PE SA ave faananā e se tagata se mea mai iā te oe?— O ā ni lagona na oo iā te oe?— O le tagata na ave faananāina au mea, o le gaoi, ma e leai ma se tasi e fiafia i se tagata e gaoi. O le ā sou manatu, e faapefea ona avea se tagata o se gaoi? Pe na fanau mai le tagata gaoi ua iai ona uiga leaga faapena?—

I le mataupu na seʻi faatoʻā uma atu, na tatou aʻoaʻoina ai faapea e fananau mai tagata ma le agasala. O lea ua lē lelei atoatoa ai tagata uma. Peitaʻi, e leai se tagata e fanau mai ua avea o se gaoi. Atonu e lelei le aiga e sau ai le tagata gaoi. Atonu e faamaoni ona mātua ma nai ona tei. Peitaʻi, e māfua ona avea o ia ma gaoi, ona e manaʻo tele i mea e pei o tupe ma mea e mafai ona faatauina i tupe.

O le ā sou manatu, o ai na muamua lava avea ma gaoi?— Seʻi mafaufau i ai. A o soifua le Faiaʻoga Sili i le lagi, na ia iloa le gaoi lea. O ia o se agelu. Na faapefea ona avea lenā agelu o se gaoi, ae na faia i latou e le Atua ma agelu lelei atoatoa?— E pei ona tatou iloa mai le Mataupu e 8 o le tusi lenei, na manaʻo lenā agelu i le mea na tatau ona ave iā Ieova. E te manatua lenā mea?—

Ina ua uma ona faia e le Atua le uluaʻi ulugalii, na manaʻo le agelu lenā e tapuaʻi atu Atamu ma Eva iā te ia. E leai sana aiā o le a manaʻo ai fua e tapuaʻi atu Atamu ma Eva iā te ia. E tatau ona la tapuaʻi atu i le Atua. Ae na gaoi e lea agelu lenā mea! E ala i le uunaʻia o Atamu ma Eva e tapuaʻi iā te ia, sa avea ai lenā agelu ma gaoi. Sa avea ai o ia ma Satani le Tiapolo.

O le ā e māfua ai ona avea se tagata o se gaoi?— O le tuʻinanau i mea e lē o ni ana mea. E mafai ona malosi tele lenā tuʻinanau, e  ono faia ai e se tagata lelei ni mea leaga. I nisi taimi, e lē salamō ai tagata gāoi ma e lē toe liliu atu e faia mea lelei. O se faataʻitaʻiga, o se tasi o aposetolo o Iesu. O lona igoa, o Iuta le Sekara.

Na iloa e Iuta, e sesē le gaoi auā na aʻoaʻoina mai lava o ia a o tamaitiiti, i le Tulafono a le Atua. Na iloa e Iuta na fetalai le Atua mai le lagi ma faapea mai i ona tagata: “Aua e te gaoi.” (Esoto 20:15) Ina ua matua Iuta, na feiloaʻi ai i le Faiaʻoga Sili ma avea ai o ia ma se tasi o ona soo. Mulimuli ane, na filifilia e Iesu Iuta, e avea ma se tasi o ona aposetolo e toʻa 12.

Sa malaga faatasi Iesu ma ona aposetolo. Na latou aai faatasi. Na tuu faatasi a latou tupe i totonu o se pusa. Na tuu e Iesu le pusa iā Iuta na te vaaia. Ae e lē o ni tupe a Iuta. Peitaʻi, e te iloa le mea na fai e Iuta mulimuli ane?—

Na amata ona faaaogā e Iuta tupe mai le pusa, o se mea e leʻi tatau ona ia faia. Sa ia aveina tupe pe a lē tilotilo atu nisi o le ʻauaposetolo, ma na ia saʻilia foʻi nisi auala e maua atili ai ma isi tupe. Ua mafaufau Iuta i tupe i taimi uma. Seʻi o tatou vaai i le mea na iʻu i ai lenei tuʻinanauga sesē, i na o ni nai aso a o leʻi fasiotia le Faiaʻoga Sili.

Na aumaia e Maria, le tuafafine o Lasalo le uō a Iesu, se fagu uu taugatā ma liligi i vae o Iesu. Peitaʻi, na tomumu ai Iuta. E te iloa le māfuaaga?— Fai mai Iuta sa tatau ona faatau atu le fagu uu ma ave tupe e maua mai ai, mo tagata matitiva. Peitaʻi, o le mea na manaʻo moni i ai Iuta, o le toe mauaina lea o tupe e tuu i le pusa, ina ia mafai ona ia gaoia.​—Ioane 12:1-6.

Na fetalai atu Iesu iā Iuta e aua le faalavelave iā Maria, o lē na agalelei iā Iesu. E leʻi fiafia Iuta i le tala a Iesu, o lea na alu ai i ositaulaga sili, o ē na ʻinoʻino iā Iesu. Sa mananaʻo ositaulaga e puʻe Iesu, ae na latou mananaʻo e faia i le pō neʻi iloa ane e tagata.

