Ua Oo Mai ‘le Itu Aso o le Faamasinoga’

UA FAAILOA mai e le Faaaliga le tusi mulimuli o le Tusi Paia, se agelu ua lele i le taulotoaʻiga o le lagi ua iā te ia “le tala lelei faavavau e folafola atu.” Ua ia faapea mai ma le leo tele: “Ia outou matataʻu i le Atua, ma avatu iā te ia le viiga, auā ua oo mai le itu aso o lana faamasinoga.” (Faaaliga 14:6, 7) O lenā ‘itu aso o le faamasinoga’ e aofia ai le faalauiloaga ma le faaooina mai o le faasalaga faafaamasinoga a le Atua. O le “itu aso” o se taimi puupuu. O le faaoo mai o le faasalaga, o le tumutumuga lenā o “aso e gata ai” lea ua tatou ola ai nei.—2 Timoteo 3:1.

O le ‘itu aso o le faamasinoga,’ o se tala fiafia mo ē e tausisi i le amiotonu. O le taimi lenā o le a aumaia ai e le Atua le mapusaga mo ana auauna, o ē na mafatia i lenei faiga o mea sauā e leai se alofa.

I le taimi nei, a o leʻi faaiʻuina ‘le itu aso o le faamasinoga’ i le faaumatiaga o lenei faiga leaga o mea, ua pulunaunauina i tatou e faapea: “Ia outou matataʻu i le Atua, ma avatu iā te ia le viiga.” Po o e faia lenā mea? E sili atu mea e aofia ai na i lo le faapea mai, “Ou te talitonu i le Atua.” (Mataio 7:21-23; Iakopo 2:19, 20) O le mataʻu i le Atua e ao ona faapogaia i tatou e faaalia le migao iā te ia. E tatau ona uunaʻia ai i tatou e liliu ese mai mea leaga. (Faataoto 8:13) E ao ona fesoasoani iā i tatou ia fiafia i mea lelei ae ʻinoʻino i mea leaga. (Amosa 5:14, 15) Afai tatou te āva i le Atua, o le a tatou faalogo ma le faaaloalo iā te ia. Tatou te lē pisi naʻuā i isi mea ma faatalalē ai i le faitauina e lē aunoa o lana Afioga, le Tusi Paia. O le a tatou faatuatua iā te ia i taimi uma lava ma o tatou loto atoa. (Salamo 62:8; Faataoto 3:5, 6) O i latou e faaaloalo moni iā te ia, latou te amanaʻia e faapea, o ia le Pule Silisili Ese auā na ia Faia le lagi ma le lalolagi, ma latou te lotomalilie e gauaʻi atu i lana Pule Silisili Ese. Afai tatou te mātauina e tatau ona tatou uaʻi atili atu i mataupu nei, seʻi o tatou gaoioi loa i le taimi nei.

Ua faamatalaina foʻi le faaooina mai o le faamasinoga lea na taʻua e le agelu, o “le aso tele o Ieova.” Na oo se “aso” faapena i le aai anamua o Ierusalema i le 607 T.L.M., ona na lē utagiaina e tagata lapataʻiga na ala mai i perofeta. Talu ai na latou manatu faapea na faatuatuai le aso o Ieova, na atili ai ona lamatia o latou ola. Na lapataʻia i latou e Ieova: “E lata mai lava, o loo matuā tele vave mai lava.” (Sefanaia 1:14) Na oo foʻi se isi “aso tele o Ieova” i Papelonia anamua i le 539 T.L.M. (Isaia 13:1, 6) Talu ai na latou faatuatua i mea na latou faia e puipuia ai i latou atoa foʻi ma o latou atua, na lē amanaʻia ai e tagata Papelonia lapataʻiga a perofeta a Ieova. Peitaʻi i le pō e tasi, na paʻū ai Papelonia le aai tele iā Metai ma Peresia.

