Mataupu Iva

Le Malosi o le Faamoemoe o le Toetū

1. O le ā se faamoemoe mo i latou ua maliliu pe ana lē seanoa le faamoemoe o le toetū?

PO UA motusia la outou mafutaga ma nisi e pele iā te oe ona o le oti? Pe ana lē seanoa le toetū, semanū e leai se faamoemoe o le toe vaai atu iā i latou. Na semanū e latou te tumau ai lava i le tulaga lea e faamatalaina e le Tusi Paia ina ua faapea mai: “O e ua oti, latou te le iloa se mea; . . . auā e leai se galuega, po o se mafaufau, po o se iloa, po o se poto i le tuugamau [Seoli], o loo e alu atu i ai.”—Failauga 9:5, 10.

2. O le ā le faamoemoe ofoofogia ua mafai ona maua ona o le toetū?

² I le alofa mutimutivale o Ieova, ua ia tatalaina mai ai e ala i le toetū le avanoa e lē mafaatusalia mo le lē mafaitaulia o tagata ua maliliu, ina ia toe tutū mai nai le oti ma ola e faavavau. O lona uiga, e mafai ona e maua se faamoemoe faamāfanafanaloto e faapea, e iai se aso i le lalolagi fou a le Atua o le a outou toe faatasi ai ma ē e pele iā te oe ua maliliu.—Mareko 5:35, 41, 42; Galuega 9:36-41.

3. (a) O ā auala sa tāua ai le toetū i le faataunuuina o le fuafuaga a Ieova? (e) O lē fea le taimi e avea patino ai le faamoemoe o le toetū o se puna o le malosi iā i tatou?

³ Ona o le toetū, ua tatou lē fefefe ai i le oti. E aunoa ma se āfaina tumau ai o ana auauna faamaoni, e mafai  e Ieova ona faataga Satani e faia mea uma, i le taumafai e faamaonia mai lana tuuaʻiga faufau leaga e faapea, “o mea uma foi ua i ai i le tagata, e avatua e ia e sui aʻi lona ola.” (Iopu 2:4) Sa faamaoni Iesu i le Atua seʻia oo i le oti, ma sa toe faatūina ai o ia e le Atua i le ola faalelagi. O lea, na mafai ai e Iesu ona foaʻiina atu le tāua o lana taulaga faaletagata lelei atoatoa, i luma o le nofoalii faalelagi a lona Tamā, ma ua mafai ona faaolaina ai i tatou. E ala i le toetū, ua maua ai e le “lafu mamoe itiiti,” o suli faatasi ma Keriso, le faamoemoe o le aufaatasi ma ia i le Malo faalelagi. (Luka 12:32) Ua iai le faamoemoe mo isi, e toe tutū aʻe ai i le ola e faavavau i se lalolagi parataiso. (Salamo 37:11, 29) Ua iloa e Kerisiano uma le avea o le faamoemoe o le toetū o se puna o le malosi e “matuā tele” lava, a o latou fesagaʻi ma puapuaga e toetoe lava oo ai i le oti.—2 Korinito 4:7.

Le Pogai ua Tāua Tele ai i le Faatuatuaga Faa-Kerisiano

4. (a) O le ā le uiga ua avea ai le toetū o se “aʻoaʻoga muamua”? (e) O le ā le uiga o le toetū i tagata?

⁴ O le toetū, e pei ona taʻua i le Eperu 6:1, 2, (LF) o se “aʻoaʻoga muamua.” Ua avea o se vaega o le faavae o le faatuatua. O lea, afai e lē iai, e lē mafai la ona avea i tatou o ni Kerisiano taʻumatuaina. (1 Korinito 15:16-19) Peitaʻi, e lē taitai malamalama tagata lautele i le aʻoaʻoga a le Tusi Paia i le toetū. Ona o le leai o se malamalamaga faaleagaga, ua faatoʻateleina ai pea tagata e manatu e na o le pau lava lenei o le olaga. O lea, ua alu uma ai o latou olaga i le saʻilia o mea faafiafia. Ae e iai foʻi i latou o loo tautū atu pea i lotu na ola mai ai—o lotu e faapea mai o lotu Kerisiano ma isi lotu faapaupau—o ē e manatu o loo iā i latou se agaga e lē mafai  ona oti. Peitaʻi e lē mafai ona ōgatusa lenā talitonuga ma le aʻoaʻoga a le Tusi Paia i le toetū, auā o le a lē manaʻomia ai se toetū pe afai o loo iai i tagata se agaga e lē mafai ona oti. O le taumafai e sosoo faatasi nei talitonuga e lua, e atili ai ona fenuminumiaʻi na i lo o le ati aʻe ai o le faamoemoe. E mafai faapefea ona tatou fesoasoani i tagata lotofaamaoni o loo fia iloa le upu moni?

