mananaʻo e “tumau seʻia oo i le gataaga”—le gataaga o o tatou olaga po o le gataaga o lenei faiga o mea, po o fea lava e muamua mai. (Mataio 24:13) Ae e mafai faapefea ona faaauau ona tatou faanatinati ma mataala pea?

⁴ Talu ai na silafia e Iesu o le a feagai ona soo—i tuā i inā ma i aso nei—ma omiga, na ia timaʻi mai: “Ia outou mataala ma tatalo, ina neʻi oo mai le faaosoosoga iā te outou.” (Mataio 26:41) O le ā le uiga o na upu mo i tatou i aso nei? O ā faaosoosoga o e fesagaʻia? E mafai faapefea ona e “mataala”?

Faaosoosoga Ina ia Faia le Ā?

⁵ I aso faisoo, ua faaosoosoina i tatou uma ina ia lolo atu i “le mailei a le tiapolo.” (2 Timoteo 2:26) Ua lapataʻia i tatou e le Tusi Paia faapea ua avea tagata tapuaʻi a Ieova ma taulaʻiga faapitoa a Satani. (1 Peteru 5:8; Faaaliga 12:12, 17) Aiseā? E lē ina ia fano ai o tatou ola. E lē manumalo Satani pe afai e iʻu o tatou ola a o tatou faamaoni pea i le Atua. Ua iloa e Satani, o le a aveesea e Ieova i Lana taimi atofaina, le oti e ala i le toetū.—Luka 20:37, 38.

⁶ E manaʻo Satani e gausia lo tatou faamaoni i le Atua lea e sili atu ona tāua na i lo o tatou ola i le taimi nei. Ua matuā vilivilitaʻi Satani e faamaonia faapea e mafai ona ia liliueseina i tatou mai iā Ieova. O lea la, afai e mafai ona faapogaia i tatou ina ia lē faamaoni—e lē toe auai i le talaʻiga o le tala lelei pe tuulafoaʻia foʻi tapulaa faa-Kerisiano—o lona uiga ua manumalo Satani! (Efeso 6:11-13) O lea la, ua aumaia e  “lē faaosooso” iā i tatou faaosoosoga.—Mataio 4:3.

⁷ E eseese “togafiti” taufaaʻoleʻole a Satani. (Efeso 6:11) E ono faaosoosoina i tatou e Satani i le manaʻo tele i meafaitino, o le fefe, masalosalo po o le soona pupū i faafiafiaga. Ae o se tasi o ana auala e sili ona taulau manuia, o le lotovaivai. Talu ai e taufaaʻoleʻole Satani ma e suʻesuʻe avanoa, e na te iloaina e mafai ona faavaivaia i tatou ma lologofie i tofotofoga, pe a tatou lotovaivai. (Faataoto 24:10) O lea la, e na te faaosoosoina i tatou ina ia faamaamulu aemaise pe a oo iā i tatou le loto “momomo.”—Salamo 38:8.

⁸ A o tatou lalata tele atu i le iʻuga, e foliga mai ua faatupulaʻia mea e faapogaia ai le lotovaivai ma ua tatou aafia ai foʻi. (Tagaʻi i le pusa “Nisi o Māfuaaga o le Lotovaivai.”) Po o le ā lava le māfuaaga, ae e mafai ona mou atu lo tatou malosi ona o le lotovaivai. O le ‘faaaogāina o o tatou aso’ mo tiute tauave faaleagaga—e aofia ai le suʻesuʻeina o le Tusi Paia, auai i sauniga faa-Kerisiano ma le faiva i le fanua—e mafai ona avea o se luʻi pe afai ua lē lavavā o tatou tino, mafaufau ma faalogona. (Efeso 5:15, 16) Manatua foʻi, e manaʻo Lē Faaosooso ina ia tatou faamaamulu. Peitaʻi, e lē o le taimi lenei e faifai mālie ai pe mou atu lo tatou lagona e faapea ua lata mai le iʻuga! (Luka 21:34-36) E faapefea ona e teena faaosoosoga ma faaauau pea ona mataala? Ia tōmanatu i fautuaga e fā e mafai ona fesoasoani iā i tatou.

