‘Na Lē Ano Foʻi i Latou’

O LE faataligatuli i lapataʻiga e mafai ona oo ai i mala.

A o sauniuni atu tagata o le aai o Darwin i Ausetalia i faafiafiaga o aso mālōlō i le 1974, na tuuina atu se lapataʻiga i le latalata ane o se afā. Ae pe tusa ua 30 tausaga talu ona lē aafia le aai o Darwin i se afā. O le pogai lea o le lē manatu mamafa o le toʻatele i le lapataʻiga. Na faatoʻā manatu le toʻatele o tagata i le mataʻutia o le tulaga o iai, ina ua amata ona aveese e matagi malolosi taualuga ma puipui o fale na lalafi ai. Ina ua malama le taeao, na iloa ai ua faatamaʻia atoatoa le aai.

Na pasae aʻe se mauga mū i Colombia iā Novema 1985. Na tafe ane le palapala ona o le kiona ma le aisa ua liusuavai ma tanumia ai le silia i le toʻa 20,000 tagata i le aai o Armero. Pe e leʻi tuuina atu muamua se lapataʻiga? Sa galulu le mauga mo le tele o masina. Peitaʻi, e leʻi ano i ai le toʻatele o tagata i Armero ona ua masani i le ola i autafa o se mauga mū. Na maua e taʻitaʻi o le malo lapataʻiga faapea ua toe o se aga ona tupu lea o se mea mataʻutia, ae e itiiti mea na latou faia e lapataʻia ai tagata lautele. Na faia faasilasilaga i le leitiō e faatoʻafilemu ai tagata o le aai. Na faaaogā mea faaleotele leo i le falesā e faalaeiau ai tagata ina ia toʻafimālie. Na pasae faalua le mauga i le afiafi. Pe ana e iai, pe e te tuulafoaʻia au meatotino ma sola ese? Na toʻatele tagata e leʻi gaoioi ma na fano ai o latou soifua.

E masani lava e matuā saʻo valovaloga a tagata suʻesuʻe i maa ma le eleele, e faatatau i le vaipanoa o le a lūlū ai se mafuiʻe. Ae e seāseā mafai ona latou valoia po o le ā tonu lava le taimi e lūlū ai se mafuiʻe. I le 1999, na maliliu tagata pe tusa e 20,000 i le lalolagi aoao ona o mafuiʻe. O le toʻatele o tagata na maliliu ai, na latou manatu faapea e lē mafai ona tupu se mea faapena iā i latou.

O le ā Sau Tali i Lapataʻiga Mai i le Atua?

Ua autausagā o faamatala auiliili e le Tusi Paia mea o le a tutupu e faailoga ai aso e gata ai. E fesootaʻi atu i na faamatalaga, ua timaʻi mai le Tusi Paia iā i tatou e tōmanatu i ona “pō o Noa.” “E pei ona faia i ona pō a o leʻi oo le lolo,” na pisi tagata i mea masani o le olaga, e ui lava e lē taumatea na faapopoleina  i latou i le tele o faiga sauā. E tusa ai o le lapataʻiga na tuuina atu e le Atua e ala i lana auauna o Noa, “na lē iloa [“lē ano,” NW] foʻi e i latou ina seʻia oo le lolo, ma aveesea i latou uma.” (Mataio 24:37-39) Pe ana e iai, pe e te utagiaina le lapataʻiga? Po o e utagiaina le lapataʻiga i le taimi nei?

Ae ā pe ana faapea na e soifua i Sotoma e lata ane i le Sami Mate, i ona pō o Lota le atalii o le uso o Aperaamo? Na pei le laufanua o se parataiso. Na lelei le tulaga tau tamaoaiga o le aai. E leai se mea na faapopoleina ai tagata. “Ua latou aai, ua inu, ua faatau, ua avane e faatau, ua totō mea, ma fai fale” i ona pō o Lota. Na matuā matagā foʻi a latou amioga faaleituaiga. Pe anafai na e iai, pe e te usiusitai i le lapataʻiga a Lota faasaga i amioga leaga? Pe e te faalogo a o ia faamatalaina atu faapea ua finagalo le Atua e faaumatia le aai o Sotoma? Pe e te manatu i ai o se tala ula, e pei ona manatu i ai tane o le a faaipoipo i afafine o Lota? Pe atonu e amata ona e sola ese ae e toe faliu i tua, e pei ona sa faia e le avā a Lota? E ui lava e leʻi manatu mamafa isi i le lapataʻiga, ae i le aso na alu ese ai Lota mai Sotoma, na “to faaua mai le afi ma le teio mai le lagi, ua fano ai i latou uma.”—Luka 17:28, 29.

E toʻatele tagata e lē o ano i le lapataʻiga i o tatou aso. Ae ua tusia nei faaaʻoaʻoga i le Afioga a le Atua e fai ma lapataʻiga mo i tatou, e faalaeiau ai i tatou IA FAAAUAU ONA MATAALA!

[Pusa/Ata i le itulau 22]

Pe na Iai Moni Lava se Lolo i le Lalolagi?

E toʻatele le ʻaufaitofā e faapea mai e Leai. Ae ua faapea mai le Tusi Paia, Ioe, na iai le lolo.

Na fetalai Iesu Keriso e faatatau i le lolo, ma na soifua i le taimi na tupu ai a o silasila mai i le lagi.

[Pusa/Ata i le itulau 23]

Pe na Faaumatia Moni Lava Sotoma ma Komoro?

E lagolagoina e suʻesuʻega i toēga mea i palapala lenei mea na tupu.

O loo taʻua lenei faaumatiaga e talafaasolopito a le lalolagi.

Na faamaonia e Iesu Keriso lenā faaumatiaga, ma o loo taʻua foʻi i tusi eseese e 14 o le Tusi Paia.