UA FAI mai isi tagata e latou te talitonu na o mea e mafai ona vaai i ai. Ae e valea lenā manatu. E tele mea o loo iai moni lava, ae e lē mafai ona vaai iai o tatou mata. E mafai ona e taʻu mai se mea se tasi?—

Ae ā le ʻea o loo tatou mānavaina? Pe e mafai ona tatou lagonaina le ʻea?— Seʻi tago e feula lou lima. Na e lagonaina se mea?— Ioe, na e lagonaina le feula atu o le ʻea, ae e lē mafai ona e vaai i ai, a ea?—

Ua uma ona tatou talanoa e uiga iā i latou e iai tino agaga, ia e lē mafai ona vaaia. Na tatou aʻoaʻoina ai, o isi agaga e lelei a o isi e leaga. Seʻi taʻu mai igoa o nisi e iai tino agaga.— O Ieova le Atua, Iesu ma agelu lelei. Faamata e iai ni agelu leaga?— Ua fai mai le Tusi Paia e iai agelu leaga. Seʻi taʻu mai mea ua e iloa e uiga i nei agelu leaga.—

O se tasi o mea ua tatou iloa, e sili atu le malolosi o agelu lelei ma agelu leaga na i lo tatou. E tele mea na silafia e le Faiaʻoga Sili e uiga i agelu. Auā na avea muamua o ia ma agelu a o leʻi fanau mai o se pepe i le lalolagi. Sa latou ola faatasi ma isi agelu i le lagi. Na silafia e Iesu le faitau miliona o agelu. Pe e iai ni igoa o agelu uma nei?—

Ua uma ona tatou aʻoaʻoina na faaigoa e le Atua fetu uma lava. O lea e mafai ona mautinoa e iai foʻi igoa o agelu uma. E tatou te iloa foʻi e talanoa atu le tasi agelu i le isi agelu, auā ua fai mai le Tusi Paia e iai le ʻgagana a agelu.’ (1 Korinito 13:1) O le ā sou manatu, o ā mea e talanoa i ai agelu? Pe latou te talanoa e uiga iā i tatou i le lalolagi?—

Tatou te iloa o loo taumafai agelu a Satani, ia temoni, e uunaʻia i tatou ia lē usitai iā Ieova. E tatau la ona latou talatalanoa i ni auala  e mafai ona latou uunaʻia ai i tatou. Latou te mananaʻo ina ia tatou faataʻitaʻi atu iā i latou, ina ia lē fiafia mai ai foʻi Ieova iā i tatou. Ae ā agelu faamaoni a le Atua? O le ā sou manatu, faamata latou te talanoa e uiga iā i tatou?— Ioe. Latou te mananaʻo e fesoasoani mai iā i tatou. Seʻi oʻu faamatala atu le auala na fesoasoani ai agelu a le Atua, i tagata na alolofa iā Ieova ma naunau e auauna iā te ia.

O se faataʻitaʻiga, na iai se tamāloa e igoa iā Tanielu sa nofo i Papelonia. O le toʻatele o tagata i inā e leʻi alolofa iā Ieova. Na fai foʻi e tagata se tulafono e faasala ai so o se tasi e tatalo atu iā Ieova le Atua. Ae e leʻi taofia ai le tatalo atu o Tanielu i le Atua. E te iloa le mea na latou fai iā Tanielu?—

Ioe, na lafo e tagata leaga Tanielu i le lua o leona. Sa tuu ai i inā si toeaina o Tanielu faatasi ma leona fia aai. E te iloa le mea na tupu?— Na taʻua e Tanielu: “Ua auina mai e loʻu Atua o lana agelu, ua punitia ai gutu o  leona.” E leai ma se mea o Tanielu na afāina! E tele mea lelei e mafai ona fai e agelu mo i latou e auauna iā Ieova.​—Tanielu 6:18-22.

Na iai foʻi se mea na tupu a o falepuipui Peteru. E te manatua o Peteru le uō a Iesu Keriso, le Faiaʻoga Sili. E leʻi fiafia isi tagata ina ua talanoa i ai Peteru e faapea o Iesu, o le Alo o le Atua. O lea na latou loka ai Peteru i le falepuipui. Na leoleo e fitafita le falepuipui neʻi sola Peteru. Pe na iai se tasi sa mafai ona fesoasoani iā Peteru?—

Sa moe Peteru i le va o fitafita e toʻalua, ma na saisai ona lima i filifili uʻamea. Ae ua fai mai le Tusi Paia: ʻFaauta foʻi, ua sau le agelu a le Alii ma ua pupula mai le malamalama i le falepuipui. Ua paʻi atu iā Peteru ma fafagu iā te ia, ua faapea atu, “Tū vave i luga!”’

