Mataupu Tolu

Ia Taofi Mau i le Afioga a le Atua

1. (a) Sa faapefea ona tofo Isaraelu anamua i le moni o afioga a le Atua? (e) Aiseā tatou te naunau ai i lenā mea?

“UA OUTOU iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou.” (Iosua 23:14-16) O le mea lenā na fai atu ai Iosua i toeaina o Isaraelu ina ua latou nofoia le Nuu Folafolaina. Ioe, sa faamaonia le maufaatuatuaina o folafolaga a Ieova. O lenā tala—ma isi uma tala a le Tusi Paia—sa faasaoina mai mo i tatou “ina ia tatou maua le faamoemoe.”—Roma 15:4.

2. (a) O le ā le uiga o le faapea atu, o le Tusi Paia e “mai le Agaga o le Atua ia”? (e) I le iloaina faapea o le Tusi Paia na faagaeeina e le Atua, o le ā la se avega tauave ua iā i tatou?

² E ui e tusa ma le 40 tagata na faaaogā e tusiaina le Tusi Paia, ae o Ieova lava o lona Tusitala lea. Po o lona uiga ea o lenei manatu sa faia moni lava sana vaega, i le faatonutonuina o le tusiaina o mea uma o loo iai? Ioe. Sa ia faia e ala mai i lona agaga paia mamana, o lona mana galue. Sa faamaoni le aposetolo o Paulo i lona faapea mai: “O tusi paia uma lava e mai le Agaga o le Atua ia . . . ina ia atoatoa ona lelei ai o le tagata o le Atua, ia saunia lava ia i galuega lelei uma lava.” O tagata i so o se vaipanoa o ē ua talitonu i lenā manatu, e latou te uaʻi atu i le Tusi Paia ma ati aʻe o latou olaga i mea o loo tusia ai.—2 Timoteo 3:16, 17, LF; 1 Tesalonia 2:13.

 Ia Fesoasoani i Isi e Talisapaia

3. O le ā le auala e sili ona lelei e fesoasoani ai i le toʻatele o tagata e lē talitonu o le Tusi Paia, o le Afioga lea a le Atua?

³ O le toʻatele o tagata tatou te talanoa, e lē auai i lo tatou talitonuga faapea o le Tusi Paia, o le Afioga lea a le Atua. E mafai faapefea ona tatou fesoasoani iā i latou? E masani lava, o le auala e sili ona lelei o le tatala lea o le Tusi Paia ma faaali iā i latou mea o loo tusia ai. “O loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, . . . o loo faamasino foi i manatu ma filifiliga o le loto.” (Eperu 4:12) O “le afioga a le Atua” e lē o se talafaasolopito ua lē o toe aogā; o loo aogā lava! O loo agaʻi atu ma le lē mataofiofia folafolaga a le Tusi Paia i o latou faataunuuga. O aafiaga o le feʻau a le Tusi Paia i uunaʻiga moni i le loto o se tagata, e sili atu ona malolosi i lo so o se mea tatou te ono fai atu ai.

4. O ā faamalamalamaga o upu moni faale-Tusi Paia ua suia ai manatu o nisi tagata agaʻi i le Tusi Paia, ma aiseā?

⁴ O le vaaia o le suafa o le Atua i inā, ua māfua ai ona fia suʻesuʻe atili le toʻatele i le Tusi Paia. Ua filifili isi e suʻesuʻe i le Tusi Paia, ina ua faaalia i ai le mea o fai mai ai e faatatau i le fuafuaga o le olaga, le pogai ua faataga ai e le Atua le amioleaga, le uiga tāua o mea o loo tutupu i aso nei, po o le faamoemoe o le ola e faavavau i se lalolagi parataiso. I atunuu o loo mafatia ai tagata i faiga faasoesa a agaga leaga e māfua mai i tū faalotu, ua faaosofia ai le fia malamalama o isi, ona o le faamalamalamaga a le Tusi Paia i le māfuaaga o lenei mea, atoa ma le auala e maua ai se mapusaga. Aiseā e maofa ai tagata lotofaamaoni i nei manatu? Talu ai o le Tusi Paia, ua na o le pau lea o le puna o faamatalaga maufaatuatuaina i nei mataupu tāua uma.—Salamo 119:130.

5. (a) Pe a fai mai tagata e latou te lē talitonu i le Tusi Paia, atonu o ā ni māfuaaga? (e) E ono mafai faapefea ona tatou fesoasoani i na tagata?

