Mataupu Sefulufitu

Ia Faatino le Amioatua i le Aiga

1. Ua faapefea i le faatatauina o taʻiala mai le Afioga a le Atua ona aafia ai faaipoipoga?

O IEOVA o Lē na Amataina le faaipoipoga, ma ua saunia mai i lana Afioga taʻiala e sili ona lelei mo aiga. Ona o le faatatauina o na taʻiala, ua faia aʻe ai e le toʻatele o tagata ni faaipoipoga e taulau manuia. O le itu e fiafia ai, e iai nisi sa nonofo faatasi o ni ulugalii e aunoa ma le faaipoipoina, ae o lea ua lesitalaina nei faaletulafono a latou faaipoipoga. O isi ua latou lē o toe faia ni faiā faaleulugalii e ese mai i a latou faaipoipoga. O tane sa muaʻi iai uiga sauā i a latou avā ma fanau, ua latou aʻoaʻoina nei le tatau ona faaalia o le agalelei ma uiga alofa faapelepele.

2. O le ā e aofia ai i le olaga o se aiga Kerisiano?

² E tele mea e aofia i le olaga o se aiga Kerisiano, e pei o le auala tatou te manatu ai i le tumau o le faaipoipoga, o mea tatou te faia ina ia faataunuu ai o tatou tiute tauave i le aiga, ma le auala tatou te feagai ai ma isi tagata o le aiga. (Efeso 5:33–6:4) E ui atonu ua tatou iloa mea o loo fai mai ai le Tusi Paia e uiga i le olaga faaleaiga, ae ese foʻi le faatatauina o fautuaga a le Tusi Paia. E leai se tasi o i tatou e manaʻo e pei o ē na taʻusalaina e Iesu ona o le faalēaogāina o poloaʻiga a le Atua. Na sesē la latou finau mai faapea, ua lava le tau ina latou tōʻaaga i lotu. (Mataio 15:4-9) E tatou te lē mananaʻo e iai sa tatou amioatua, ae e lē o faatinoina i o tatou lava aiga. Ae peitaʻi, tatou te mananaʻo e faaalia le amioatua tatau auā, “o le oloa tele lava lea.”—1 Timoteo 5:4; 6:6; 2 Timoteo 3:5.

 O le ā le Umi o le a Tumau ai se Faaipoipoga?

3. (a) O le ā o loo tupu i le tele o faaipoipoga, ae o le ā la tatou filifiliga mautū e tatau ona iai? (e) Ia faaaogā lau Tusi Paia e tali mai ai fesili o loo lisiina mai i lalo ifo o lenei palakalafa.

³ Ua faamaonia mai le faatupulaʻia o le faalētonu o fusi o faaipoipoga. O nisi ulugalii ua fia tausaga o faatasia ae ua tatala le faaipoipoga ma toe faaipoipo atu i se isi paaga. Ua lē o se mea fou foʻi le faalogo atu i tala i ni ulugalii laiti ua toe teteʻa ae leʻi leva lava talu ona faaipoipo. Po o ā lava mea o faia e isi, ae tatau ona tatou mananaʻo e faafiafiaina le finagalo o Ieova. O lea, seʻi o tatou talanoaina fesili ma mau o loo mulimuli mai, ina ia iloa po o ā fa a le Afioga a le Atua e uiga i le faatumauina o se faaipoipoga.

Pe a faaipoipo se alii ma se tamaʻitaʻi, o le ā le umi ua faatalitalia e tatau ona la nonofo faatasi ai? (Mareko 10:6-9; Roma 7:2, 3)

O le ā le faavae e tasi e taliaina ai e le Atua se talaga faaipoipoga, ma maua ai se avanoa e toe faaipoipo ai? (Mataio 5:31, 32; 19:3-9)

O le ā le silafaga a Ieova i talaga faaipoipoga e lē o faatagaina mai e lana Afioga? (Malaki 2:13-16)

Pe lagolagoina ea e le Tusi Paia le teteʻa e fai ma auala e foʻia ai faafitauli i le faaipoipoga? (1 Korinito 7:10-13)

O ā tulaga e ono talia ai se teteʻaga? (Salamo 11:5; Luka 4:8; 1 Timoteo 5:8)

