‘E Oo mai’ le Malo—Mai Fea?
Mataupu 4
‘E Oo mai’ le Malo—Mai Fea?
1. Ona o le 1 Timoteo 1:17 ma le Faaaliga 15:3, o ā fesili tāua ua lāgā?
TALU ai ona o loo faamatala mai e le Tusi Paia o Ieova o le “Tupu o le vavau,” aiseā la e tatau ai ona “oo mai” se malo e faapaiaina lona suafa? (1 Timoteo 1:17; Faaaliga 15:3) Ma e sau la mai fea lea malo?
2. O ā tulaga i malo ua aumaia ai le faalumaina i le suafa o le Atua, ma i le ā le auala?
2 Muamua lava, ua manino e faapea e tatau ona faia ni suiga tetele ina ia toe faafoisia le amiotonu, le filemu ma le fiafia i lenei lalolagi. Ua lē gata ina lē taulau malo taitasi i le tele o auala i le tausia o le nofo lelei o o latou tagatanuu, peitai ua vevesi foi atunuu lava latou. O le ita, le inoino, fevaevaeaiga faavaomalo ua vaevaeina ai tagata ma ituaiga o lanu eseese. Ua faaseseina tele e nei uiga le fuafuaga a Lē na Foafoaina Mea ma faapogaia ai le tele o le faalumaina ua faia i lona suafa.—Roma 2:24; Esekielu 9:9.
3. (a) E faapefea ona “oo mai” le malo o le Atua e tusa ai ma lenei faamatalaga? (e) O le ā le mea ua sili ona faapitoa e uiga i le Malo?
3 Ina ia faasaʻoina lenei tulaga, ua manaomia ai se pulega e sili ona faapitoa. Ma o le mea lena ua saunia e Ieova. O fea la e sau mai ai? Mai ia Ieova lava ia, o lē afio i le lagi. E lē o se malo tutoatasi, ae na te faailoa atu le pule aoao a Ieova i le vateatea. E maua lana pule mai le tulaga tautupu ua aaoina e Ieova mai lava i le amataga, a o leʻi taitai ona foafoaina lo tatou lagi ma le lalolagi. Talu ai ona e mafua mai i le faalapotopotoga faalelagi a le Atua, ua maua ai e lenei malo tauatua faapitoa ona uiga ofoofogia mai le pule aoao ua autausagā a Ieova.—Faaaliga 12:1, 2, 5.
O LE PULE AOAO FAALEVATEATEA A IEOVA
4. O le ā le faamatalaga i le Faaaliga 4:11 ua fetaui lona faamatalaina o le pule aoao a Ieova?
4 Ona o ia na “faia mea uma lava” ua avea ai le Atua o le Pule Aoao tonu i luga o foafoaga uma lava o loo iai. E oo ia i latou o ē ua faaeaina e le Atua i tulaga tautupu i le lagi, e tatau lava ona latou faapaʻūū “i luma o lē tietie i le nofoālii, ma ifo atu i lē soifua e faavavau e faavavau lava.” O i latou ia ua amanaia ma le loto maulalo le silisiliese o le pule aoao a le “Tupu o le vavau”—e pei ona faaalia i lenei faamatalaga atili e faatatau ia i latou:
“Ma lafo o latou pale i luma o le nofoālii, o loo faapea atu, Le Alii e [“o Ieova,” NW], e tatau lava oe ina ia tuu atu ia te oe le viiga, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.” (Faaaliga 4:10, 11; Efeso 3:9)
O le auala ea lena o loo e tagai atu ai i le pule aoao a le Atua? E tatau ona faapena.
5. I le faatusatusaga ma pulega faaletagata, e faapefea ona fusia mea uma i lalo o le tulaga tautupu a Ieova?
5 E pulea e se malo ona tagata e faatatau i tulafono. Ua tatau lenei mea mo le tausisia o le nofo lelei. E masani lava, e iai faamasino i malo o ē e fofogaina faamasinoga i le tulafono, o palemene e faia tulafono eseese, ma se tupu po o se peresitene o ia o lē e tuuina atu aloaia le tulafono. I le vateatea na ia foafoaina, ua tausia ai e Ieova le Atua ia ofisa uma e tolu, e pei ona faaalia mai e le perofeta o Isaia, ua fai mai: “Auā o Ieova o lo tatou faamasino ia, o Ieova o lo tatou fai tulafono, o Ieova o lo tatou tupu.” (Isaia 33:22) Ma i lenei itu ua faaopoopo mai ai e le Tupu o Tavita ia upu e faapea: “Ua faatumauina e Ieova o lona nofoālii i le lagi; ua pule aoao foi lona malo.” (Salamo 103:19) Seʻi o tatou iloiloina nisi o vala o lena tulaga tautupu.
