O UŌ, o tagata ia tatou te fiafia e talatalanoa i ai ma faifaimea faatasi. Peitaʻi, e tāua ona iai ni a tatou uō lelei. O le ā sou manatu, o ai e tatau ona avea ma a tatou uō sili?— Ioe, o Ieova le Atua.

Ae faamata e mafai ona avea moni i tatou ma uō a le Atua?— Ua faapea mai le Tusi Paia na avea Aperaamo, o se tamā na ola i aso a la, ma “uō a le Atua.” (Iakopo 2:23) E te iloa le māfuaaga na avea ai o ia ma uō a le Atua?— O loo tali mai le Tusi Paia e faapea, ona na usiusitai Aperaamo i le Atua. Na usitai pea o ia e tusa pe faigatā le mea na faatonu atu e fai. O lea la, ina ia avea ma uō a Ieova, e tatau ona tatou faia mea e fiafia ai o ia, e pei ona sa faia e Aperaamo ma e pei foʻi ona sa faia i taimi uma e le Faiaʻoga Sili.​—Kenese 22:1-14; Ioane 8:28, 29; Eperu 11:8, 17-19.

 Na faapea atu Iesu i ona aposetolo: “O aʻu uō outou, pe afai tou te faia mea uma lava ou te fai atu ai iā te outou.” (Ioane 15:14) Talu ai o faamatalaga uma na fai mai ai Iesu na sau mai iā Ieova, o le uiga la o lana tala, o ana uō o tagata latou te faia mea ua fetalai mai ai le Atua. E alolofa uma uō a Iesu i le Atua.

O nisi na uō lelei ma le Faiaʻoga Sili o ona aposetolo, ma e mafai ona e tilotilo i o latou ata i le itulau e 75 o le tusi lenei. Na latou faimalaga faatasi ma Iesu ma na fesoasoani iā te ia i le galuega talaʻi. Na tele ina faifai mea faatasi Iesu ma tamāloloa nei. Na latou aai faatasi. Na latou talatalanoa e uiga i le Atua, ma e tele foʻi isi mea na latou faia faatasi. Peitaʻi, e tele foʻi isi uō a Iesu. E masani ona nonofo Iesu ma i latou, ma latou fiafia faatasi ai.

Sa fiafia Iesu e nofo i se tasi aiga i le aai o Petania, e lē mamao mai le aai telē o Ierusalema. E te manatua lenā aiga?— O Maria ma Mareta faapea ma lo la tuagane o Lasalo. Na taʻua e Iesu Lasalo o lana uō. (Ioane 11:1, 5, 11) O le māfuaaga na fiafia ai Iesu  e faifaimea faatasi ma lenei aiga, ona e alolofa iā Ieova ma e auauna foʻi iā te Ia.

E leʻi faapea la na agaleaga atu Iesu i tagata e leʻi auauna i le Atua. Na agalelei atu iā i latou. Na alu atu o ia i o latou fale ma aai faatasi ai. O le ala lea na fai mai ai isi tagata faapea e ʻuō Iesu ma ao lafoga ma ē agasala.’ (Mataio 11:19) O le mea moni, e leʻi alu atu Iesu i fale o na tagata ona faapea e fiafia i a latou mea na fai. Na asiasi atu iā i latou ina ia talanoa ai e uiga iā Ieova. Na taumafai Iesu e fesoasoani atu iā i latou ina ia suia a latou amio ae auauna i le Atua.

Na tupu lenei mea i le aai o Ieriko. Na ui atu Iesu i le aai lenā ina ua ia alu atu i Ierusalema. Ua tumutumu atu tagata ma na iai foʻi se tamāloa e igoa iā Sakaio. Na fia vaai atu Sakaio iā Iesu. Peitaʻi, o Sakaio o se tagata puupuu ma e leai se mea na ia iloa atu ona o le toʻatele o tagata. O lea na tamoʻe ai ma aʻe i luga o le laau ina ia mafai ona ia iloa lelei atu Iesu a o savali ane.