5. (a) A o leʻi malamalama se tagata i le toetū, o le ā e ao ona ia iloaina? (e) O ā ni mau e te ono faaaogā e faamatala ai le tulaga o ē ua maliliu? (i) O le ā e mafai ona fai pe a faaaogā e se tasi se faaliliuga o le Tusi Paia lea e foliga mai o loo natiaina ai le mea moni?

⁵ A o leʻi talisapaia e na tagata le ofoofogia o le sauniuniga o le toetū, e manaʻomia ona latou maua le malamalamaga saʻo e faatatau i le tulaga o ē ua maliliu. O le masani lava, e lē tele ni mau e manaʻomia ina ia faamanino ai lenei mataupu, i se tagata o loo matuā fia malamalama i upu moni a le Tusi Paia. (Failauga 9:5, 10; Salamo 146:3, 4; Galuega 7:60) Ae peitaʻi, e iai ni faaliliuga faaonapōnei o le Tusi Paia ma nisi foʻi Tusi Paia o loo toe faaupuina, ua latou natiaina le mea moni e uiga i le tulaga o ē ua maliliu. Atonu la e talafeagai ai ona talanoaina faaupuga o loo faaaogā i uluaʻi gagana o le Tusi Paia.

6. O le ā e faaalia e le suʻesuʻeina ma le māeʻaeʻa, e tusa ai o le mea e tupu i le tagata pe a oti?

⁶ I nisi faaliliuga o le Tusi Paia, e pei o Tusi Paia Samoa, o loo faaliliuina ai le upu Eperu neʹphesh ma lona upu Eleni e tutusa atu i ai, le psy·kheʹ, i nisi o upu eseese e pei o le “tagata,” “mea ola” ma le “agaga.” O le suʻesuʻeina ma le māeʻaeʻa o le auala o loo faaaogā ai i le Tusi Paia nei upu Eperu ma le Eleni, o le a fesoasoani  lea i se tagata suʻesuʻe faamaoni ina ia malamalama ai, o nei upu e masani lava ona faasino atu i le tagata atoa (Kenese 2:7; Galuega 2:43; 1 Peteru 3:20), ma e faatatau atu foʻi i manu. (Kenese 1:20, 24) Peitaʻi e lē taitai ona aumaia e nei upu se manatu faapea, o loo iai se mea e lē vaaia, e leai sona tino e mafai ona paʻi atu i ai, e mafai ona sao ese mai le tino pe a oti ma faaauau ai ona ola i se isi mea.

7. O le a faapefea ona e faamatalaina mai i le Tusi Paia le tulaga o i latou o i Seoli? o i Kena?

⁷ O loo tausisi lava le Tusi Paia Samoa i le faaaogāina o le upu “Seoli” e faaliliu i ai le upu Eperu sheʼohlʹ, atoa ma le upu Eleni haiʹdes, ma le “Kena” mo le upu Eleni geʹen·na. Ua faamanino mai e le Tusi Paia e faapea, o Seoli e faasino atu i tuugamau o tagata, ma e fesootaʻi atu i le oti, ae lē o le ola. (Salamo 18:5; Faaaliga 20:13) E taʻua foʻi e le Tusi Paia le faamoemoe o le toe ō mai nai tuugamau e ala i se toetū. (Iopu 14:13; Galuega 2:31) Ae i se faaeseesega, e leai se faamoemoe mo se ola i le lumanaʻi o taʻua mai mo i latou e ō atu i Kena, ma e leai lava se mea o taʻua faapea o loo ola ai i inā.—Mataio 10:28.

8. E mafai faapefea e le malamalama lelei i le toetū ona aafia ai uiga ma gaoioiga a se tagata?

⁸ Pe a uma ona faamanino lelei na mataupu, ona mafai lea e le tagata ona malamalama lelei i le mea e ono uiga i ai le toetū iā te ia. E amata ai ona ia talisapaia le alofa o Ieova i le faia o lenā sauniuniga ofoofogia. O le faavauvau lea e lagonaina e i latou o ē ua maliliu nisi e pele iā i latou, e mafai ona faaitiitia teisi e ala i le faamoemoe atu i le toe faatasia fiafia ma i latou i le lalolagi fou a le Atua. O le malamalama i nei mataupu  o le ki foʻi lenā i le malamalama i le uiga o le maliu o Keriso. Na iloatino e Kerisiano i le uluaʻi senituri e faapea, e matuā tāua le toetū o Iesu Keriso i le faatuatuaga Kerisiano, auā sa tatalaina ai le ala mo le toe faatutūina aʻe o isi. Sa latou talaʻi atu ma le maelega le toetū mai o Iesu, faapea foʻi le faamoemoe ua aumaia ai. O lea la, o i latou i aso nei ua malamalama ma talisapaia le toetū, o loo naunau e tufa atu lenei upu moni tāua i isi.—Galuega 5:30-32; 10:42, 43.

