E TE fiafia pe afai e pule lava oe i au mea e fai? E iai ni taimi e te manatu ai maʻimau e, pe ana lē faatonu mai oe e isi i le mea e fai? Aua e te pepelo, taʻu saʻo mai lau tali.—

Ae, o fea e lelei mo oe? Pe e atamai ea le pule lava oe i au mea e fai? Pe e lē sili atu ai pe a e usitai i lou tamā ma lou tinā?— Talu ai ua faapea mai le Atua e tatau ona e usitai i ou mātua, e ao la ona iai se māfuaaga lelei e tatau ai ona e usitai iā i laʻua. Seʻi o tatou vaai po o le ā le māfuaaga e tatau ai ona e usitai i ou mātua.

E fia ou tausaga?— E te iloa e fia tausaga o lou tamā?— E fia tausaga o lou tinā, po o mātua o ou mātua?— E sili atu le tele o o latou tausaga na i lo oe. O le tele o tausaga o se tasi, o le tele foʻi lenā o mea na te iloaina. E sili atu mea ua faalogo i ai, vaai i ai ma faia e le tagata lenā i tausaga taʻitasi. O lea la, e tele mea e iloa ma aʻoaʻoina e tamaiti mai tagata matutua.

E te iloa se tamaitiiti e laʻitiiti iā te oe?— Pe e sili atu mea e te iloa na i lo le tamaitiiti lenā?— Aiseā?— Ona e te matua atu na i lo ia. E sili atu ona tele tausaga ua e aʻoaʻoina ai mea, na i lo se tamaitiiti e laʻitiiti iā te oe.

O ai la se tasi e sili atu ona tausaga na i lo oe, o aʻu, po so o se isi lava?— O Ieova le Atua. E sili atu lona malamalama i mataupu  uma na i lo oe ma aʻu. A faapea mai Ieova tatou te faia se mea, e mafai ona tatou mautinoa e saʻo le mea lenā, e ui atonu e faigatā ona fai. Pe na e iloa, e oo lava i le Faiaʻoga Sili e iai le taimi na faigatā ai ona usitai?—

I se tasi aso, na fetalai atu le Atua iā Iesu e fai se galuega faigatā. Na tatalo Iesu e tusa ai ma le mea faigatā lenā, e pei ona tatou vaaia i le ata. E faapea le tatalo a Iesu: ʻA e finagalo i ai, ia e ave ese lenei mea faigatā ua iā te aʻu.’ Ua faaalia e Iesu e ala i lana tatalo lenei, sa lē faigofie ona fai le finagalo o le Atua i nisi taimi. Ae o le ā le faaiʻuga o le tatalo a Iesu? E te iloa?—

Na faapea le faaiʻuga o lana tatalo: “Aua le faia loʻu loto, a o lou finagalo.” (Luka 22:41, 42) Ioe, na manaʻo Iesu e fai le finagalo o le Atua, ae lē o le mea na ia loto i ai. Na faia foʻi e Iesu le mea na finagalo i ai le Atua, na i lo le mea e saʻo i lona manatu.

O le ā le mea tatou te iloa mai i inei?— Ua tatou iloa ai, o mea uma lava e fetalai mai ai le Atua e saʻo, e ui e lē faigofie. Ae ua tatou iloa ai foʻi ma se isi mea. E te iloa le mea lenā?— Ua tatou iloa ai, e lē tutusa le Atua ma Iesu e pei ona fai mai ai isi tagata. E matua atu ma e sili atu mea e silafia e Ieova le Atua, na i lo lona Alo o Iesu.

E faaalia lo tatou alofa i le Atua pe a tatou usiusitai iā te ia. Ua faapea mai le Tusi Paia: “Auā o lenei lava le alofa i le Atua, ia tatou tausi i ana poloaʻiga.” (1 Ioane 5:3) O lea la ua manino mai, o i tatou uma lava e tatau ona usiusitai i le Atua. E te manaʻo e te usitai i le Atua, a ea?—

 Seʻi suʻe a tatou Tusi Paia ma vaai i le mea ua fai mai ai le Atua, e tatau ona fai e tamaiti. O le a tatou faitau i le Efeso mataupu e 6, fuaiupu 1 seʻia oo i le 3. Ua faapea mai: “O outou le fanau, ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā; (o le uluaʻi tulafono lea ua i ai le mea ua folafolaina), ina ia manuia ai oe, ma ia e nofo tuluʻi ai i luga o le laueleele.”