⁵ Ae faapefea pe a taʻu mai e tagata iā i tatou e latou te lē  talitonu i le Tusi Paia? Pe tatau ea ona faamuta ai i lenā mea le talanoaga? E leai, pe afai o loo latou fia talanoa pea. Atonu latou te manatu i le Tusi Paia o se tusi a lotu ua faapea mai o lotu Kerisiano. O le lauiloa o lotu ua faapea mai o lotu Kerisiano i a latou faiga pepelo ma le isuisu fua i faiga faapolotiki, atoa ma a latou suʻegatupe faifai pea, e ono māfua ai lo latou faaalia mai o uiga musuā i le Tusi Paia. Aiseā e lē fesiligia ai po o māfuaaga na? O le taʻusalaina e le Tusi Paia o ala faalelalolagi o Kerisiano pepelo, atoa ma mea e tuufaafeagai i le va o le Faa-Kerisiano pepelo ma le Faa-Kerisiano moni, e ono faaosofia ai lo latou fia malamalama.—Mika 3:11, 12; Mataio 15:7-9; Iakopo 4:4.

6. (a) O le ā ua faatalitonuina ai oe lava faapea, o le Tusi Paia o le Afioga a le Atua? (e) O ā isi faamatalaga e mafai ona fesoasoani ai i tagata, e iloatino o le Tusi Paia e aumaia moni mai le Atua?

⁶ Mo isi, e ono aogā i ai se talanoaga tuusaʻo o faamaoniga e faapea, o le Tusi Paia na faagaeeina e le Atua. O le ā ua faamaonia manino ai iā te oe o le Tusi Paia e mai iā Ieova le Atua? Pe ona o mea ua taʻua e le Tusi Paia lava ia e faatatau i lona amataga mai? Pe ona o le anoanoaʻi o valoaga o i le Tusi Paia o loo faaalia mai ai le malamalamaga auʻiliʻili e uiga i le lumanaʻi, o valoaga e ono maua mai i se puna e maoaʻe atu i lo o tagata? (2 Peteru 1:20, 21) Pe ona o loo faaalia e le Tusi Paia se autasi ofoofogia o ona manatu uma, e ui sa tusia e ni tane se toʻa 40 i se vaitaimi e silia ma le 1,600 tausaga? Po o lona saʻo aʻiaʻi ea faasaienisi pe a fua atu i isi tusitusiga mai i na foʻi taimi? Pe ona o le tautatala faamaoni ea o ona tusitala? Pe ona o lona sao mai pea e ui i taumafaiga mataʻutia sa taumafai e faatamaʻia ai? Po o le ā lava le tulaga ua mataʻina iā te oe, ae mafai foʻi ona faaaogā e fesoasoani ai i isi tagata. *

 La Tatou Faitauga Tusi Paia

7, 8. (a) O le ā e ao ona tatou faia i le Tusi Paia? (e) O le ā ma le isi mea tatou te manaʻomia, e ese mai le faitauga Tusi Paia a le tagata lava ia? (i) Po o faapefea ona mauaina e oe lava ia se malamalamaga i fuafuaga a Ieova?

⁷ E lē gata i le fesoasoani i isi ia talitonu i le Tusi Paia, ae manaʻomia foʻi e i tatou lava ia ona faaavanoa se taimi e faitauina ai e lē aunoa. Po o e faia lenā mea? I tusi uma ua lomia mai, e aupito sili ona tāua lenei tusi. E lē o le uiga faapea a tatou faitauina le Tusi Paia, ona tatou lē toe manaʻomia ai lea o se isi lava mea. O loo lapataʻi mai le Tusi Paia ina ia faaeteete i lo tatou faaesea o i tatou lava. E lē tatau ona tatou manatu faapea, e mafai ona tatou malamalama i mea uma e ala i a tatou lava saʻiliʻiliga totino. E manaʻomia uma le suʻesuʻega totino ma le auai e lē aunoa i sauniga a tagata o le Atua, pe afai e fia avea i tatou o ni Kerisiano e paleni lelei.—Faataoto 18:1; Eperu 10:24, 25.