Ia Faaauau Ona “Tatalo”

⁹ Ia faalagolago iā Ieova e ala i le tatalo. Manatua foʻi le faaaʻoaʻoga a Iesu i le faatoʻaga o Ketesemane. O le ā na ia faia a o matuā mafatia o ia? Na ia liliu atu iā Ieova mo le fesoasoani, ma ona o le faatauanau o lana tatalo, na ‘pei ai lona afu o le ʻaluʻalu toto ua paʻū ifo i le eleele.’ (Luka 22:44) Seʻi mafaufau foʻi i ai. Na silafia lelei e Iesu ia Satani. Na mātauina e Iesu mai le lagi, faaosoosoga uma ua faaaogā e Satani e taumafai e maileia ai auauna a le Atua. E ui i lea, e leʻi manatu Iesu faapea e faigofie ona ia manumalo mai so o se faaosoosoga e tuuina atu e Satani iā te ia. Afai na manatu le Alo lelei atoatoa o le Atua na tatau ona ia tatalo mo le fesoasoani ma le malosi mai le Atua, e sili atu la ona manaʻomia ona tatou tatalo mo ia mea!—1 Peteru 2:21.

¹⁰ Manatua foʻi, ina ua uma ona faalaeiauina ona soo e faaauau ona “tatalo,” na fetalai Iesu e faapea: “Ua manaʻo i ai le loto, a o le tino ua vaivai.” (Mataio 26:41) O le tino o ai na fetalai i ai Iesu? E mautinoa lava e lē o lona tino talu ai e leai ni vaivaiga o lona tino lelei atoatoa. (1 Peteru 2:22) Ae e lē o le tulaga lenā na iai ona soo. Ona o le lē lelei atoatoa tuufaasolo mai ma  tuʻinanauga agasala, e tāua tele lo latou mauaina o le fesoasoani e tetee ai i faaosoosoga. (Roma 7:21-24) O le ala lea na ia faalaeiauina ai i latou atoa foʻi ma Kerisiano moni uma lava mulimuli ane ai, ina ia tatalo mo le fesoasoani pe a feagai ma faaosoosoga. (Mataio 6:13) E talia e Ieova tatalo faapena. (Salamo 65:2) E faapefea? E ala i ni auala se lua.

¹¹ Muamua lava, e fesoasoani le Atua iā i tatou ina ia tatou iloaina faaosoosoga. O faaosoosoga a Satani, e pei o ni mailei o loo taatitia solo i se ala pogisa. E ono maileia oe pe afai e te lē o iloaina atu. E ala i le Tusi Paia ma lomiga faale-Tusi Paia, ua faaalialia ai i lumāmea e Ieova mailei a Satani, ma ua mafai ai ona tatou ʻalofia le lolo atu i faaosoosoga. I le faagasologa mai o tausaga, ua faailoa mai e lē aunoa e lomiga ma polokalame o tauaofiaga ma fonotaga, ia lamatiaga e pei o le fefe i tagata, feusuaʻiga lē mamā, manaʻo tele i meafaitino ma isi faaosoosoga a Satani. (Faataoto 29:25; 1 Korinito 10:8-11; 1 Timoteo 6:9, 10) Pe tatou te lē lotofaafetai ea iā Ieova mo le faailoa mai o togafiti a Satani? (2 Korinito 2:11) O na lapataʻiga uma, o tali o au tatalo mo se fesoasoani e tetee atu ai i faaosoosoga.

¹² Lona lua, e talia e Ieova a tatou tatalo e ala i le tuuina mai o le malosi ina ia tatou feagai ai ma faaosoosoga. Ua faapea mai lana Afioga: ‘E lē tuuina atu e le Atua outou i le faaosoosoga e sili i se mea ua outou lavātia, a e sauni foʻi faatasi ma le faaosoosoga se mea e sao ai.’ (1 Korinito 10:13) Pe afai e faaauau ona tatou faalagolago i le Atua, e na te lē tuuina atu i tatou i se faaosoosoga e lē lavātia e lo tatou malosi faaleagaga. E faapefea ona ia faia ‘se mea tatou te sao ai’? E na te ‘foaʻiina mai le Agaga Paia i ē ole atu iā te ia.’ (Luka 11:13) E mafai ona fesoasoani le agaga paia iā i tatou e manatua ai mataupu silisili o le Tusi Paia, ia e faamalosia ai lo tatou naunautaʻiga e faia le mea saʻo, ma fesoasoani iā i tatou e faia ni filifiliga atamai. (Ioane 14:26; Iakopo 1:5, 6) E mafai foʻi ona fesoasoani iā i tatou e faaalia uiga manaʻomia ina ia manumalo ai mai tuʻinanauga sesē. (Kalatia 5:22, 23) E ono uunaʻia foʻi e le agaga o le Atua, uso talitonu e ‘fai ma faamatalaloto iā i tatou.’ (Kolose 4:11) Pe e te lē lotofaafetai ea ona o auala alofa ua tali mai ai Ieova i au tatalo mo le fesoasoani?

