I SE isi aso, na sau ai se tamāloa e talanoa iā Iesu. Na iloa e le tamāloa o Iesu e atamai tele, ma o le ala lea na fesili atu ai iā Iesu: ʻLe aʻoaʻo e, fai i loʻu uso e aumai ma aʻu isi o ana mea.’ Sa manatu le tamāloa lenei, e tatau ona avatu ma ia nisi mea a lona uso.

Ana faapea o oe o Iesu, o le ā sau tala e fai?— Na iloa e Iesu e sesē mafaufauga o le tamāloa lenei. E lē faapea na manaʻo o ia i mea a lona uso ona faapea e mativa. O le mea e sesē ai, e leʻi iloa e le tamāloa le mea e sili ona tāua i le olaga.

Seʻi tatou mafaufau i ai. O le ā e ao ona sili ona tāua iā i tatou? O le maua ea o mea taalo mananaia, o ofu fou, po o mea faapena?— E leai, e iai se isi mea e sili atu ona tāua. O le lesona lenei na manaʻo Iesu e aʻoaʻo atu i tagata. O lea na faamatala ai e Iesu se tala e uiga i se tamāloa na galo iā te ia le Atua. E te fia faalogo i le tala?—

O lenei tamāloa, o se tagata e mauʻoa tele. Sa iai ona fanua ma fale tuu saito. Na fua lelei faatoʻaga a le tamāloa. E leʻi lava le avanoa i ona fale tuu saito e faaputu uma ai saito na seleseleina. O le ā se mea o le a ia fai? Na faapea ifo iā te ia: ʻO le a talepe i lalo oʻu fale saito ma toe fai ni fale e tetelē atu. Ona faaputu uma lea o aʻu saito ma mea lelei uma i fale saito fou.’

Sa manatu le tamāloa mauʻoa, o se gaoioiga atamai le mea o le a ia faia.  Na faapea a ia ua tele lona poto, pe a faaputu le tele o mea. Sa faapea ifo iā te ia: ʻUa tele mea lelei ua ou faaputuina. O le a aogā iā te aʻu mo le tele o tausaga. O le taimi la lenei ou te lē toe popole i se mea e tasi. O le a na o loʻu ʻai, inu ma fiafia.’ Peitaʻi, na sesē mafaufauga o le tamāloa mauʻoa. E te iloa, aiseā na sesē ai?— Sa manatu le tamāloa na o ia ma lona lava lelei. Sa galo i le tamāloa mauʻoa le Atua.

Ona fetalai mai lea o le Atua i le tamāloa mauʻoa. Na faapea mai: ʻO oe na le vale. E te oti i le pō nanei. E fai ma ai mea ua e faaputuina?’ Faamata e mafai ona toe faaaogā e le tamāloa mauʻoa ana mea pe a oti?— E leai, o le a maua e se isi tagata. Na faapea atu Iesu: “O loo faapea foʻi lē faaputu ʻoa iā te ia, a e lē mauʻoa i le Atua.”​—Luka 12:13-21.

E te lē manaʻo ia pei oe o le tamāloa mauʻoa lenā, a ea?— Na pau lava le mea e manaʻo ai, ia maua ana mea faitino. E sesē le manatu  lenā. Na manaʻo le tamāloa ia atili tele mea na te mauaina. Ae e leʻi “mauʻoa i le Atua.”

E toʻatele tagata e pei o le tamāloa mauʻoa. E mananaʻo lava ia tele atu mea latou te mauaina. Peitaʻi, e mafai ona oo ai i le tele o faafitauli. O se faaaʻoaʻoga, e iai au mea taalo, a ea?— O ā nisi o au mea taalo? Seʻi taʻu mai iā te aʻu.— Ae ā pe a iai se polo po o se pepe mea taalo po o se isi mea taalo a sau uō, ae e leai sau mea taalo faapena? Pe e saʻo la pe a e taumafai e tauanau ou mātua e faatau mai se mea taalo faapena mo oe?—

Atonu e iai taimi e tāua ai se mea taalo iā te oe. Ae o le ā e iʻu ina tupu i le mea taalo lenā?— E faasolosolo ina tuai. Atonu e malepe i se taimi, ona e lē toe manaʻo lea i ai. O le mea moni, o loo e mauaina se mea e sili atu ona tāua na i lo mea taalo. E te iloa lenā mea?—

O lou ola. E tāua tele lou ola, auā e tele mea e mafai ona e faia pe afai e maua pea lou ola. Ae e faalagolago lou ola i le faia o le mea e fiafia i ai le Atua, a ea?— O lea la, aua neʻi o tatou pei o le tamāloa mauʻoa valea lea na faagaloina le Atua.

