NA TAGI Iesu ina ua oti lana uō o Lasalo. O le ā sou manatu, na mafatia Ieova i le taimi na tigāina ai Iesu, ma oo ina maliu?— Ua faapea mai le Tusi Paia e mafai ona ʻmafatia’ ma tigā faalogona o le Atua i mea o loo tutupu.​—Salamo 78:40, 41; Ioane 11:35.

Pe e mafai ona e mafaufau i le tigā o faalogona o Ieova a o silasila mai i le maliu o lona Alo pele?— Na silafia e Iesu, e lē mafai ona faagaloina o ia e le Atua. O le māfuaaga lenā na faapea ai ana toe upu ae maliu loa: “Loʻu Tamā e, ou te tuuina atu loʻu nei [ola] i ou aao!”​—Luka 23:46.

Sa mautinoa e Iesu e toe faatūina o ia, ma e lē tuua pea “i Seoli” po o le tuugamau. Ina ua toe faatūina Iesu nai le oti, na toe taʻua ai e le aposetolo o Peteru le tala a le Tusi Paia e uiga iā Iesu: “Ua lē tuua o ia i Seoli, ua lē oo foʻi le pala i lona tino.” (Galuega 2:31; Salamo 16:10) Talu ai sa puupuu  le taimi sa iai Iesu i le tuugamau, e leʻi pala lona tino pe manogi leaga foʻi.

A o iai Iesu i le lalolagi, na ia taʻu atu i ona soo e lē umi se taimi e maliu ai. Na ia faamalamalama atu iā i latou ʻe fasiotia o ia, ma e faatūina i le aso lona tolu.’ (Luka 9:22) O lea la, sa lē tatau ona faateʻia le ʻausoo ina ua toetū mai Iesu. Ae pe na faateʻia i latou?— Seʻi tatou vaai po o le ā le mea na tupu.

Pe tusa o le tā o le tolu i le aoauli o le Aso Faraile, na maliu ai le Faiaʻoga Sili i luga o le satauro. Sa iai se tamāloa mauʻoa o se sui foʻi o le Saniterini e igoa iā Iosefa, na talitonu iā Iesu ae e leʻi faailoa atu i tagata. Ina ua iloa e Iosefa ua maliu Iesu, na alu atu iā Pilato le kovana o Roma. Na talosaga atu i ai pe mafai ona ia ave i lalo le tino o Iesu mai le satauro ina ia tanuina. Mulimuli ane, ona ave lea e Iosefa le tino o Iesu i se togālaau o loo iai se tuugamau e tanu ai tino oti.

Ina ua tuu le tino i totonu, na avane se maa telē e pupuni ai le gutu o le tuugamau. Ua tapuni le tuugamau. Ua oo nei i le aso lona tolu, o le Aso Sa. E leʻi oso aʻe le lā, ma o loo pogisa pea. O loo leoleoina e tamāloloa le tuugamau. Na faatonuina e ositaulaga sili tamāloloa nei e leoleo le tuugamau. E te iloa le māfuaaga?—

Na faalogo foʻi le ʻauositaulaga o faapea mai Iesu, e toe faatūina o ia. Na faatonuina e le ʻauositaulaga tamāloloa e leoleo le tuugamau, ina neʻi ō atu soo o Iesu e gaoi lona tino ma faapea mai ua toetū Iesu. Ua lūlū faafuaseʻi se mafuiʻe. Ua susulu mai le malamalama a o pogisa. Ua faaali mai se agelu a Ieova! Na matuā fefefe fitafita ma ua lē gaoioi. Ona alu atu lea o le agelu ma fuli ese le maa mai le tuugamau. Ua avanoa le tuugamau!

Ioe, e pei ona taʻua mulimuli e le aposetolo o Peteru: “O Iesu lava lenā ua toe faatūina e le Atua.” (Galuega 2:32) Na toe faatūina e le Atua, Iesu i se tino e tutusa ma lona tino a o leʻi afio mai i  le lalolagi. Na toetū Iesu i se tino agaga e pei o tino o agelu. (1 Peteru 3:18) Ina ia mafai la ona vāai tagata iā Iesu, e tatau ona liu tino tagata. Faamata na fai e Iesu le mea lenā?— Seʻi tatou vaai la i ai.

Ua amata ona oso aʻe le lā. Ua sosola fitafita. O loo ō atu Maria le Makatala ma isi fafine na avea ma soo o Iesu, i le tuugamau. Ua faapea atu le tasi i le isi: ʻO ai ea sē na te fulieseina le maa mo i tatou i le gutu o le tuugamau?’ (Mareko 16:3) Peitaʻi, e taunuu atu i le tuugamau ua uma ona fuli ese le maa. Faauta, ua leai se tino i le tuugamau! Ua lē o iai le tino maliu o Iesu! Ona alu atu faatopetope lea o Maria le Makatala e suʻe nisi o le ʻauaposetolo o Iesu.

