Mataupu Sefulutolu

Le Motu o Tagata e Toʻatele i Luma o le Nofoalii o Ieova

1. (a) A o leʻi maua e auauna a le Atua mai aso anamua ma le 144,000 lo latou taui, o le ā e tatau ona oo iā i latou? (e) O le ā o le a mafai ona maua e le “motu o tagata e toatele” o loo ola i le taimi nei?

SA FAAMUAMUA i olaga o auauna faamaoni a le Atua i taimi o Apelu e oo mai iā Ioane le Papatiso, le faia o le finagalo o le Atua. Peitaʻi, na maliliu uma i latou, ma faatalitali ai mo lo latou toetutū aʻe e ola i le lalolagi fou a le Atua. E tatau foʻi i le toʻa 144,000, o ē o le a pule faatasi ma Keriso i le Malo faalelagi o le Atua ona maliliu, ona faatoʻā mafai lea ona maua lo latou taui. Peitaʻi, ua faaalia e le Faaaliga 7:9, i aso nei e gata ai, o le a iai le “motu o tagata e toatele” mai atunuu uma o ē o le a lē feoti, ae o le a latou maua le faamoemoe o le ola e faavavau i le lalolagi. Po o oe ea o se tasi o i latou na?

Le Mātauliaina o le Motu o Tagata e Toʻatele

2. O ā faamatalaga na māfua ai ona maua le malamalamaga manino mo le mātauliaina o le motu o tagata e toʻatele i le Faaaliga 7:9?

² I le 1923, na iloa ai e auauna a Ieova, “o mamoe” i le faataoto a Iesu o loo faamatalaina i le Mataio 25:31-46 ma “isi mamoe” na ia faasino atu i ai e pei ona faamauina i le Ioane 10:16, o tagata na o le a maua le avanoa e ola ai e faavavau i le lalolagi. I le 1931 na iloa ai e faapea, o i latou ua faamatalaina i le Esekielu 9:1-11 o ē ua faailogaina o latou muaulu, o i latou ia ua iai le faamoemoe e ola i le lalolagi. Ae i le 1935 na iloa ai o le motu o tagata e toʻatele,  o se vaega lea o isi mamoe na fetalai mai ai Iesu. I aso nei, ua faitau miliona le aofaʻi o lenei motu o tagata e toʻatele o ē ua maua le finagalo malie o le Atua.

3. Aiseā e lē o faasino atu ai i le vasega faalelagi le faaupuga ‘o loo tutū i luma o le nofoālii’?

³ I le Faaaliga 7:9, e lē o vaaia ai se iai o le motu o tagata e toʻatele i le lagi. O lo latou ‘tutū i luma o le nofoālii’ o le Atua e lē uiga ai faapea, e ao ona latou iai i le lagi. O lona uiga, o loo silafia mai e le Atua i latou. (Salamo 11:4) Ua faamaonia le manatu e lē o se vasega faalelagi le motu o tagata e toʻatele lea “e le ma faitaulia e se tasi,” pe a faatusatusa atu lona aofaʻiga lē mafaitaulia, i le aofaʻiga lea e tusia i le Faaaliga 7:4-8 ma le Faaaliga 14:1-4. O inā ua faaalia ai e toʻa 144,000 le aofaʻi o i latou e aveina aʻe i le lagi nai le lalolagi.

4. (a) O le ā “le puapuaga tele” lea o le a sao mai ai le motu o tagata e toʻatele? (e) E pei ona taʻua i le Faaaliga 7:11, 12, o ai o loo mātauina mai le motu o tagata e toʻatele, ma aufaatasi mai ai i le tapuaʻiga?

⁴ Ua faapea mai le Faaaliga 7:14 e uiga i le motu o tagata e toʻatele: “O i latou ia o e o mai nai le puapuaga tele.” O le a latou sao mai i se mea mataʻutia e leʻi tupu muamua lava i le soifuaga o tagata. (Mataio 24:21) Pe a oo ina latou faafetai atu i le Atua ma Keriso mo lo latou faaolataga, ona aufaatasi lea iā i latou o foafoaga faamaoni uma i le lagi, i le faapea atu: “Amene! Ia i lo tatou Atua le faamanū, ma le viiga, ma le poto, ma le faafetai, ma le mamalu, ma le mana, ma le malosi e faavavau faavavau lava! Amene.”—Faaaliga 7:11, 12.

