Mataupu Lua

Ia Faaneeneeina Ieova o le Atua Moni e Toʻatasi

1. O ai le Atua moni e toʻatasi?

UA FAI mai le Tusi Paia, e ui lava ina toʻatele i latou e manatu i ai o ni atua, “a e peitai ua ia te i tatou le Atua e toatasi o le Tamā ia.” (1 Korinito 8:5, 6) O lenā “Atua e toatasi” o Ieova lea, o Lē na Foafoaina mea uma lava. (Teuteronome 6:4; Faaaliga 4:11) Sa taʻua e Iesu faapea, o “loʻu Atua ma lo outou Atua.” (Ioane 20:17) Sa ia ioe faatasi ma Mose, o lē na faapea mai i se taimi muamua atu: “O Ieova o ia lava le Atua [“moni,” NW], e leai se tasi na o ia lava.” (Teuteronome 4:35) E sili atu ona maualuga Ieova i lo se isi lava mea o loo tapuaʻia, e pei o faatusa, o tagata ua tapuaʻia e pei o ni atua, po o lona fili foʻi o Satani le Tiapolo, “le atua o le lalolagi nei.” (2 Korinito 4:3, 4, LF) I se faaeseesega i nei mea uma, o Ieova o ia, e pei ona taʻua ai e Iesu, o “le Atua moni e toatasi.”—Ioane 17:3.

2. A o tatou aʻoaʻoina mea e faatatau i le Atua, e ao faapefea ona aafia ai o tatou olaga?

² O tagata lototalisapaia o ē ua aʻoaʻoina e faatatau i uiga mataʻina o le Atua, atoa ai ma mea ua ia faia ma mea foʻi o le a ia faia mo i tatou, ua latou tosina atu ai iā te ia. A o tuputupu aʻe lo latou alofa mo Ieova, e latou te lagonaina le fia faaneenee atu iā te ia. Faapefea? O se tasi o auala o le taʻu atu lea i isi e faatatau iā te ia. Ua faapea mai le Roma 10:10: “O le gutu e taʻutino ai, e oo mai ai le ola.” O le isi auala, o le faaaʻoaʻo atu iā te ia i a tatou upu ma gaoioiga. Ua faapea mai le Efeso 5:1: “Ia faaaʻoaʻo outou i le Atua, faapei o le fanau pele.” Ina ia sili ona atoatoa lo tatou faia o lenā mea,  e manaʻomia ona tatou iloa Ieova i ona uiga moni e pei ona iai.

3. O ā uiga autū o le Atua?

³ I le Tusi Paia atoa, e anoanoaʻi faamatalaga o loo iai e mafai ona mātaulia ai uiga matilatila o le Atua. O ona uiga autū e fā, o le atamai, le faamasinotonu, le malosi, ma le alofa. “O loo ia te ia le poto [“atamai,” NW].” (Iopu 12:13) ‘E tonu ona ala uma lava.’ (Teuteronome 32:4) E matuā ‘tele lona mana [“malosi,” NW].’ (Isaia 40:26) “O le Atua, o le alofa lava ia.” (1 Ioane 4:8) Peitaʻi, mai uiga autū e fā o le Atua, o lē fea e aupito sili ona matilatila, po o le uiga lea e tele ona faamatalaina mai ai le Atua?

‘O le Atua o le Alofa Lava Ia’

4. O lē fea uiga o le Atua na māfua ai ona ia foafoaina le vateatea ma foafoaga ola uma?

⁴ Seʻi manatu i le māfuaaga na finagalo ai Ieova e foafoaina le vateatea, atoa ai ma foafoaga agaga atamamai ma tagata. Po o lona atamai ea po o lona malosi? E leai, auā e ui sa faaaogā e le Atua na uiga, ae e lē o uiga na sa uunaʻia ai o ia. Ma sa leʻi manaʻomia e lona faamasinotonu ona ia avatu ai le meaalofa o le ola i isi. I lo lea, o le tele o le alofa o le Atua na māfua ai ona ia finagalo, e foaʻi atu i isi le avanoa e olioli ai i ni olaga atamamai. O le alofa na māfua ai ona ia fuafuaina e ola e faavavau i le Parataiso tagata usiusitai. (Kenese 1:28; 2:15) O le alofa na māfua ai ona ia fuafua e aveesea le tulaga malaia lea na aumai e le agasala a Atamu i tagata.

