O le ā le Uiga o ia Mea Uma?

NA FETALAI Iesu Keriso: O le a faailogaina “le gataaga o le lalolagi” i taua, oge, faamaʻi ma mafuiʻe.—Mataio 24:1-8; Luka 21:10, 11.

Talu mai le 1914, ua faaleagaina soifua o tagata i taua i va o atunuu po o ituaiga, lea e masani ona māfua ona o aafiaga faapolotiki mai taʻitaʻi lotu ma osofaʻiga faatupu faalavelave i aso nei.

E ui i le faaleleia o le saunia o meataumafa, ae e faitau miliona tagata i le lalolagi aoao o loo matuā galala mo le fia taumafa. Ua maliliu le faitau miliona o tagata i tausaga taʻitasi ona o oge.

O faamaʻi, o se tasi lenā o vaega o le faailoga na taʻua e Iesu. Ina ua uma le Taua Muamua a le Lalolagi, e silia i le 21,000,000 tagata na maliliu i se fulū pipisi. Na aafia ai atunuu i le lalolagi atoa ma motu tumamao, e lē pei o aso muamua atu lea na aafia na o ni nai vaipanoa i faamaʻi. Ua matuā salalau atu le faamaʻi oti o le AIDS i le lalolagi aoao ma o loo faaauau pea ona aafia atunuu tauatiaʻe i le fatafata vaivai, malalia, taifoi ma le dengue fiva.

Ua lipotia i tausaga taʻitasi le faitau afe o mafuiʻe e eseese uma o latou malosi. E ui lava i meafaigaluega ma le faaleleia o le lipotia o mafuiʻe, ae ua masani ona taʻua e tala fou tulaga mataʻutia i nofoaga e tumutumu ai tagata ona o mafuiʻe.

Na valoia foʻi e le Tusi Paia: “A e ia e iloa e oe lenei mea, o ona aso e gata ai e oo mai ai aso faigatā. Auā e avea tagata ma ē alolofa i latou iā i latou, o ē mananaʻo i tupe, o ē loto vii, o ē faamaualuga, o ē upu leaga, o ē lē faalogo i mātua, o ē lē faafetai, o ē amio leaga, o ē lē lotoaiga, o ē lē ma faaleleia, o ē faatuaupua, o ē lē taofi manaʻo o le tino, o ē faasauā, o ē ʻinoʻino i le amio lelei, o ē faalata, o ē soona fai, o ē ua faafefeteina, o ē ua tele le manaʻo i mea faafiafia a e leai se manaʻo i le Atua; o ē ua peiseaʻī ua toʻaga i lotu, a o le mana ua i lea mea ua latou teena; ia e ʻalo ese lava i tagata faapena.”—2 Timoteo 3:1-5.

Pe e te lē ioe o loo tatou ola i “aso faigatā”?

Po ua e mātauina ea, ua mātele ina avea tagata ma ē alolofa iā i latou lava, o ē mananaʻo i tupe ma ē faamaualuluga?

Ua ioe tagata i le manatu e faapea ua faatumulia le lalolagi i tagata tagisā ae lē loto faafetai, o ē lē ma faaleleia ma ē amio leaga.

Po ua e silafia ea ua matuā faatupulaʻia le lē faalogo i mātua ma le leai o se lotoaiga, e lē gata i na o ni nai vaipanoa a o le lalolagi aoao foʻi?

 E lē taumatea ua e mātauina o loo tatou ola i se lalolagi ua matuā pupū i le manaʻo i mea faafiafia ae lē fiafia i le amio lelei. O le auala lenā ua faamatalaina ai e le Tusi Paia amioga o le a taatele i “aso e gata ai.”

Pe e manaʻomia ni faamaoniga faaopoopo e iloa tonu ai le taimi o loo tatou ola ai? Na valoia foʻi e Iesu, a o faagasolo lenā lava taimi, o le a talaʻiina atu le tala lelei o le Malo o le Atua i le atulaulau uma. (Mataio 24:14) Po ua faataunuuina lenā mea?

Ua sili atu ona tele gagana ua lomia ai Le Olomatamata na i lo se isi lava mekasini, ma o se lomiga faale-Tusi Paia ua taulaʻi atu i le faasilasilaina o le tala lelei o le Malo o Ieova.

Ua silia i le tasi le piliona itula ua molimau atu ai Molimau a Ieova e uiga i le Malo o le Atua i tausaga taʻitasi.

