O LE ā se mea tatou te faia e faafiafia ai le Atua? Pe mafai ona tatou avatu ni mea i le Atua?— Ua fetalai mai Ieova: “Auā o iā te aʻu manu uma i le vao matua.” Na faapea mai foʻi: “O loo iā te aʻu le ario, o loo iā te aʻu foʻi le auro.” (Salamo 24:1; 50:10; Hakai 2:8) Peitaʻi, e iai se mea e mafai ona tatou avatu i le Atua. O le ā lenā mea?—

E faataga i tatou e Ieova e filifili pe tatou te auauna iā te ia, pe leai. E lē faamalosia i tatou e Ieova e fai le mea o finagalo ai. Seʻi tatou suʻeina la le māfuaaga na faia ai e le Atua tagata i le auala e mafai ai ona filifili pe auauna iā te ia, pe leai.

Atonu ua e faalogo i tala i masini ua uma ona faatonutonuina, e faia galuega e masani ona fai e tagata. Na faia masini nei ina ia faia mea uma e manaʻo i ai le tagata na fausiaina le masini. E lē mafai e masini nei ona fai ni filifiliga. Na ono faia i tatou e Ieova, e tai pei o masini na. Na ono mafai e Ieova ona faia i tatou ina ia tatou faia na o mea e finagalo i ai Ieova. Peitaʻi, e lē o le auala lenā na faia ai i tatou e Ieova. E te iloa le māfuaaga?— E tai faapena foʻi isi mea taalo. E na o le oomi lava o le ki, ona fai lea e le mea taalo le  mea na faapolokalame ai o ia e le tagata lea na fausiaina e fai. Na e vaai i se mea taalo faapena?— E masani ona fiafia puupuu tagata e taaalo i mea taalo ua uma ona faapolokalame, auā e tasi lava le mea e mafai ona ia faia. E lē finagalo le Atua e tatou te usiusitai iā te ia, ona o i tatou o ni masini ua uma ona faapolokalame e auauna atu iā te ia. E finagalo Ieova tatou te auauna iā te ia ona tatou te alolofa iā te ia ma tatou te mananaʻo e usiusitai iā te ia.

O le ā sou manatu, o ā ni faalogona o lo tatou Tamā i le lagi pe a tatou usiusitai iā te ia, ona tatou te mananaʻo ai?— Seʻi fai mai sau tala, e faapeʻī faalogona o ou mātua i au amio?— Ua fai mai le Tusi Paia o le atalii poto ʻe faafiafia ai lona tamā’ a o le atalii valea ʻe faanoanoa ai lona tinā.’ (Faataoto 10:1) Po o e iloa, e fiafia lou tamā ma lou tinā pe a e faia le mea la te mananaʻo ai?— Ae o ā ni o la faalogona pe a e lē usitai iā i laʻua?—

Seʻi o tatou mafaufau la i lo tatou Tamā i le lagi, o Ieova. Ua faailoa mai e Ieova le auala e tatou te faafiafia ai o ia. Faamolemole, ia aumai lau Tusi Paia ma suʻe i le Faataoto 27:11. O loo fetalai mai le Atua iā i tatou i le mau lenā: “Loʻu atalii e [e mafai ona tatou faapea atu foʻi, loʻu afafine e] ia poto oe, ma e faafiafia loʻu loto; ona ou mau tali ai lea i lē fāifai mai.” E te iloa le uiga o le fāifai i se tagata?— Atonu e fāifai atu se tagata iā te oe e ala i le ata aamu ma faapea atu e lē mafai ona e faia  le mea na e fai atu ai. E faapefea la ona fāifai Satani iā Ieova?— Seʻi o tatou vaai la i ai.

Manatua foʻi, na tatou aʻoaʻoina i le Mataupu e 8 o le tusi lenei, e manaʻo Satani e pito i sili lona tulaga, ma ia auauna uma atu tagata iā te ia. Na fai mai Satani e pau le māfuaaga e auauna ai tagata iā Ieova ona latou te maua ai le ola e faavavau. Ina ua uma ona faapogaia e Satani le lē usiusitai o Atamu ma Eva iā Ieova, na luʻi ai loa e Satani, Ieova. Na ia fai atu i le Atua: ʻE pau le māfuaaga e auauna ai tagata iā te oe, ona o mea latou te maua mai iā te oe. Tuu mai se avanoa iā te aʻu, e mafai ona ou liliueseina uma tagata mai iā te oe.’

E moni e lē o upu na o loo maua i le Tusi Paia. Peitaʻi, a tatou faitau i le tala iā Iopu, e foliga mai e tai faapena tala na fai atu ai Satani i le Atua. Ioe, sa tāua tele iā Satani ma Ieova, pe faamaoni Iopu i le Atua pe leai. Seʻi suʻe a tatou Tusi Paia i le Iopu mataupu 1 ma le 2, ma tatou vaai po o le ā le mea na tupu.