5. E tusa ai o le Tusi Paia, o lē fea uiga ua faatinoina moni mai e Ieova, ma aiseā?

⁵ O lea la, i uiga uma lava o le Atua, e aupito sili ona matilatila ai lona alofa. O lona uiga autū lenā. E ui ina tāua lona atamai, lana faamasinotonu, ma lona malosi, ae lē o fai mai lava le Tusi Paia faapea o Ieova o se tasi o na uiga. Peitaʻi o loo faapea mai o ia o le alofa. Ioe, o Ieova o le faatinoga moni lava o le alofa. O lenei alofa e taʻitaʻia i mataupu silisili ae lē i faalogona  ootia. O le alofa o le Atua, ua pulea e mataupu silisili o le upu moni ma le amiotonu. O le ituaiga alofa lenei e silisili, e pei ona faataʻitaʻia mai e Ieova le Atua lava ia. O lea alofa o se faailoaga o le matuā leai o se manatu faapito, ma e ō faatasi i taimi uma ma gaoioiga moni e faamaonia ai.

6. O le ā ua mafai ai ona tatou faataʻitaʻi atu i le Atua e ui lava e silisili o ia i lo o tatou?

⁶ Ona o le uiga matagofie lenei o le alofa, ua mafai ai ona tatou faataʻitaʻi atu i lea Atua. Talu ai o i tatou o ni tagata faatauvaa, e lē lelei atoatoa ma masei soo, tatou te ono manatu ai, e lē taitai mafai ona tatou faia lenā mea. Peitaʻi o se tasi lenei o faaaʻoaʻoga o le alofa silisili o Ieova: E na te silafia ma malamalama i mea e gata ai lo tatou mafai, ma e na te lē manaʻomia se lelei atoatoa mai iā i tatou. Ua ia silafia e lē o taitai ona tatou oo i se tulaga lelei atoatoa i le taimi lenei. (Salamo 51:5) O le māfuaaga lenā ua faapea mai ai le Salamo 130:3, 4: “Ioa e, afai e te mataulia le amio leaga, le Alii e, o ai se na te mafaia ona tulai? A o ia te oe le faamagaloina o sala.” Ioe, o Ieova o se “Atua alofa mutimutivale ma le alofa fua, e telegese lona toasa, a e tele le alofa.” (Esoto 34:6) “Le Alii e, o oe e lelei, ma ua e faamagalo sala.” (Salamo 86:5) Maʻeu se faamāfanafanaloto! Maʻeu se faalaeiauina o le auauna atu i lenei Atua ofoofogia, ma tofo ai i lana tausiga alofa faapelepele!

7. E mafai faapefea ona tatou vaaia le alofa o Ieova i ana galuega o le foafoaga?

⁷ E mafai foʻi ona vaaia le alofa o Ieova i ana galuega o le foafoaga. Seʻi manatu i le tele o mea lelei ua saunia e Ieova mo le faafiafiaina o i tatou, e pei o atumauga matagofie, o vaomatua, o vaituloto, ma vasa. Ua ia foaʻi mai le matalasi o le anoanoaʻi o taumafa eseese e lelei i le tofo ma tausia ai i tatou. E lē gata i lea, ua saunia e Ieova le anoanoaʻi o ituaiga eseese o fugalaau matagofie e sasala manaia o latou manogi, faapea foʻi ma manu tataa e maofa ai. Sa ia faia mea  ina ia fiafia ai tagata, e ui sa lē tau manaʻomia ona faia na mea. O le mea moni, e lē mafai ona atoatoa lo tatou olioli i lana foafoaga, a o tatou ola i lenei lalolagi amioleaga i lo tatou tulaga lē lelei atoatoa o loo iai nei. (Roma 8:22) Peitaʻi seʻi tau ina faaata i lou mafaufau mea o le a faia e Ieova mo i tatou i le Parataiso! Ua faamautinoa mai e le faisalamo iā i tatou: “O loo e faamafola lou aao, ma faamaoona le manao [talafeagai] o mea ola uma lava.”—Salamo 145:16.

