Mataupu Sefuluono

‘Ia Maua le Alofa Naunau o le Tasi i le Tasi’

1. O le ā e masani lava ona maofa ai tagata e fou mai i sauniga a Molimau a Ieova?

PE A faatoʻā auai mai ni tagata i sauniga a Molimau a Ieova, e masani lava ona latou maofa i le alofa o loo faaalia ai i inā. E latou te mātauina i le faafeiloaʻia o i latou, ma le feoeoeaʻiga māfana a le ʻauuso. E mātauina foʻi e tagata asiasi mai i a tatou tauaofiaga lenei alofa. Na tusia e se tagata faasalalau se faamatalaga e faatatau i se tauaofiaga e faapea: ‘E leai se tagata na tagofia ni fualaau faasāina po o le ʻava malosi. E leai se taumanuō ma se feʻei. E leai se tautulei. E leai se feomaʻi solo. E leai se tasi e palauvale pe tautala lē mafaufau. E leai ni tausuaga lē mamā po o ni gagana matagā. E leai ni tagata ulaula tapaa ma faaleagaina ai le ʻea. E leai se gaoi. E leai se tasi e tiaʻi solo atigiʻapa i le laufanua. Sa matuā uigaese lava.’ O nei mea uma o se faamaoniga o le alofa, le alofa lea “e le amio matagā, e le sailia e ia ana lava mea.”—1 Korinito 13:4-8, LF.

2. (a) A o faagasolo taimi, o le ā e tatau ona faamaonia atu e tusa ai o lo tatou faaalia o le alofa? (e) I le faataʻitaʻi iā Keriso, o le ā le ituaiga o alofa e manaʻomia ona tatou ati aʻe?

² O le alofa faaleuso o le faailoga lea e mātaulia ai Kerisiano moni. (Ioane 13:35) A o tatou tuputupu aʻe faaleagaga, ua aʻoaʻoina i tatou ina ia faaalia atili le alofa. Na tatalo le aposetolo o Paulo ina ia “faatuputeleina pea lava pea” le alofa o ona uso Kerisiano. (Filipi 1:9, NW) Na faaalia e le aposetolo o Ioane, o lea alofa e tatau ona iai le agaga faataulagaina o i tatou lava. Na ia tusi mai: “O le mea lava lenei ua  tatou iloa ai le alofa, ina ua tuuina atu e [le Alo o le Atua] o lona lava soifua e sui aʻi i tatou; e tatau foi ona tatou tuuina atu lo tatou ola e sui aʻi le au uso.” (1 Ioane 3:16; Ioane 15:12, 13) Pe faamata ea o le a tatou tuuina atu o tatou ola mo o tatou uso? E ui e lē manaʻomia lenā mea i le tele o taimi, ae o le ā le tele e oo i ai la tatou fesoasoani iā i latou i le taimi nei, e tusa lava pe lē o fetaui ma i tatou?

3. (a) Pe mafai faapefea ona tatou faaalia atili lo tatou alofa? (e) Aiseā e tāua tele ai le mauaina o le alofa naunau o le tasi i le tasi i le taimi nei?

³ E lē gata ina ia atagia atu se agaga o le faataulagaina totino i a tatou gaoioiga, ae manaʻomia foʻi ona iā i tatou se lagona māfana moni mo o tatou uso. Ua faalaeiauina i tatou e le Afioga a le Atua: “Ia fefaapelepeleai i le fealofani o uso.” (Roma 12:10) E iā i tatou uma lava na faalogona mo nisi tagata. Ae pe mafai ona tatou lagonaina na faalogona naunau mo isi foʻi tagata? A o lalata mai le iʻuga o lenei faiga tuai o mea, e tāua tele mo i tatou ona matuā māfana atu i o tatou uso Kerisiano. Ua taʻua e le Tusi Paia: “Ua lata mai le gataaga o mea uma lava; . . . Ia muamua i mea uma ona maua e outou o le alofa naunau o le tasi i le tasi, auā o le alofa e ufiufi ai agasala e tele.”—1 Peteru 4:7, 8.

