NA TUU e le Atua Atamu ma Eva i le faatoʻaga o Etena. E ui lava e leʻi usiusitai ma mulimuli ane la feoti, ae na saunia e le Atua le auala ina ia mafai ai e a la fanau, e aofia ai ma i tatou i aso nei, ona ola e faavavau i le Parataiso. Na folafola mai e le Tusi Paia: “E fai lava le nuu mo tagata amiotonu, e nonofo ai pea i latou.”​—Salamo 37:29.

O loo taʻua i le Tusi Paia le “lagi fou” ma le “lalolagi fou.” (Isaia 65:17; 2 Peteru 3:13) O le “lagi” i le taimi nei o loo faia aʻe e malo o tagata, peitaʻi o le “lagi fou” o loo faia aʻe e Iesu Keriso ma ē latou te pule faatasi i le lagi. Maʻeu se taimi fiafia pe a oo ina pulea le lalolagi aoao e lenei lagi fou, po o le malo amiotonu ma le filemu a le Atua!

O le ā la le “lalolagi fou”?— O le lalolagi fou o tagata lelei e alolofa iā Ieova. E tatau ona e malamalama, i nisi taimi pe a talanoa le Tusi Paia i “le lalolagi” e mafai ona faasino atu i le lalolagi o tagata ae lē o le laueleele. (Kenese 11:1; Salamo 66:4; 96:1) O lea la, o tagata o le a faia aʻe ai le lalolagi fou o le a nonofo pea i le lalolagi lenei.

O le a lē toe iai le lalolagi o tagata amioleaga o loo iai i le taimi nei. Manatua foʻi, na aveesea e le Lolo o aso o Noa le lalolagi o tagata amioleaga. E pei foʻi ona tatou aʻoaʻoina, o le a faaumatia le lalolagi amioleaga iā Amaketo. Seʻi tatou vaai la pe faapeʻī le olaga i le lalolagi fou a le Atua pe a mavae Amaketo.

 E te fia ola e faavavau i le Parataiso i le lalolagi fou filemu a le Atua?— E leai se fomaʻi e mafai ona aumaia le ola e faavavau iā i tatou. E leai foʻi se fualaau e mafai ona aveesea ai le oti. E pau le auala e mafai ona tatou ola ai e faavavau, o le faalatalata atu lea i le Atua. Na taʻu mai e le Faiaʻoga Sili le auala tatou te ausia ai lenā mea.

Manaia pe a aumai a tatou Tusi Paia ma suʻe i le Ioane mataupu e 17, fuaiupu e 3. O loo maua ai le faamatalaga a le Faiaʻoga Sili: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.”

O le ā la na fetalai i ai Iesu e tusa ma le mea e tatau ona tatou faia, ina ia maua ai le ola e faavavau?— Muamua lava, e tatau ona tatou iloa lelei Ieova lo tatou Tamā o i le lagi, faapea ma lona Alo, o lē na foaʻi mai lona ola mo i tatou. O lona uiga, e tatau ona tatou suʻesuʻeina le Tusi Paia. Ua fesoasoani lenei tusi, Ia Faalogo i le Faiaʻoga Sili, ina ia tatou faia faapea.

E faapefea ona tatou maua le ola e faavavau pe a tatou aʻoaʻoina tala e uiga iā Ieova?— E pei lava ona moomia ona tatou aai i aso uma, e faapena foʻi ona moomia ona tatou aʻoaʻoina tala e uiga iā Ieova i aso uma. Ua faapea mai le Tusi Paia: “E lē na o mea e ʻai e ola ai le tagata, a o afioga uma e tulei mai i le fofoga o le Atua.”​—Mataio 4:4.

E moomia foʻi ona tatou iloa lelei Iesu Keriso, auā na auina mai o ia e le Atua e aveesea a tatou agasala. Ua faapea mai le Tusi Paia: “E leai foʻi se tasi ua i ai le ola.” Ua taʻua foʻi e le Tusi Paia: “O lē faatuatua i le Alo, ua iā te ia le ola faavavau.” (Galuega 4:12; Ioane 3:36) O le ā le uiga o le “faatuatua” iā Iesu?— O lona uiga e tatou te matuā talitonu iā Iesu ma tatou iloa faapea ana lē seanoa Iesu, semanū e lē mafai ona tatou ola e faavavau. Pe tatou te talitonu i lenā tala?— Afai tatou te talitonu i ai, o le a faaauau pea la ona tatou aʻoaʻoina tala a le Faiaʻoga Sili i aso uma ma e tatou te usiusitai i mea ua fetalai mai ai.

 O se tasi o auala lelei e mafai ona tatou aʻoaʻo ai tala a le Faiaʻoga Sili, o le faitauina pea lea o lenei tusi ma ia matamata i ata taʻitasi ma mafaufau lelei i ai. Ia taumafai e tali fesili o loo iai faatasi ma ata. E lē gata i lea, ia faitau faatasi le tusi ma si ou tinā po o si ou tamā foʻi. A faapea e lē o avanoa nai ou mātua, ia faitau faatasi ma nisi tagata matutua po o isi foʻi tamaiti. Oka se manaia pe afai e te fesoasoani i isi tagata, ina ia latou faalogo i le Faiaʻoga Sili i le mea e tatau ona latou fai, e maua ai le ola e faavavau i le lalolagi fou a le Atua, a ea?—

Ua taʻu mai e le Tusi Paia iā i tatou: “E mavae atu foʻi le lalolagi.” Peitaʻi, o loo faamatala mai e le Tusi Paia le auala e mafai ona tatou ola ai e faavavau i le lalolagi fou a le Atua. O loo faapea mai: “O lē fai le finagalo o le Atua, e tumau lea e faavavau.” (1 Ioane 2:17) E faapefea la ona tatou ola e faavavau i le lalolagi fou a le Atua?— Ioe, e ala lea i lo tatou iloa lelei o Ieova ma lona Alo pele, o Iesu. Peitaʻi, e moomia foʻi ona tatou faatatauina mea ua tatou iloaina. Tau ina ia fesoasoani le suʻesuʻeina o lenei tusi iā te oe ina ia e faia ai faapea.