 E lē na o tamaiti e mafai ona faia ni mea valea e pei o le tamāloa mauʻoa lenā. E fai foʻi e tagata matutua. O nisi o i latou e mananaʻo i mea e sili atu na i lo mea ua latou maua. Atonu o loo maua a latou meaʻai, o ofu, ma se fale e nonofo ai. Ae o loo mananaʻo pea i isi mea. Ua mananaʻo i le tele o ofu. E mananaʻo foʻi i fale e tetelē atu. E tele tupe e alu ai i mea faapenei. O le ala lea latou te galulue mamafa ai, ina ia maua le tele o tupe. O le tele o tupe latou te mauaina, o le tele foʻi lenā o mea e mananaʻo ai.

O isi tagata matutua ua pisi tele i le suʻeina o tupe, ua lē maua ai se taimi e faatasi ai ma o latou aiga. E leai foʻi so latou taimi mo le Atua. Pe mafai ona latou mauaina le ola ona o a latou tupe?— E leai. Faamata e mafai ona latou faaaogāina a latou tupe pe a feoti?— E leai. Talu ai, e lē mafai e i latou ua feoti ona fai se mea.​—Failauga 9:5, 10.

Po o lona uiga la, e sesē le iai o tupe?— E leai. E mafai ona tatou faaaogā tupe e faatau ai o tatou ofu ma meaʻai. Ua fai mai le Tusi Paia, e iai le aogā o tupe. (Failauga 7:12) Peitaʻi, o le a anoanoaʻi o tatou faafitauli pe afai tatou te mananaʻo tele i tupe. O le a pei ai i tatou o le tamāloa mauʻoa valea lea na faaputu ana mea mo ia lava, ae e leʻi mauʻoa i le Atua.

O le ā le uiga o le mauʻoa i le Atua?— O lona uiga, ia faamuamua le Atua i o tatou olaga. Ua fai mai isi tagata latou te talitonu i le Atua. E manatu i latou, ua lava na o le talitonu i le Atua. Peitaʻi, faamata o mauʻoa moni tagata na i le Atua?— E leai, e pei i latou o le tamāloa mauʻoa lea na galo iā te ia le Atua.

E leʻi galo lava iā Iesu lona Tamā i le lagi. E leʻi taumafai Iesu ia tele ni ana tupe. E leʻi tele foʻi ni ana mea faitino. Na silafia e Iesu le mea e sili ona tāua i le olaga. E te iloa lenā mea?— O le mauʻoa i le Atua.

Seʻi taʻu mai iā te aʻu, pe faapefea ona tatou mauʻoa i le Atua?— E mafai ona tatou mauʻoa i le Atua e ala i le faafiafiaina o Ia. Na faapea  mai Iesu: “Ou te faia pea lava o mea e lelei iā te ia.” (Ioane 8:29) E fiafia le Atua pe a tatou faia mea lelei mo ia. Seʻi taʻu mai iā te aʻu, o ā mea e mafai ona e fai e faafiafiaina ai le Atua?— Ioe, e mafai ona e faitau i le Tusi Paia, auai i sauniga faa-Kerisiano, tatalo i le Atua, ma fesoasoani i isi ia iloa le Atua. O mea na e sili ona tāua i le olaga.

Na tausia e Ieova Iesu auā na mauʻoa Iesu i le Atua. Na tuuina atu e Ieova le taui iā Iesu, o le ola e faavavau. A faapea tatou te faataʻitaʻi iā Iesu, o le a alofa mai Ieova iā i tatou ma o le a ia tausia i tatou. O lea la, ia tatou pei o Iesu ae lē o le tamāloa mauʻoa lea na faagaloina le Atua.