Na Faasaoina Ona o le Utagiaina o Lapataʻiga

NA AVATU e Iesu Keriso a o leʻi taitai lava ia lapataʻiga e faatatau i le iʻuga o le faiga o mea faa-Iutaia, lea na faaautū atu i le malumalu i Ierusalema. E leʻi taʻua e Iesu se aso e tupu ai lenā mea. Ae na ia faamatalaina mea o le a tutupu a o lumanaʻi lenā faaumatiaga. Na ia pulunaunauina ona soo e mataala ma sosola ese mai le nofoaga o le a faaumatia.

Na valoia e Iesu: “A iloa e outou ua siʻosiʻomia Ierusalema i ʻau o le taua, ia outou iloa i lea aso ua latalata lona faatafunaina.” Na fetalai foʻi o ia: “Pe a iloa foʻi e outou le mea e inosia e faatafunaina aʻi . . . ua tū i le mea paia, . . . o ē o i Iutaia i ia ona pō, ia latou sosola i mauga.” Na pulunaunau atu Iesu i ona soo e aua le toe foʻi e faasao a latou meafaitino. Na tāua tele ona latou sosola ese ina ia faasaoina ai o latou ola.—Luka 21:20, 21; Mataio 24:15, 16.

Ina ia taofia fouvalega ua loa ona iai, na taʻitaʻia ai e Sesetia Kalusi ʻautau a Roma ina ia faatoʻilalo Ierusalema i le 66 T.A. Na ia ulu atu i le aai ma siʻomiaina le malumalu. Na matuā faatumulia le aai i le atuatuvale. O ē na mataala, na latou iloaina le lata tele ane o le faaumatiaga. Ae faamata na mafai ona sosola ese? I se tulaga e leʻi faatalitalia, na toe solomuli Sesetia Kalusi ma ana ʻautau. Na tuliloa i latou e tagata fouvale a Iutaia. O le taimi tonu lenā e sosola ese ai mai Ierusalema ma Iuta!

I le tausaga na sosoo ai, na toe foʻi ane ai ʻautau a Roma i lalo o le taʻitaʻiga a Vasepasana ma lona atalii o Tito. Na aafia le atunuu atoa i taua. I le amataga o le 70 T.A., na tanu ai e tagata Roma le mea mautiʻetiʻe po o se pā e siʻo ai Ierusalema. Ua lē mafai e se tagata ona toe sola ese. (Luka 19:43, 44) I totonu o le aai, na toe fefasiotiaʻi lava vaega na feteenaʻi. O tagata na totoe, a lē fasiotia e tagata Roma po o le ave foʻi faapagota. Na faaumatia atoatoa le aai ma lona malumalu. E tusa ai o le tusitala o talafaasolopito o le uluaʻi senituri o Iosefasa, e silia i le miliona tagata Iutaia na pagatia ma maliliu ai. E leʻi toe fausiaina lava le malumalu.

Ana faapea na iai Kerisiano i Ierusalema i le 70 T.A., semanū e fasiotia i latou pe ave faapagota faatasi ma isi uma tagata. Peitaʻi, na lipotia mai e tusitala o talafaasolopito  o aso anamua faapea, na utagia e Kerisiano lapataʻiga a le Atua ma sosola ese ai mai Ierusalema ma Iuta, ae agaʻi atu i mauga i le itu i sasaʻe o le vaitafe o Ioritana. Na faamautū isi i Pela, i le itumalo o Perea. Na latou tuua Iuta ma lē toe foʻi i ai. Na faasaoina o latou soifua ona o le usiusitai i le lapataʻiga a Iesu.

Pe E te Manatu Mamafa i Lapataʻiga Mai Ē Maufaatuatuaina?

E toʻatele tagata ua manatu māmā i lapataʻiga uma ona o le lē taulau o le tele o lapataʻiga ua latou faalogo i ai. Peitaʻi ane, o le utagiaina o lapataʻiga, e ono faasaoina ai lou soifua.

I Saina i le 1975, na tuuina atu ai se lapataʻiga faapea o le a lūlū se mafuiʻe. Na sauniuni tagata o le malo. Na gaoioi foʻi tagata o le atunuu. Na faasaoina le faitau afe o soifua.

Iā Aperila 1991 i Filipaina, na lipotia e tagata o le aai i pito mauga o Pinatubo e faapea o loo alu aʻe le asu ma lefulefu mai le mauga. Ina ua iloiloina le tulaga o le mauga mo masina e lua, na lapataʻia ai e le Faalapotopotoga o Mauga Mū ma Mafuiʻe i Filipaina faapea, ua matuā lamatia lava le tulaga o iai. O le taimi lava lenā na ō ese ai le faitau afe o tagata mai le vaipanoa. I le amataga o Iuni 15, na matuā pasae aʻe ai le mauga mū ma na lafo aʻe i luga i le ʻea, le anoanoaʻi o maa ua nutipalaina ma lefulefu, ma toe paʻūʻū ifo i le laueleele. Na laveaʻiina le faitau afe o soifua ona o le utagiaina o lapataʻiga.

Ua lapataʻia e le Tusi Paia le oo mai o le iʻuga o lenei faiga o mea. O loo tatou ola nei i ona pō o le iʻuga. Po o e mataala a o latalata mai le iʻuga? Po o e faia ni gaoioiga ina ia lē faaumatia ai oe? Po o e faanatinati ea e lapataʻia isi ina ia gaoioi faapena?

[Ata i le itulau 20]

O le utagiaina o le lapataʻiga na laveaʻi ai le tele o soifua ina ua pasae aʻe le mauga mū o Pinatubo

[Ata i le itulau 21]

Na faasaoina soifua o Kerisiano o ē na utagia lapataʻiga a Iesu ina ua faaumatia Ierusalema i le 70 T.A.