SA IAI ea se taimi na e faanoanoa ai ma e faapea e leai se isi o manatu atu iā te oe?— Pe e te taumānatu ea pe e iai se tasi e alofa iā te oe?— E iai tamaiti e manatu faapena. Peitaʻi, na folafola mai e le Atua: “E lē galo lava oe iā te aʻu.” (Isaia 49:15) O le manaia ia o lenā manatu, a ea?— Ioe, e alofa moni lava Ieova le Atua iā i tatou!

Na faapea mai se tasi tusitala o le Tusi Paia: “E ui lava ina tuua aʻu e loʻu tamā ma loʻu tinā, a e talia aʻu e Ieova.” (Salamo 27:10) O le iloaina o lenā manatu, e faamāfanafana ai i tatou, a ea?— Ioe, ua fetalai mai Ieova iā i tatou: “Aua e te fefe, auā ou te iā te oe; . . . e moni, ou te fesoasoani iā te oe.”​—Isaia 41:10.

Peitaʻi, i nisi taimi e faataga ai e Ieova Satani na te aumaia faafitauli iā i tatou. E faataga foʻi e Ieova Satani e tofotofoina Ana auauna. I se tasi taimi, na aumai ai e Satani mafatiaga iā Iesu lea na māfua ai ona alaga atu Iesu iā Ieova: “Loʻu Atua e, loʻu Atua e, se ā le mea ua e tuulafoaʻi mai ai aʻu?” (Mataio 27:46) E ui lava na matuā tigāina Iesu, ae na silafia e Iesu o loo alofa mai pea Ieova iā te ia. (Ioane 10:17) Na silafia foʻi e Iesu, e faataga e le Atua Satani na te tofotofoina Ana auauna, ma aumai mafatiaga iā i latou. O le a faamalamalama i se mataupu o mulimuli mai, le māfuaaga e faataga ai e le Atua, Satani na te faia lenā mea.

E iai taimi tatou te fefefe ai a o tatou laiti. O se faataʻitaʻiga, sa iai ea se taimi na e sē ai i se mea?— Pe na e fefe i lenā taimi?— E toʻatele tamaiti e fefefe. Na faamatalaina e le Faiaʻoga Sili se tala e faatatau i se mea na leiloa. O le tala e uiga i se mamoe na leiloa, ae lē o se tamaitiiti.

 Atonu e mafai ona faatusaina oe i se mamoe. Aiseā? Auā e laiti tino o mamoe, ma e lē malolosi foʻi. E manaʻomia e mamoe se tagata e tausia ma leoleoina i latou. O le galuega lenā a le leoleo mamoe e fai.

I le tala a Iesu, na ia faamatala ai se leoleo mamoe ma ana mamoe e selau. Ae, na leiloa le mamoe e tasi. Atonu na manaʻo lenei mamoe e vaai po o le ā le mea o i le isi itu o le mauga. E leʻi umi lava, ae sē le mamoe mai le mea o iai le lafu mamoe. Pe mafai ona e mafaufau i lagona o si mamoe a o tilotilo solo ua na o ia?—

O le ā le mea o le a fai e le leoleo mamoe, pe a iloa ua leiloa le mamoe e tasi? Faamata e faapea ifo, ou te lē popole fua i ai, tuu ai pea auā o lona lava faatamala? Pe e tuu e le leoleo mamoe isi mamoe e 99 i se nofoaga saogalemu, ae alu atu e suʻe le mamoe ua leiloa? Pe e talafeagai ona faaalu le tele o le taimi, i le suʻeina o lenei mamoe e tasi?— Seʻi faapea o oe o le mamoe ua leiloa, faamata e te manaʻo e alu atu le leoleo mamoe e suʻe mai oe?—

E ese le faapelepele o le leoleo mamoe i ana mamoe, e oo lava i le mamoe ua leiloa. O le māfuaaga lenā na alu ai e suʻe mai le mamoe na leiloa. Seʻi manatu i le fiafia o lenei mamoe i le taimi na vaai mai ai o alu atu le leoleo mamoe! E pei ona fetalai  Iesu, na fiafia le leoleo mamoe ina ua maua lana mamoe. Ua sili atu lona fiafia i le mamoe lenei ua toe maua, na i lo mamoe e 99. O ai la, e tai pei o le leoleo mamoe i le tala a Iesu? O ai e sili lona manatu mamafa mai iā i tatou, faapei ona manatu mamafa le leoleo mamoe i ana mamoe?— Na fetalai Iesu e faapena lona Tamā i le lagi ma o le Tamā o Iesu, o Ieova.

