O le ā Lou Lumanaʻi?

• O le toʻatele o tagata ua alu uma lo latou taimi ma le malosi i meafai o le olaga i aso faisoo, ua latou lē manatu mamafa ai i o latou lumanaʻi.

• Ua faailoa mai e le Tusi Paia mea matagofie o le a tutupu i le lumanaʻi. O loo aumaia ai foʻi se lapataʻiga e faatatau i suiga mataʻutia i faalapotopotoga a tagata i le lalolagi aoao. Ina ia tatou mauaina aogā ma ʻalofia lamatiaga, e tāua tele ona tatou gaoioi faanatinati.

• O loo iai tagata ua latou silafia mea ua fai mai ai le Tusi Paia ma taumafai e faatatauina, ae ua sesē le ala ua latou uia ona o popolega o le olaga.

• Po o e fiafia ea i le auala o loo e soifua ai i le taimi nei? A faia ni au fuafuaga, pe e te tōmanatu pe faapefea ona aafia ai ou sini i le lumanaʻi?

[Pusa/Ata i le itulau 9]

O le ā e Sili Ona Tāua iā te Oe?

Po o le ā le tāua iā te oe o mea o loo mulimuli mai? Tago e faanumera.

O le tele o mea nei e talafeagai mo le soifuaga, ae pe a faia sau filifiliga, o le ā e faatulaga muamua? lona lua? ma faaauau ai lava e oo i le lona sefulu.

․․․ Faafiafiaga

․․․ Laʻu galuega

․․․ Loʻu ola mālōlōina

․․․ Loʻu lava fiafiaga

․․․ Laʻu paaga

․․․ Oʻu mātua

․․․ Laʻu fanau

․․․ Se fale ma lavalava matagofie

․․․ Ia sili ona lelei i mea uma ou te faia

․․․ Tapuaʻiga i le Atua

 [Pusa i le itulau 10, 11]

Po o E Ausia Mea o E Manaʻo i ai e Ala i Au Filifiliga?

IA TŌMANATU I FESILI NEI

FAAFIAFIAGA: Pe e faafouina ai aʻu i faafiafiaga ou te filifilia? Po o aofia ai taaloga e lamatia ai loʻu ola pe ono faaleagaina ai loʻu tino i loʻu olaga atoa? Faamata o ni faafiafiaga e na o ni nai itula e fiafia ai ae e matuā mafatia ai le loto mo se taimi umi? E tusa foʻi pe e lelei faafiafiaga ou te filifilia, ae po ua ou faaaogāina ea le tele o le taimi i na mea ma lē lava ai se taimi mo mea e sili ona tāua?

LAʻU GALUEGA: Po o oʻu faigaluega ina ia maua ai ni tupe mo mea e moomia mo le ola, po ua alu uma loʻu taimi ma loʻu malosi i laʻu galuega? Po ua aafia loʻu ola mālōlōina ona o le tele o mea e fai ma le taimi e alu i laʻu galuega? Pe e sili iā te aʻu loʻu faigaluega ovataimi po o le faifaimea faatasi ma laʻu paaga ma laʻu fanau? Afai e manaʻo mai le pule ou te faatinoina galuega e afāina ai loʻu lotofuatiaifo pe e faalavelavea ai e lē aunoa manaʻoga faaleagaga, pe o le a ou faia ea lenā galuega ina ia ou tumau ai pea i laʻu galuega?

LOʻU OLA MĀLŌLŌINA: Pe ou te manatu māmā i ai, po o faaauau ona ou tausia lelei? Pe e faaautū atu laʻu talanoa i loʻu ola mālōlōina? Pe ou te tausia ea loʻu tino i se auala e faaalia ai loʻu manatu mamafa i loʻu aiga?

LOʻU LAVA FIAFIAGA: Po o le mea lenā ou te faamuamuaina? Pe ou te faamuamuaina loʻu fiafiaga na i lo le fiafiaga o laʻu paaga po o loʻu aiga? Po o ōgatasi le auala o loo saʻilia ai loʻu lava fiafiaga ma loʻu tulaga o sē e tapuaʻi i le Atua moni?

LAʻU PAAGA: Pe seʻiloga lava e talafeagai ma loʻu manaʻo ona ou faatoʻā ano lea i laʻu paaga? Pe ou te feagai ma laʻu paaga i se auala faaaloalo, o lē ua tatau i ai le āva ma le migao? Po o taaʻina e loʻu talitonuga i le Atua laʻu vaai agaʻi i laʻu paaga?

OʻU MĀTUA: Afai o aʻu o se talavou, po o oʻu usiusitai ea i oʻu mātua e ala i le tali atu i se auala faaaloalo, ia faia feʻau, ia taunuu i le fale i le taimi ua la faatulaga mai, ʻalofia aumea ma gaoioiga o loo la faasāina? Afai o aʻu o se tagata matua, pe ou te faalogo ma le faaaloalo i oʻu mātua ma tuuina atu iā i laʻua le fesoasoani pe a moomia? Faamata e faatonutonu e fautuaga a le Afioga a le Atua le auala ou te feagai ai ma oʻu mātua, pe e fua lava i mea e talafeagai ma aʻu?