Ia Iai se Vaaiga Saʻo i Mea E te Faatalitalia

¹³ Ina ia mataala, e tatau ona iai se vaaiga saʻo i mea tatou te faatalitalia. Ona o omiga o le olaga, e iai taimi tatou te lagona uma ai le vaivai. Ae e tatau ona manatua, e leʻi folafola mai lava e le Atua e faapea tatou te saʻoloto mai faafitauli o lenei faiga tuai o mea. E oo foʻi i vaitaimi o le Tusi Paia, na fetaiaʻi auauna a le Atua ma puapuaga e aofia ai sauāga, mativa, lotomafatia ma maʻi.—Galuega 8:1; 2 Korinito 8:1, 2; 1 Tesalonia 5:14; 1 Timoteo 5:23.

¹⁴ O loo tatou feagai foʻi ma faafitauli i aso nei. Tatou te ono fesagaʻia sauāga, popolega tautupe, tauivi ma le lotomafatia, gasegase pe mafatia foʻi i isi auala. Pe afai e puipuia faavavega i tatou e Ieova mai lamatiaga uma, e maua ai e Satani se pogai e faifai ai iā Ieova. (Faataoto 27:11) E faataga e Ieova ana auauna ia faaosoosoina ma tofotofoina, ma i nisi tulaga, e oo ina maliliu ae e leʻi taitai o latou soifua ona o faiga a tagata tetee.—Ioane 16:2.

¹⁵ O le ā ua folafola mai e Ieova? E pei ona taʻua muamua, ua ia folafola mai e mafai ona ia fesoasoani iā i tatou ia lavātia so o se faaosoosoga tatou te fesagaʻia, pe afai tatou te faatuatua atoatoa iā te ia. (Faataoto 3:5, 6) E ala i lana Afioga, o lona agaga ma lana faalapotopotoga, e na te puipuia i tatou i se tulaga faaleagaga ma e mafai ai ona tausia pea la tatou faiā ma ia. E tusa lava pe tatou te feoti, ae tatou te manumalo ona o loo mausalī la tatou faiā ma  Ieova. E leai se mea e oo lava i le oti, e mafai ona taofia le Atua mai le tuuina mai o le taui i ana auauna faamaoni. (Eperu 11:6) I le lalolagi fou lea ua lata tele mai, e mautinoa o le a faataunuu e Ieova isi folafolaga matagofie uma o faamanuiaga mo ē e alolofa iā te ia.—Salamo 145:16.

Ia Manatua Finauga

¹⁶ Ina ia tumau seʻia oo i le iʻuga, e tatau ona tatou manatuaina finauga tāua ua ala ai ona faataga e le Atua le amioleaga. Pe afai e iai taimi e lofitūina ai i tatou i faafitauli ma tatou manatu ai e sili pe a lē toe auauna iā Ieova, e lelei pe a tatou manatua, sa luʻia e Satani le tonu o le pule silisili ese a Ieova. Na fesiligia foʻi e Satani le moni o le tuutoina atu ma le faamaoni o tagata tapuaʻi a le Atua. (Iopu 1:8-11; 2:3, 4) E sili atu le tāua o na finauga, ma le auala ua filifili Ieova e foʻia ai na i lo i tatou. I le ā le itu?

¹⁷ O le faatagaina e le Atua o faafitauli mo sina taimi, ua maua ai e isi le avanoa e talia ai le upu moni. Ia manatu foʻi i lenei mea: Na puapuagatia Iesu ina ia tatou maua le ola. (Ioane 3:16) Pe tatou te lē talisapaia ea lenā mea? Ae faamata tatou te lotomalilie e onosaia tulaga faigatā mo sina taimi ina ia maua ai e isi le ola? Ina ia tumau seʻia oo i le iʻuga, e tatau ona tatou iloaina e sili mamao atu le atamai o Ieova na i lo tatou. (Isaia 55:9) O le a ia faamutaina le amioleaga i le taimi pito i sili ona lelei e foʻia ai e faavavau ia finauga, ma e mo lo tatou lelei e faavavau. E mautinoa lava e leai se isi auala lelei e foʻia ai na finauga. E lē amiolētonu le Atua!—Roma 9:14-24.