O Ieova le Atua, o le Leoleo Mamoe Sili o ona tagata. E alofa Ieova i tagata uma lava e auauna iā te ia, e aofia ai ma tamaiti e pei o oe. E lē manaʻo Ieova tatou te mafatia pe oo foʻi i le oti. O le mea moni, o se faamāfanafanaga le iloa, e matuā manatu mamafa mai Ieova iā i tatou!​—Mataio 18:12-14.

E te talitonu iā Ieova le Atua?— Pe e moni Ieova iā te oe?— E moni e lē mafai ona tatou vaai iā Ieova, auā o Ieova o se Agaga. E lē mafai ona tatou vaai i lona tino. Peitaʻi, o loo soifua moni lava Ieova, ma e mafai ona silasila mai iā i tatou. E silafia e Ieova taimi tatou te moomia ai le fesoasoani. E mafai ona tatou talanoa iā  Ieova e ala i le tatalo, e pei ona tatou talanoa atu i se tagata i le lalolagi. E finagalo Ieova tatou te talanoa atu iā te ia.

A faapea la e te faanoanoa ma e lagona e lē o manatu atu se tasi iā te oe, o le ā se mea e tatau ona e fai?— Ia talanoa iā Ieova. Ia faalatalata iā Ieova, ma o le a faamāfanafana ma fesoasoani mai Ieova iā te oe. Ia manatua, e alofa Ieova iā te oe, e tusa lava pe e te lagona e lē o manatu mai se isi iā te oe. Seʻi aumai le tatou Tusi Paia. Ua taʻu mai iā i tatou i le Salamo mataupu 23 fuaiupu 1: “O Ieova, o loʻu leoleo mamoe o ia; e leai se mea ou te mativa ai. Na te ave aʻu i le mea e i ai le vao muʻa ou te taoto ai; na te taʻitaʻi iā te aʻu i tafatafa o vai e tafe lemū.”

Seʻi mātau le isi tala a le tusitala i le fuaiupu e 4: “E ui lava ina ou savali i le vanu o le ata o le oti, ou te lē fefe lava i se mea leaga; auā o oe ta te faatasi ma aʻu; o lau laau ma lou tootoo e faamāfanafanaina ai aʻu.” E faapena faalogona o tagata e avea Ieova ma o latou Atua. E latou te mauaina faamāfanafanaga pe a oo i faafitauli. Pe e faapena ou faalogona?—

E pei ona tausia e se leoleo mamoe alofa lana lafu, e faapena foʻi ona tausia lelei e Ieova ona tagata. E faailoa mai e Ieova le auala saʻo latou te savavali ai, ma e fiafia ona tagata e mulimuli atu i lenā auala. E tusa lava pe siʻomia i latou i tulaga vevesi, ae latou te lē fefefe ai. E faaaogā e le leoleo mamoe se laau umī e puipui ai lana lafu mai  manu feʻai e ono osofaia ana mamoe. Ua faamatala mai e le Tusi Paia le auala na puipuia ai e Tavita, o lē na avea ma leoleo mamoe, ana mamoe mai se leona ma se urosa. (1 Samuelu 17:34-36) E iloa e tagata o le Atua, e puipuia foʻi i latou e Ieova. E mafai ona latou lagonaina le saogalemu, auā o loo faatasi le Atua ma i latou.

E matuā alofa Ieova i ana mamoe, ma e na te tausia faapelepele i latou. Ua fai mai le Tusi Paia: ʻNa te leoleoina lona lafu e pei o le leoleo mamoe. Na te sapaia tamaʻi mamoe i ona lima.’​—Isaia 40:11.

Pe e te lē fiafia la e iloa, e faapena uiga o Ieova?— E te manaʻo e avea oe ma mamoe a Ieova?— E faalogo mamoe i le leo o lo latou leoleo mamoe. E latou te faalatalata i lo latou leoleo mamoe. Pe e te faalogo la iā Ieova?— E te faalatalata atu iā te ia?— E leai la se mea o le a e fefe ai fua, auā e puipuia oe e Ieova.