E TE masani i ni tama po o ni teine e ese le fia malolosi?— Pe e te fiafia e faauō i tamaiti faapena? Pe e lē sili atu ona e fia uō i tamaiti agalelei ma filemu?— Na faapea mai le Faiaʻoga Sili: “Amuia ē faatupuina le filemu; auā e taʻua i latou o atalii o le Atua.”​—Mataio 5:9.

Ae i isi taimi, e fai ai e tagata mea tatou te feita ai. Pe lē o le tulaga moni ea lenā?— Atonu e oo iā i tatou ni lagona o le toe fia taui atu le leaga i na tagata. Na faapena foʻi faalogona na oo i soo o Iesu a o latou faimalaga faatasi ma Iesu agaʻi i Ierusalema. Seʻi oʻu faamatala atu le mea na tupu.

A o alu la latou malaga, na auina ai e Iesu nisi o ona soo e muamua atu i le aai o Samaria, e saʻili se nofoaga latou te mālōlō ai. Peitaʻi, e leʻi mananaʻo tagata o le nuu e mālōlō i inā Iesu ma ona soo ona e ese le tapuaʻiga a tagata Samaria. E lē gata i lea, latou te lē fiafia i tagata e ō i Ierusalema e tapuaʻi ai.

 Ana o oe lea na tupu ai le mea lenā, o le ā sau mea e fai? Faamata e te ita? Pe e te manaʻo e toe taui atu le leaga i na tagata?— O le mea lenā na mananaʻo ai le soo o Iakopo ma Ioane e fai. Na la fai atu iā Iesu: ʻPe e te manaʻo ma te fai atu ia alu ifo le afi mai le lagi, ma feoti ai i latou?’ E lētioa lava a faaigoa i laʻua e Iesu, o Tagata Faititili! Ae na fetalai atu Iesu iā i laʻua, e lē saʻo le fai faapena o tagata.​—Luka 9:51-56; Mareko 3:17.

E moni, atonu e agaleaga mai tagata iā i tatou i nisi taimi. Atonu e lē mananaʻo isi tamaiti tatou te auai i a latou taaloga. E ono faapea mai: “Alu ese, matou te lē fiafia iā te oe.” E mafai ona tatou faanoanoa pe a tupu se mea faapena iā i tatou, a ea? Atonu tatou te mananaʻo e fai se mea e toe taui atu ai. Peitaʻi, faamata e tatau ona toe taui atu?—

E lelei pe a aumai le Tusi Paia. Ia suʻe i le Faataoto mataupu e 24, fuaiupu e 29. Ua faapea mai: “Aua neʻi e faapea ane, E pei ona faia e le tagata iā te aʻu, e faapea lava ona ou faia iā te ia; ou te taui atu iā te ia e tusa ma lana mea ua fai.”

O le ā sou manatu, o le ā le uiga o lenā fuaiupu?— O loo faapea mai e lē tatau ona tatou taui atu i isi. E lē tatau ona agaleaga atu i se tagata ona sa agaleaga mai. Ae ā pe a faamisa se tamaitiiti iā te oe? Atonu e taumafai e faaita oe e ala i le faifai atu iā te oe. E ono ula ma faapea atu e ese lou matafefe ma taʻua ai oe o le palaai. O le ā le mea e tatau ona e fai? Pe tatau ona lua fufusu loa?—

Seʻi o tatou toe tilotilo i le mea o fai mai ai le Tusi Paia. Suʻe foʻi i le Mataio mataupu e 5, fuaiupu e 39. Na faapea mai Iesu: “Aua neʻi outou tetee atu i le leaga; ai sē na te po mai i lou alafau taumatau, ia e liliu atu iā te ia le isi.” O le ā sou manatu, o le ā le uiga o le tala lenā a Iesu? Po o lona uiga ea, afai e tuʻi e se tagata le tasi itu o lou gutu, e tatau ona tuu i ai le isi itu o lou gutu e toe tuʻi foʻi?—

 E leai, e lē o le uiga lenā o le tala a Iesu. E lē tutusa le po i le gutu ma le tuʻi o le gutu. Peitaʻi, e tai pei o le tago atu o se tagata ma tulei se isi tagata. Atonu e po i tatou e se tasi ona e fia fusu mai, ma e manaʻo e faaita i tatou. A faapea la e oso aʻe lo tatou ita ma tatou tuleiina lenā tagata, o le ā e tupu?— Atonu o le a iʻu ai ina tatou fufusu.