“Ia Outou Faalatalata Atu i le Atua”

¹⁸ Ina ia faaauau ona tatou mataala, e tatau ona tatou faalatalata atu pea iā Ieova. Aua neʻi galo, o loo faia e Satani taumafaiga uma lava ina ia faaleagaina ai la tatou faiā lelei ma Ieova. E manaʻo Satani tatou te talitonu faapea e lē oo mai le iʻuga, ma e leai se aogā e talaʻi ai le tala lelei po o le ola foʻi e tusa ma tapulaa a le Tusi Paia. Ae o Satani, “o le pepelo ia, ma le tamā o le pepelo.” (Ioane 8:44) E tatau ona tatou naunautaʻi e “tetee atu i le tiapolo.” E lē tatau lava ona tatou manatu māmā i la tatou faiā ma Ieova. Ua pulunaunauina ma le alofa i tatou e le Tusi Paia: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:7, 8) E faapefea ona e faalatalata atili iā Ieova?

¹⁹ E tāua tele le mafaufau loloto ma le tatalo. Ia sasaa atu lou loto iā Ieova pe afai ua aliali mai ua mamafatū omiga o le olaga. Pe afai e maʻoti au tatalo, e faigofie foʻi ona e mātauina tali i au faatoga. Atonu o le tali lenā e te leʻi mafaufauina, ae afai o lou faanaunauga o le faamamaluina o le Atua ma ia tumau i le faamaoni, o le a ia saunia le fesoasoani e te moomia e tumau ai i le faamaoni. (1 Ioane 5:14) A o e mātauina lana taʻitaʻiga i lou olaga, o le a e faalatalata atili ai iā te ia. E tāua foʻi le faitau ma manatunatu loloto i uiga ma ala o Ieova e pei ona faaalia i le Tusi Paia. O le manatunatu loloto faapena, e fesoasoani iā te oe e iloa atili ai o ia; e pāʻia ai lou loto ma faatupuina lou alofa mo ia. (Salamo 19:14) O lenā alofa e lautua i mea uma, ma o le a fesoasoani iā te oe e tetee atu ai i faaosoosoga ma ia mataala.—1 Ioane 5:3.

²⁰ Ina ia faalatalata iā Ieova, e tāua foʻi ona tatou faalatalata i o tatou uso talitonu. O le a talanoaina lenā manatu i le vaega faaiʻu o lenei polosiua.

FESILI O LE SUʻESUʻEGA

• O le ā le gaoioiga na faia e Iesu a o fesagaʻi ma omiga e sili ona faigatā a o lata ina iʻu lona soifuaga, ma o le ā na ia timaʻi atu i ona soo e fai? (Pala. 1-4)

• Aiseā ua taulaʻi atu ai Satani i tagata tapuaʻi o Ieova, ma o ā auala ua ia faaosoosoina ai i tatou? (Pala. 5-8)

• Ina ia teena faaosoosoga, aiseā e tatau ai ona faaauau ona tatou tatalo (Pala. 9-12), ia iai se vaaiga saʻo i mea tatou te faatalitalia (Pala. 13-15), ia manatua finauga (Pala. 16-17), ma ‘faalatalata i le Atua’ (Pala. 18-20)?

[Pusa i le itulau 25]

Nisi o Māfuaaga o le Lotovaivai

Soifua mālōlōina po ua afu le soifua. Afai ua tatou maua i se maʻi faaumiumi pe ua faatapulaa mea e faia ona o le soifua matua, e ono maua i tatou i le lotomafatia ona ua lē mafai ona tele ni mea tatou te faia i le auaunaga i le Atua.—Eperu 6:10.

Faalogona o le lē taulau. E mafai ona faavaivaia i tatou pe a tau lē fua mai a tatou taumafaiga i le talaʻia o le Afioga a le Atua.—Faataoto 13:12.

Faalogona o le lē tāua. Ona ua autausagā o faileagaina, atonu e talitonu se tagata faapea e leai se tasi e alofa atu iā te ia, e aofia ai ma Ieova.—1 Ioane 3:19, 20.

Lagona tigā. Afai ua matuā tigā faalogona o se tasi ona o se uso talitonu, atonu e matuā mafatia ai ma manatu e lē toe auai i sauniga faa-Kerisiano po o le faiva i le fanua.—Luka 17:1.

Sauāga. O ē e lē talitonu i lou faatuatuaga, latou te ono teena, faasauā pe tauemu foʻi iā te oe.—2 Timoteo 3:12; 2 Peteru 3:3, 4.

[Ata i le itulau 26]

Na pulunaunauina i tatou e Iesu e faaauau ona “tatalo” mo le fesoasoani e feagai ai ma faaosoosoga