Ina ua taunuu atu Iesu i le mea o iai le laau, na tepa aʻe i luga ma faapea atu: ʻIa e vave ifo ia i lalo, auā ou te nofo i lou fale i le aso nei.’ Peitaʻi, o Sakaio o se  tamāloa mauʻoa ma e iai mea leaga na ia faia. Aiseā na fia nofo ai Iesu i le fale o se tagata faapena?—

E lē faapea na fiafia Iesu i mea a lenā tamāloa na fai. Na alu Iesu i le fale o Sakaio e talanoa ai e uiga i le Atua. Na iloa e Iesu taumafaiga a lenei tamāloa ina ia iloa atu o ia. O lea, na silafia ai e Iesu atonu o le a faalogo Sakaio. O se avanoa lelei lea e talanoa ai iā Sakaio e uiga i le faamatalaga a le Atua i le auala e tatau ona ola ai tagata.

O le ā la le mea na oo i ai?— Na fiafia Sakaio i faamatalaga na fetalai atu ai Iesu. Ua matuā salamō o ia ona o lona taufaasesē i tagata, ma na folafola o le a toe faafoʻi uma tupe a tagata lea na ia aveina. Ona avea lea o Sakaio ma soo o Iesu, ma o lea na faatoʻā avea ai foʻi o ia ma uō a Iesu.​—Luka 19:1-10.

Pe afai tatou te mulimuli i le faaaʻoaʻoga a le Faiaʻoga Sili, faamata o le a tatou asiasi atu i tagata e lē o ni a tatou uō?— Ioe. Peitaʻi, tatou te lē ō i o latou fale ona e faapea ua tatou fiafia i a latou mea o fai. E lē taitai foʻi ona tatou faia ni mea sesē ma i latou. E tatou te asiasi atu iā i latou ina ia talanoa atu e uiga i le Atua.

 Peitaʻi, o a tatou uō lelei o i latou na tatou te fiafia tele e faifaimea faatasi. Ina ia avea ma uō lelei, e tatau ona fiafia i ai le Atua. Atonu e lē iloa e isi tagata, Ieova. Ae a faapea latou te mananaʻo e iloa po o ai o Ia, e mafai ona tatou fesoasoani i ai. A faapea la e mulimuli ane alolofa tagata na iā Ieova e pei o i tatou, ona mafai lea ona avea i latou ma a tatou uō lelei.

E iai foʻi se isi auala tatou te iloa ai po o ai e lelei ona tatou faauō i ai. Ia mātau mea e fai e lenā tagata. Pe e agaleaga atu i isi tagata ona ʻata lea i ai? E lē saʻo lenā mea, a ea?— Faamata e aafia soo lenā tamaitiiti i mea sesē? E tatou te lē mananaʻo e aafia i mea sesē a lenā tamaitiiti e fai, a ea?— Pe na te faia mea leaga ma lona iloa, ma manatu e ese lona poto auā e lē o maua lana mea na fai? E tusa lava pe lē o maua le mea na fai e lenā tagata, ae na silasila mai le Atua i lana mea leaga na fai, a ea?— O le ā sou manatu, faamata e lelei lo tatou faauō atu i tagata e faapena a latou mea e fai?—

Faamolemole aumai lau Tusi Paia. Seʻi tatou vaai, pe faapefea ona aafia i tatou i a tatou uō. O loo maua le mau i le 1 Korinito mataupu e 15 fuaiupu e 33. Ua maua lau mau?— Ua faapea mai: “Aua neʻi faasesēina outou, ʻO le feoaʻi ma ē amio leaga e leaga ai amio lelei.’” O le uiga o lenā mea, a faapea tatou te feoaʻi ma tagata leaga, atonu o le a leaga ai foʻi i tatou. E faapena foʻi pe a iai ni a tatou uō lelei, o le a fesoasoani iā i tatou ina ia amio lelei ai.

Aua nei galo iā i tatou, e pito i sili Ieova i o tatou olaga. E tatou te lē mananaʻo e faaleaga la tatou faauōga ma Ieova, a ea?— O lea la, e tatau ona tatou faamautinoa e pau tagata tatou te faauō i ai, o ē e alolofa i le Atua.