O lona uiga la, o loo fai mai Ieova e te usitai i lou tamā ma lou tinā. O le ā le uiga o le “ava” i lou tamā ma lou tinā? O lona uiga, e te faaalia le faaaloalo iā i laʻua. Ua folafola mai e le Atua afai e te usitai i ou mātua, o le a ʻe manuia ai.’

Seʻi oʻu faamatala atu se tala i ni tagata na faasaoina o latou ola, ona o lo latou usiusitai. O nei tagata, na ola i aso ua leva i le aai o Ierusalema. E leʻi faalogo le toʻatele o tagata i le aai lenā i le Atua, ma o le māfuaaga lenā na lapataʻi atu ai Iesu o le a faaumatia e le Atua lo latou aai. Na taʻu atu foʻi e Iesu le auala latou te sao ai, pe afai latou te naunau e faia le mea saʻo. Na faapea atu Iesu: ʻA tou vaai ua siʻomia Ierusalema i ʻautau, ia outou iloa ua latalata ona faaumatia. O lea la, ua tatau ona tou sosola ese mai Ierusalema ma ō atu i mauga.’​—Luka 21:20-22.

Na ō mai ʻautau a Roma e osofaʻi Ierusalema e pei ona taʻua e Iesu. Na tolauapi faataamilo i le aai atoa. Ae na toe foʻi fitafita e ui e leʻi iloa le māfuaaga. O le ala lea na manatu ai le toʻatele o tagata e faapea ua saogalemu le aai, ma na faaauau ona latou nonofo i le aai. Peitaʻi, o le ā le tala a Iesu i le mea e tatau ona latou faia?— O le ā sau mea e fai, pe ana faapea na e iai i lenā taimi i Ierusalema?— O tagata na talitonu moni i mea na fai mai ai Iesu, na latou tuua o latou fale ae sosola i mauga e mamao mai Ierusalema.

E leai se mea na tupu i Ierusalema i le tausaga muamua. E leai  foʻi se mea na tupu i le tausaga na sosoo ai. E faapena foʻi le isi tausaga na sosoo ai, e leai se mea na tupu ai. Atonu na manatu nisi e faapea ua vālea i latou ia na sosola i mauga. Ae peitaʻi, na toe foʻi mai ʻautau a Roma i le tausaga lona fā. Na toe tolauapi faataamilo i le aai o Ierusalema. Ua lē mafai nei ona toe sola se tagata. Ona faaumatia ai loa lea e ʻautau le aai atoa. Na fasiotia le toʻatele o tagata na iai i le aai, ae ave faapagota tagata na totoe.

Ae o le ā na tupu iā i latou na usiusitai i le mea na fetalai mai ai Iesu?— Na faasaoina. E mamao le mea na latou iai mai Ierusalema. O le māfuaaga lenā na latou saogalemu ai. Ona o lo latou usiusitai la, na puipuia ai i latou.

Pe o le a puipuia foʻi oe pe afai e te usitai?— Atonu e faapea atu ou mātua e faasā ona e taalo i luga o le auala tele. Aiseā?— Ina neʻi e lavea i se taavale. Ae atonu e te manatu i se isi aso: ʻE lē o feoaʻi  ni taavale i le auala i le taimi nei. E lē mafai ona ou lavea. O la e taaalo isi tamaiti i luga o le auala tele, ae leai se isi o lavea.’

O le manatu foʻi lenā o le toʻatele o tagata na i Ierusalema. I le taimi na toe foʻi ai ʻautau a Roma, na latou manatu faapea ua leai se mea e toe popole ai. Sa nonofo ai pea isi tagata i le aai. Ona latou nonofo ai foʻi lea ma latou. Ua uma ona lapataʻia i latou, ae latou te leʻi faalogo. O le iʻuga, na latou feoti ai.

Seʻi fai se isi faataʻitaʻiga. Pe sa iai se taimi na e taalo ai i se afi tusi?— O le manaia ia o le tilotilo atu i le mumū o le laau afi tusi. Ae e lē lelei le taalo i le afi tusi. E mafai ona mū ai le fale ma e oti ai!

Ia manatua foʻi, e lē lava le usitai i se taimi puupuu. Ae afai e te usitai i taimi uma, o le a puipuia ai oe. O ai foʻi lea na faapea mai iā te oe, “O outou le fanau, ia outou faalogo i o outou mātua”?— O le Atua. Ia manatua, o le māfuaaga ua fetalai mai ai le Atua e te faalogo i ou mātua, ona e alofa iā te oe.