Mataupu Sefulu

O le Malo “e Le Faaumatia e Faavavau”

1. O le ā le mea moni ua faamautūina mai e mea o loo tutupu i le lalolagi a o faagasolo le soifuaga o le tagata?

O MEA o loo tutupu i le lalolagi i aso taʻitasi ua faamautūina ai le mea moni, e lē o maua e tagata se fiafiaga i lo latou teena o le pule silisili ese a Ieova, ae taumafai e pulea i latou lava. E leai se faigāmalo faaletagata o aumaia ni manuia tutusa i tagata uma lava. E ui ua oo le atamai faasaienisi o tagata i se tele e lē mafaatusalia, ae e lē o mafai ai ona latou soloiesea maʻi pe taofia le oti, e oo lava i se tagata e toʻatasi. Ua lē mafai e pulega a tagata ona faamutaina taua, o faiga sauā, o soligātulafono, o faiga faapiʻopiʻo, po o le mativa foʻi. O loo pulepuletutū pea faigāmalo fia tautalatasi i tagata i le tele o atunuu. (Failauga 8:9) O loo faapogaia e meafaigaluega faaonapōnei, le matapeʻapeʻa, ma le lē aʻoaʻoina, le faaleagaina o le laueleele, le suavai, ma le ʻea. O le leaga o le faasoasoaina o le tamaoaiga e ē o gafa ma lea matafaioi, ua faigatā ai i le toʻatele o tagata ona mauaina mea e manaʻomia ina ia ola ai. O le faitau afe o tausaga o pulega a tagata, ua matuā manino mai ai le mea moni lenei: “E le o i le tagata lona ala, e le o i le tagata e savali ona faatonuina le mea e ui ai o ia.”—Ieremia 10:23.

2. O le ā le vaifofō e tasi mo faafitauli o tagata?

² O le ā le vaifofō mo nei faafitauli? O le Malo o le Atua, lea na aʻoaʻo ai e Iesu ona soo ina ia tatalo ai: “Ia oo mai  lou malo, Ia faia lou finagalo, I le lalolagi e pei ona faia i le lagi.” (Mataio 6:9, 10) Ua faamatalaina le Malo faalelagi o le Atua i le 2 Peteru 3:13 e faapea, o le “lagi fou,” lea e tatau ona pule mai i le “lalolagi fou,” po o le sosaiete o tagata amiotonu. E tāua tele le Malo faalelagi o le Atua, o le pogai lenā na avea ai ma taulaʻiga o le talaʻiga a Iesu. (Mataio 4:17) Sa ia taʻua le tulaga e tatau ona iai lenā Malo i o tatou olaga, i lona augani mai: “A ia outou muai saili lona malo ma lana amiotonu.”—Mataio 6:33.

3. Aiseā ua avea ai le aʻoaʻoina o mea e uiga i le Malo o le Atua, o se manaʻoga ua sili ona faanatinati i aso nei?

³ O le aʻoaʻoina o mea e uiga i le Malo o le Atua o se manaʻoga ua sili ona faanatinati i aso nei, auā ua lē pine ona gaoioi lea o lenā Malo ia suia e faavavau le pulega o lenei lalolagi. Ua muaʻi taʻua e le Tanielu 2:44 e faapea: “O ona po o ia tupu [o faigāmalo o loo pule nei] e faatuina ai e le Atua o le lagi o le malo [i le lagi] e le faaumatia e faavavau; o lea malo foi, e le tuuina atu ia i se tasi nuu [e lē toe pule lava tagata i le lalolagi], na te tuʻimomomoina ma faaumatia ia malo uma lava [o loo iai i le taimi nei], a o ia e tumau lava e faavavau.” O lea la, o le a aumaia e le Malo le iʻuga o nei aso e gata ai, e ala i le faaumatia o lenei faiga aoao amioleaga o mea. Ona matuā faamautinoa ai lea o le pulea o le lalolagi e le Malo faalelagi. Maʻeu so tatou lotofaafetai ona ua matuā lalata mai lava le mapusaga o le a aumaia e lenei pulega!