Peitaʻi, e leʻi manaʻo Iesu e fufusu ona soo ma isi tagata. O le ala lea na fetalai mai ai, a faapea e po i tatou e se tagata, e lē tatau ona tatou toe po atu. E lē tatau ona tatou feita ma fufusu ai. Afai e faapea a tatou amio, e faailoa ai e tutusa lava i tatou ma tamaiti fia malolosi ma fia fufusu.

A faapea ua amata se misa, o le ā sou manatu, o le ā le gaoioiga poto e mafai ona e faia?— Ia savali ese. E ono faaauau ona tulei oe e le isi tamaitiiti. Peitaʻi, atonu e uma ai le misa pe a e savali ese.  Afai e te savali ese, e lē faapea ua e palaai. Ae ua faaalia ai, o oe o se tamaitiiti malosi o loo manaʻo e fai le mea e lelei.

Ae ā pe afai lua te fufusu ma se isi, ma e mālō ai? O le ā se mea e ono tupu?— Atonu e alu le tamaitiiti lea na faiaʻina, ma aumai ana uō. E latou te ono faamanuʻalia oe i se laau po o se naifi. Ua e malamalama la i le māfuaaga na lē manaʻo ai Iesu tatou te fufusu?—

O le ā le mea e tatau ona fai pe a tatou vaaia o loo fufusu ni tagata? Pe tatau ona tatou ʻau ma se tasi o ē o loo fusu?— Ua taʻu mai e le Tusi Paia le mea saʻo e tatau ona fai. Ia suʻe i le Faataoto mataupu e 26, fuaiupu e 17. Ua fai mai: “O lē ua tago i taliga o le ulī, o le tagata lea ua alu ane, ma oso vale i le misa ese.”

O le ā e tupu pe a e tosoina le taliga o se ulī po o se maile? E tigā le taliga o le maile ma o le a taumafai e ū oe, a ea? A o taumafai le maile e sola ese, e te taumafai foʻi e uumau taliga o le maile, ma e atili ai ona feʻai. A faapea la e faamamulu lou lima, atonu e faasaga atu le maile ma ʻai oe. Faamata e mafai ona e uumauina pea taliga o se maile?—

O iʻuga lē lelei na e oo iā i tatou pe a tatou auai fua i se fusuaga a isi tagata. E tatou te lē iloa po o ai na amataina le misa, ma po o le ā foʻi le māfuaaga ua fufusu ai. Atonu o le māfuaaga ua fasi ai se tagata, ona ua ia gaoia se mea a le isi tagata. A faapea la tatou te  fesoasoani i ai, ua tatou fesoasoani foʻi la i le tagata gaoi. E lē saʻo lenā mea, a ea?

O le ā la se mea e te faia pe a e vaaia ni tagata o fufusu?— A faapea o loo tupu i le aʻoga, e mafai ona e tamoʻe vave e taʻu i le faiaʻoga. Ae a faapea o se isi nofoaga o loo fufusu ai, e mafai ona e telefoni i ou mātua pe taʻu atu foʻi i se leoleo. Ioe, e tusa lava pe faamimisa mai isi tagata, e tatau pea ona tatou tausia le filemu.

E taumafai malolosi soo moni o Iesu ia aua neʻi fufusu ma isi. O lo tatou faia faapea, ua faaalia ai lo tatou tū malosi mo le mea saʻo. Ua fai mai le Tusi Paia ʻe lē tatau ona faamisa,’ soo o Iesu ʻa ia agamalu i tagata uma.’​—2 Timoteo 2:24.