TULAFONO AOAO A LE ATUA
6. O le ā ua faaalia mai ai le maoaʻe o tulafono a le Atua?
6 O loo saili malo o tagata e faatonuina gaoioiga a o latou tagātanuu, peitai latou te lē mafai ona pulea malosi faanatura o le lalolagi ua matuā āfaina ai o latou olaga. A o Ieova, le Pule Aoao o le Vateatea, na te mafaia, ma ua ia faia lava. E masani ona maofa tagata saienisi i le saʻo atoatoa o tulafono o loo faagaoioia le vateatea faitino. O tulafono ia a le Atua. Ona o le faatatauina o nei tulafono e aunoa ma le femoumouai ua mafai ai e tagata ona oo atu ma tutū i luga o le masina, ona fesootai e ala i satelite, ona valoia mai le gasetoto o le masina ma aumaia le faitau afe o mea fou ua gaosia. O tulafono foi a le Atua ua faapea ona pulea ai le la ma le timu, ma na te mafai ona faatonutonuina ia mea mo le manuia o i latou o ē usiusitai ia te ia.—Salamo 89:8, 11-13; Iopu 38:33, 34; Sakaria 14:17.
7. (a) E faapefea ona molimau tulafono a Ieova i lona tulaga tauatua? (e) I le pei o Iopu, e tatau faapefea ona tatou manatu i ala o le Atua?
7 E faatatau i le maoaʻe sili i le tulaga o tino faalelagi, sa fai mai le perofeta a le Atua: “Seʻi tetepa aʻe i luga, ma outou vaai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau ia te i latou uma i o latou igoa; ona o le tele o lona malosi ma lona mana tele; e leai so latou e le iloa. E te le iloa ea? E te lei faalogo ai ea? O le Atua o le vavau, o Ieova o le na faia tuluiga o le lalolagi.” (Isaia 40:26, 28) I le faitau piliona o tausaga ua pulea lava e Ieova lana vateatea sili ona tele e le malosi ua taʻua o tulafono “faanatura.” Ua taumafai tagata e tatalaina mea lilo o nei tulafono, peitai e sili ona tele mea latou te leʻi iloaina! E itiiti sina mamao o lo latou alualu i luma na i lo le tagata faamaoni i le 3,500 tausaga ua mavae, o lē na folafola mai faapea: “Faauta, o mea aupito mai ia a ona ala, a e matuā itiiti se mea ua tatou lagona ia te ia; a o le faititili o lona malosi, o ai se lagona lea?”—Iopu 26:14.
8. O ā isi uiga o le Atua ua tuu faatasia, ua faaalia mai ai o ia o Lē Sili e Saunia Mea?
8 Ae ui i lea, i le foafoaina o lo tatou lalolagi, sa sili ona tele mea na faia e Ieova na i lo le faavaeina o ana tulafono faitino. O lona atamai e lē gata mai ma lona alofa lē mafuafuaina ua tuufaatasi ma lona mana ma ana tulafono, i le faia o sauniuniga ofoofogia mo ē o le a mau ai i le lalolagi i le lumanai. Maeu le silasila mamao ma le agalelei, maeu se matua o faiva poto, ua matauina i galuega faalefoafoaga a le Atua i inei i le lalolagi! (1 Ioane 4:8; Salamo 104:24; 145:3-5, 13) E pei ona sa tatou matauina i se mataupu ua mavae atu, e moni, o Ieova o Lē Sili e Saunia Mea!
9. O ā nisi o mea e tatau ai ona tatou faafetai i le Atua?
9 E tatau lava ona tatou faafetai i le Atua ona o ana sauniuniga ofoofogia uma. E lē gata i lea, e tatau foi ona tatou faafetai ia te ia i le auala na ia fuafua ma faia ai i tatou, faatasi ai ma o tatou tomai faaletino ma le mafaufau ma o tatou uiga ua mafai ai ona tatou maua le fiafia i ana foafoaga. Ioe, e tatau ona tatou nofo sauni e faailoa atu i le Atua, e pei ona fai e le faisalamo: “Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia; ua ou matuā iloa e aʻu nei mea. E leʻi lilo loʻu tino ia te oe, ina ua faia aʻu i le mea lilo, ina ua saunia aʻu i mea loloto i le lalolagi. Na silasila mai ou fofoga i oʻu tino uma ina o afuafua; ua tusia foi uma lava i lau tusi [o fuafuaga], o ona aso foi na faia ai, a o leai ni oʻu tino.”—Salamo 139:14-16.