4. Aiseā ua tumau ai nisi o faaipoipoga?

⁴ E iai nisi faaipoipoga ua taulau manuia, o loo tumau pea. Aiseā? E ui o se tasi o māfuaaga tāua o le faatali lea seʻi faatagatamatua i laʻua uma, ae tāua foʻi le mauaina e se tasi o se paaga e fiafia i mea e fiafia foʻi i ai o ia ma mafai ona la talanoa saʻoloto i mataupu. Peitaʻi, e sili atu  ona tāua le mauaina o se paaga e alofa iā Ieova, ma amanaʻiaina lana Afioga e fai ma faavae mo le foʻiaina o faafitauli. (Salamo 119:97, 104; 2 Timoteo 3:16, 17) O le a lē iai i se tagata faapena se manatu faapea, afai e lē sologa lelei le tulaga o mea, e mafai lava ona la teteʻa pe tatala le faaipoipoga. O le a ia lē faaaogā vaivaiga o lana paaga e fai ma faamolemolega o le lē faatinoina o ona ia foʻi tiute tauave. Na i lo lea, o le a ia lotomalie e faafetaiaʻia le faafitauli ma taumafai e saʻili ni vaifofō.

5. (a) Ua faapefea ona aofia le faamaoni iā Ieova i le faaipoipoga? (e) E tusa lava pe fetaiaʻi ma teteega, ae o ā aogā e mafai ona maua pe a tausisia pea tapulaa a Ieova?

⁵ E finau maumauaʻi mai lava Satani e faapea, pe a tatou puapuagatia, o le a tatou lafoaʻia loa ala o Ieova. (Iopu 2:4, 5; Faataoto 27:11) Peitaʻi o le toʻatele o Molimau a Ieova o ē ua oo i ai puapuaga ona o le iai o se paaga e tetee, e latou te lē o lafoaʻia a latou tautōga o le faaipoipoga. O loo latou faamaoni atu pea iā Ieova ma ana poloaʻiga. (Mataio 5:37) O nisi sa fesagaʻi ma puapuaga ua latou mauaina le olioli, ona ua aufaatasi mai nei a latou paaga ina ia auauna iā Ieova—e ui i le tele o tausaga sa tetee mai ai! (1 Peteru 3:1, 2) Ae mo Kerisiano e lē o iai lava ni suiga i a latou paaga, po ua lafoaʻi foʻi e a latou paaga ona o lo latou auauna iā Ieova, ua iloa e i latou nei o le a faamanuiaina i latou ona o le faamaonia atu o lo latou amioatua i le aiga.—Salamo 55:22; 145:16.

E Tofu le Tagata ma Lana Vaega e Fai

6. Ina ia maua se faaipoipoga manuia, o le ā le faatulagaga e tatau ona faaaloalo i ai?

⁶ E mautinoa lava, o le iai o se faaipoipoga manuia, e tele nisi mea e manaʻomia ai i lo le tau ina nonofo faatasi. O le manaʻoga autū mo paaga uma, o le faaaloalo  atu i le faatulagaga a Ieova o le tulaga ulu. O inā e maua ai se faamaopoopoga lelei ma se lagona saogalemu i le aiga. I le 1 Korinito 11:3, e tatou te faitau ai: “O le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea.”

7. E tatau faapefea ona faatinoina le tulaga ulu i le aiga?

⁷ Po o e mātauina le mea na muamua lava taʻua e lenā fuaiupu? Ioe, o tane uma e iai lē ua fai ma o latou Ulu, o Keriso lea, e tatau ona latou gauaʻi atu i ai. O lona uiga, e tatau i le tane ona faatinoina lona tulaga ulu i se auala e atagia atu ai uiga o Iesu. E gauaʻi atu Keriso iā Ieova, e matuā alofa o ia i le faapotopotoga, ma tausi i ai. (1 Timoteo 3:15) Na oo lava ina ia ‘⁠foaiina mai o ia e fai ma o latou sui.’ E leʻi faamaualuga ma lē magafagafa Iesu, ae na ‘agamalu ma loto maulalo.’ O i latou ua gauaʻi atu i lona tulaga ulu o loo ‘maua e i latou le malologa mo o latou agaga.’ Pe afai o le auala lenei o loo faatautaia ai e se tane lona aiga, e mafai ona faaalia ai lona gauaʻi atu foʻi o ia lava iā Keriso. O le a tatau la i se avā Kerisiano ona iloa le aogā ma le lelei o le felagolagomaʻi ma lana tane, ma gauaʻi atu i lona tulaga ulu.—Efeso 5:25-33; Mataio 11:28, 29; Faataoto 31:10, 28.