Pe a Tulaʻi Mai Faafitauli

4. (a) Aiseā e mafai ai ona tulaʻi mai faafitauli i le va o i latou o i le faapotopotoga? (e) O le ā se lelei e iʻu i ai pe a tatou faatatauina fautuaga a le Tusi Paia, e ui atonu e lē o taimi uma tatou te fia faia ai faapea?

⁴ O le mea moni, a o tatou iai pea i le tulaga lē lelei atoatoa, o le a iai taimi tatou te faia ai ni mea e tigā ai faalogona o isi. E ono masei mai foʻi o tatou uso iā i tatou i ni auala eseese. (1 Ioane 1:8) Pe afai e te fetaiaʻi ma lenā tulaga, o le ā e tatau ona e faia? O loo saunia mai e le Tusi Paia ni taʻiala manaʻomia. Peitaʻi atonu o mea o loo taʻu mai ai, e lē tusa ai ma mea o loo faanaunau atu i ai i tatou o tagata lē lelei  atoatoa e fai. (Roma 7:21-23) E ui lava i lea, o lo tatou faatatauina ma le naunautaʻi o fautuaga o loo iai i le Tusi Paia, o le a faamaonia ai lo tatou faanaunauga moni e faafiafiaina Ieova. O le faia faapea o le a atili ai foʻi ona faateleina le uigā o lo tatou alofa mo isi.

5. Pe a faatigā e se tasi o tatou faalogona, aiseā e lē tatau ai ona tatou tauimasui atu i ai?

⁵ I nisi taimi, pe a tigā faalogona o tagata, latou te saʻili mo ni mea e toe taui atu ai i lē na faatigā iā i latou. Peitaʻi e na ona atili ai ona tugā le faafitauli. Pe afai e manaʻomia se tauimasui, e tatau ona tatou tuu atu lenā mea i le Atua. (Faataoto 24:29; Roma 12:17-21) Atonu e taumafai isi e ʻaloʻalo mamao i lē na faatigā mai. Peitaʻi e lē tatau ona tatou faia lenā mea i o tatou uso tapuaʻi, auā o se tasi o vala e faalagolago i ai le taliaina o la tatou tapuaʻiga, o lo tatou alolofa atu lea i o tatou uso. (1 Ioane 4:20) O lea, na tusi mai ai Paulo: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai [Ieova] ia te outou, ia faapea foi outou.” (Kolose 3:13) Pe mafai ona e faia lenā mea?

6. (a) E faafia taimi e tatau ai ona tatou faamagaloina so tatou uso? (e) O le ā e ao ona malamalama i ai, ona mafai lea ona tatou onosaia se agasala ua faia mai iā i tatou?

⁶ Ae faapefea pe a faaauau pea ona faia mai e se tasi ni agasala iā i tatou, ae e lē o ni agasala matuiā e mafai ona tuuesea ai o ia mai le faapotopotoga? Mo na agasala lē matuiā, sa fautuaina mai e le aposetolo o Peteru le faamagalo atu i ai “seia atu fitu.” Ae na fetalai mai Iesu: “Ou te le fai atu . . . seia atu fitu, a ia fitugafulu ni fitu.” Sa ia faamatilatila mai ai le sili atu ona anoanoaʻi o a tatou aitalafu i le Atua, na i lo ni mea e ono aitalafu ai se tagata iā i tatou. (Mataio 18:21-35) E tele mea tatou te agasala ai i le Atua i aso taʻitasi e aunoa ma so tatou iloa o loo tatou faia ai le agasala. O nisi taimi o se gaoioiga manatu faapito, i mea tatou te tautala  pe mafaufau ai, po o mea foʻi ua tatou lē faia. (Roma 3:23) Peitaʻi, o loo alofa mutimutivale mai pea le Atua iā i tatou. (Salamo 103:10-14; 130:3, 4) O lona finagalo ina ia tatou faia foʻi faapea i isi. (Mataio 6:14, 15; Efeso 4:1-3) Ona tatou faatinoina ai lea o le ituaiga o alofa lea ‘e le faitauina leaga ua tuuina mai e nisi.’—1 Korinito 13:4, 5, LF; 1 Peteru 3:8, 9.

