E TE talanoa iā Ieova le Atua?— E manaʻo Ieova e te talanoa atu iā te ia. Pe a e talanoa i le Atua, o le mea lenā e taʻu o le tatalo. Na masani ona talanoa Iesu i lona Tamā i le lagi. I nisi taimi, na manaʻo Iesu e tuua na o ia, pe a talanoa i le Atua. Fai mai le Tusi Paia i se isi aso: ʻOna alu aʻe lea ua na o ia i le mauga e tatalo ai. Ua oo i le afiafi, ua na o ia sa iai.’​—Mataio 14:23.

O fea e mafai ona e tatalo ai na o oe, iā Ieova?— Atonu e mafai ona e talanoa iā Ieova, pe a na o oe ae e te leʻi moe i le pō. Na faapea mai Iesu: ʻInā alu atu ia i lou potu e te moe ai, a uma ona tapuni le faitotoʻa, ia tatalo loa i lou Tamā.’ (Mataio 6:6) Faamata e te tatalo iā Ieova ae e te leʻi moe i pō uma?— E tatau ona e tatalo.

 Sa tatalo foʻi Iesu a o iai faatasi ma tagata. Ina ua oti lana uō o Lasalo, na tatalo faatasi Iesu ma isi tagata i le nofoaga na teu ai le tino o Lasalo. (Ioane 11:41, 42) Na tatalo foʻi Iesu a o fai a latou sauniga ma ona soo. E te alu i sauniga ia e faia ai tatalo?— E masani lava ona tatalo se tagata matua i le sauniga. Ia faalogologo lelei i le tatalo, auā o loo tatalo lenā tamāloa mo oe. Ona mafai lea ona e fai atu “Amene” pe a uma le tatalo. E te iloa le uiga o le upu “Amene”?— O lona uiga, e te fiafia i le tatalo. E lē gata i lea, e te ioe i upu o le tatalo ma e te manaʻo foʻi ia pei o sau lava tatalo.

Sa tatalo foʻi Iesu i taimi e aai ai. Sa faafetai iā Ieova mo ana meaʻai. Pe e te tatalo i taimi uma ae e te leʻi ʻai?— E lelei lo tatou faafetai iā Ieova i taimi tatou te aai ai. Atonu e faia e se isi tagata le tatalo pe a tou aai faatasi. Ae ā pe a e ʻai na o oe? Ae ā pe a tou aai faatasi ma tagata e lē faia se faafetai iā Ieova?— E tatau ona fai pea sau tatalo.

Pe e tatau ona e leotele i taimi uma e fai ai au tatalo? Pe e faafofoga mai Ieova iā te oe pe a e tatalo lē leoa?— O le a maua le tali, pe a tatou vaai i le mea na tupu iā Neemia. O Neemia, o se tagata tapuaʻi iā Ieova, ma sa faigaluega i le maota o le tupu Peresia  o Aretaseta. I se tasi aso, na faanoanoa ai tele Neemia ona ua faalogo ua malepe pa o Ierusalema, le aai o ona tagata.

Ina ua fesili i ai le tupu pe aiseā ua faanoanoa ai, na faia ai loa e Neemia sana tatalo lē leoa iā Ieova. Ona faailoa atu lea e Neemia i le tupu, le māfuaaga ua faanoanoa ai, ma faanoi i ai pe e mafai ona alu e toe fai pa o Ierusalema. O le ā le mea na tupu?—

Ioe, na talia e le Atua le tatalo a Neemia. Na fai atu le tupu iā Neemia e mafai ona alu! Na ave foʻi e le tupu le tele o laau iā Neemia, e fesoasoani i le toe fauina o le pa. O lea la, e mafai e le Atua ona talia a tatou tatalo e tusa pe lē leoa.​—Neemia 1:2, 3; 2:4-8.

Seʻi mafaufau i le mea lenei. Pe e tatau ona punou lou ulu pe a e tatalo? Pe tatau ona e tootuli? O le ā  sou manatu?— Na tootuli Iesu i nisi taimi a o tatalo. Ae o isi taimi na tū ai i luga. I isi foʻi taimi, na tilotilo ai Iesu i le lagi a o fai ana tatalo, e pei o le taimi na tatalo ai mo Lasalo.