Le Faaaogāina ‘o le Ki o Seoli’

9. O le ā le auala muamua ua faaaogāina ai e Iesu “ki o le oti ma seoli”?

⁹ O i latou uma e tatau ona aufaatasi ma Keriso i lona Malo faalelagi e ao lava ona maliliu i latou. Peitaʻi ua latou iloa lelei le faamautinoaga na ia tuuina atu ina ua ia fetalai: “Sa ou oti, faauta foi, ou te ola e faavavau faavavau lava; o ia te au foi ki o le oti ma seoli.” (Faaaliga 1:18, LF) O le ā sa uiga i ai lana fetalaiga? Sa ia tataʻi atu manatu i le mea na tupu iā te ia lava. Sa maliu foʻi o ia. Peitaʻi sa leʻi tuua ai pea o ia e le Atua i Seoli. O lona tolu o aso na toe faatūina aʻe ai o ia e Ieova i le soifuaga agaga, ma foaʻiina atu iā te ia le ola e lē toe mafai ona oti. (Galuega 2:32, 33; 10:40) E lē gata i lea, na tauaao atu e le Atua iā te ia “ki o le oti ma seoli” e faaaogā i le faasaʻolotoina o isi mai tuugamau o tagata, ma āuga o le agasala a Atamu. Ua mafai e Iesu ona toe faatutūina aʻe ona soo faamaoni mai le oti, ona o lona mauaina o na ki. Ua muamua ona ia faatutūina aʻe sui faauuagagaina o lana faapotopotoga, ma foaʻi atu iā i latou le meaalofa tāua o le ola e lē mafai ona oti i le lagi, e pei lava ona foaʻiina mai e lona Tamā iā te ia.—Roma 6:5; Filipi 3:20, 21.

10. O afea e faatinoina ai le toetū o Kerisiano faauuina faamaoni?

 ¹⁰ O afea o le a maua ai e Kerisiano faamaoni faauuina le toetū faalelagi? Ua faaalia mai e le Tusi Paia o lea ua amata. Na faamatala mai e le aposetolo o Paulo, o le a toe faatutūina aʻe i latou i le taimi ‘o le toe afio [“faatasi,” NW] mai o Keriso,’ lenā sa amataina i le tausaga e 1914. (1 Korinito 15:23) Pe a faaiʻuina e le vaega faamaoni faauuina o latou soifuaga i le lalolagi i le taimi lenei a o faagasolo lona faatasi mai, e lē tau manaʻomia ona faatali ai pea i le tuugamau seʻia toe taliu mai lo latou Alii. O le taimi lava latou te maliliu ai, e faatutūina aʻe ai i tino agaga, e “liua . . . e faafuasei lava, o le emo o le mata.” Maʻeu so latou fiafiaga, talu ai o galuega lelei sa latou faia “e mulimuli ia te i latou”!—1 Korinito 15:51, 52; Faaaliga 14:13.

11. O le ā le toetū o le a iai mo isi tagata, ma o afea e amata ai?

 ¹¹ Peitaʻi, o le toetū o suli o le Malo i le ola faalelagi, ua lē na o le pau lenā o se toetū. O le taʻua o “le uluai toe tu” i le Faaaliga 20:6, e faaalia ai e tatau ona iai se isi toetū o loo mulimuli mai. O i latou e aogā i ai le isi toetū lea o le a mauaina le faamoemoe fiafia o le ola e faavavau i le lalolagi parataiso. O afea o le a tupu ai lenā mea? Ua faaalia i le tusi o Faaaliga, o le a tupu pe a uma ona aveesea “le lalolagi ma le lagi”—le faiga o mea amioleaga o loo iai nei, faatasi ai ma ona taʻitaʻi o loo pule. Ua matuā lalata mai lava lenā iʻuga o le faiga tuai o mea. Pe a mavae lenā, ona amata ai lea o le toetū mai i le lalolagi, i le taimi ua atofaina e le Atua.—Faaaliga 20:11, 12.

12. O ai o le a aofia ai iā i latou faamaoni e toe faatutūina aʻe e ola i le lalolagi, ma aiseā ua avea ai lenā mea o se faamoemoe faafiafia loto?

