O LE ā le uiga o le mimita? E te iloa?— Seʻi fai se faataʻitaʻiga. Pe sa iai se taimi na e taumafai ai e fai se mea, ae e te lē iloa lelei ona fai? Atonu na e taumafai e kiki se polo soka. Pe na e taumafai foʻi e oso a o tā se tafue. Pe na fai atu se tagata, “Se matuā e valea tele! Ou te poto atu iā te oe”?— Ioe, o le tagata mimita le tagata e faia ni tala faapena.

O ā ni ou faalogona pe a mimita vale se tagata? Pe e te fiafia ai?— O le ā la sou manatu, o ā ni faalogona o isi tagata pe afai e te mimita i au mea e fai?— Pe o se mea lelei le faapea atu i se isi, “Ou te sili atu i lo oe”?— Faamata e fiafia Ieova i tagata faapena?—

Na silafia e le Faiaʻoga Sili tagata na manatu e sili atu i latou na i lo isi. Sa latou gugutu pe mimita vale i mea na latou faia, ma vaai maulalo i isi tagata. O lea na faamatala ai e Iesu se tala i se isi aso, e faaalia ai le sesē o lo latou mimita vale iā i latou lava. Seʻi tatou faalogo atu i le tala.

O le tala e uiga i se tamāloa Faresaio ma se aolafoga. O le ʻau Faresaio o ni taʻitaʻi lotu ma e masani ona latou manatu e sili atu lo latou amiotonu po o lo latou paia, i lo isi tagata. E tusa ma le tala a Iesu, na alu atu le Faresaio i le malumalu o le Atua i Ierusalema, e fai ai lana tatalo.

Na taʻua e Iesu, na alu atu foʻi le aolafoga i le malumalu e tatalo ai. E leʻi fiafia le toʻatele o tagata i aolafoga. Na manatu tagata faapea e faoa e le ʻauaolafoga a latou tupe. O le mea moni, e tele ina lē faamaoni le toʻatele o aolafoga.

 Sa faapea le tatalo a le Faresaio a o iai i le malumalu: ʻLe Atua e, ou te faafetai atu iā te oe, auā ou te lē pei o isi tagata. Ou te lē fao mea ma e lē leaga laʻu amio. Ou te lē pei o lelā tagata aolafoga. O aʻu o se tagata amiotonu. Ou te anapogi faalua i le vaiaso ina ia tele ai le taimi ou te manatunatu iā te oe. E avatu foʻi i le malumalu le sefuluaʻi o mea uma ou te maua.’ Ioe, na manatu le Faresaio e sili atu lava ia i lo isi, a ea?— Na faailoa foʻi e le Faresaio lona manatu lenā, i le Atua.

Peitaʻi, e leʻi faapena le aolafoga. E leʻi mafai ona tilotilo le aolafoga i le lagi a o fai lana tatalo. Sa tū mamao ese ma punou lona ulu. Na matuā salamō le aolafoga i ana agasala, ma na pōpō lona fatafata e faaalia ai lona mafatia. E leʻi taumafai le aolafoga e taʻu atu i le Atua, mea lelei na ia faia. Na i lo lea, na tatalo atu i le Atua: “Le Atua e, ia e alofa mai iā te aʻu le tagata agasala.”

O le ā sou manatu, o ai o tamāloloa nei e toʻalua na fiafia i ai le Atua? Po o le Faresaio, o lē e manatu faapea o ia o se tagata lelei? Po o le aolafoga, o lē na salamō i ana agasala?—

Na taʻua e Iesu, sa fiafia le Atua i le aolafoga. Aiseā? Na faamatala mai e Iesu le māfuaaga: “Auā o sē faamaualuga iā te ia, e faamaulaloina lea; a o lē faamaulalo iā te ia, e faamaualugaina lea.”​—Luka 18:9-14.

O le ā le lesona na aʻoaʻoina mai e Iesu i lana tala?— Na aʻoaʻo mai e Iesu  faapea, e sesē pe a tatou manatu e sili i tatou na i lo isi. Atonu tatou te lē taʻuina saʻo atu e sili i tatou i isi, ae e ono faaalia i a tatou mea e fai lo tatou manatu maualuga iā i tatou lava. Faamata sa iai se taimi na e faapena ai?— Seʻi manatu i le aposetolo o Peteru.

Ina ua taʻu atu e Iesu i ona aposetolo, o le a latou tuulafoaʻia o ia pe a puʻeina, na mimita vale Peteru ma faapea atu: ʻE ui lava ina tuua oe e tagata uma, ae ou te lē tuua lava oe’! Ae na sesē Peteru. Na soona mautinoa Peteru iā te ia lava. Na tuua e Peteru, Iesu. Peitaʻi, o le a tatou iloa i le Mataupu e 30 o le tusi lenei, na toe foʻi atu Peteru iā Iesu.​—Mataio 26:31-33.