Sa nonofo ai pea isi fafine i le tuugamau. Ua latou taumānatu: ʻPo o fea o iai le tino o Iesu?’ Ua faafuaseʻi ona tutū mai tamāloloa ofu pupula e toʻalua. O i laʻua o ni agelu! Ua la faapea atu i fafine: ʻAiseā tou te suʻeina ai Iesu i inei. Ua toetū o ia. Inā ō atu vave ia e taʻu i ona soo.’ Na tamomoʻe vave fafine! A o ō atu fafine nei, na latou feiloaʻi ai ma se tamāloa. E te iloa lenei tamāloa?—

O Iesu, ae o lea ua liu tino tagata! Ua faapea atu foʻi Iesu i fafine: ʻŌ e taʻu i oʻu soo.’ Ua matuā fiafia fafine. Na latou maua soo ma faapea atu i ai: ʻUa toetū Iesu! Na matou vāai i ai!’ Ua uma ona taʻu e Maria iā Peteru ma Ioane faapea e lē o iai se tino i le tuugamau. O lea na la ō ai loa seʻi vaai i le tuugamau, e pei ona e vaaia i le ata. Ua la iloa atu ʻie na fusifusia ai Iesu, peitaʻi la te lē o mautonu i le mea o tupu. E la te fia talitonu ua toetū mai Iesu, ae e faigatā ona o se mea e ofoofogia tele, pe afai e moni.

Mulimuli ane i le Aso Sa lava lenā, na alu atu ai Iesu i ona soo e toʻalua a o agaʻi atu i le ala i le nuu o Emau. Sa savavali ma talatalanoa faatasi ma Iesu, ae la te leʻi iloa o Iesu lea latou te talanoa faatasi, ona ua ese lona tino lea mai lona tino sa iai muamua. Peitaʻi, faatoʻā la iloa lava Iesu, ina ua faia e Iesu le tatalo a o latou fai ʻaiga faatasi. Ua matuā fiafia le ʻausoo ma toe foʻi vave atu i Ierusalema!  Atonu e leʻi umi lava ae alu atu loa Iesu iā Peteru e faaali atu i ai, o Ia lea ua toe soifua mai.

I le afiafi o le Aso Sa lava lenā, na potopoto faatasi ai le toʻatele o le ʻausoo i se potu, o loo loka le faitotoʻa. Peitaʻi, na tū faafuaseʻi Iesu i totonu o le potu! O lea na latou mautinoa ai, ua toe soifua mai le Faiaʻoga Sili. Seʻi mafaufau i lo latou fiafia tele!​—Mataio 28:1-15; Luka 24:1-49; Ioane 19:38–20:21.

Pe tusa ma le 40 aso, sa liu ai Iesu i tino eseese ma faaali atu ina ia faailoa i ona soo ua toe soifua moni mai. Ona tuua loa lea e Iesu o le lalolagi ma toe alu atu i lona Tamā i le lagi. (Galuega 1:9-11) E leʻi umi ae faailoa atu loa e soo i tagata, e faapea ua toe faatūina  e le Atua Iesu nai le oti. E ui lava na fasi faamoʻamoʻa ma fasiotia ai nisi o i latou e le ʻauositaulaga, ae na faaauau pea ona latou talaʻi. Na latou iloa afai latou te feoti, e manatuaina i latou e le Atua e pei ona ia manatuaina lona Alo.

E matuā eseese lava uluaʻi soo o Iesu mai le toʻatele o tagata i aso nei! Ona e pau le mea e manatua e nei tagata, i le taimi o le tausaga na toetū ai Iesu, o lapiti ma fuāmoa sukalati felanulanuaʻi o le Eseta. Peitaʻi, e leai ma se faamatalaga a le Tusi Paia e faatatau i lapiti ma fuāmoa o le Eseta. O loo faamatala ai le auauna atu i le Atua.

E mafai ona tatou pei o soo o Iesu e ala i le taʻu atu i tagata le mea matagofie na faia e le Atua, ina ua ia toe faatūina lona Alo. E lē tatau ona tatou fefefe, e tusa pe fai mai tagata o le a latou fasiotia i tatou. Afai tatou te feoti, e manatua i tatou e Ieova ma o le a ia toe faatutūina i tatou, e pei ona ia faatūina Iesu.

Pe tatou te lē fiafia ea, aemaise lea ua tatou iloa e manatua e le Atua ana auauna ma o le a ia toe faatutūina i latou nai le oti?— O le iloaina o lenā mea, e tatau ona uunaʻia ai i tatou ia iloa pe faapefea ona fiafia mai le Atua iā i tatou. Pe na e iloa, e mafai moni lava ona fiafia mai le Atua iā i tatou?— O le a tatou talanoa la i ai i le mataupu o sosoo mai.