⁸ E tusa ai o lenei mea, o loo taʻua e le Tusi Paia se alii aloaʻia i Aitiope o lē sa faitauina le valoaga a Isaia. Na tataʻi e se agelu le faievagelia Kerisiano o Filipo e fesili atu i le tamāloa: “Po ua e lagona [malamalama] ea i mea ua e faitauina?” Na tali ma le lotomaulalo le Aitiope: “Ou te mafaia faapefea, pe a le faasino mai [e] se tasi ia te au?” Sa ia talosagaina Filipo ina ia faamatala ane lea vaega o le Tusi Paia. Peitaʻi sa leʻi tau ina faaali atu e Filipo ni ona lava manatu e faatatau i le Tusi Paia, ona o mea na faitauina mai ai. Sa iai pea sana fesootaʻiga vavalalata ma le faalapotopotoga vaaia a le Atua. O lea sa mafai ai ona ia fesoasoani i le Aitiope ina ia aogā iā te ia faamatalaga na saunia e Ieova e ala mai i lenā faalapotopotoga. (Galuega 6:5, 6; 8:5, 26-35) E faapena foʻi i aso nei, e leai se tasi e mafai ona ia mauaina se malamalamaga saʻo i fuafuaga a Ieova mai ni ana lava taumafaiga. E tatou te manaʻomia uma lava le fesoasoani o loo saunia ma le alofa e Ieova, e ala mai i lana faalapotopotoga vaaia.

9. O le ā le faasologa o le faitauga Tusi Paia e mafai ona aogā mo i tatou uma?

 ⁹ Ua saunia pea e le faalapotopotoga a Ieova e ala mai i lomiga eseese, mataupu faale-Tusi Paia e sili ona lelei, ina ia tatou malamalama ai i le Tusi Paia. E lē gata i lea, ua faatulaga mai mo i tatou se faasologa faifai pea o le faitauga Tusi Paia i le Aʻoga o le Faiva Faatiokarate, lea e faia i faapotopotoga uma o Molimau a Ieova i le lalolagi atoa. E tele aogā e mafai ona maua pe a iloiloina e le tagata lava ia le Tusi Paia. (Salamo 1:1-3; 19:7, 8) Ia fai se taumafaiga faapitoa e faitau ai e lē aunoa le Tusi Paia. E tusa lava pe e te lē matuā malamalama atoatoa i mea uma, ae o lou mauaina o se malamalamaga i le aotelega o le Tusi Paia o le a telē sona aogā. O se faaaʻoaʻoga, afai e te faitauina le fā pe lima itulau i le aso, e mafai ona e faitauina ai le Tusi Paia atoa pe tusa o se tausaga.

10. (a) O fea le taimi e fai ai lau faitauga Tusi Paia? (e) O ai isi e ao ona faaaofia ai pe a faitau le Tusi Paia, ma aiseā e tāua ai le faia e lē aunoa?

¹⁰ O fea le taimi e mafai ona fai ai lau faitauga Tusi Paia? E tusa lava pe 10 pe 15 minute o se aso ua e faataatia ese mo lenā fuafuaga, o le a matuā telē se aogā iā te oe. Afai e lē mafai, e sili pe a faatulaga se faasologa mo ni taimi e lē aunoa i vaiaso taʻitasi, ona tausisia lea o lenā faasologa. Afai ua e faaipoipo, e mafai e oulua ma lau paaga ona olioli i le faitauina o le Tusi Paia e le tasi i le isi. Afai e iai sa oulua fanau ua matutua ma iloa faitau, e mafai ona latou feauauaʻi i le faitauina o le Tusi Paia. E ao ona avea le faitauina o le Tusi Paia o se gaoioiga masani i le olaga atoa, e pei o le taumafaina o taumafa faaletino. E pei ona e silafia, afai e lē lelei le tulaga masani o loo taumafa ai se tagata, o le a āfaina lona soifua mālōlōina. E faapena foʻi i lo tatou olaga faaleagaga, aemaise lo tatou ola e faavavau, e faalagolago i le fafagaina e lē aunoa o i tatou i “afioga uma e tulei mai i le fofoga o le Atua.”—Mataio 4:4.

 Lo Tatou Sini

11. O le ā e ao ona avea ma o tatou sini i le faitauina o le Tusi Paia?

¹¹ O le ā e ao ona avea ma o tatou sini i le faitauina o le Tusi Paia? O lo tatou sini e lē o le tau ina faitau se aofaʻiga patino o ni itulau. E ao ona tatou faanaunau ia iloa lelei le Atua, ina ia faateleina ai lo tatou alofa mo ia ma tapuaʻi iā te ia i le auala e na te talileleia mai. (Ioane 5:39-42) E tatau ona tatou faataʻitaʻi atu i uiga o se tusitala o le Tusi Paia o lē na faapea mai: “Ieova e, ia e faailoa mai ia te au ou ala; ia e aʻoaʻo mai ia te au i ou magāala.”—Salamo 25:4.