8. (a) Aiseā e foliga mai ai e lē o iai ni iʻuga lelei i nisi aiga e ui lava o lea ua latou faaaogāina auala faa-Kerisiano? (e) O le ā e tatau ona tatou faia pe a fesagaʻi ma se tulaga faapena?

⁸ Ae peitaʻi, o le a tulaʻi mai faafitauli. Atonu a o leʻi amata ona faatatau e se tasi o le aiga mataupu silisili o le Tusi Paia, ae ua leva ona mauaa i lona loto ni lagona ita ona o le faatonu mai e isi. E oo lava i ni talosaga agalelei ma se uiga alofa, atonu e lē maua mai ai ni iʻuga lelei. Ua tatou iloa o loo faapea mai le Tusi Paia ina ia tuu ese “le lotoa, ma le ita, ma le leo tele, ma le upu leaga.” (Efeso 4:31, LT ) Ae o le ā e tatau ona fai, pe  afai e iai nisi o le aiga e foliga mai ua na o le pau lava lenā o le auala e latou te iloa tali atu ai? Manatua, sa leʻi faataʻitaʻi atu Iesu iā i latou sa iai uiga taufaamataʻu ma fai upuleaga, ae sa ia faalagolago i lona Tamā. (1 Peteru 2:22, 23) O lea, pe a tulaʻi mai tulaga faigatā i le aiga, ia faaalia le amioatua e ala i le tatalo iā Ieova mo lana fesoasoani, na i lo le faataʻitaʻi i ala o le lalolagi.—Faataoto 3:5-7.

9. O le ā ua iloa e le toʻatele o tane Kerisiano e tatau ona latou faia na i lo le saʻiliʻili masei?

⁹ E lē vave i taimi uma ona iai suiga, peitaʻi e aogā moni lava fautuaga a le Tusi Paia pe a faatatauina i se uiga onosai ma le naunautaʻi. Ua iloa e le toʻatele o tane, na amata ona faaleleia a latou faaipoipoga ina ua latou malamalama i le auala sa feutagaʻi ai Keriso ma le faapotopotoga. E lē o faia aʻe lenā faapotopotoga i ni tagata lelei atoatoa. Peitaʻi, o loo alofa i ai Iesu, o loo ia faataatia mai i ai se faaaʻoaʻoga saʻo, ma o loo ia faaaogā le Tusi Paia e faaleleia ai. Na ia foaʻi mai lona soifua mo le faapotopotoga.  (1 Peteru 2:21) Ua faalaeiauina e lana faaaʻoaʻoga le toʻatele o tane Kerisiano ina ia faatinoina lelei o latou tulaga ulu ma avatu ni fesoasoani alofa mo le faaleleia o a latou faaipoipoga. O inei e maua ai le tele o iʻuga e sili atu ona lelei i lo le saʻiliʻili masei ma musu e talanoa atu.

10. (a) O ā auala e ono mafai ai e se tane po o se avā, e oo lava i lē o faapea mai o se Kerisiano, ona ia faafaigatāina le olaga mo isi i le aiga? (e) O le ā se mea e ono fai ina ia faaleleia ai le faafitauli?

¹⁰ Ae faapefea pe a leai se naunau tele o le tane i manaʻoga tau faalogona o lona aiga, pe lē tausolomua foʻi o ia e faatulaga ni talanoaga faale-Tusi Paia a le aiga po o isi lava meafai? E faapefea pe a lē lagolagosua se avā ma lē faaalia sona gauaʻi faale-Atua? O nisi ua latou maua iʻuga lelei e ala i le faia o ni talanoaga uigā a le aiga e faatatau i faafitauli. (Kenese 21:10-12; Faataoto 15:22) E tusa foʻi pe lē taulau uma faamoemoega sa iai, ae mafai lava e i tatou taʻitoʻatasi ona saosaolaumea i le faaleleia o le tulaga i le aiga, e ala i lo latou fuaina atu o fua o le agaga o le Atua i o latou olaga, ma faaalia ai le magafagafa alofa mo isi tagata o le aiga. (Kalatia 5:22, 23) O le a maua le agaʻigaʻi i luma, e lē i le faatalitali i le isi tagata e fai se mea, ae i le faia o la tatou lava vaega, ma faaalia ai o loo tatou faatinoina le amioatua.—Kolose 3:18-21.