4. I le fesootaʻi atu ma le Malo, o le ā na tupu i le lagi i le 1914, ma aiseā e tāua ai lenā mea iā i tatou?

⁴ I le 1914, na avea ai Keriso Iesu ma Tupu, ma sa ia mauaina foʻi le aiā e ‘pule ai i totonu o e ita ia te ia.’ (Salamo 110:1, 2) I lenā foʻi tausaga, na amata mai ai “aso  e gata ai” o lenei faiga amioleaga o mea. (2 Timoteo 3:1-5, 13) O le taimi lava foʻi lea na tutupu moni ai i le lagi mea sa vaaia e Tanielu i se faaaliga faavaloaga. Sa tauaao atu e “Lē ua mai anamua ona aso,” o Ieova le Atua lea, i le Atalii o le tagata, o Iesu Keriso, “le pule, ma le viiga, ma le malo, ina ia auauna ia te ia o nuu uma, ma atu nuu, ma gagana eseese.” I le lipotia mai o lenei vaaiga, na tusi ai Tanielu e faapea: “O lana pule o le pule e faavavau lea, e le mavae atu ia, o lona malo foi e le faaumatia.” (Tanielu 7:13, 14) O lenei Malo faalelagi i le taʻitaʻiga a Keriso Iesu, ua finagalo le Atua e auala mai ai le mauaina e i latou o ē naunau i le amiotonu, o le anoanoaʻi o mea lelei sa ia fuafuaina ina ua ia tuuina o tatou uluaʻi mātua faaletagata i le Parataiso.

5. O ā auʻiliʻiliga e faatatau i le Malo e tatou te matuā naunau i ai, ma aiseā?

⁵ Po o e faanaunau ea ia avea oe o se tagatānuu faamaoni o le Malo? Afai o lea, o le a e matuā naunau la i le faatulagaga  ma le faagaoioiga o lenei pulega faalelagi. O le a e fia iloa mea o loo faia e le Malo i le taimi nei, o mea o le a faataunuuina ai i le lumanaʻi, ma mea o loo manaʻomia mai ai iā te oe. A o e iloiloina totoʻa le Malo, e tatau ona tuputupu aʻe ai lou agaga talisapaia. Pe afai e te sapasapaia lana pulega, o le a atili mafai ai ona e taʻu atu i isi mea ofoofogia o le a faia e le Malo o le Atua mo tagata usiusitai.—Salamo 48:12, 13.

O Pule o le Malo o le Atua

6. (a) Ua faaalia faapefea e le Tusi Paia po o ai e ana le pule silisili ese lea e faatinoina e ala mai i le Malo Faa-Mesia? (e) E tatau faapefea ona aafia i tatou i mea ua tatou aʻoaʻoina e uiga i le Malo?

⁶ O se tasi o mea muamua lava e faaalia mai e lenā iloiloga e faapea o lenei Malo Faa-Mesia, o se faatinoga o le pule silisili ese a Ieova lava ia. O Ieova na foaʻiina atu “le  pule, ma le viiga, ma le malo” i lona Alo. Ina ua amata e le Alo o le Atua ona pule o se Tupu, na faalauiloa ai ma le talafeagai e leo mai le lagi e faapea: “O le malo o le lalolagi ua avea mo lo tatou Alii [Ieova le Atua] ma lona Keriso, e fai foi [Ieova] ma tupu e faavavau faavavau lava.” (Faaaliga 11:15) Ona o mea uma lava la ua tatou mātauina e uiga i lenei Malo ma mea ua faataunuuina ai, e mafai ona tatou faalatalata atili atu ai iā Ieova. O mea ua tatou aʻoaʻoina, e tatau ona totō ifo ai i o tatou loto se faanaunauga e gauaʻi atu i lana pule silisili ese e faavavau.