O le ā o le a tatou fetaiaʻi i aso nei? O se isi “aso tele o Ieova” e sili atu lona mataʻutia. (2 Peteru 3:11-14) Ua uma ona faalauiloa le faasalaga faafaamasinoga a le Atua faasaga iā “Papelonia o le aai tele.” E tusa ai o le Faaaliga 14:8 (LT), ua folafolaina e se agelu e faapea: “Ua paʻū Papelonia o le aai tele.” Ua uma ona tupu lenā mea. Ua lē mafai ona ia toe taofiofia tagata tapuaʻi o Ieova. Ua matuā faaalialia i lumamea ana faiga faapiʻopiʻo ma lona aafia i taua. Ua toe o se aga ona faaumatia atoatoa lea o ia. O le māfuaaga lenā ua uunaʻia ai e le Tusi Paia tagata i atunuu uma e faapea: “Ia outou ō ese iā te ia [Papelonia le Aai Tele], ina neʻi faatasia outou i ana agasala, ina neʻi tofusia foʻi outou i ona mala; auā ua paʻi atu ana agasala i le lagi, ua manatua foʻi e le Atua ana amioleaga.”—Faaaliga 18:4, 5.

O ai Papelonia le Aai Tele? O faiga lotu i le lalolagi aoao lea e matuā tutusa ma Papelonia  anamua. (Faaaliga, mataupu 17, 18) Seʻi manatu foʻi i nisi o mea e tutusa ai:

• O ositaulaga i Papelonia anamua, na matuā aafia i mataupu faaupufai o le atunuu. O le mea foʻi lenā o loo faia e le tele o tapuaʻiga i aso nei.

• Na masani ona faaauiluma e ositaulaga a Papelonia, taua a le atunuu. I aso nei, e masani ona taulamua tapuaʻiga i le faamanuiaina o fitafita i atunuu fetauaʻi.

• O aʻoaʻoga ma tū a Papelonia anamua, na ala ai ona faia e le atunuu amioga matagā faaleituaiga. Pe a tuulafoaʻia e taʻitaʻi lotu i aso nei ia faatulagaga a le Tusi Paia i amioga tatau, e matuā taatele amioga lē mamā ua faia e taʻitaʻi lotu ma le ʻaulotu. O se mea e mataʻina ai ona o loo faia e Papelonia le Aai Tele faiga faatalitane ma le lalolagi ma ona faiga faapolotiki, o le ala lea ua taʻua ai o ia o le fafine talitane i le tusi o Faaaliga.

• Ua taʻua foʻi e le Tusi Paia, o Papelonia le Aai Tele ua “faafiafia o ia iā te ia” e aunoa ma le mā. I Papelonia anamua, na mauaina e le taupulega a le lotu le tele o fanua, ma na taulamua ositaulaga i gaoioiga faapisinisi. E lē gata i nofoaga o tapuaʻiga, ae e tele foʻi pisinisi ma meatotino a Papelonia le Aai Tele i aso nei. O ana aʻoaʻoga ma ona aso mālōlō, e lē gata ua tele ai lona tamaoaiga, ae ua tele ai foʻi le tamaoaiga a ē faipisinisi.

• Na taatele i Papelonia anamua le faaaogāina o faatusa, faiga faamaneta ma faataulāitu e pei ona faaaogāina i le tele o nofoaga i aso nei. Na manatu faapea o le oti o le avanoa lenā e ulu atu ai i se isi olaga. Na faatumulia Papelonia i malumalu ma falesā e faamamaluina ai ona atua, ae na tetee tagata Papelonia i tagata tapuaʻi o Ieova. Ua mātaulia foʻi Papelonia le Aai Tele i aʻoaʻoga ma tū faapena.

I aso anamua, na faaaogā e Ieova malo malolosi faapolotiki ma ʻautau, e faasala ai ē e faaauau ona lē faaaloalo iā te ia ma lona finagalo. O lea la, na faaumatia e Asuria ia Samaria i le 740 T.L.M. Na faatafunaina Ierusalema e Papelonia i le 607 T.L.M., a o le 70 T.A. na vagaia ai e Roma. Ae na faatoʻilaloina Papelonia e Metai ma Peresia i le 539 T.L.M. I o tatou aso, ua valoia e le Tusi Paia e faapea o malo faapolotiki lea e pei o se manu feʻai, o le a osofaʻia “le fafine talitane” ma faatelenoa iā te ia, e faaalialia ai ona uiga moni. O le a latou faatamaʻia atoatoa o ia.—Faaaliga 17:16.

