OU TE mautinoa e te ioe mai, e maualuluga atu, pe e malolosi atu isi tagata na i lo oe ma aʻu. O ai e te manatu, e sili atu ona maualuga na i lo tatou?— O Ieova le Atua. Ae ā lona Alo, le Faiaʻoga Sili? Pe e sili atu o ia na i lo tatou?— Ioe.

Sa iai faatasi Iesu ma le Atua i lugā i le lagi. Sa avea muamua Iesu ma Atalii agaga, po o se agelu. Pe na faia e le Atua isi agelu, po o atalii agaga?— Ioe, na faia e le Atua le faitau miliona o agelu. E sili ma e malolosi atu agelu nei na i lo tatou.​—Salamo 104:4; Tanielu 7:10.

E te manatua foʻi le igoa o le agelu lea na talanoa atu iā Maria?— O Kaperielu. Na taʻu atu e le agelu iā Maria o le a avea lana pepe ma Alo o le Atua. Na tuuina e le Atua le ola o lona Atalii agaga i totonu o le manava o Maria, ina ia mafai ai ona fanau mai Iesu i le lalolagi o se pepe.​—Luka 1:26, 27.

E te talitonu i le vavega lenā? Pe e te talitonu na iai muamua Iesu i le lagi faatasi ma le Atua?— Na faapea mai Iesu sa iai muamua o ia i le lagi. Na faapefea ona iloa na mea e Iesu? Atonu i le taimi a o laʻitiiti Iesu, na taʻu i ai e Maria le tala a Kaperielu. E le gata i lea, sa ono taʻu foʻi e Iosefa iā Iesu o lona Tamā moni lava le Atua.

Ina ua papatiso Iesu, na fetalai mai ai le Atua mai le lagi e faapea: ʻO loʻu Atalii lenā.’ (Mataio 3:17) E lē gata i lea, i le pō a o leʻi maliu, na tatalo atu ai Iesu: “Loʻu Tamā e, ia e tuu mai iā te aʻu le mamalu faatasi ma oe, o le mamalu lava  sa iā te i taʻua ma oe, a o leʻi faia le lalolagi.” (Ioane 17:5) Ioe, na talosaga atu Iesu ina ia ave o ia i le lagi, e toe faatasi ma le Atua. Pe faapefea ona soifua Iesu i le lagi?— Seʻiloga e toe faia e Ieova se vavega e avea ai Iesu ma se agaga e lē vaaia, po o se agelu.

E iai se fesili tāua lea ou te fia fesili atu ai. E lelei uma agelu? O le ā sou manatu?— I aso a la ua leva, sa lelei ai uma agelu. Auā foʻi na faia i latou e Ieova, ma o mea uma lava ua faia e Ieova, e lelei. Ae peitaʻi, na iʻu ina avea se tasi agelu ma agelu leaga. Na faapefea ona tupu lenā mea?

Ina ia maua le tali, e tatau ona tatou toe foʻi i tua i le taimi na faia ai e le Atua le uluaʻi tamāloa ma le fafine, o Atamu ma Eva. Ua fai mai isi tagata o le tala iā Atamu ma Eva o se fagogo. Ae na silafia e le Faiaʻoga Sili, e moni le tala lenā.

Na tuuina e le Atua Atamu ma Eva i se faatoʻaga matagofie e taʻua o Etena, ina ua uma ona faia i laʻua. Na avea lenā faatoʻaga ma togālaau matagofie, o se parataiso. Na mafai ona fai sa la fanau e toʻatele, ia maua se aiga telē ma nonofo ai e faavavau i le Parataiso. Ae na iai se lesona tāua sa tatau ona la iloa. Ua uma foʻi ona tatou talanoa i le lesona lenā. Seʻi vaai la pe tatou te manatua.

 Na taʻu atu e Ieova iā Atamu ma Eva e mafai ona la aai i so o se fua mai laau o le faatoʻaga. Peitaʻi, sa iai se laau na faasā ona la aai ai. Na taʻu atu e le Atua le mea e oo iā i laʻua, pe a aai i le laau lenā. Na taʻu i ai e le Atua: ʻLua te oti ai lava.’ (Kenese 2:17) O lea la, o le ā le lesona na tatau ona iloa e Atamu ma Eva?—

O le lesona, e tatau ona la usitai. Ioe, e faalagolago o la ola i le usitai atu iā Ieova le Atua! E leʻi lava le fai atu o Atamu ma Eva, o le a la usitai iā te ia. Sa tatau ona faaalia lo la usitai e ala i mea na la faia. A faapea la te usitai i le Atua, ua faaalia ai la te alolofa iā te ia, ma e mananaʻo e avea o ia ma o la Pule. Ona ono mafai ai lea ona la ola e faavavau i le Parataiso. Peitaʻi, afai la te aai i le laau faasāina, o le ā ua faaalia ai?—