10. O le ā ua faaalia ai o Ieova e atoatoa lona tomai e faasaʻo ai mea i luga o le lalolagi?
10 O le Alii Pule Aoao o Ieova, o lē na foafoaina le vateatea ma mea uma o iai, na ia faavaeina le faiga o mea ona o lona alofa ma le atamai, ma e tusa ai ma ana tulafono amiotonu, o ia foi lea o lē ua fai mai ai le Tusi Paia: “O le amiotonu ma le faamasinoga o loo tumau ai lou nofoālii; o le alofa ma le faamaoni la te muamua atu i ou luma.” (Salamo 89:14) E mautinoa lava o loo iai Ieova i le tulaga na te mafai ai ona aumaia se pulega po o se Malo lea na te faatulagaina mea ma le tonu i le lalolagi. (Salamo 40:4, 5) Peitai pe faapefea ona ia faia lenei mea?
FAAALIINA SE MEA LILO
11. (a) Aiseā e tatau ai ona tatou fiafia i aso nei, ona o le faaavanoa mai o le malamalama saʻo? (e) E mafai faapefea ona tatou iloaina lelei “Mekaeli,” ma o le ā ua faauiga mai e lona igoa?
11 Ua tatou maua i le Tusi Paia le tele o valoaga i le faatuina e le Atua o se malo faapea o le a na faapaiaina lona suafa ma pogai ai ona faia lona finagalo i le lalolagi. O se tasi o ia valoaga, o le valoaga lea a Tanielu, lea o loo faasino “i ona po o le iuga” pe a oo ina “tupu tele foi le malamalama.” E mafai ona tatou fiafia ona o lena poto o loo avanoa i aso nei. Auā ua taʻu mai e Tanielu ia i tatou e faapea:
“E oo mai foi aso vale, e leai sona tusa talu ona faatoa tupu o nuu, ua oo i ia lava aso; o ona po foi ia e laveaiina ai ou tagata.”
E pei ona faamatala mai e Tanielu, i lea taimi o le a tulai le perenise sili o Mekaeli mo tagata o le Atua. Ua faailoaina mai e le Tusi Paia e faapea o Mekaeli o Iesu Keriso lea, o lē faitaua faasaga i fili o le Atua ina ia faapaiaina le suafa o Ieova. Ua talafeagai lelei la, le igoa “Mekaeli,” o lona uiga “O Ai e Pei o le Atua?” auā o Mekaeli lava o lē ua faamaonia faapea e leai se tasi na te mafai ona luʻia ma le manuia le pule aoao a Ieova.—Tanielu 12:1, 4; Faaaliga 12:7-10.
12. O le ā le ata faafaalepō i le Tanielu 2:31-33, ma aiseā e ao ai ona tatou naunau i ai i aso nei?
12 Ua taʻu mai foi e le valoaga a Tanielu se faalepō na faia a le Tupu o Nepukanesa o Papelonia, o se faalepō e uiga i se faasologa o malo. Sa vave ona galo i le tupu po o le ā le uiga o le faalepō, e ui lava ina sa faaauau pea ona atuatuvale tele ai o ia. Mulimuli ane, o “Lē Faaalia mealilo,” o Ieova le Atua, na ia faaaogāina Tanielu e faailoa atu i le tupu, e lē gata i le faalepō, ae faapea foi ma lona faamatalaga. (Tanielu 2:29, NW) Talu ai ona o le faataunuuga o lenei faalepō faavaloaga o loo faaauau e oo mai i o tatou aso ma i tala atu foi o o tatou aso, e tatau ai lava la ona tatou naunau loloto ai i lona uiga. O le faalepō e uiga i se “tupua tele” e pei o se tagata—e mataʻutia ona foliga mai. E te mafai ona faitau i ai i le Tanielu 2:31-33. Po o le ā ua faaatagia mai e lena tupua?