Po o le a faia moni ea e malo o le lalolagi lenā mea? Ua taʻua e le Tusi Paia o le mea lenā o le a “tuuina atu e le Atua i o latou loto.” (Faaaliga 17:17) O le a faafuaseʻi ona tupu ma e faateʻia ai, e lē iloa mamao atu pe e faasolosolo mālie.

O le ā le gaoioiga e tatau ona e faia? Fesili ifo iā te oe lava: ‘Po o oʻu piiama atu pea i se faalapotopotoga faalelotu o pisipisia i aʻoaʻoga ma tū a Papelonia le Aai Tele?’ E tusa foʻi pe e te lē auai i ai, ae ia fesili ifo iā te oe lava: ‘Po o taaʻina aʻu e lona agaga?’ O le ā lenā agaga? O le agaga o le taliaina o amioga lē mamā, pupū i meafaitino ma faafiafiaga na i lo le alofa i le Atua, po o le teena ma le loto i ai (e oo lava i mea iti) o le Afioga a Ieova. Ia mafaufau lelei i lau tali.

Ina ia fiafia mai Ieova iā i tatou, e tāua tele ona tatou faamaonia e faapea e leai moni sa tatou vaega o faia iā Papelonia le Aai Tele, e lē gata i a tatou gaoioiga, a o tatou faanaunauga foʻi. Aua le faatuatuai. Ua lapataʻia i tatou e le Tusi Paia i le oo faafuaseʻi mai o le iʻuga e ala i le faapea mai: “E faapea ona  lafotuina o Papelonia le aai tele, e lē toe iloa lava.”—Faaaliga 18:21.

Ae e iai isi mea o le a tutupu. O se isi vala o lenā ‘itu aso o le faamasinoga,’ o le a faamasinoina e Ieova le Atua e ala mai i lona Malo i le lagi i aao o Iesu Keriso, le faiga o mea faapolotiki i le lalolagi aoao ma ona taʻitaʻi ma ē uma e lē lagolagoina lana pulega. (Faaaliga 13:1, 2; 19:19-21) I le vaaiga faavaloaga i le Tanielu 2:20-45, o loo faatusaina pulega faaupufai e amata mai i le taimi o Papelonia anamua e oo mai i le asō, i se tupua tele e fai i auro, ario, ʻapa memea, uʻamea ma le omea. E tusa ai ma o tatou aso, ua faapea mai le valoaga: “E faatūina ai e le Atua o le lagi o le malo e lē faaumatia e faavavau.” Ua faalauiloa mai foʻi e le Tusi Paia le mea o le a faia e lenā Malo a o faagasolo ‘le itu aso o le faamasinoga’ a Ieova e faapea: “Na te tuʻimomomoina ma faaumatia ia malo [faaletagata] uma lava, a o ia e tumau lava e faavavau.”—Tanielu 2:44.

O loo lapataʻia e le Tusi Paia tagata tapuaʻi moni e aua le mananaʻo i “mea o i ai i le lalolagi”—o le ituaiga o olaga ua faaauilumaina e le lalolagi lea ua vavaeese mai le Atua moni. (1 Ioane 2:15-17) Po o faaalia ea e au filifiliga ma gaoioiga, o loo e lagolagoina atoatoa le Malo o le Atua? Po o e faamuamuaina moni lava lea Malo i lou olaga?—Mataio 6:33; Ioane 17:16, 17.

[Pusa i le itulau 14]

O Afea e Oo Mai ai le Iʻuga?

“O le itu aso tou te lē manatunatu ai, e sau ai le Atalii o le tagata.”—Mataio 24:44.

“Ia outou mataala ai, auā tou te lē iloa le aso po o le itu aso.”—Mataio 25:13.

“E lē faatuai mai.”—Sapakuka 2:3.

[Pusa i le itulau 14]

Pe e Suia ai Lou Olaga pe Afai E te Iloa le Itu Aso?

Pe afai e te mautinoa o loo totoe pea ni nai tausaga ona faatoʻā oo mai lea o le faasalaga faafaamasinoga a le Atua o loo faaloloʻi mai, faamata e suia ai lou olaga? Pe afai ua tuai le mutaaga o lenei faiga tuai o mea na i lo lea na e faatalitalia, faamata ua faavaivaia ai oe i le auaunaga iā Ieova?—Eperu 10:36-38.