7. Aiseā e matuā tāua ai iā i tatou le manatu faapea, o Iesu Keriso, o le Pule Lagolago a Ieova?

⁷ Seʻi manatu foʻi i le mea moni e faapea, ua tuuina e Ieova Iesu Keriso i le nofoalii e avea ma ana Pule Lagolago. I le avea ma Matai Tufuga o lē na faaaogā e le Atua e faia le lalolagi ma tagata, ua sili atu ai ona silafia lelei e Iesu o tatou manaʻoga, na i lo o le iloa e so o se tasi o i tatou. E lē gata i lea, i le amataga mai o le olaga o le tagata, sa ia faaalia mai ai lona ‘fiafia i le fanau a tagata.’ (Faataoto 8:30, 31; Kolose 1:15-17) Na faamaonia le tele o lona alofa mo tagata, ina ua afio mai lava i le lalolagi ma foaʻi mai lona soifua e fai ma togiola mo i tatou. (Ioane 3:16) O inā na ia saunia ai mo i tatou le auala e tuusaʻoloto ai mai le agasala ma le oti, ma le avanoa mo le ola e faavavau.—Mataio 20:28.

8. (a) I le ese mai i pulega faaletagata, aiseā o le a tumau ai le pulega a le Atua? (e) O le ā le faiā a “le auauna faamaoni ma le mafaufau” i le pulega faalelagi?

⁸ O le Malo o le Atua, o se pulega e mautū ma tumau. Ua faamautinoaina lona tumau e le mea moni e faapea, o Ieova lava ia e lē mafai ona maliu. (Sapakuka 1:12) I le  ese mai i tupu faaletagata, o Iesu Keriso, lea ua tauaao i ai e le Atua le tulaga tautupu, e lē mafai foʻi ona maliu o ia. (Roma 6:9; 1 Timoteo 6:15, 16) E toʻa 144,000 isi o le a iai faatasi ma Keriso i nofoalii faalelagi, o i latou o auauna faamaoni a le Atua mai “ituaiga uma, ma gagana eseese, ma nuu, atoa ma atunuu.” Ua foaʻiina atu foʻi iā i latou le ola e lē mafai ona oti. (Faaaliga 5:9, 10, LF; 14:1-4; 1 Korinito 15:42-44, 53) Ua iai nei i le lagi le toʻatele o i latou, ae o le vaega totoe o i latou o loo iai pea i le lalolagi, o loo faia aʻe ai i le taimi nei “le auauna faamaoni ma le mafaufau,” lea o loo latou faamaoni e faalautele atu manaʻoga o lenā Malo i inei i le lalolagi.—Mataio 24:45-47.

9, 10. (a) O ā taaʻiga leaga fevaevaeaʻi o le a aveesea e le Malo? (e) Pe afai tatou te lē fia avea ma fili o le Malo o le Atua, o ā la faatosinaga e tatau ona tatou ʻalofia?

⁹ Ua toe nei o se aga, i le taimi atofaina a Ieova, ona ia aauina mai loa lea o lana ʻaufaaoosala e faamamāina le lalolagi. O le a latou faaumatia e faavavau tagata uma ua filifili e lē fia amanaʻia lana pule silisili ese, ma ʻinoʻino i sauniuniga alofa o loo ia faia e ala mai iā Iesu Keriso. (2 Tesalonia 1:6-9) O le aso lenā o Ieova, le taimi ua leva ona faatalitalia mo le faaeaeaina o lana Pule Silisili Ese Aoao. “Faauta, o loo sau le aso o Ieova, e ogoogo i le toatamai ma le toasa tele; . . . na te faaumatia foi tagata agasala o i ai.” (Isaia 13:9) “E fai lea aso ma aso o le toasa, o le aso o le puapuaga ma le tiga, o le aso o le faatafunaina ma le faagaogaoina, o le aso o le pouliuli ma le pogisa, o le aso o ao ma le faamalumalu.”—Sefanaia 1:15.