7. O le ā e tatau ona tatou fai pe a lē fiafia mai se uso iā i tatou?

⁷ Atonu e iai taimi tatou te iloa ai, e ui lava e lē o iai ni o tatou lagona lē fiafia i so tatou uso, ae o loo lē fiafia mai o ia iā i tatou. E mafai ona tatou ‘ufiufi i le alofa,’ e pei ona fautua mai ai le 1 Peteru 4:8. Pe tatou te tausolomua foʻi e talanoa atu iā te ia ma taumafai e toe maua se faiā filemu.—Mataio 5:23, 24.

8. Pe a faia e se uso talitonu se mea e tatou te lē fiafia i ai, o le ā le mea e mafai ona faia?

⁸ Atonu o loo faia e se uso talitonu se mea e lē gata e te lē fiafia i ai, ae o loo lē fiafia ai foʻi isi. Pe lē o se mea lelei ea la le talanoa atu i lenā tagata? Atonu o le tulaga lenā. Pe afai e te faamatala atu iā te ia le faafitauli i se auala agalelei, e ono maua ai ni iʻuga lelei. Peitaʻi e tatau ona e muaʻi fesili ifo iā te oe lava: ‘Pe o ia faia moni lava se mea e lē faale-Tusi Paia? Po ua ala ea ona telē le faafitauli, ona e eseese talaaga na ma feola aʻe ai ma le auala na aʻoaʻoina ai i maʻua?’ Ia e faaeteete ina neʻi e faataatitia ni a oe lava tapulaa, ma e faia ai se faamasinoga e fua i na tapulaa. (Iakopo 4:11, 12) O loo taliaina ma le lē faailoga tagata e Ieova tagata mai talaaga eseese, ma o loo onosai mai o ia iā i latou a o tutupu aʻe faaleagaga.

9. (a) O ai e feagai ma tulaga o ni mea sesē matuiā i totonu o le faapotopotoga? (e) O le ā le taimi e avea ai o se tiute tauave a lē ua āfaina i se agasala, ona gaoioi muamua, ma o le ā lona sini?

⁹ Pe a faia e se tasi o le faapotopotoga se mea sesē matuiā, e pei o amioga lē mamā, e tatau lava ona vave fai i ai se faatatau. O ai na te faia? E fai e le ʻautoeaina. (Iakopo 5:14, 15) Ae peitaʻi, pe afai o le agasala ua fai o loo āfaina ai ma se  isi tagata, pe i se mataupu faapisinisi po o le faaaogāsesēina o le laulaufaiva, e tatau la i lē ua āfaina ona taumafai muamua e talanoa atu i lē na faia le agasala, e tau lava o i laʻua. (Mataio 18:15) Pe afai e lē foʻia ai i inā le mataupu, e tatau ona faatino isi laasaga atili, e pei ona otooto mai i le Mataio 18:16, 17. O le alofa mo lo tatou uso ua masei, ma se manaʻoga ia toe “maua” mai o ia, o le a fesoasoani iā i tatou e faia ai lenei gaoioiga i se uiga e pāʻia ai lona loto.—Faataoto 16:23.

10. Pe a tulaʻi mai se faafitauli, o le ā o le a fesoasoani iā i tatou ina ia saʻo ai le vaai i le mataupu?

¹⁰ Pe a tulaʻi mai se faafitauli, pe telē pe itiiti, e tatou te maua se fesoasoani pe a taumafai e malamalama i le auala o loo silasila ai Ieova i le mataupu. E lē fiafia o ia i so o se agasala, ma i lana taimi atofaina, e faamamāeseina ai mai  lana faalapotopotoga i latou o loo faia pea ma le lē salamō agasala matuiā. Ae peitaʻi, seʻi aua neʻi galo iā i tatou, e iai lava ni mea iti tatou te agasala uma ai, ma e tatou te manaʻomia ai lona faapalepale ma lona alofa mutimutivale. O lea ua faataatia ai e Ieova se faaaʻoaʻoga e faataʻitaʻi atu i ai, pe a tatou fesagaʻi ma agasala a isi. Pe a tatou faaalia le alofa mutimutivale, ua tatou faaatagia atu ai la lona alofa.—Efeso 5:1, 2.