Ua Faamaonia le Tatau Ona Faasaoina

5. E mafai faapefea ona tatou iloa mea e manaʻomia ina ia avea ai o se vaega o le motu o tagata e toʻatele?

⁵ O le faasaoina o le motu o tagata e toʻatele mai le  puapuaga tele, e faia e tusa ai ma tapulaa amiotonu a Ieova. O loo manino ona talanoaina i le Tusi Paia uiga e mātaulia ai i latou o le a faasaoina. O lea, o i latou o loo naunau i le amiotonu, ua mafai nei loa ona gaoioi, ma le faamoemoe o le a faamaonia le tatau ona faasaoina o i latou. O le ā e tatau ona latou faia?

6. Aiseā e mafai ai ona faatusaina ma le tonu le motu o tagata e toʻatele i mamoe?

⁶ E iai i mamoe le uiga filemu ma le usiusitai. O lea, ina ua fetalai Iesu faapea e iai isi ana mamoe ua lē o iai i le vasega faalelagi, sa ia uiga atu i tagata o ē e lē gata ina mananaʻo e ola e faavavau i le lalolagi, ae o le a gauaʻi atu foʻi i ana aʻoaʻoga. Na ia fetalai: “O aʻu mamoe e faalogo mai i latou i loʻu leo, ua ou iloa foi i latou, ua latou mulimuli mai foi ia te au.” (Ioane 10:16, 27) O tagata nei o loo matuā faalogo atu ma faia ma le usiusitai mea o loo fetalai mai ai Iesu ma avea ma ona soo.

7. O ā uiga e ao ona ati aʻe e soo o Iesu?

⁷ O ā isi uiga e ao ona ati aʻe e nei soo taʻitasi o Iesu? Ua tali mai le Afioga a le Atua: “Ia outou to ese le tagata tuai o loo ua leaga, e tusa ma le amioga faaanamua . . . ma ia oofu outou i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:22-24) Ua latou ati aʻe uiga e atili ai ona autasi auauna a le Atua—“o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā [“pulea totino,” NW ].”—Kalatia 5:22, 23, LT.

8. O ā mea o le a fesagaʻi ma le motu o tagata e toʻatele a o latou lagolagoina le vaega totoe?

⁸ E lagolagoina e le motu o tagata e toʻatele se vaega toʻaitiiti o i latou e faamoemoe mo le lagi, o ē o loo taʻimua i le galuega talaʻi. (Mataio 24:14; 25:40) O loo avatu e isi mamoe lenei lagolagosua, e ui lava ina latou iloa o  le a latou fesagaʻi ma teteega, talu ai, i le amataga o nei aso e gata ai, na lafo ese ai e Keriso Iesu ma ana agelu ia Satani ma ana temoni mai le lagi. O lona uiga, “oi talofa ia te outou o e nonofo i le fanua . . . auā ua alu ifo ia te outou le tiapolo ua lotoa tele, auā ua na iloa ua saasaa ona po.” (Faaaliga 12:7-12, LT) O lea, ua matuā aasa ai teteega a Satani i auauna a le Atua a o latalata mai le iʻuga o lenei faiga o mea.

9. Ua faapefea ona taulau manuia auauna a le Atua i le talaʻia o le tala lelei, ma aiseā?

⁹ E ui lava i sauāga ogaoga, ae o loo faaauau pea ona  agaʻigaʻi i luma le galuega talaʻi. E na o ni nai afe o tagata talaʻi o le Malo sa iai ina ua iʻu le Taua Muamua a le Lalolagi, ae i le taimi nei ua faitau miliona, auā na folafola mai e Ieova: “O auupega uma e faia e tau ma oe e le manuia ia.” (Isaia 54:17) E oo lava i se sui o le faamasinoga sili a Iutaia sa ia ioe e lē mafai ona faatoʻilaloina le galuega a le Atua. Na ia taʻu atu i le ʻau Faresaio i le uluaʻi senituri e faatatau i le ʻausoo: “Ia tuu pea ia te i latou; auā afai ua tupu mai tagata lena sauniga ma lena galuega, e faaumatia ia; a e afai ua tupu mai le Atua, tou te le mafai ona faaumatia; ina neʻi iloa ua outou fai taua i le Atua lava.”—Galuega 5:38, 39.

