SA ʻAI sau meaʻai i le asō?— E te iloa o ai na saunia lau meaʻai?— Atonu na saunia e lou tinā po o se isi tagata, peitaʻi, aiseā e ao ai ona tatou faafetai i le Atua mo meaʻai?— Auā o le Atua e māfua ai ona ola mea totō o loo maua mai ai a tatou meaʻai. Peitaʻi, e tatau foʻi ona tatou faafetai i le tagata na kukaina le meaʻai, po o lē na laulauina mai iā i tatou.

I isi taimi e galo ai ona tatou faafetai iā i latou e faia mea lelei mo i tatou, a ea? A o soifua le Faiaʻoga Sili i le lalolagi, sa iai ni tagata lepela na galo ona faafetai atu.

E te iloa le mea e tupu i se tagata e maua i le lepela? E mafai ona māfua ai ona pala se vaega o le tino o le tagata i le maʻi lepela. I aso o Iesu, sa nonofo mamao ese tagata lepela mai le mea e iai isi tagata. Afai e iloa atu e se tagata lepela se isi tagata o savali mai, e tatau ona valaau leotele atu e lapataʻi le tagata lea ia sōsō mamao ese. O le māfuaaga na valaau leotele ai, ina ia aua le faalatalata atu isi tagata iā te ia, ma ono maua ai i le maʻi lepela.

Na agalelei tele Iesu i tagata lepela. I se isi aso a o agaʻi atu Iesu i Ierusalema, na ui atu i se aai laʻitiiti. A o toeitiiti taunuu i le aai, na ō mai ai ni lepela e toʻa 10 iā Iesu. Na faalogo lepela nei i le mana o Iesu mai le Atua, e faamālōlō ai so o se ituaiga maʻi.

Peitaʻi, e leʻi faalatalata lepela iā Iesu. Na latou tutū mamao ese. Ae na latou talitonu e mafai e Iesu ona faamālōlōina i latou. Ina ua vāai atu i le Faiaʻoga Sili, na latou alalaga ai faapea: ʻIesu e, le Faiaʻoga, alofa mai iā i matou!’

 Faamata e te alofa i tagata mamaʻi?— Sa alofa i ai Iesu. Na silafia e Iesu le tulaga mafatia o tagata e maua i le lepela. O lea na tali atu ai Iesu iā i latou: “Inā ō ia, ia faaali atu outou i ositaulaga.”​—Luka 17:11-14.

Aiseā na fetalai atu ai Iesu e ō i ositaulaga? Ona o le tulafono a Ieova na tuuina atu i Ona tagata e faatatau i tagata lepela. Na fai mai le tulafono, e tatau ona iloilo e le ositaulaga a le Atua le tino o se tagata lepela. Afai e lē o toe maʻi lepela le tagata, ona faailoa atu lea e le ositaulaga lea tulaga iā te ia. A malosi lea tagata, e mafai ona toe foʻi atu e nonofo faatasi ma tagata e lē o aafia i le maʻi lepela.​—Levitiko 13:16, 17.

 Peitaʻi, e leʻi teʻa ese lepela o tamāloloa nei. Faamata na ō i le ositaulaga e pei ona faatonuina ai i latou e Iesu?— Ioe, na ō i le taimi lava lenā. Na talitonu tamāloloa nei, e mafai e Iesu ona aveesea lo latou maʻi. O le ā le mea na tupu?

A o latou agaʻi atu i le ositaulaga, ae teʻa ese loa o latou maʻi lepela. Ua toe lelei o latou tino. Ua lē o toe maua i le maʻi lepela! Ua manuia i latou ona o lo latou talitonu i le mana o Iesu. Maʻeu so latou fiafia! Peitaʻi, o le ā le mea na tatau ona latou faia e faaalia ai lo latou loto faafetai? O le ā e te ono faia?—

Na toe foʻi mai le toʻatasi o tamāloa na faamālōlōina, iā Iesu. Na vivii atu le tamāloa iā Ieova. E saʻo lana mea na fai, ona o le mana lea na faamālōlō ai le tamāloa, na sau mai le Atua. Na tootuli foʻi le tamāloa i vae o le Faiaʻoga Sili ma faafetai iā te ia. Na matuā loto faafetai le tamāloa i le mea na fai e Iesu.

Peitaʻi, e faapefea isi tamāloloa e toʻaiva? Na fesili atu Iesu: ʻE leʻi faamālōlō ea le toʻasefulu? A o fea le isi toʻaiva? Pe na o le toʻatasi ua toe foʻi mai e vivii i le Atua?’

 Ioe, e saʻo. E na o le toʻatasi le tamāloa mai tamāloloa e toʻasefulu, na vivii i le Atua ma toe foʻi mai e faafetai iā Iesu. O le tamāloa lenei o se tagata Samaria, e sau mai se isi atunuu. E leʻi faafetai isi tamāloloa e toʻaiva i le Atua, ma e leʻi faafetai atu foʻi iā Iesu.​—Luka 17:15-19.

O ai o tamāloloa nei e te soo i ai? E tatou te mananaʻo ia pei o le tamāloa Samaria, a ea?— O lea la, afai e fai e se tasi se mea lelei mo i tatou, o le ā e tatau ona tatou manatua e fai?— E manaʻomia ona tatou faafetai i ai. E masani ona galo i tagata ona faafetai atu i isi. Peitaʻi, o se mea lelei le faafetai i tagata. E fiafia Ieova le Atua ma lona Alo o Iesu Keriso pe a tatou faafetai atu i tagata.

Aua neʻi galo, e tele mea lelei ua faia e tagata mo oe. O se faataʻitaʻiga, pe sa iai se taimi na e maʻi ai?— Atonu e leʻi maua oe i se maʻi tigāina e pei o tamāloloa lepela e toʻasefulu, ae atonu na e fulū pe na tigā foʻi lou manava. Faamata na iai se tagata na tausia oe?— Atonu na latou avatu ni fualaau iā te oe pe faia foʻi isi mea mo oe. Pe sa e talisapaia la latou fesoasoani ina ia mafai ona e toe malosi?—

Na faaalia e le tamāloa Samaria le loto faafetai iā Iesu mo le faamālōlōina o lona maʻi, ma na fiafia i ai Iesu. O le ā sou manatu, e fiafia lou tinā po o lou tamā pe a e faafetai atu iā i laʻua mo mea ua la faia mo oe?— Ioe, e fiafia.

 E fai foʻi e isi tagata mea mo oe i aso uma po o vaiaso uma. Atonu o la latou galuega lenā, ma atonu latou te fiafia ai. Ae e ono galo iā te oe ona faafetai atu iā i latou. E galue malosi lou faiaʻoga ina ia mafai ona e maua le poto. O lana galuega lenā. Peitaʻi, o le a fiafia lou faiaʻoga pe a e faafetai atu iā te ia mo le aʻoaʻoina o oe.

I nisi taimi, e faia ai e tagata ni mea laiti mo oe. Pe e tatala e se tagata se faitotoʻa mo oe? Pe e tuu atu e se tagata se ipu meaʻai iā te oe? E lelei le faafetai atu mo mea laiti faapena.

A faapea tatou te manatua ona faafetai atu i tagata, e mautinoa lava la, o le a tatou manatua foʻi ona faafetai atu i lo tatou Tamā i le lagi. E anoanoaʻi mea e faafetai ai iā Ieova! Ua foaʻi mai e Ieova le ola ma le tele o mea lelei e tatou te fiafia ai i le olaga. E tele la māfuaaga e tatou te vivii ai i le Atua e ala i le fai atu o tala lelei e uiga i le Atua, i aso taʻitasi.