 ¹² O ai o le a aofia ai i lenā toetū mai i le lalolagi? O le a aofia ai auauna faamaoni a Ieova mai aso anamua, o tane ma fafine o ē ona o lo latou faatuatua malosi i le toetū, na “le talia [ai] e i latou le olataga [“mai se isi togiola,” NW].” O lona uiga, sa lē mafai ona lafoaʻia lo latou faamaoni i le Atua, ina ia sao mai i se oti mataʻutia, a o leʻi taitai le olaga. Maʻeu se fiafiaga o le a iai i le mafai ona iloa totino i latou ma faalogo patino atu lava i a latou tala e faatatau i mea na tutupu, na o loo taʻu faapuupuu mai i le Tusi Paia! E aofia foʻi iā i latou e toe tutū aʻe i le lalolagi, o Apelu le uluaʻi molimau faamaoni a Ieova; o Enoka ma Noa o ē na folafolaina ma le lē fefefe le feʻau lapataʻi a le Atua a o lumanaʻi le Lolo; o Aperaamo ma Sara o ē na talileleia agelu; o Mose o lē na tuuina mai i ai le Tulafono i le Mauga o Sinai; o perofeta lototetele e pei o Ieremia o ē na vaai i le faaumatiaga o Ierusalema i le 607 T.L.M.; ma Ioane le Papatiso o lē na faalogo atu i le Atua lava ia o fetalai mai, o Iesu, o Lona Alo lea. E lē gata i lea, o le a iai foʻi le toʻatele o tane ma fafine faamaoni o ē na maliliu i nei aso e gata ai o le faiga o mea amioleaga.—Eperu 11:4-38; Mataio 11:11.

13, 14. (a) O le ā o le a tupu iā seoli ma le oti o loo iai? (e) O ai o le a aofia ai i le toetū, ma aiseā?

¹³ I se taimi mulimuli ane, o le a toe tutū aʻe foʻi isi e ese mai i auauna faamaoni a le Atua, ona lē toe iai loa lea o se tasi e totoe i tuugamau o tagata. O le matuā faagaogaoina o tuugamau mai tagata oti o loo iai, e mafai ona iloa i le auala o le a faaaogā ai e Iesu ‘le ki o seoli’ mo le fanau a tagata. Ua faaalia lenei mea i se vaaiga  na tuuina atu i le aposetolo o Ioane, lea na ia vaaia ai seoli o ‘lafoina i le lepa afi.’ (Faaaliga 20:14) O le ā le uiga o lenā mea? O lona uiga, ua faaumatia aʻiaʻi seoli, po o tuugamau o tagata. O le a lē toe iai, ua matuā lē toe iai lava ni tino oti i tuugamau, auā e lē gata ina toe tutū uma aʻe tagata tapuaʻi faamaoni a Ieova, ae o le a faaalia ai foʻi e Iesu lona alofa mutimutivale, i le toe faatutūina mai e oo lava i tagata amiolētonu. Ua faamautinoa mai e le Afioga a le Atua iā i tatou: “O le a toe tutū mai e ua amiotonu atoa ma e ua amioletonu.”—Galuega 24:15, LF.

¹⁴ E leai ma se tasi o i latou nei o ē amiolētonu, e tau ina faatūina aʻe ma toe faasalaina i le oti. I le siʻomaga amiotonu lea o le a iai i le lalolagi aoao i le pulega a le Malo o le Atua, o le a latou maua ai se fesoasoani ina ia faaōgatusa o latou olaga ma ala o Ieova. Na faaalia i le vaaiga, o le a tatalaina ‘le tusi o le ola.’ O lea la, o le a latou maua se avanoa e tusia ai o latou igoa i lenā tusi. O le a ‘faamasinoina [“taʻitoʻatasi,” NW] i latou e tusa ma a latou galuega’ e latou te faia pe a uma ona toe faatutūina aʻe. (Faaaliga 20:12, 13) O lea, pe a fua atu i le taunuuga mulimuli, e mafai ona avea lo latou toetū mai ma “toe tutū i le ola” ae lē o le “toe tutū i le faasala.”—Ioane 5:28, 29.

15. (a) O ai o le a lē toe faatutūina aʻe? (e) E tatau faapefea i le iloaina o le mea moni e uiga i le toetū ona aafia ai i tatou?