10. (a) O le ā le uiga o “le faailoga” lea o loo mauaina e le motu o tagata e toʻatele? (e) Ua faapefea ona usiusitai atu auauna a le Atua i le “leo mai le lagi”?

¹⁰ O loo vaaia le motu o tagata e toʻatele o ni ē ua faailogaina mo le faasaoina. (Esekielu 9:4-6) O “le faailoga” o le faamaoniga lea, ua tuuina atu i latou iā Ieova, ua papatisoina e fai ma soo o Iesu ma o loo galulue i le atiina aʻe o uiga e pei o Keriso. Ua latou usiusitai i le “leo mai le lagi” o loo faapea mai e faatatau i le emepaea o lotu sesē i le lalolagi aoao a Satani: “Loʻu nuu e, ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala.”—Faaaliga 18:1-5.

11. I le ā le auala tāua ua faaalia mai ai e le motu o tagata e toʻatele, o i latou o auauna a Ieova?

¹¹ Na fetalai mai foʻi Iesu i ona soo: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) I se faaeseesega, o loo toe fefasiotiaʻi lava tagata o lotu a lenei lalolagi i taimi o taua, ma e masani lava ona faia faapea ona o le eseese o o latou  atunuu! Ua faapea mai le Afioga a le Atua: “O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso. . . . Ia tatou fealofani. E le pei o Kaino na i lē o loo leaga, na fasioti foi i lona lava uso.”—1 Ioane 3:10-12.

12. I le puapuaga tele, o le a faapefea ona feutagaʻi Ieova ma “laau” faalelotu o loo fuaina mai fua leaga?

¹² Na folafola mai e Iesu: “[O] laau lelei taitasi [e] fua mai i fua lelei; a o le laau leaga e fua mai i fua leaga. E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. O laau uma e le fua mai i fua lelei, e taia ia ma lafoina i le afi. O lea foi tou te iloa ai i latou i o latou fua.” (Mataio 7:17-20) O fua o loo fuaina mai e lotu a lenei lalolagi ua mātaulia ai i latou o ni “laau” leaga, lea ua toe o se aga ona faaumatia lea e Ieova i le puapuaga tele.—Faaaliga 17:16.

13. Ua faapefea ona faaalia mai e le motu o tagata e toʻatele lo latou ‘tutū autasi i luma o le nofoālii’ o Ieova?

¹³ Ua faasino atu e le Faaaliga 7:9-15 i vala ia e taʻitaʻia atu ai i le faasaoina o le motu o tagata e toʻatele. O loo faaalia lo latou ‘tutū [autasi] i luma o le nofoālii’ o Ieova, o loo sapasapaia lana pule silisili ese aoao. Ua latou “ta foi o latou ofu, ma ua faasinasinaina o latou ofu i le toto o le Tamai mamoe,” e faaalia ai lo latou talia o le taulaga faatogisala a Iesu. (Ioane 1:29) Ua latou tuuina atu i latou lava i le Atua, ma faailogaina e ala i le faatofuina i le vai. O lea ua latou maua ai se tulaga mamā i le silafaga a le Atua, o loo faaata mai i o latou ofu sisina, ma tuuina atu iā te ia le ‘auaunaga [“paia,” NW] i le ao ma le po.’ Pe o iai ea ni mea e mafai ona e faia, ina ia ōgatusa ai lou olaga ma mea ua faamatalaina i inei?

