O le ā le Lumanaʻi o Lenei Lalolagi?

O faafitauli tugā ma mea mataʻutia e tutupu, ua avea ma tala masani i aso faisoo i le lalolagi aoao! O le ā le uiga o nei mea?

SAOGALEMU O LE TAGATA LAVA IA: Na pāpā ni pomu i maketi. Tafanaina faiaʻoga ma tamaiti aʻoga i le aʻoga. Gaoia pepe ae lē iloa e mātua. Osofaʻia fafine ma tamā matutua ma gaoia a latou mea i le ao teatea.

TULAGA O TAPUAʻIGA: Lagolagoina e lotu vaegaau i taua. Tuuaʻia taʻitaʻi lotu i fasiotiga tagata o ituaiga. Faia e patele feusuaʻiga ma tamaiti; nanā e le lotu. Faaitiitia ē e auai i lotu; faatauina atu falesā.

LE SIʻOSIʻOMAGA: Tāina i lalo vaomatua ona o faiga faapisinisi. Tuu i lalo e tagata matitiva laau uma mo ni fafie e fai ai a latou afi. Faapolusioneina le vai i le eleele, lē saogalemu mo le taumafa. Faaleagaina faiga faiva ona o nisi o faiga faaonapōnei atoa ma lapisi ua lafo i vaitafe ma le sami e falegaosimea. Momole tagata ona ua faaleagaina le ʻea.

 TAU O LE SOIFUAGA: E itiiti tupe maua e tagata taʻitoʻatasi o loo nonofo i Aferika i saute o le toafa o le Sahara i tausaga taʻitasi. Gau pisinisi ona o le matapeʻapeʻa o faatonusili, ma ua leai ni galuega o le faitau afe o tagata. Leiloloa faaputuga tupe a nisi ua teuina i kamupani tetele ona o faiga faagaoi.

LĒ LAVA MEATAUMAFA: Pe tusa ma le 800,000,000 tagata i le lalolagi aoao o loo galala i le fia taumafa.

TAUA: E silia i le 100,000,000 tagata ua maliliu ona o taua o le senituri lona 20. Ua lava meatau faaniukilia e matuā faaumatia ai le lalolagi aoao. Taua i le va o tagata o atunuu. Faatumulia le lalolagi aoao i faiga faatupu faalavelave.

FAAMAʻI: E toʻa 21,000,000 ē na maliliu i le fulū Sepania e amata mai i le 1918. Ua avea le faamaʻi oti o le AIDS ma “mala e sili ona mataʻutia i le talafaasolopito o tagata.” Pagatia le lalolagi aoao ona o le kanesa ma le maʻi fatu.

Ia mafaufau i tala fou taʻitasi. Pe e na o ni mea e seāseā tutupu? Po o avea ma vaega tāua o se faailoga o mea e tutupu i le lalolagi aoao?

 [Pusa/Ata i le itulau 5]

Po o Silasila Alofa Mai le Atua?

Ona o le atuatuvale i mea mataʻutia e tutupu po o le matuā mafatia o le tagata lava ia, e toʻatele ua tōmanatu i le māfuaaga ua lē faalaa mai ai le Atua e taofia na mea.

O loo silasila alofa mai le Atua. Ua ia saunia taʻiala aogā ma le mapusaga i aso nei. (Mataio 11:28-30; 2 Timoteo 3:16, 17) Ua ia saunia le faavae e faamuta ai e faavavau faiga sauā, maʻi ma le oti. Ua faaalia e ana sauniuniga e faapea, o loo ia silasila alofa mai i tagata o atunuu uma, ituaiga ma gagana.—Galuega 10:34, 35.

O le ā le tele o lo tatou alofa i le Atua? Pe e te silafia Lē na Faia le lagi ma le lalolagi? O ai lona suafa? O le ā lana fuafuaga? Ua ia taliina fesili nei i le Tusi Paia. Ua ia faailoa mai e ala i le Tusi Paia, laasaga ua ia faia ina ia tafiesea ai faiga sauā, maʻi ma le oti. Ina ia aogā iā i tatou sauniuniga a le Atua, o le ā e manaʻomia mai iā i tatou? E manaʻomia ona tatou aʻoaʻo e faatatau iā te ia ma lana fuafuaga. E lē mafai ona tatou mauaina aogā mai ana sauniuniga seʻi vaganā ua tatou faatuatua iā te ia. (Ioane 3:16; Eperu 11:6) E tatau foʻi ona usiusitai i ana poloaʻiga. (1 Ioane 5:3) Pe e te alofa ea i le Atua ma e naunau e faia na mea?

Ina ia malamalama i le māfuaaga ua faataga ai e le Atua tulaga e pei ona iai i aso nei, e tatau ona tatou malamalama i se finauga tāua. Ua fesoasoani mai le Tusi Paia i lenei itu. O loo faamalamalamaina lenei finauga i le itulau e 15 o le lomiga lenei.