¹⁰ O le a faaumatia e faavavau lotu sesē uma ma faigāmalo uma a tagata ma a latou ʻautau, lea ua matuā puleaina e le pule amioleaga lē vaaia o lenei lalolagi. O le a  faaumatia i latou uma o loo faifaimea faatasi ma lenei lalolagi, e ala i le ola i ni olaga manatu faapito, lē faamaoni, ma le lē mamā tau amio. O le a lē toe mafai e Satani ma ana temoni ona fesootaʻi mai i tagata e aināina le lalolagi, auā o le a matuā taofiofi mau i latou mo le afe o tausaga. Ona pulea atoatoa ai lea e le Malo o le Atua mataupufai uma a le lalolagi. Maʻeu se mapusaga o le a iai mo ē uma e naunau i le amiotonu!—Faaaliga 18:21, 24; 19:11-16, 19-21; 20:1, 2.

O Fuafuaga a le Malo—Le Auala e Maua Ai

11. (a) O le a faapefea ona faataunuu e le Malo Faa-Mesia le fuafuaga a Ieova mo le lalolagi? (e) O le a faapeʻī le pulega o le Malo mo tagata e nonofo i le lalolagi i lenā taimi?

¹¹ O le a faataunuuina atoatoa e le Malo Faa-Mesia le uluaʻi fuafuaga a le Atua mo le lalolagi. (Kenese 1:28; 2:8, 9, 15) E oo mai lava i le asō, e lē o lagolagoina e tagata lenā fuafuaga. Peitaʻi ane, o “le olaga [“lalolagi aināina,” NW] atali” o le a pulea e le Atalii o le tagata, o Iesu Keriso. O i latou uma e sao mai le sala faafaamasinoga lea e faaoo mai e Ieova i lenei faiga tuai o mea, o le a galulue autasi i le taʻitaʻiga a Keriso le Tupu. O le a latou fiafia foʻi e faia so o se mea na te faatonuina, ina ia avea ai le lalolagi o se parataiso i le lalolagi aoao. (Eperu 2:5-9, LF) O le a olioli tagata uma i galuega e faia e o latou lava lima, ma matuā faamanuiaina i le anoanoaʻi o fua o le laueleele.—Salamo 72:1, 7, 8, 16-19; Isaia 65:21, 22.

12. O le a faapefea ona maua e tagatānuu o le Malo le tulaga o le lelei atoatoa i le tino ma le mafaufau?

¹² Ina ua foafoaina Atamu ma Eva, sa lelei atoatoa i laʻua, ma o le fuafuaga a le Atua, ina ia la faatumuina le lalolagi i a la fanau e lelei atoatoa i le tino ma le mafaufau. O le a faataunuuina ma le matagofie lenā fuafuaga  i le pulega a le Malo. E aofia ai le aveesea o aafiaga uma o le agasala, ma i lenā itu, ua avea ai Keriso e lē gata o se Tupu, ae o se Ositaulaga Sili foʻi. O le a ia onosai pea e fesoasoani atu i ona tagatānuu usiusitai, ina ia latou maua manuia mai le tāua o le taulaga faatogisala, sa faia i lona lava soifua faaletagata.

13. O ā faamanuiaga i la le tino o le a maua i le pulega a le Malo?

¹³ I le pulega a le Malo, o le a maua ai e tagata e aināina le lalolagi le tele o faamanuiaga i la le tino e maofa ai. “Ona faapupulaina ai lea [o] mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.” (Isaia 35:5, 6) O le tino ua matagā ona o le soifuaga matua pe o le maʻi foʻi, o le a sili atu ona toe momosi na i lo le tino o se tamaitiiti, ma o faalogona lē lavā o le tino sa iai, o le a toe faafoʻisia i le malaulau o le malosi. “E toe ola lelei ai lona tino e sili i le tama itiiti, e toe foi o ia i ona po o lona taulealea.” (Iopu 33:25) O le a oo mai le aso e lē toe iai se māfuaaga e faapea mai ai se tasi, “ou te maʻi.” Aiseā? Auā o le a mapu tagata o ē matataʻu i le Atua mai le avega mamafa o le agasala ma ona āuga faanoanoa. (Isaia 33:24; Luka 13:11-13) Ioe, “e sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:4.