8. O le ā le faaaʻoaʻoga e sili ona matilatila o le alofa o Ieova mo i tatou?

⁸ O le ā le faaaʻoaʻoga e sili ona matilatila o le alofa o Ieova mo tagata? Ua faamatala mai e le Tusi Paia: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) Pe na ala ea ona fai e Ieova lenei mea ona o le lelei o le tagata? Ua tali mai le Roma 5:8 e faapea: “Ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.” O le mea moni, na auina mai e le Atua lona Alo lelei atoatoa i le lalolagi ina ia foaʻi atu lona soifua o se taulaga togiola, e tuusaunoa ai i tatou mai le faamalaiaina i le agasala ma le oti. (Mataio 20:28) O lenei mea na tatala ai le avanoa mo tagata e alolofa i le Atua ina ia maua le ola e faavavau. E tatou te faafetai ona ua faasafua atu le alofa o le Atua iā i latou uma o ē mananaʻo e fai lona finagalo, auā ua faapea mai le Tusi Paia: “E le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.”—Galuega 10:34, 35.

9. E tatau faapefea ona taaʻina i tatou i le mea moni e faapea na auina mai e Ieova lona Alo e fai ma togiola mo i tatou?

⁹ E faapefea i le mea moni e faapea na auina mai e Ieova lona Alo e fai ma togiola mo i tatou, ma tatala ai le ala i le ola e faavavau, ona taaʻina ai le auala tatou te faaaogāina ai  o tatou ola i le taimi nei? E ao ona faalolotoina ai lo tatou alofa mo le Atua moni, o Ieova. I le taimi lava e tasi, e ao ona faapogaia ai lo tatou fia faalogo atu iā Iesu, o lē ua avea ma sui o le Atua. “Na maliu foi [Iesu] ona o tagata uma, ina ia le usiusitai pea o e ola ia te i latou lava, a o ia o le na maliu ma toe tu mai mo i latou.” (2 Korinito 5:15, LF) Maʻeu se faaeaga o le mulimuli i tulagāaao o Iesu, auā sa matuā lelei lava o ia i le faataʻitaʻia o le alofa ma le faapalepale o Ieova! Ua faaalia lenei mea i le fetalaiga na fai atu ai Iesu i ē lotomaulalo: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.”—Mataio 11:28-30.

Le Faaalia o le Alofa mo Isi

10. O ā nisi o auala e mafai ona tatou faaalia ai le alofa mo o tatou uso Kerisiano?

¹⁰ E mafai faapefea ona tatou faaalia o loo tatou alolofa i o tatou uso Kerisiano i le ituaiga o alofa lea e alofa mai ai Ieova ma Iesu mo i tatou? Ia mātau le tele o auala e mafai ona tatou faatinoina ai lenei mea: “E onosai le alofa, e agamalu, e le losilosi le alofa, e le mitamita vale le alofa, e le faafefeteina, e le amio matagā, e le sailia e ia ana lava mea, e le faaitaitagofie, e le faitau leaga ua tuuina mai e nisi, e le fiafia i le amio leaga, a e fiafia i le faamaoni. O le alofa e lavātia mea uma, e leai se mea e gata mai ai lona faatuatua, ma lona faamoemoe ma lona onosai. E le uma le alofa.”—1 Korinito 13:4-8, LF; 1 Ioane 3:14-18; 4:7-12.

