Le Lalolagi Fou e Pei Ona Folafola Mai e Le Atua

UA TATOU maua le faamoemoe ona o upu a le Tusi Paia, le Afioga tusia a le Atua e faapea: “E faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.”—2 Peteru 3:13.

O le ā le “lagi fou”? I le Tusi Paia, e iai le sootaga o le lagi ma pulega. (Galuega 7:49) O le “lagi fou” o se malo fou o le a puleaina le lalolagi. E fou lenā pulega auā o le a suitulaga i pulega o loo iai i le taimi nei; ma o se laasaga fou i le faataunuuga o le finagalo o le Atua. O le Malo lea na aʻoaʻoina ai i tatou e Iesu ia tatalo e oo mai. (Mataio 6:10) Talu ai o Ieova e Ana le Malo ma o loo afio o Ia i le lagi, o le ala lea ua taʻua ai o “le malo o le lagi.”—Mataio 7:21.

O le ā le “lalolagi fou”? E lē faapea o le a faia se isi lalolagi, auā o loo faamatalaina manino e le Tusi Paia faapea e aināina e faavavau lenei lalolagi. O le “lalolagi fou” e faasino atu i tagata o le a nonofo i inā. E fou lenā tulaga auā o le a aveeseina tagata amioleaga uma. (Faataoto 2:21, 22) O tagata uma o le a soifua i lenā taimi, o le a faaaloalo ma usiusitai i Lē na Faia Mea, ma ola e ōgatusa ma ana taʻiala. (Salamo 22:27) Ua valaaulia tagata o atunuu uma ina ia aʻoaʻoina na taʻiala, ma ia faaōgatusa loa o latou olaga ma na taʻiala. Po o le mea ea lenā o e faia?

I le lalolagi fou a le Atua, o le a faaaloalo tagata uma i Lana pule. Po o e usiusitai i le Atua ona o lou alofa mo ia? (1 Ioane 5:3) Po o atagia lenā mea i totonu o lou aiga? i le galuega po o le aʻoga? i lou soifuaga?

I lenā lalolagi fou, o le a autasia tagata uma i le tapuaʻiga i le Atua moni. Po o e tapuaʻi i Lē na Faia le lagi ma le lalolagi? Po o e auaufaatasi moni i le tapuaʻiga ma tagata tapuaʻi mai atunuu, ituaiga ma gagana uma?—Salamo 86:9, 10; Isaia 2:2-4; Sefanaia 3:9.

 [Pusa i le itulau 17]

O le Atua o Lē na Folafolaina Nei Mea Uma

O ia na Faia le lagi ma le lalolagi. Na taʻua o ia e Iesu o “le Atua moni e toʻatasi.”—Ioane 17:3.

O loo auauna le toʻatele o tagata i atua na latou faia. E faitau miliona tagata e ifo i faatusa e leai ni ola. O nisi latou te viiviia faalapotopotoga a tagata, filosofia faaletagata po o o latou lava tuʻinanauga. E oo lava i ē e faapea mai e talitonu i le Tusi Paia, latou te lē āva i le suafa o lē o loo taʻua e le Tusi Paia, “o ia lava le Atua.”—Teuteronome 4:35.

Na fetalai Lē na Faia Mea e faatatau iā te ia lava: “O aʻu o Ieova, o loʻu igoa lea.” (Isaia 42:5, 8) O loo tusia lenā suafa e silia i le 7,000 taimi i uluaʻi gagana o le Tusi Paia. Na aʻoaʻoina e Iesu Keriso ona soo e tatalo: “Lo matou Tamā e, o i le lagi, Ia paia lou suafa.”—Mataio 6:9.

E faapeʻī uiga o le Atua moni? Ua ia faamatalaina ia lava e faapea e “alofa mutimutivale ma le alofa fua, e telegese lona toʻasā, a e tele le alofa ma le faamaoni” ma e na te faasalaina ē e solia ma le loto i ai ana tulafono. (Esoto 34:6, 7) O ana feutagaʻiga ma tagata, ua faamaonia ai le moni o lenā faamatalaga.

E tatau ona faapaia pe faamamaluina le Atua ma lona suafa. Talu ai o Ia na Faia Mea Uma Lava ma o le Pule Silisili Ese i le Lagi ma le Lalolagi, ua alagatatau ai ona tatou usiusitai ma tapuaʻi tau lava o ia. Po o e faia lenā mea?

 [Pusa/Ata i le itulau 18]

O ā Suiga o le a Aumaia e le “Lagi Fou ma le Lalolagi Fou”?

Faaliliuina le lalolagi i se Parataiso Luka 23:43

O le a fealofani tagata uma i le Ioane 13:35;

lalolagi aoao mai so o se atunuu, Faaaliga 7:9, 10

ituaiga ma gagana

Filemu i le lalolagi aoao ma le Salamo 37:10, 11;

saogalemu moni mo tagata uma Mika 4:3, 4

Galuega faamalieloto, anoanoaʻi meataumafa Isaia 25:6; 65:17, 21-23

Soloiesea maʻi, faanoanoaga ma le oti Isaia 25:8;

Faaaliga 21:1, 4

Autasia le lalolagi aoao i le Faaaliga 15:3, 4

tapuaʻiga i le Atua moni

 [Pusa/Ata i le itulau 19]

Po o le a E Mauaina Aogā?

E lē mafai ona tala pepelo le Atua!—Tito 1:2.

Na folafola mai e le Atua: “[O] laʻu upu . . . e lē foʻi mai fua iā te aʻu; a e peitaʻi e faia le mea ou te loto i ai, e manuia foʻi i le mea ou te auina atu ai.”—Isaia 55:11.

Ua faia e Ieova “le lagi fou ma le lalolagi fou.” Ua pule mai le malo o le lagi. Ua uma foʻi ona faataatia le faavae mo “le lalolagi fou.”

Ina ua māeʻa ona faamatalaina nisi o mea matagofie o le a faia e “le lagi fou ma le lalolagi fou” mo tagata, na taʻua i le tusi o Faaaliga e faapea na fetalai le Atua lava ia o le Pule Silisili Ese i le lagi ma le lalolagi: “Faauta, ou te faia ia fou mea uma lava.” Ua fetalai mai foʻi o ia: “Ia e tusi; auā o upu nei e moni ma le faamaoni ia.”—Faaaliga 21:1, 5.

O le fesili tāua la, Po o tatou faia ea fetuutuunaʻiga manaʻomia i o tatou olaga, ina ia tatou agavaa ai e ola i “le lalolagi fou” lea e pulea e “le lagi fou”?