 Na fai atu Iuta i ositaulaga: ʻOu te taʻu atu le auala tou te puʻeina ai Iesu pe afai e maua saʻu tupe. E fia se tupe tou te aumaia iā te aʻu?’

Na tali atu ositaulaga: ʻE avatu ma oe tupe siliva e 30.’​—Mataio 26:14-16.

Na ave e Iuta le tupe. E tai pei ua faatauina atu e Iuta le Faiaʻoga Sili i na tagata! Pe e mafai ona e mafaufau i se tagata amio leaga faapena?— O le mea lenā e oo i se tagata e gaoia tupe. E sili atu lona naunau i tupe na i lo lona alofa i tagata ma le Atua.

Atonu e te faapea mai, ʻE sili atu loʻu alofa iā Ieova le Atua i lo se isi lava mea.’ E faamālō atu pe afai o ou faalogona na. Ina ua filifilia e Iesu Iuta e avea ma ona aposetolo, atonu o faalogona na sa iā Iuta. Atonu na faapena foʻi faalogona o tagata gāoi. Seʻi o tatou talanoa e uiga i nisi o tagata gāoi.

O se tasi o i latou o se auauna a le Atua e igoa iā Akana, o lē na ola a o leʻi taitai oo i le taimi na fanau mai ai le Faiaʻoga Sili. Na vaai atu Akana i se ofu manaia, o se auro ma ni tupe siliva. Ae e lē o ni ana mea. Ua fai mai le Tusi Paia o Ieova e ana mea na,  auā na maua mai i fili o tagata o le Atua. Peitaʻi, ua manaʻo tele i ai Akana i mea na, o lea na ia gaoia ai.​—Iosua 6:19; 7:11, 20-22.

O se isi faataʻitaʻiga. I aso a la, na filifilia ai e Ieova Tavita e avea ma tupu o tagata Isaraelu. I se isi aso, na vaavaai ai Tavita i le fafine lalelei o Patesepa. Na faaauau ona vaavaai atu iā Patesepa ma mafaufau ai e fai Patesepa ma ana avā. Peitaʻi, o Patesepa o le toʻalua o Uria. O le ā le mea a Tavita na tatau ona fai?—

Na tatau ona taofia e Tavita lona mafaufau atu e avea Patesepa ma ana avā. Ae e lē o le mea lenā a Tavita na fai. Na ia aumaia Patesepa i lona fale. Na fuafuaina e Tavita le fasiotia o Uria. Aiseā na faia ai e Tavita na mea leaga?—  Auā na manaʻo tele i le toʻalua o le isi tamāloa.​—2 Samuelu 11:2-27.

Ona na salamō Tavita, na faatagaina ai e Ieova ina ia ola pea. Peitaʻi, e tele faafitauli na oo iā Tavita. Sa manaʻo lona atalii o Apisaloma, e faoa le tulaga tautupu o lona tamā o Tavita. A o ō mai tagata iā Tavita, na alu atu Apisaloma ma fusi i latou, ma feasogi i ai. Ua fai mai le Tusi Paia: ʻOna gaoia lea e Apisaloma o loto o tagata o Isaraelu.’ Na uunaʻia e Apisaloma tagata na, ina ia mananaʻo e avea o ia ma o latou tupu na i lo Tavita.​—2 Samuelu 15:1-12.

Pe e iai se mea na e matuā manaʻo ai lava e pei o Akana, Tavita ma Apisaloma?— A faapea e lē o oe e ana le mea lenā, ae ua e aveina e aunoa ma le faanoi, o le gaoi lau mea ua fai. E te manatua foʻi le mea na manaʻo i ai le gaoi muamua, o Satani?— Na manaʻo Satani e tapuaʻi atu tagata iā te ia, na i lo le Atua. O lea la, na avea Satani ma se gaoi ina ua ia avea Atamu ma Eva ma ē e usiusitai iā te ia.

E pule lava le tagata i le faaaogāina o ana lava mea totino. O se faataʻitaʻiga, atonu e te tafao i le fale o isi tamaiti. Faamata e saʻo pe a e alu ma ave se mea i lou fale?— Seʻi vaganā lava ua faataga atu e le tamā po o le tinā o tamaiti. A faapea e te aveina se mea i lou fale e aunoa ma le faanoi, o lona uiga ua e gaoi.

Aiseā atonu e te fia gaoia ai se mea?— Auā o loo e manaʻo i se mea a le isi tagata. E tusa pe lē o vaai atu se isi tagata o loo e aveina se mea, ae o ai o loo iloa mai?— O Ieova le Atua. E tatau ona tatou manatua, e ʻinoʻino le Atua i le gaoi. O lou alofa la i le Atua ma i lē lua te tuaoi, o le a fesoasoani lenā iā te oe, ia aua le gaoi.