11. O ai foʻi isi e ao ona tatou faaalia i ai le alofa, ma e faapefea?

¹¹ O ai isi e ao ona tatou faaalia i ai le alofa, ma e faapefea? Na fetalai Iesu: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma  le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) E aofia ai i lenei mea le tufa atu o le tala lelei o le lalolagi fou faaparataisoina o loo fotuaʻi mai a le Atua, iā i latou e leʻi oo ina avea ma o tatou uso Kerisiano. Sa faaalia manino e Iesu e faapea e lē tatau ona gata mai lo tatou alofa i na o i latou e tutusa o tatou talitonuga, auā na ia fetalai: “Afai tou te alolofa atu i [na o] e ua alolofa mai ia te outou, se a ea se taui tou te maua ai? E le faia ea e tagata ao lafoga o lea lava mea? Pe afai tou te faapito lo outou fealofani i o outou uso, se a se mea sili ua outou faia? E le faapea ea ona faia e tagata faapaupau?”—Mataio 5:46, 47, LF; 24:14; Kalatia 6:10.

“Savavali i le Suafa o Ieova”

12. Aiseā e na o le Atua lava e mafai ona faatatau i ai lona suafa?

¹² O se tasi vala tāua e faaneeneeina ai le Atua moni, o le iloaina, faaaogāina, ma aʻoaʻoina isi i lona suafa tutasi, o Ieova. Na faaleo mai e le faisalamo lenei faanaunauga mai le loto e faapea: “Ina ia iloa e i latou, o oe, e ou le suafa o Ieova, na o oe lava o le Silisili ese i le lalolagi uma.” (Salamo 83:18) O le uiga o le suafa Ieova “O Lē ua Faapogaia.” O ia o Lē Faia Fuafuaga Sili, e na te faataunuuina ma le manuia i taimi uma ana fuafuaga. Ma e na o le Atua moni e mafai ona tauaveina ma le saʻo lenā suafa, auā e lē taitai mafai e tagata ona faamautinoa pe o le a taulau manuia a latou taumafaiga. (Iakopo 4:13, 14) E na o Ieova e mafai ona faapea mai ‘o le a manuia’ lana afioga i le mea ua ia auina atu ai. (Isaia 55:11) E toʻatele ua faagaeetia ina ua latou faatoʻā iloaina le suafa o le Atua i a latou Tusi Paia ma aʻoaʻoina lona uiga. (Esoto 6:3) Peitaʻi e faatoʻā aogā iā i latou lenei iloa, pe a latou “savavali i le suafa o Ieova . . . e faavavau.”—Mika 4:5.

13. O le ā e aofia ai i le iloaina o le suafa o Ieova ma le savavali i lona suafa?

¹³ E tusa ai o le suafa o le Atua, ua taʻua i le Salamo 9:10 e  faapea: “E faatuatua ia te oe o e ua iloa lou suafa.” E tele atu isi mea e aofia ai i lenei iloa, na i lo o le tau ina iloa o le suafa Ieova, auā e lē faapea a iloa ona otometi ai lea ona faatuatua iā te ia. O le iloaina o le suafa o le Atua o lona uiga, ia talisapaia le ituaiga o Atua e iai Ieova, ia faaaloalo i lana pule, ia usiusitai i ana poloaʻiga, ma ia faatuatua iā te ia i mea uma. (Faataoto 3:5, 6) E faapena foʻi i le savavali i le suafa o Ieova ona aofia ai le tuuina atu iā te ia ma fai ma ona sui e ala i le avea ma ona tagata tapuaʻi, e ala i le faaaogā o o tatou olaga ia ōgatasi ma le finagalo o le Atua. (Luka 10:27) Po o e faia lenā mea?

14. Pe afai o le a tatou auauna iā Ieova e faavavau, o le ā e manaʻomia na i lo le manatu i ai ua na o se tiute e ao ona fai?