 Ua latou lomiaina lomiga faale-Tusi Paia i le taimi nei i gagana pe tusa e 400, e oo lava i gagana a tagata o ē nonofo i nuu maotua ma vaega toʻalaiti. Ua folafolaina e Molimau a Ieova le tala lelei i atunuu uma; ua latou talaʻi foʻi i le tele o motu ma teritori e lē o amanaʻiaina i faiga faaupufai a le lalolagi. I le tele o atunuu, ua latou faatinoina e lē aunoa se polokalame o aʻoaʻoga faale-Tusi Paia.

O le mea moni, ua talaʻina atu le tala lelei o le Malo o le Atua i le atulaulau uma e fai ma molimau i nuu uma, ae e lē faapea ina ia liulotu ai le lalolagi aoao. Ua tuuina atu i tagata i so o se vaipanoa, le avanoa e faaalia ai pe latou te alolofa i lē na faia le lagi ma le lalolagi, ma pe latou te faaaloalo i ana tulafono ma alolofa i o latou tuaoi.—Luka 10:25-27; Faaaliga 4:11.

Ua toe o se aga ona faamamāina lea e le Malo o le Atua le lalolagi mai amioga leaga uma ma avea o se parataiso.—Luka 23:43.

[Pusa i le itulau 6]

O Aso e Gata ai mo le Ā?

E lē o aso e gata ai mo le fanau a tagata. O loo folafola mai e le Tusi Paia le faamoemoe o le ola e faavavau mo ē uma e faia le finagalo o le Atua.—Ioane 3:16, 36; 1 Ioane 2:17.

E lē o aso e gata ai mo le lalolagi po o le laueleele. Ua folafola mai e le Afioga a le Atua, o le a tumau e faavavau le lalolagi o loo aināina e tagata.—Salamo 37:29; 104:5; Isaia 45:18.

Na i lo lea, o aso e gata ai mo lenei faiga sauā o mea e leai se alofa, ma ē e piiama atu i ona ala.—Faataoto 2:21, 22.

[Pusa/Ata i le itulau 7]

Po o le Tusi Paia o le Afioga Moni Lenā a le Atua?

E tele taimi na tusi ai perofeta o le Tusi Paia e faapea: “O loo faapea ona fetalai mai o Ieova.” (Isaia 43:14; Ieremia 2:2) Na faamatilatila foʻi e le Alo o le Atua o Iesu Keriso, ‘e leʻi tautala fua na o ia.’ (Ioane 14:10) E manino upu a le Tusi Paia lava ia: “O tusi paia uma lava e mai le Agaga o le Atua.”—2 Timoteo 3:16.

E leai se isi tusi ua lomiaina i le tele o gagana—ua silia i le 2,200 gagana e pei ona lipotia e le Faalapotopotoga Autasi o le Tusi Paia. E leai se isi tusi ua matuā faasalalauina—ua silia i le fā piliona kopi i le taimi nei. Pe e lē o le tele ea lenā tatou te faatalitalia e oo i ai se feʻau mai le Atua mo tagata uma?

Mo se auiliiliga o faamaoniga e iloa ai o le Tusi Paia e mai le agaga o le Atua, tagaʻi i itulau e 12-22 o le tusi Le Poto e Taʻitaʻia ai i le Ola e Faavavau, lomia e Molimau a Ieova.

E tele aogā e te mauaina pe afai e te faitauina le Tusi Paia ma e talisapaia le mea moni e faapea, o le Tusi Paia o le Afioga moni lava lenā a le Atua.

[Pusa/Ata i le itulau 8]

O le ā le Malo o le Atua?

O se pulega faapitoa i le lagi ua faatūina e Ieova le Atua moni, o Lē na Faia le lagi ma le lalolagi.—Ieremia 10:10, 12.

Ua faailoa mai e le Tusi Paia faapea na faaee e le Atua le pule iā Iesu Keriso. (Faaaliga 11:15) A o soifua i le lalolagi, na faaalia e Iesu e faapea, na tuuina atu e le Atua le pule faapitoa iā te ia—le pule e mafai ona ia vavao i matagi ma le sami, faamālōlō gasegase eseese ma faatutūina foʻi ē ua maliliu. (Mataio 9:2-8; Mareko 4:37-41; Ioane 11:11-44) Na valoia foʻi e valoaga o le Tusi Paia o le a tuuina atu e le Atua iā te ia le “pule, ma le viiga, ma le malo, ina ia auauna iā te ia o nuu uma, ma atu nuu, ma gagana eseese.” (Tanielu 7:13, 14) E taʻua lenā pulega o le Malo o le lagi, ma o loo pule mai Iesu Keriso mai le lagi i le taimi nei.

[Ata i le itulau 7]

Talaʻiina o le tala lelei i le lalolagi aoao