E faaalia ai lo la lē talisapaia o mea na foaʻi mai e le Atua mo i laʻua. Ana faapea na e iai i inā, faamata e te usitai iā Ieova?— I le taimi muamua sa usitai ai Atamu ma Eva. Peitaʻi, o se tasi e sili atu iā i laʻua, na faasesēina Eva lea na māfua ai lona lē usitai iā Ieova. O ai ia lenā?—

 Ua taʻu mai e le Tusi Paia, na tautala atu le gata iā Eva. Tatou te iloa lelei, e lē mafai e se gata ona tautala. Na faapefea ona tautala lenei gata?— Na faia e se agelu se togafiti, na foliga mai ai o le gata o loo tautala. Ae o le mea moni lava ia, o le agelu sa talanoa mai. Ua amata ona mafaufau le agelu lenei i mea leaga. Sa manaʻo e tapuaʻi atu Atamu ma Eva iā te ia. Sa manaʻo foʻi e fai e Atamu ma Eva mea uma na ia fai atu ai. Na manaʻo le agelu lenei e auauna atu tagata iā te ia, na i lo le Atua.

O lea, na tuuina ai e lenā agelu manatu sesē i le mafaufau o Eva. E ala i le faaaogāina o le gata na ia fai atu ai iā Eva: ʻE leʻi taʻuina atu e le Atua le mea moni iā te oulua. Lua te lē oti pe a lua aai i le laau. Lua te atamamai ai e pei o le Atua.’ Faamata e te talitonu i le tala lenā?—

Ua manaʻo nei Eva i se mea sa faasā e le Atua, ma ua ʻai i le fua. Ona avatu lea e Eva le fua iā Atamu. E leʻi talitonu Atamu i le tala a le gata. Ae ua sili atu lona manaʻo iā Eva na i lo lona alofa i le Atua. Ona ʻai ai foʻi lea ma ia i le fua.​—Kenese 3:1-6; 1 Timoteo 2:14.

O le ā le mea na iʻu i ai?— Ua lē toe lelei atoatoa Atamu ma Eva, ua oo ina ola matutua, ma feoti. Talu ai ua lē lelei atoatoa i laʻua, ua faapena ai foʻi ona lē lelei atoatoa le la fanau, ua oo  ina ola matutua ma feoti. E leʻi pepelo le Atua! Ioe, e faalagolago moni le mauaina o le ola i le usitai atu i le Atua. (Roma 5:12) Ua taʻu mai e le Tusi Paia e faapea o le agelu lea sa pepelo iā Eva, ua igoa nei iā Satani le Tiapolo, ma o agelu na mulimuli atu iā te ia ua taʻua o temoni.​—Iakopo 2:19; Faaaliga 12:9.

Po ua e malamalama la i le māfuaaga na avea ai le agelu lelei lea na faia e le Atua, ma agelu leaga?— Ona ua amata ona mafaufau i mea leaga. Na manaʻo le agelu lenei e pito i sili lava ia na i lo isi. Na iloa e le agelu lenei, na fai atu le Atua iā Atamu ma Eva e fai ni a la fanau, ma na manaʻo ina ia latou tapuaʻi uma atu iā te ia. E manaʻo le Tiapolo ia lē usiusitai tagata uma iā Ieova. O le mea lea ua taumafai ai o ia ina ia tatou mafaufau i manatu sesē.​—Iakopo 1:13-15.

Ua fai mai le Tiapolo e leai ma se tasi e alofa moni iā Ieova. Na ia faapea mai tatou te lē alolofa i le Atua, ma lē mananaʻo moni e fai mea o fai mai ai le Atua. Ua fai mai foʻi e faatoʻā usitai lava iā Ieova pe a fetaui ma lo tatou manaʻo. Pe e saʻo le Tiapolo? Pe e faapena i tatou?

Ua faapea mai le Faiaʻoga Sili e pepelo le Tiapolo! Na faamaonia e Iesu le moni o lona alofa iā Ieova e ala i le usitai atu iā te Ia. E lē faapea na o taimi na lelei ai mea uma, na usitai ai Iesu i le Atua. Sa usitai Iesu i taimi uma, e ui e leʻi faigofie i nisi taimi ona o gaoioiga lē lelei sa faia e isi tagata iā te ia. Sa faamaoni Iesu iā Ieova e oo lava i le taimi na maliu ai. O le māfuaaga lenā na toe faatūina ai e le Atua Iesu mai le oti, ina ia ola e faavavau.

O le ā sou manatu, o ai lo tatou fili sili?— Ioe, o Satani le Tiapolo. E mafai ona e vaai iā Satani?— E leai! Peitaʻi ua tatou iloa o loo iai moni lava Satani, ma e sili atu lona malosi na i lo tatou. Ae o ai e sili atu ona maualuga na i lo le Tiapolo?— O Ieova le Atua. Ua tatou iloa ai, e mafai e le Atua ona puipuia i tatou.