 Seʻi mātau i le mataupu 1 o le Iopu, na iai foʻi Satani i le lagi i le taimi na ō ifo ai agelu i luma o Ieova. Na fesili atu Ieova iā Satani: “Ua e sau ea mai fea?” Na tali atu Satani na fealualuaʻi solo i le lalolagi. Ona fesili atu lea o Ieova: ʻNa e vaai i laʻu auauna o Iopu, o lē e amiotonu?’​—Iopu 1:6-8.

Ua lē iloa se mea e sisiʻo solo i ai Satani. Na faapea atu: ʻE pau le māfuaaga e auauna ai Iopu iā te oe, auā o loo sologa lelei mea uma. A faapea e te lē puipuia ma faamanuia iā Iopu, o le a fāifai iā te oe.’ Ona tali atu lea o Ieova e faapea: ʻSatani e, ua lelei, e mafai ona e fai so o se mea e te manaʻo i ai, ae aua neʻi oo lou lima iā Iopu.’​—Iopu 1:9-12.

O le ā na fai e Satani?— Na faapogaia loa e Satani tagata e ō atu e gaoi le lafu manu a Iopu ma ana asini, ma fasioti i latou na leoleoina lana lafu. Ona taia lea e le uila mai le lagi le lafu mamoe ma leoleo mamoe. Mulimuli ane, na gaoia e tagata kamela ma fasioti i latou na vaaia kamela. Na aumaia foʻi e Satani se afā ma faaumatia ai le fale o Iopu lea na iai lana fanau e toʻasefulu, ma feoti uma ai. E ui i na mafatiaga uma, ae na auauna pea Iopu iā Ieova.​—Iopu 1:13-22.

Ina ua toe feiloaʻi Ieova ma Satani, na faapea atu Ieova o loo tumau pea le faamaoni o Iopu. Ua sisiʻo solo Satani ma  faapea atu: ʻA faapea e te faataga ona oo loʻu lima i lona tino, o le a fāifai Iopu iā te oe.’ Na faataga ai loa e Ieova, Satani e oo lona lima i le tino o Iopu ae lapataʻi atu e faasā ona fasioti iā te ia.

Na taia loa e Satani si toeaina o Iopu i le maʻi papala. Na matuā manogi leaga le tino o Iopu ma ua lē fia sōsō ane i ai se tagata. Na faapea atu foʻi le avā a Iopu: “Inā fāifai ia e oe o le Atua, ma e oti ai.” Na asiasi ane foʻi uō pepelo a Iopu ma latou faapea ane o le māfuaaga ua faapena ai ona o se mea leaga na ia faia, ma ua atili ai ona mafatia si toeaina o Iopu. Peitaʻi, e ui i le tele o faafitauli ma mafatiaga na tuu atu e Satani iā Iopu, ae na faaauau pea ona auauna ma le faamaoni Iopu iā Ieova.​—Iopu 2:1-13; 7:5; 19:13-20.

O le ā sou manatu, o ā ni faalogona o Ieova i le faamaoni o Iopu?— Na faafiafia ai Ieova, auā ua mafai nei ona Ia faapea atu iā Satani: ʻVaai foʻi iā Iopu! E auauna mai iā te aʻu auā e manaʻo i ai.’ Faamata e te pei o Iopu, o sē e faasino mai i ai Ieova e avea ma faataʻitaʻiga e faamaonia ai, e pepelo Satani?— O le mea moni, o se faaeaga le mafai ona avatu se tali e tusa ai ma le luʻi a Satani faapea e mafai ona ia liliueseina tagata uma mai le auauna atu iā Ieova. Na manatu i ai Iesu o se faaeaga.

E leʻi tuua e le Faiaʻoga Sili se avanoa iā Satani e uunaʻia ai o Ia e faia le mea sesē. Seʻi manatu i le fiafia o lona Tamā i le faataʻitaʻiga a Iesu! Na mafai ona faasino Ieova iā Iesu, ma tali atu iā Satani: ʻSeʻi vaai foʻi i loʻu Atalii! Na tausisi i le faamaoni ona e alofa iā te aʻu!’ Ia mafaufau foʻi i le olioli o Iesu i lona faafiafiaina o lona Tamā. O lona olioli na onosai ai ina ua maliu i le satauro.​—Eperu 12:2.

Pe e te manaʻo e pei o lo tatou Faiaʻoga Sili, ma faafiafia Ieova?— Ia faaauau la ona e aʻoaʻoina mea e manaʻo Ieova e te faia, ma ia e faafiafia Ieova e ala i lou faia o mea na!