Seʻi fai se faataʻitaʻiga i se mea e ono tupu i aso nei. Atonu e fesili atu le faiaʻoga iā te oulua ma se isi tamaitiiti o lau vasega. O le ā lau mea e fai pe afai ua e iloa le tali saʻo, ae e lē o iloa e le isi tamaitiiti? E moni, o se mea e fiafia ai pe a e iloa le tali saʻo. Ae faamata o se mea lelei pe a e faatusatusaina oe i si tamaitiiti e leʻi mafai ona faia vave sana tali?— Po o se mea lelei le taʻu faatauvaa o se isi tagata ina ia taʻuleleia ai oe?—

O le mea lenā na fai e le Faresaio. Na mimita vale le Faresaio e faapea e sili atu ia i le aolafoga. Peitaʻi, na fetalai mai le Faiaʻoga Sili e sesē le Faresaio. E moni, atonu e lelei atu se mea e mafai ona fai e se tasi tagata na i lo le isi. Ae e lē faapea ai ua sili atu le lelei o le tagata lenā na i lo le isi.

Afai e tele atu mea ua tatou iloaina i lo se isi tamaitiiti, po o se māfuaaga lelei ea lenā tatou te mimita ai?— Ia manatu i le mea lenei. Pe na tatou faia o tatou faiʻai?— E leai, na faia e le Atua. O le tele o mea e tatou te iloaina, na tatou aʻoaʻoina mai i isi tagata. Atonu na tatou faitau ai i tusi. Pe na taʻu mai foʻi e se tagata. E tusa foʻi pe tatou te iloaina le tali i se faafitauli e aunoa ma le fesoasoani mai o se isi, ae na faapefea ona tatou iloaina le tali lenā?— Ioe, e ala i le faaaogāina o o tatou faiʻai na foaʻi mai e le Atua.

 Afai o loo taumafai se tamaitiiti e fai se mea, e lelei lou faamālō i ai ina ia faalaeiau ai si tamaitiiti. Ia fai i ai, e te fiafia i le mea na ia faia. Atonu e mafai foʻi ona e fesoasoani i ai e faaleleia atili le mea na ia faia. O le mea lenā e te manaʻo e fai e se isi tamaitiiti iā te oe, a ea?—

E malolosi atu isi tagata na i lo isi. Ae ā pe afai e te malosi atu na i lo o ou tei? Po o se māfuaaga lelei lenā e te mimita ai?— E leai. E māfua ona tatou malolosi, ona o meaʻai tatou te aai ai. Na faia e le Atua le lā, le timu atoa ai ma isi mea uma ina ia fesoasoani e ola lelei ai a tatou meaʻai, a ea?— O lea la, e tatau ona tatou faafetai i le Atua mo lo tatou malosi.​—Galuega 14:16, 17.

E leai se isi o i tatou e fia faalogologo i se tagata e mimita vale, a ea?— Aua neʻi galo iā i tatou fetalaiga a Iesu: ʻO mea tou te mananaʻo e fai mai e tagata iā te outou, ia faapea ona outou faia iā i latou.’ A tatou faia faapea, e lē taitai ona pei i tatou o le Faresaio i le tala a le Faiaʻoga Sili, lea na mimita vale i ana mea na fai.​—Luka 6:31.

 Na iai le taimi na faapea atu ai se tamāloa, o Iesu e lelei. Pe na fetalai atu le Faiaʻoga Sili, ʻE moni, o aʻu o se tagata lelei?’— E leai. Na i lo lenā, na faapea atu Iesu: “E leai se tasi e lelei, na o le toʻatasi lava, o le Atua lea.” (Mareko 10:18) E ui lava e lelei atoatoa le Faiaʻoga Sili, ae e leʻi mimita ai i lona tulaga. Na i lo lea, na avatu e Iesu le viiga uma i lona Tamā, o Ieova.

Faamata la e iai se isi e mafai ona tatou mitamita ai?— Ioe, e iai. E mafai ona tatou mitamita i Lē na Faia i tatou, o Ieova le Atua. Afai tatou te vaaia se lāgoto matagofie po o se isi mea manaia, e mafai ona tatou fai atu i se isi, ʻNa faia e le Atua alofa, o Ieova, le mea lenā!’ Ia tatou nofo sauni e taʻutaʻu atu mea ofoofogia ua uma ona faia e Ieova, ma mea o le a ia faia i le lumanaʻi.