12. (a) Aiseā e talafeagai ai le mauaina o le “poto saʻo,” ma o le ā le taumafaiga atonu e manaʻomia i le faitauina o le Tusi Paia, ina ia maua ai lenā poto? (e) O le faaaogāina o ā manatu e fā, e ono aogā iā i tatou pe a tatou auʻiliʻiliina mea o loo tatou faitauina i le Tusi Paia? (Tagaʻi i le pusa i le itulau 30.) (i) Ia faataʻitaʻi mai manatu nei e ala i le taliina o fesili o loo i lenei palakalafa. Ia suʻe mau o loo faasino mai ae lē o sii maia.

¹² A o tatou mauaina aʻoaʻoga mai iā Ieova, e ao ona avea ma o tatou faanaunauga le mauaina o le “poto saʻo.” A aunoa ma lea, e mafai faapefea ona tatou faatatauina tonu le Afioga a le Atua i o tatou lava olaga pe faamatalaina saʻo atu i isi? (Kolose 3:10, faatusatusa i le NW; 2 Timoteo 2:15) O le mauaina o le poto saʻo e manaʻomia ai ona tatou faitau lelei i ai, ma afai e loloto le uiga o se vaega, atonu e manaʻomia ona sili atu i le faatasi ona tatou faitauina lenā vaega ina ia matuā malamalama lelei ai i lona faauigaga. O le a aogā foʻi pe afai tatou te faaalu se taimi e mafaufau loloto ai i le mataupu, e manatunatu i ai mai i auala eseese. I le itulau e 30, o loo iai auala tāua e fā e mafaufau i ai, e mafai ona tatou iloiloina. E tele vaega o le Tusi Paia e mafai ona aogā pe a auʻiliʻiliina e ala i le faaaogā o se tasi po o le sili atu foʻi o nei manatu. A o e taliina fesili o loo i itulau o mulimuli mai, o le a e mātauina ai le moni o le faia faapea.

(1) E masani lava ona mafai e le vaega o le Tusi Paia o loo e faitauina, ona taʻu maia iā te oe se mea e faatatau i le ituaiga o Atua  e iai Ieova. O se faaaʻoaʻoga, i le Salamo 139:13, 14, ua tatou aʻoaʻoina ai e faatatau i le naunau tele o le finagalo o le Atua i pepe e leʻi fananau mai: “Na e ufiufi ia te au i le manava o loʻu tinā. Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia; ua ou matuā iloa e aʻu nei mea.” Maʻeu se ofoofogia o mea na faia e Ieova! E molimau le auala na faia ai tagata, i le tele o lona alofa mo i tatou.

E tusa ma le mea o loo taʻua i le Ioane 14:9, 10, pe a tatou faitau i le auala sa feutagaʻi ai Iesu ma isi, ua tatou vaaia moni ai le auala e gaoioi ai Ieova lava ia. I le manatuaina o lenā mea, o le ā se faaiʻuga e tatou te ono faia ai e faatatau iā Ieova, mai mea na tutupu o loo faamauina i le Luka 5:12, 13 ma le Luka 7:11-15?

(2) Iloilo pe faapefea ona fesootaʻi atu le tala i le matua o le Tusi Paia: le faaeaeaina o le pule silisili ese a Ieova ma le faapaiaina o lona suafa, e ala mai i le Malo i le pule a Iesu Keriso, le Fanau folafolaina.