14. O le ā e aofia ai i le mauaina o le lelei atoatoa faaletagata?

¹⁴ Ae peitaʻi, o le mauaina o le lelei atoatoa, e aofia ai ni mea e tele atu na i lo o le tau ina iai o se tino malosi ma se mafaufau lelei. E aofia ai le faaatagia lelei atu o uiga o Ieova, talu ai sa faia i tatou ‘i le faatusa o le Atua, ia foliga iā te ia.’ (Kenese 1:26) Ona o lenā māfuaaga, o le a tele ai ni aʻoaʻoga e manaʻomia. I totonu o le lalolagi fou, o le a  “mau ai le amiotonu.” O lea, e pei ona sa valoia mai e Isaia, ‘e aʻoaʻoina e o nonofo i le lalolagi [“i le amiotonu,” NW].’ (2 Peteru 3:13; Isaia 26:9) O lenei uiga e maua ai le filemu—i le va o tagata o ituaiga uma, i le liʻo o aumea māfana, i totonu o le aiga o se tasi, ae sili ai, i le va ma le Atua. (Salamo 85:10-13; Isaia 32:17) O i latou e aʻoaʻoina le amiotonu, o le a faasolosolo pea ona aʻoaʻoina i le finagalo o le Atua. A o faasolo ina matuā mauaa i o latou loto le alofa mo Ieova, o le a latou usitaia ai ona ala i vala uma o o latou olaga. O le a mafai ai ona latou faapea mai e pei ona sa fetalai Iesu, ‘ou te faia pea lava o mea e lelei i loʻu Tamā.’ (Ioane 8:29) Maʻeu se olioli o le a iai le olaga pe afai e tupu moni lenā mea i tagata uma!

Ua Manino Mai Mea ua Faataunuuina

15. I le faaaogāina o fesili i lenei palakalafa, ia faamatilatila mai mea ua faataunuuina e le Malo, ma faaali mai mea e tatau ona tatou faia nei.

¹⁵ Ua matuā manino mai lava mea ofoofogia ua faataunuuina e le Malo o le Atua ma ona tagatānuu. O fesili ma mau o loo mulimuli mai, o le a faamanatu atu ai iā te oe nisi o mea ua faataunuuina, faapea foʻi mea e mafai ma e tatau ona faia nei, e tagatānuu uma o le Malo.

O ai na muaʻi gaoioi lava le Malo e faasagatau atu i ai, ma o le ā le iʻuga? (Faaaliga 12:7-10, 12)

Talu mai le faanofotupuina o Keriso, o ai le vaega lea ua uaʻi atu nei i ai, mo le aoaoina o ona sui o loo totoe? (Faaaliga 14:1-3)

O le ā le galuega na valoia mai e Iesu faapea o le a ia faia pe a mavae le amataga o le puapuaga tele, e pei ona faamauina i le Mataio 25:31-33?

O le ā le galuega faavae ua faataunuuina i aso nei?  O ai o loo faia ai so latou sao? (Salamo 110:3; Mataio 24:14; Faaaliga 14:6, 7)

Aiseā ua lē mafai ai e tagata faapolotiki ma tagata lotu o loo tetee mai, ona latou taofia le galuega talaʻi? (Sakaria 4:6; Galuega 5:38, 39)

O ā suiga ua faia i olaga o i latou o loo gauaʻi atu i le pule a le Malo? (Isaia 2:4; 1 Korinito 6:9-11)

Le Malo o le Afe Tausaga

16. (a) O le ā le umi o le a pule ai Keriso? (e) O ā mea ofoofogia o le a faia a o faagasolo lea pulega, ma pe a mavae foʻi lenā taimi?