Ia Saʻili Auala e ‘Faalautele’ Atu Ai

11. Aiseā na faalaeiauina ai e Paulo Kerisiano i Korinito ina ia ‘faalautele’ atu?

¹¹ Sa faaaluina e Paulo masina e tele i le atiina aʻe o le faapotopotoga i Korinito i Eleni. Sa ia galue mamafa e fesoasoani atu i uso i inā, ma sa ia alofa iā i latou. Peitaʻi e iai nisi o i latou sa leai ni o latou lagona māfana mo ia. Na latou faitio naʻuā. Sa ia faalaeiauina i latou ina ia ‘faalautele’ atu le faaalia o le alofa. (2 Korinito 6:11-13; 12:15) E lelei foʻi mo i tatou uma ona mafaufau i le tele o loo tatou faaalia atu ai le alofa i isi, ma ia saʻili i auala e faalautele atu ai.—1 Ioane 3:14.

12. E mafai faapefea ona faatuputeleina lo tatou alofa mo tagata uma o i le faapotopotoga?

¹² Po o iai ea nisi i le faapotopotoga o faafaigatā ona tatou māfana i ai? Pe afai tatou te taumafai e faagalo ni feeseeseaʻiga i uiga faaletagata—e pei foʻi ona tatou mananaʻo e latou te faia iā i tatou—e mafai ona fesoasoani lenei tulaga ina ia māfana ai a tatou faiā. Pe a tatou mafaufau pea i na o o latou uiga lelei, o le a mafai foʻi ona faaleleia ai o tatou faalogona iā i latou. E mautinoa lava le faatuputeleina e lenei mea o lo tatou alofa mo i latou.—Luka 6:32, 33, 36.

13. E mafai faapefea ona tatou faalautele atu, i le faaalia o le alofa iā i latou i la tatou faapotopotoga?

¹³ O le mea moni, e gata mai mea e mafai ona tatou faia  mo isi. Atonu e lē mafai ona tatou faafeiloaʻia tagata uma i sauniga taʻitasi. Atonu e lē mafai ona tatou faaaofia tagata uma pe a valaaulia ni uō mo se taumafataga. Ae pe mafai ea ona tatou faalautele atu e ala i le faaaluina o ni nai minute e faamasani lelei ai i se tasi i la tatou faapotopotoga? Faamata o iai ni taimi e tatou te valaaulia ai se tasi e lē o masani lelei i ai, ina ia tatou galulue faatasi i le faiva i le fanua?

14. Pe a tatou iai faatasi ma ni Kerisiano e tatou te leʻi feiloaʻi muamua lava i ai, e mafai faapefea ona tatou faaalia ai le alofa naunau o le tasi i le tasi?

¹⁴ O tauaofiaga faa-Kerisiano e mafai ona maua ai ni avanoa e faalautele atu ai lo tatou alofa. Atonu e faitau afe i latou e auai atu. E lē mafai ona tatou feiloaʻi iā i latou uma, peitaʻi e mafai ona tatou amioaʻi i se auala e faaalia ai o loo tatou faamuamuaina o latou lelei na i lo o o tatou lava manaʻoga. I taimi o mālōlōga, e mafai ona tatou faaalia le naunau totino e ala i le tausolomua ona faafeiloaʻi atu i nisi o loo latalata ane iā i tatou. E sau se aso, o le a avea tagata uma e nonofo i le lalolagi o ni uso ma tuafāfine e autasi i le tapuaʻiga i le Atua moni e toʻatasi, o le Tamā o tagata uma. Maʻeu se olioli o le a iai pe a masani tagata uma! O le alofa naunau o le a tatou mananaʻo ai e faia lenā mea. Aiseā e lē amata ai loa i le taimi nei?

Talanoaga Autalu

• Pe a tulaʻi mai faafitauli i le va o Kerisiano, e tatau faapefea ona foʻia, ma aiseā?

• A o tatou tuputupu aʻe faaleagaga, o ā auala e tatau foʻi ona tupu aʻe ai lo tatou alofa?

• E mafai faapefea ona faaalia le alofa naunau i isi e ese mai i a tatou uō māfana?

[Fesili mo le Suʻesuʻega]

[Ata i le itulau 148]

E tele auala e faaalia ai le alofa faa-Kerisiano, e pei ona faaalia i sauniga a le faapotopotoga