O lo tatou lē iloaina o le taimi tonu, e mafai ai ona tatou faaalia le saʻo o le māfuaaga tatou te auauna ai i le Atua. O i latou e iloaina Ieova, latou te malamalama faapea o gaoioiga maelega e faatoʻā faia i le taimi mulimuli, e lē faafiafiaina ai le Atua o lē e silasila i loto o tagata.—Ieremia 17:10; Eperu 4:13.

O ē e alolofa moni iā Ieova, latou te faamuamuaina pea o ia i o latou olaga. E pei o isi tagata, atonu e faigaluega foʻi Kerisiano moni. Peitaʻi ane, o lo latou sini e lē ina ia mauʻoa ai ae ia maua mea e moomia mo le ola, ma ia iai ni nai mea e tufatufa atu i isi. (Efeso 4:28; 1 Timoteo 6:7-12) Latou te olioli foʻi i faafiafiaga mamā ma mālōlōga mai i tiute masani ona o le faanaunauga ina ia faafouina ai i latou, ae e lē faapea ina ia faataʻitaʻi ai i mea o loo faia e isi tagata. (Mareko 6:31; Roma 12:2) O se fiafiaga iā i latou le faia o le finagalo o le Atua e pei foʻi o Iesu Keriso.—Salamo 37:4; 40:8.

E faanaunau Kerisiano moni e ola ma auauna e faavavau iā Ieova. E lē faapea ua faaitiitia le tāua o lenā faamoemoe ona e tatau ona latou faatalitali teisi mo nisi faamanuiaga na i lo le mea na manatu ai nisi.

 [Pusa/Ata i le itulau 15]

Le Finauga i le Pule Silisili Ese

Ina ia malamalama i le pogai ua faataga ai e le Atua le tele o mafatiaga, e manaʻomia ona tatou malamalama i le finauga i le pule silisili ese.

Talu ai o Ieova o Lē na Faia Mea Uma Lava, ua iā te ia le aiā tatau e pule ai i le lalolagi ma ē uma o loo iai. Ae e pei ona faamatalaina e le Tusi Paia, na luʻia le pule silisili ese a Ieova i le tauamatamataga o le talafaasolopito o tagata. Na faapea mai Satani le Tiapolo, o Ieova o se Atua e faasāsā naʻuā, ma na ia pelogia o tatou uluaʻi mātua e faatatau i le mea e tupu pe a la teena le tulafono a le Atua ae faia le mea la te loto i ai, ma e sili atu ona lelei pe a pulea i laʻua e i laʻua lava na i lo le puleaina e le Atua.—Kenese, mataupu 2, 3.

Ana faapea na faaumatia loa e Ieova le ʻaufouvale i le taimi lava lenā, ua faaalia ai lona malosi peitaʻi ane, e lē foʻia ai finauga na lāgā. E leʻi faaumatia loa e Ieova le ʻaufouvale peitaʻi, na tuu le avanoa i tagata ma agelu e vāai ai i āuga o lea fouvalega. E moni ua oo mai ai mafatiaga, ae ua maua ai foʻi le avanoa tatou te fananau mai ai i lenei lalolagi.

E lē gata i lea, na saunia ma le alofa e Ieova e ui ina matuā mafatia ai, le taulaga togiola a lona Alo ina ia saʻoloto mai le agasala ma ona āuga, ia tagata uma e usiusitai ma faatuatua i le taulaga togiola, ma ola i le Parataiso. O le a taunuu foʻi lenei fuafuaga e ala i le toetutū o ē ua maliliu.

O le lē vave foʻia o le finauga, ua maua ai e auauna a le Atua le avanoa e faaalia ai e mafai ona latou tali atu i le alofa o le Atua ma faamaonia ai lo latou faamaoni iā Ieova po o ā lava tulaga latou te fesagaʻia. O le foʻiaina o le finauga e faatatau i le pule silisili ese a Ieova ma le finauga e fesootaʻi atu i le faamaoni o tagata, e tāua tele ina ia faamautinoa ai e faaaloalo foafoaga uma i le lagi ma le lalolagi i tulafono. Afai e lē faaaloalo i tulafono, e lē mafai ona ausia le filemu moni. *

[Faaopoopoga i lalo]

[Ata i le itulau 15]

O le a muta pulega a malo i le lalolagi aoao