LAʻU FANAU: Pe ou te manatu o laʻu tiute tauave le aʻoaʻoina o laʻu fanau i amioga tatau, pe ou te manatu o le tiute tauave lenā a aʻoga? Pe e sema soʻu taimi e faifaimea faatasi ai ma laʻu fanau, pe ou te manatu e tuu i ai meataalo, le TV po o se komepiuta e faaalu ai o latou taimi? Faamata ou te maumauaʻi e aʻoaʻi laʻu fanau pe a faaauau ona lē faalogo i poloaʻiga a le Atua, pe ou te faatoʻā aʻoaʻia i latou pe a ou ita?

SE FALE MA LAVALAVA MATAGOFIE: O le ā le māfuaaga ou te uaʻi atu ai i oʻu foliga vaaia ma aʻu meatotino—pe ona o le vaaiga a oʻu tuaoi iā te aʻu? pe ina ia lelei ai loʻu aiga? pe ona o aʻu o sē e tapuaʻi i le Atua?

IA SILI ONA LELEI I MEA UMA OU TE FAIA: Pe ou te manatu e tāua le faia lelei o mea? Pe ou te tauivi ina ia ou sili i mea ou te faia? Pe e faapopoleina aʻu pe a sili atu mea e faia e se isi tagata?

TAPUAʻIGA I LE ATUA: Pe e sili atu ona tāua iā te aʻu le faamalieina o le finagalo o le Atua na i lo le faamalieina o laʻu paaga, laʻu fanau, oʻu mātua po o loʻu pule i le galuega? Pe ou te lotomalie e faatulaga lua le auaunaga a le Atua ina ia tausisia ai se olaga sologa lelei?

 IA MANATUNATU LELEI I FAUTUAGA A LE TUSI PAIA

O le ā le tāua o le tapuaʻiga i le Atua i lou olaga?

Failauga 12:13: “Ia e mataʻu i le Atua, ma e anaana i ana poloaʻiga; auā o mea ia e tatau i tagata uma.”

FESILI IFO IĀ TE OE LAVA: Po o faaalia ea i loʻu olaga e faapea ou te manatu i mea e pei ona taʻua ai i le Failauga 12:13? Pe e aafia oʻu tiute tauave i le aiga, galuega po o le aʻoga i loʻu usitai i tulafono a le Atua? Po o alu uma loʻu taimi i isi manaʻoga po o popolega ae faamulimuli ai le auaunaga i le Atua?

E faapeʻī la oulua faiā ma le Atua?

Faataoto 3:5, 6: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”

Mataio 4:10: “E te ifo atu i le Alii lou Atua, ua na o ia lava e te auauna i ai.”

FESILI IFO IĀ TE OE LAVA: Faamata o oʻu faalogona na e faatatau i le Atua? Po o oʻu faaalia lenā faatuatua ma le tuutoina atu i le Atua i mea ou te faia i aso faisoo, ma le auala ou te feagai ai ma tulaga faigatā?

O le ā le tāua iā te oe o le faitauina ma le suʻesuʻeina o le Tusi Paia?

Ioane 17:3: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.”

FESILI IFO IĀ TE OE LAVA: Po o oʻu faaalia ea ou te talitonu moni i lenā mau e ala i loʻu faatāuaina o le faitauina ma le mafaufau loloto i le Afioga a le Atua?

O le ā le tāua iā te oe o le auai i sauniga a le faapotopotoga Kerisiano?

Eperu 10:24, 25: “Ia tatou manatunatu foʻi le tasi i le tasi, ina ia taufaatupu ai le alofa ma galuega lelei; aua le lafoaʻiina le faapotopotoina o i tatou, . . . ia atili ai foʻi ona faapea ina ua outou iloa o le Aso o loo taulata mai.”

Salamo 122:1: “Na ou fiafia ina ua latou fai mai iā te aʻu, Tatou te ō i le fale o Ieova.”

FESILI IFO IĀ TE OE LAVA: Pe e atagia atu i loʻu olaga e faapea ou te talisapaia le poloaʻiga lenei a le Afioga a le Atua? I le masina ua teʻa, pe na ou misia se sauniga faa-Kerisiano talu ai ua ou faamuamuaina se isi mea?

Po o e maelega e talanoa atu i isi e uiga i le Atua ma ana fuafuaga?

Mataio 24:14: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”

Mataio 28:19, 20: “O lenei, ia outou ō atu e fai nuu uma lava ma soo, . . . ia outou aʻoaʻo atu iā te i latou ia tausi i mea uma ua ou fai atu ai iā te outou.”

Salamo 96:2: “Ia outou pepese atu iā Ieova, ia outou faafetaia lona suafa; ia outou talaʻi atu lana faaolataga i lea aso ma lea aso.”

FESILI IFO IĀ TE OE LAVA: Po o oʻu faatāuaina moni lenei galuega i loʻu olaga? Po o atagia atu i aʻu taumafaiga i lenei galuega, loʻu talitonuga i le mataʻutia o le taimi o loo tatou ola ai?