Pe na faapefea ona faamamafaina e Esekielu ma Tanielu le matua o le Tusi Paia? (Esekielu 38:21-23; Tanielu 2:44; 4:17; 7:9-14)

Ua faapefea ona faaalia manino mai e le Tusi Paia o Iesu o le Fanau folafolaina? (Kalatia 3:16)

Ua faapefea ona faamatalaina i le Faaaliga le tumutumuga matagofie o le matua o le Malo? (Faaaliga 11:15; 12:7-10; 17:16-18; 19:11-16; 20:1-3; 21:1-5)

(3) Fesili ifo iā te oe pe faapefea ona e faatatauina iā te oe lava mea o loo e faitauina. Mo se faaaʻoaʻoga, ua tatou faitau i le Esoto e oo atu i le Teuteronome e faatatau i amioga lē mamā ma le fouvale a Isaraelu. Ua tatou malamalama o na uiga ma gaoioiga na aumaia ai iʻuga leaga. O lea la, e ao ona uunaʻia i tatou e faafiafia Ieova e ala i le lē faataʻitaʻia o  faaaʻoaʻoga leaga a Isaraelu. “Na oo na mea uma ia te i latou e fai ma faailoga; ua tusia foi e fai ma apoapoaiga mo i tatou o e ua aulia mai ai tausaga e gata ai.”—1 Korinito 10:11.

O le ā se lesona tatou te aʻoaʻoina mai i le tala, o le fasiotia e Kaino o Apelu? (Kenese 4:3-12; Eperu 11:4; 1 Ioane 3:10-15; 4:20, 21)

Po o faatatau atu fautuaga a le Tusi Paia mo Kerisiano o iai le faamoemoe faalelagi, iā i latou foʻi o iai le faamoemoe o le ola e faavavau i le lalolagi? (Numera 15:16; Ioane 10:16)

E ui o loo lelei lo tatou tulaga i le faapotopotoga Kerisiano, ae aiseā tatou te mananaʻo ai, e iloiloina auala e faatatauina atili ai fautuaga a le Tusi Paia ua uma ona tatou iloa? (2 Korinito 13:5; 1 Tesalonia 4:1)

(4) Ia manatunatu i auala e te ono faaaogā ai mea ua e faitauina e fesoasoani atu ai i isi. O loo manatu mamafa tagata uma i faafitauli o le soifua mālōlōina. E mafai ona tatou faitauina  ma i latou gaoioiga na faia e Iesu, e faataʻitaʻia ai le mea o le a ia faia i se tulaga e sili atu ona telē pe a ia pulea le Malo. “Ona o mai ai lea ia te ia o le motu o tagata e toatele, ua ia te i latou o e pipili, o e mumutu, o e tauaso, o e gūgū, atoa ma nisi e toatele, . . . ona faamalolo ai lea e ia o i latou.”—Mataio 15:30.

O ai e ono aogā i ai le tala i le toe faatūina mai o le afafine o Iairo? (Luka 8:41, 42, 49-56)

13. O ā iʻuga e mafai ona tatou faatalitalia mai se faasologa o le faitauina ma le suʻesuʻeina pea o le Tusi Paia, faatasi ma le faalapotopotoga a Ieova?

¹³ Maʻeu le tele o le taui e mauaina mai i le faitauina o le Tusi Paia pe a tatou faaaogāina manatu e fā o loo taʻua i luga! Ia mautinoa, o le faitauina o le Tusi Paia o se luʻitau. Peitaʻi e mafai ona aogā iā i tatou i le olaga atoa, auā a o tatou faitauina le Tusi Paia, o le a atili ai ona tatou malolosi faaleagaga. O le faitauina e lē aunoa o le Tusi Paia o le a atili ai ona tatou mafuta vavalalata atu i lo tatou Tamā alofa o Ieova, ma o tatou uso Kerisiano. O le a fesoasoani iā i tatou i le utagiaina o le fautuaga, ina ia ‘taofi [“mau,” NW] i le upu o le ola.’—Filipi 2:16.

[Faaopoopoga i lalo]

Talanoaga Autalu

• Aiseā na tusia ai ma faasaoina le Tusi Paia seʻia oo mai i o tatou aso?

• E mafai faapefea ona tatou fesoasoani i isi ina ia talisapaia le Tusi Paia?

• Aiseā e aogā ai le faitauina e lē aunoa o le Tusi Paia e le tagata lava ia? O le faaaogāina o ā manatu e fā, e ono aogā iā i tatou pe a auʻiliʻiliina mea o loo tatou faitauina?

[Fesili mo le Suʻesuʻega]

[Pusa/Ata i le itulau 30]

PE A E FAITAUINA SE VAEGA O LE TUSI PAIA, IA ILOILO

Po o le ā o taʻu mai ai iā te oe e uiga iā Ieova

Pe faapefea ona fesootaʻi atu i le matua o le Tusi Paia

Pe tatau faapefea ona aafia ai lou lava olaga

Pe mafai faapefea ona e faaaogā e fesoasoani atu ai i isi