O le ā ua faaalia i lenei mea?— Ua faaalia ai e lē tāua le tulaga e fai ai le tatalo. I nisi taimi, e lelei pe a punou lou ulu ma moeiini ou mata. Atonu e te fia tootuli i nisi taimi, e pei ona sa faia e Iesu. Ae ia manatua, e mafai ona tatou tatalo i le Atua i so o se taimi i le ao po o le pō, ma e faafofoga mai le Atua iā i tatou. O le mea e tāua, o lo tatou matuā talitonu o loo faafofoga mai Ieova. E te talitonu e faafofoga mai Ieova i au tatalo?—

O ā ni mea tatou te tatalo ai iā Ieova?— Seʻi taʻu mai iā te aʻu: Pe a e tatalo, o ā mea e te talanoa atu ai i le Atua?— O le tele ia o mea mananaia e foaʻi mai e Ieova mo i tatou, ma e lelei lo tatou faafetai i ai mo ia mea, a ea?— E mafai ona tatou faafetai iā Ieova mo a tatou meaʻai. Ae, pe e te faafetai iā Ieova mo le tele o mea mananaia e pei o le lagi, o laau, ma fugalaau eseese?— Na faia e Ieova mea uma na.

Na mananaʻo soo o Iesu e na te aʻoaʻoina i latou i le auala e tatalo ai. O lea na aʻoaʻoina ai e le Faiaʻoga Sili le auala e tatalo ai, ma na ia faaalia iā i latou mea e sili ona tāua e tatalo i ai. E te iloa na mea?— Seʻi aumai lau Tusi Paia ma suʻe i le Mataio mataupu e 6. E tatou te maua ai le Tatalo a le Alii i fuaiupu e 9 seʻi oo i le 13. Tatou faitau faatasi i ai.

 Ua tatou aʻoaʻoina mai i lenei mau, na faapea mai Iesu ia tatou tatalo mo le suafa o le Atua. Na fetalai mai, e tatalo ina ia faapaia le suafa o le Atua. O ai le suafa o le Atua?— Ioe, o Ieova, ma e tatau ona tatou faapelepele i lenā suafa.

O le manatu lona lua, ua aʻoaʻoina i tatou e Iesu ia tatalo mo le oo mai o le Malo o le Atua. E tāua lenei malo auā o le a na aumaia le filemu i le lalolagi ma avea ai le lalolagi ma parataiso.

O le manatu lona tolu, na fai mai le Faiaʻoga Sili ia tatalo ina ia faia le finagalo o le Atua i le lalolagi e pei ona faia i le lagi. A tatou tatalo mo lenā tulaga, e tatau la ona tatou faia mea e finagalo i ai le Atua.

Ona faapea mai lea o Iesu, ia tatou tatalo mo a tatou meaʻai mo aso taʻitasi. Na fai mai foʻi e tatau ona tatou faatoese atu i le Atua mo mea sesē tatou te faia. E tatau foʻi ona tatou talosaga i le Atua e faamagalo mai i tatou. Peitaʻi, a o leʻi faamagaloina i tatou e le Atua, e tatau ona tatou faamagalo atu i isi pe afai ua agaleaga mai iā i tatou. Pe e faigofie ona e faia lenā mea?—

O le manatu mulimuli lava, na fetalai mai Iesu e tatau ona tatou tatalo iā Ieova e puipuia i tatou mai lē e leaga, o Satani le Tiapolo. O mea lelei uma nei e mafai ona tatou tatalo ai i le Atua.

E tatau ona tatou talitonu o loo faafofoga mai Ieova i a tatou tatalo. E lē gata i le talosaga atu iā te ia mo lana fesoasoani, ae e tatau foʻi ona tatou faafetai atu pea iā te ia. E fiafia Ieova pe a moni a tatou tatalo, ma pe a saʻo foʻi mea tatou te tatalo atu ai. O le a foaʻi mai la e Ieova mea tatou te tatalo atu ai. E te talitonu i lenā mea?—