¹⁵ Peitaʻi ane, e lē o tagata uma na soifua mai ma maliliu o le a toe faatutūina. E iai nisi na latou faia ni agasala e lē toe mafai i ai se faamagaloga. O i latou na, e lē o i seoli, ae o loo i Kena, lea ua oo ai i latou i le faaumatiaga e faavavau. O le a aofia iā i latou na, tagata o le a faaumatia ai i le “puapuaga tele” lea ua lata mai.  (Mataio 12:31, 32; 23:33; 24:21, 22; 25:41, 46; 2 Tesalonia 1:6-9) O lea, ua faaalia e Ieova lona matuā alofa mutimutivale i le faasaʻolotoina o tagata oti mai Seoli. Peitaʻi ia lē avea le faamoemoe o le toetū ma pogai e tatou te lē manatu mamafa ai i le auala o loo tatou ola ai i le taimi nei. E leai se toetū mo i latou e fouvale ma le loto i ai i le pule silisili ese a Ieova. O lenei malamalamaga e tatau ona uunaʻia ai i tatou ina ia matuā talisapaia le alofa tunoa o le Atua, e ala i lo tatou ola e tusa ma lona finagalo.

Ua Faamalosia e le Faamoemoe o le Toetū

16. E mafai faapefea ona avea le faamoemoe o le toetū o se puna o le malosi sili?

¹⁶ O i tatou o ē ua matuā talitonu maumauaʻi i le faamoemoe o le toetū, ua mafai ona faamalosia ai i tatou. I le taimi nei, a o faasolo ina fāi ifo le soifua, ua tatou iloa ai e lē mafai ona tatou tolopōina le oti—e tusa lava po o ā togafitiga faafomaʻi o loo faaaogā. (Failauga 8:8) Pe afai sa tatou auauna faamaoni iā Ieova faatasi ma lana faalapotopotoga, e mafai ona tatou faatalitali atu ma le mautinoa atoatoa i le lumanaʻi. Ua tatou iloa, e ala i le toetū, o le a tatou toe olioli ai i le ola, i le taimi atofaina a le Atua. Maʻeu se olaga o le a iai! O “le ola moni” lenā, e pei ona taʻua e le aposetolo o Paulo.—1 Timoteo 6:19; Eperu 6:10-12.

17. O le ā e mafai ona fesoasoani iā i tatou ina ia tausisia ai le faamaoni iā Ieova?

¹⁷ O le iloaina o le iai o se toetū ma iloa Lē e puna mai ai lenā sauniuniga, e mafai ai ona tatou malolosi i le faatuatua. E faamalosia ai i tatou ina ia faamaoni i le Atua e tusa lava pe faamataʻuina i le oti mai tagata sauā. Ua leva ona faaaogā e Satani le mataʻu i le vave oo  mai o le oti, e fai ma ana auupega e faapologaina ai tagata. Peitaʻi e leʻi mataʻu faapena Iesu. Sa tumau lona faamaoni iā Ieova seʻia oo lava i lona maliu. E ala mai i lana taulaga togiola, na saunia ai e Iesu le auala mo le faasaʻolotoina o isi mai lenā mataʻu.—Eperu 2:14, 15.

18. O le ā ua fesoasoani i auauna a Ieova e ati aʻe ai se talaaga mataʻina o le faamaoni?

¹⁸ Ona o lo latou faatuatua i le sauniuniga o le taulaga a Keriso ma le toetū, ua ati aʻe ai e auauna a Ieova se talaaga mataʻina o ni ē e tausia le faamaoni. Ina ua latou fesagaʻi ma omiga, sa faamaonia mai ‘lo latou le faapelepeleina o o latou ola,’ ae sa sili lo latou alofa mo Ieova. (Faaaliga 12:11) I se gaoioiga atamai, latou te lē lafoaʻia mataupu silisili faa-Kerisiano mo le faasaoina o o latou ola i le taimi nei. (Luka 9:24, 25) Ua latou iloa, pe afai e maʻimau lo latou ola i le taimi nei ona o le sapasapaia ma le faamaoni o le pule silisili ese a Ieova, o le a ia tauia i latou i le toetū. Po o iā te oe ea lenā faatuatua? O le a e maua, pe afai e te alofa moni iā Ieova, ma e teuloto le uiga moni o le faamoemoe o le toetū.

Talanoaga Autalu

• Aiseā e manaʻomia ai e se tagata ona malamalama e uiga i le tulaga o ē ua maliliu, ina ia mafai ona ia talisapaia le toetū?

• O ai o le a toe faatutūina mai i le oti, ma e tatau faapefea i lenei malamalamaga ona aafia ai i tatou?

• E faapefea ona faamalosia i tatou i le faamoemoe o le toetū?

[Fesili mo le Suʻesuʻega]

[Ata i le itulau 84, 85]

Ua folafola mai e Ieova, o le a toe faatutūina mai ē amiotonu ma ē amiolētonu