¹⁴ Pe afai o le a tatou auauna iā Ieova e faavavau, e lē tatau ona uunaʻia i tatou, i le na o se manatu faapea o se tiute e ao ona fai. Na pulunaunau atu le aposetolo o Paulo iā Timoteo, o lē ua tele tausaga o auauna iā Ieova e faapea: “Ia e faamasani i le amio Atua [“tuutoina faale-Atua,” NW].” (1 Timoteo 4:7) O le tuutoina e sau mai se loto ua tumu i le agaga talisapaia mo le tagata lea o loo tuutoina atu i ai. O le “tuutoina faale-Atua” e faaalia mai ai se faaaloalo loloto mo Ieova lava ia. O loo faailoa mai ai se alofa māfana iā te ia ona o le matuā faasilisilia o ia ma ona ala. E faapogaia ai ona tatou mananaʻo i tagata uma ina ia latou siitia lona suafa i se tulaga maualuga. E ao ona tatou ati aʻe le tuutoina faale-Atua i o tatou olaga pe afai o le a tatou savavali i le suafa o Ieova, le Atua moni e toʻatasi, e faavavau.—Salamo 37:4; 2 Peteru 3:11.

15. E faapefea ona tatou tuutoina atoatoa atu i le Atua?

¹⁵ Ina ia auauna i le Atua i le auala na te taliaina, e ao ona tatou avatu iā te ia le tapuaʻiga atoatoa, auā o ia “o le Atua e na o ia lava e manaʻomia ona tuutoina atoatoa atu i ai.” (Esoto 20:5, NW) E lē mafai ona tatou alolofa i le Atua ae i le  taimi e tasi o loo tatou mananaʻo foʻi i le lalolagi amioleaga, lea o loo avea ai Satani ma ona atua. (Iakopo 4:4; 1 Ioane 2:15-17) E silafia lelei e Ieova a tatou taumafaiga taʻitoʻatasi iā i tatou lava. (Ieremia 17:10) Pe afai tatou te naunau moni lava i le amiotonu, e na te silafia mai, ma o le a ia fesoasoani mai ina ia tatou onosaia tofotofoga i aso taʻitasi. O le lagolagoina o i tatou i lona agaga paia mamana, o le a ia fesoasoani mai ai ina ia mafai ona tatou manumalo i mea leaga ua matuā taatele i lenei lalolagi. (2 Korinito 4:7) O le a ia fesoasoani foʻi iā i tatou ina ia faatumauina lo tatou faamoemoe malosi, o le ola e faavavau i se lalolagi parataiso. Maʻeu le matagofie o lenā faamoemoe! E ao ona tatou talisapaia loloto lenei faamoemoe ma auauna ma le lotomalie i le Atua moni o Ieova, o lē na saunia maia.

16. O le ā e ao ona e manaʻo e te faia faatasi ma le faitau miliona o isi tagata?

¹⁶ E faitau miliona tagata i le lalolagi aoao ua latou taliaina ma le fiafia le valaaulia a le faisalamo, o lē na tusi mai: “Ia outou faaneenee atu ia Ieova faatasi ma aʻu; ma ia tatou vivii faatasi i lona suafa.” (Salamo 34:3) Ua valaaulia oe e Ieova ina ia e iai faatasi ma le vao o tagata o loo faatoʻateleina pea mai atunuu uma o ē o loo faia lenei gaoioiga.

Talanoaga Autalu

• O le ā le ituaiga o peresona e iai Ieova? Ua faapefea ona aogā mo i tatou le mauaina o se malamalamaga manino i ona uiga?

• E mafai faapefea ona tatou fesoasoani i isi tagata ina ia latou aʻoaʻoina le upu moni e uiga i le Atua?

• O le ā e aofia ai i le iloaina o le suafa o Ieova ma le savavali i lona suafa?

[Fesili mo le Suʻesuʻega]

 [Ata i le itulau 14]

Ona o le tele o le alofa o Ieova, o le a ia ‘faamafola ai lona aao, ma faamaoona le manao o meafaiola uma’