 O Aogā i le Taimi Nei

14. O ā nisi o aogā e sili ona mataʻina, lea ua oo mai lava i le taimi nei, o loo maua foʻi e auauna a Ieova?

¹⁴ Atonu ua e mātauina aogā e sili ona mataʻina, lea ua oo mai lava i le taimi nei, o loo maua foʻi e i latou o loo auauna iā Ieova. Mo se faaaʻoaʻoga, ina ua e aʻoaʻoina fuafuaga amiotonu a Ieova, sa e malamalama ai e iai se faamoemoe pupula mo le lumanaʻi. O lenei la ua iā te oe se fuafuaga moni i le olaga—ina ia auauna i le Atua moni faatasi ma se faamoemoe fiafia o le ola e faavavau i se lalolagi parataiso. Ioe, o le a ‘taʻitaʻia atu e Iesu Keriso le motu o tagata e toʻatele i puna o vai ola.’—Faaaliga 7:17.

15. Ua faapefea ona aogā i Molimau a Ieova lo latou sapasapaia o mataupu silisili o le Tusi Paia, e tusa ai o mataupu faapolotiki ma tau amio?

¹⁵ O se aogā ofoofogia ua olioli ai le motu o tagata e toʻatele, o le alofa, le autasi, ma le fegalegaleaʻi o auauna a Ieova i le lalolagi aoao. Talu ai e tutusa taumafa faaleagaga o loo fafagaina ai i tatou uma, e tutusa foʻi la tulafono ma mataupu silisili o le Afioga a le Atua o loo tatou usitaia. O le pogai lenā ua tatou lē fevaevaeaʻi ai i ni manatu faapolotiki pe faalotonuu. E lē gata i lea, ua tatou tausisia tapulaa maualuluga tau amio, o loo tāpā e le Atua mai ona tagata. (1 Korinito 6:9-11) O lea, na i lo o le oo iā i latou o femisaʻiga, le lē autasi, ma amioga lē mamā e pei ona taatele i le lalolagi, ae o loo olioli tagata o Ieova i le mea ua taʻua o se parataiso faaleagaga. Seʻi mātau le auala o loo faamatalaina ai lenei mea i le Isaia 65:13, 14.

16. E ui lava i faafitauli masani o le olaga, ae o le ā le faamoemoe o loo iai i le motu o tagata e toʻatele?

¹⁶ E leai, e lē lelei atoatoa auauna faaletagata a Ieova. O loo aafia i latou i faafitauli taatele o le olaga i lenei lalolagi,  e pei o le fesagaʻi ma tulaga faigatā pe āfaina fua i taua a atunuu. O loo oo foʻi iā i latou maʻi, o puapuaga ma le oti. Peitaʻi ua iā i latou le faatuatuaga e faapea, o le a “sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga.”—Faaaliga 21:4.

17. E tusa lava po o le ā se mea e ono tupu iā i tatou i le taimi nei, ae o le ā le lumanaʻi ofoofogia ua teuina mai mo i latou e tapuaʻi i le Atua moni?

¹⁷ E tusa lava pe e te oti i le taimi nei ona o le soifuaga matua, se maʻi, se faalavelave faafuaseʻi, po o sauāga, ae o le a toe faatūina mai oe e Ieova ina ia e ola i le Parataiso. (Galuega 24:15) Ona faaauau ai lea ona e olioli i se tausamiga faaleagaga a o faagasolo le Pulega Faameleniuma a Keriso. O le a faateleina lou alofa i le Atua a o e tagaʻi atu i le faataunuuina i se tulaga mamalu o ana fuafuaga. O faamanuiaga faaletino o le a saunia e Ieova i lenā taimi, o le a atili ai ona faateleina lou alofa mo ia. (Isaia 25:6-9) Maʻeu se lumanaʻi ofoofogia ua teuina mai mo tagata o le Atua!

Talanoaga Autalu

• O le ā le mea o le a tupu e sili atu ona mataʻina o loo faafesootaʻi atu i ai e le Tusi Paia le motu o tagata e toʻatele?

• Pe afai tatou te fia aofia moni lava i lenā motu o tagata e toʻatele ua finagalo malie i ai le Atua, o le ā ua tatau nei ona tatou faia?

• O le ā le tāua iā te oe o faamanuiaga o loo olioli ai nei le motu o tagata e toʻatele, ma o le a olioli ai foʻi i le lalolagi fou a le Atua?

[Fesili mo le Suʻesuʻega]

[Ata i le itulau 123]

E faitau miliona le motu o tagata e toʻatele o loo tapuaʻi ma le autasi i le Atua moni