13. O le ā o faaatagia mai e vaega eseese o le tupua?
13 Sa faailoaina atu e Tanielu ia Nepukanesa faapea o le ulu auro e faatatau lea i le “tupu” o Papelonia, ma o vaega pito i lalo o lona tino e fai ma sui o isi malo faapea o le a tutū aʻe pe a mavae Papelonia. I aso nei, ua mafai ona tatou matauina i na mea o emepaea malolosi o Metai ma Peresia, Eleni ma Roma, faatasi ai ma “vae” ua faaooina atu i le malo fuifuilua o Amerika ma Peretania, o le Malo Malosi o le Lalolagi o ona po nei. Ae faapefea la tapuvae, na faia i “uamea isi mea, a o isi mea o omea a le fai ipu omea”? I tausaga e leʻi leva talu ai, sa sili ai ona faavaivaia e gaoioiga lauiloa faavafealoaloai le pule malosi pei se uamea o i le Malo Malosi o le Lalolagi o Amerika ma Peretania, e faapei foi o tapuvae o le tupua tele ona maʻaleʻale ona o le ‘lē filogia o le uamea ma le omea.’ O lea la, o lenei tupua uigaese e suitulaga i le faasologa o “tupu” faaletagata, po o malo malolosi ia e faamutaina pe a faaumatia i latou e le malo o le Atua.—Tanielu 2:36-44.
14, 15. O le ā ua faia e le “maa” i le tupua, ma e faapefea la ona tatou iloaina po o le ā lena “maa”?
14 Auā, faauta! O se “maa” ua taavale ese faavavega mai se mauga, ‘ae leʻi faia e lima.’ E leai lava se mea faigaluega faitino faaletagata na faia lenei gaoioiga. Na i lo o lea, o Ieova lava ia ua ia aaoina mai, e tusa ma lona finagalo paia. I le taavale ifo agaʻi i le tupua tele, ona taia ai lea e le maa o tapuvae. Na ia nutipalaina ai le fuaitino atoa o pulega tautupu faaletagata, o lea na ia faataapeape ai ona toega e pei o le fuga i le matagi. Ona avea ai lea o le maa lava ia ma mauga tele ua faatumuina ai le lalolagi uma.—Tanielu 2:34, 35.
15 O le ā lenei “maa”? Ua aveesea faaletonu uma ina ua faapea mai le valoaga:
“O ona po o ia tupu [le Malo Malosi o Peretania ma Amerika ma vaega totoe o malo malolosi o le lalolagi na muamua ia te ia] e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”—Tanielu 2:44.
16. I le tatalo, “Ia oo mai lou malo,” o ā mea ua tatou talosagaina?
16 O le ā le uiga o lenei mea mo i tatou i aso nei? O lona uiga e faapea pe a tatou tatalo mo le “oo mai” o le malo o le Atua, o le mea moni o loo tatou talosaga ia faaaogā e le malo faalelagi lona mana e faaumatia ai malo uma lava ua faia e tagata, ia ua sili ona lē taulau ma le faanoanoa tele ona aumaia le filemu ma le manuia. Ma le fiafia lava, o le “maa” lena, pe a maeʻa lana feau o le faaumatiaga, o le a tupu aʻe ai lava ia e avea ma mauga faalemalo na te faatumuina le lalolagi atoa. O le a na aumaia le filemu sa lē iloa e le fanau a tagata talu mai aso o le Tupu o Solomona, “e manuia tele ai, seia leai se masina”—o lona uiga e faavavau!—Salamo 72:7.
17. (a) Aiseā ua ao ai ona aumaia ia i tatou le mautinoa i le faiā a le “maa” ma le “mauga” na pogai mai ai? (e) O le ā le isi gaoioiga e faia e le Malo? (i) E pei ona faamatalaina mai e le Salamo 85:8-12, o le ā le faamautinoaga e ao ona ia i tatou?
17 Ae peitai ane, e faapefea le “mauga” lea na taavale ese mai ai le “maa” o le Malo? (Tanielu 2:45) O le “maa” e tatau ona faalagolago i le mauga, ma ia faia aʻe lava i mea e pei ona faia ai le mauga. Ma o le mea moni lava lea. O lenei la pulega o le Malo e vavae ese mai le faatasiga uma o le pule aoao i luga o mea uma a le Tupu o le vavau—o Ieova le Atua. Faapei ona atagia mai i le pule aoao faalevateatea a Ieova ona uiga matagofie uma lava, e faapea foi i le malo na taavale ese mai i lea pule aoao ona tatau ona faaeaina ai Ieova le Atua ma ana fuafuaga sili. Na te faapaiaina lona suafa i le nutipalaina o ona fili, e faailoaina mai ai e lē o ia o se vaega o a latou galuega amioleaga. Ona faatumuina ai lea e lenei malo e ala ia Keriso Iesu le lalolagi i tulafono ma le maopoopo, faatasi ma le alofa ma le olioli, e faaliliuina ai i le nofoaga amiotonu ma le filemu e pei ona sa fuafuaina e le Atua i le amataga. E moni, e tatau lava ona tatou tatalo mo ‘le oo mai o le Malo’!—Salamo 85:8-12.
[Fesili mo le Suʻesuʻega]