¹⁶ Pe a uma ona lafoina Satani ma ana temoni i le tō e lē gata, ona pule ai lea o Iesu Keriso ma ona suli e 144,000 o ni tupu ma ositaulaga mo tausaga e afe. (Faaaliga 20:6) A o faagasolo lenā vaitaimi, o le a oo ina lelei atoatoa tagata, ma tafiesea ai e faavavau le agasala ma le oti na tuufaasolo mai iā Atamu. I le iʻuga o le Pulega o le Afe Tausaga, ina ua māeʻa ona faatinoina ma le manuia lona tofiga o se Tupu Ositaulaga Faa-Mesia, ona ‘tuuina atu ai lea e Iesu le malo’ i lona Tamā, “ina ia pule aoao le Atua i le aoao o mea.” (1 Korinito 15:24-28) O inā loa o le a tatala mai ai Satani mo sina taimi puupuu e tofotofoina tagata ua togiolaina, ina ia iloa ai pe latou te lagolagoina le pule silisili ese aoao a Ieova. Pe a māeʻa lenā tofotofoga faaiʻu, ona faaumatia loa lea e Ieova, o Satani ma tagata fouvale o ē ʻau ma ia. (Faaaliga 20:7-10) O i latou e sapasapaia le pule silisili ese a Ieova—lana aiā e pule ai—o le a matuā faaalia mai lo latou faamaoni lē maluelue. Ona latou maua ai lea o lo latou faiā tatau ma Ieova, ua taliaina e ia o ni ona atalii ma afafine, ma ua faamaonia e le Atua mo le ola e faavavau.—Roma 8:21.

17. (a) O le ā o le a tupu i le Malo i le iʻuga o le afe tausaga? (e) O le ā le uiga e moni ai le faapea atu, “e le faaumatia e faavavau” le Malo?

 ¹⁷ O lea la, o le a suia le matafaioi a Iesu faapea le 144,000, e tusa ai o le lalolagi. O ā a latou galuega o le a iai i le lumanaʻi? E lē o taʻu maia e le Tusi Paia. Peitaʻi, afai tatou te sapasapaia ma le faamaoni le pule silisili ese a Ieova, o le a tatou ola ai pea i le iʻuga o le Pulega o le Afe Tausaga, ma mafai ai ona tatou iloa ai po o le ā ua fuafuaina e Ieova mo i latou, faapea foʻi ma lana vateatea e sili ona ofoofogia. E ui i lea, o le pulega a Keriso mo le afe o tausaga o le a “faavavau,” ma o lona Malo ‘o le a le faaumatia.’ (Tanielu 7:14) I le ā le itu? O le a lē tuuina atu i isi e ese o latou faanaunauga e pule ai, auā o Ieova lea o le a avea ma Pule. E lē gata i lea, “e le faaumatia e faavavau” le Malo, auā o le a tumau e faavavau mea na te faataunuuina. (Tanielu 2:44) O le a faavavau ona faamamaluina le Tupu Ositaulaga Faa-Mesia ma i latou o loo avea ma tupu ma ositaulaga faatasi ma ia, talu ai la latou auaunaga faamaoni iā Ieova.

Talanoaga Autalu

• Aiseā ua avea ai le Malo o le Atua, ua na o lea le vaifofō mo faafitauli o tagata? O anafea na amata ai ona pule le Malo o le Atua?

• O le ā ua sili ona mataʻina iā te oe e faatatau i le Malo o le Atua ma mea o le a faataunuuina ai?

• O ā mea ua faataunuuina e le Malo ua mafai ona tatou vaaia, ma o le ā la tatou vaega o loo faia i nei mea?

[Fesili mo le Suʻesuʻega]

[Ata i le itulau 92, 93]

I le pulega a le Malo o le Atua, o le a aʻoaʻoina ai e tagata uma le amiotonu