 Na mamulu ai loa filifili nai lima o Peteru! Na fai atu le agelu: ʻIa fai ou ofu, faamau ou seevae, ma mulimuli mai iā te aʻu.’ E leʻi mafai e fitafita ona taofiofi iā i laʻua ona sa fesoasoani le agelu iā Peteru. Ua la oo atu i se faitotoʻa uʻamea, ae na iai se mea uiga ese na tupu. Na matala le faitotoʻa e aunoa ma se tasi o tatalaina! Ua faasaʻoloto e le agelu Peteru ina ia mafai ona faaauau le talaʻiga a Peteru.​—Galuega 12:3-11.

Faamata e mafai foʻi e agelu a le Atua ona fesoasoani mai iā i tatou?— Ioe, e mafai. Po o le uiga o lenā mea, o le a latou puipui i tatou i taimi uma ma lē faatagaina se mea e afāina ai i tatou?— E leai, e lē puipuia i tatou e agelu pe a tatou te faia ni mea valea e ono lavevea ai. Ae e tusa pe tatou te lē faia ni mea e ono lavevea ai, ae e mafai lava ona tatou afāina i se mea. E leʻi faatonuina agelu e puipuia i tatou ina neʻi tatou lavevea. Na i lo lenā, ua tuuina atu e le Atua se galuega faapitoa e faia e agelu.

Ua taʻua e le Tusi Paia se agelu o loo fai atu i tagata uma, ia tapuaʻi i le Atua. (Faaaliga 14:6, 7) Pe faapefea ona fai atu le agelu i tagata? Po o leotele le agelu mai le lagi ina ia lagona uma e tagata ana tala?— E leai, na i lo lea, ua talanoa atu soo o Iesu i tagata e uiga i le Atua, ma e taʻitaʻiina e agelu galuega a na soo. E faamautinoa e agelu ua maua e i latou uma o naunau moni e faalogo i le Atua, le avanoa e faalogo ai. E mafai ona tatou auai i lenā galuega talaʻi, ma o le a fesoasoani mai agelu iā i tatou.

Ae ā pe a tetee tagata o ē e lē alolofa i le Atua, i le galuega talaʻi? Ae ā pe a latou tuuina i tatou i falepuipui? Po o le a faasaʻoloto i tatou e agelu?— Ioe, e mafai. Ae e lē o le mea lenā e masani ona latou faia.

Na iai se taimi na falepuipui ai le soo o Iesu, o Paulo. Na faimalaga Paulo i se vaa a o agi se afā malosi. Ae e leʻi faasaʻolotoina vave  e agelu Paulo. O le māfuaaga, auā na iai isi tagata na tatau ona faalogo i le tala e uiga i le Atua. Na fai atu se agelu: “Paulo e, aua e te fefe; e tatau ona e tū i luma o Kaisara.” Ioe, na tatau ona alu atu Paulo i lē na pulea le lalolagi, o Kaisara, ina ia talaʻi atu i ai. Na iloa e agelu le mea na iai Paulo i taimi uma lava, ma na latou fesoasoani iā te ia. O le a latou fesoasoani foʻi iā i tatou pe a tatou auauna ma le faamaoni i le Atua.​—Galuega 27:23-25.

E iai foʻi se isi galuega tāua ua toeitiiti ona faia loa lea e agelu. Ua lata mai le taimi e faaumatia ai e le Atua tagata amio leaga. O i latou uma e lē tapuaʻi i le Atua moni, o le a faaumatia. O i latou lava o faapea mai e lē talitonu i agelu ona e lē mafai ona vaai i ai, o le a iloa ai lo latou sesē.​—2 Tesalonia 1:6-8.

O le ā le uiga o lenā mea mo i tatou?— A tatou tutū i le itu a agelu, o le a latou fesoasoani mai iā i tatou. Ae faamata o tatou tutū ea i le itu a agelu?— Tatou te tutū i le itu a agelu pe a tatou auauna iā Ieova. Afai tatou te auauna iā Ieova, o le a tatou taʻu atu la i isi tagata ia latou auauna foʻi iā Ieova.