Le Mea e Maua ai Tali

11, 12. O le ā ua saunia mai e Ieova e fesoasoani iā i tatou ina ia manuia ai o tatou olaga faaleaiga?

¹¹ E tele puna o loo liliu atu i ai tagata mo ni fautuaga e faatatau i a latou mataupu faaleaiga. Peitaʻi ua tatou iloa o loo iai i le Afioga a le Atua fautuaga e sili ona lelei, ma e tatou te lotofaafetai ona e ala i lana faalapotopotoga vaaia, ua fesoasoani mai ai le Atua ina ia tatou  faatatauina nei fautuaga. Po o matuā aogā ea iā te oe lenā fesoasoani?—Salamo 119:129, 130; Mika 4:2.

¹² E lē gata i le auai i sauniga a le faapotopotoga, ae po o e faataatia ese ea ni taimi e lē aunoa mo le suʻesuʻega faale-Tusi Paia a le aiga? O aiga o loo latou faia faapea ua mafai ona galulue ia autasi i la latou tapuaʻiga. Ua faamanuiaina o latou olaga faaleaiga, a o latou faatatauina le Afioga a le Atua i o latou lava olaga.—Teuteronome 11:18-21.

13. (a) Pe a iai ni a tatou fesili e uiga i mataupu faaleaiga, o fea e masani ona tatou maua i ai se fesoasoani manaʻomia? (e) O le ā e tatau ona faaalia i filifiliga uma tatou te faia?

 ¹³ Atonu e iai ni au fesili e uiga i mataupu faaleaiga. Mo se faaaʻoaʻoga, e faapefea le taofiofia o le fanauina o se fanau? Faamata ea e ono talafeagai le faia o se faapaʻū tama? Pe a leai se naunau o se tasi o le fanau i mea faaleagaga, o le ā le tele e tatau ona faatalitalia ai o ia e faia sona sao i le tapuaʻiga a le aiga? E tele fesili faapena ua talanoaina i lomiga o loo lomia e Molimau a Ieova. Ia faataʻitaʻi ona e faaaogāina lomiga e fesoasoani ai i le faia o suʻesuʻega faale-Tusi Paia, e aofia ai faasinotusi mo le saʻilia o tali. Pe afai e lē o iai ni au lomiga na e faasino atu i le faasinotusi, siaki atu i le potutusi i le Maota o le Malo. Pe atonu foʻi o loo mafai ona e maua nei lomiga i le polokalame o lau komepiuta. E mafai foʻi ona e talanoaina au fesili ma ni tane ma tuafāfine Kerisiano ua taʻumatuaina. Ae aua e te faatalitalia le tali o le ioe pe leai i au fesili uma. E masani lava o oe e toʻatasi pe o oulua o se ulugalii faaipoipo e tatau ona faia le filifiliga. Ona fai lea o ni filifiliga e faaalia ai o loo e faatinoina le amioatua e lē gata i le lautele, ae i totonu o lou lava aiga.—Roma 14:19; Efeso 5:10.

Talanoaga Autalu

• E faapefea i le faamaoni iā Ieova ona aofia ai i le faamaoni o se tasi i lana paaga faaipoipo?

• Pe a omia i faafitauli faaleaiga, o le ā o le a fesoasoani iā i tatou ina ia faia le mea e fiafia i ai le Atua?

• E tusa lava pe iai ni itu ua lē taulau ai nisi o le aiga, ae o le ā e mafai ona tatou faia ina ia faaleleia ai le faafitauli?

[Fesili mo le Suʻesuʻega]

[Ata i le itulau 155]

E tatau i le tulaga ulu o le tane ona atagia mai ai uiga o Iesu

[Ata i le itulau 157]

O le faia e lē aunoa o le suʻesuʻega faale-Tusi Paia a le aiga e fesoasoani ina ia autasia ai