Mataupu 16

“Le Motu o Tagata e Toatele” o loo Alagaina le Tupu

1, 2. (a) Na faapefea ona afio atu Ieova e faataunuu lana valoaga i le Isaia 60:22? (e) O le ā le faaaliga ofoofogia o le upu moni a le Atua na faia i le 1935?

E AUALA i lana perofeta, na faasilasila mai ai e Ieova e faapea: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” (Isaia 60:22) Ma, e matuā ofoofogia, ona na faapea lava ona “faavave ona fai” e Ieova. I le 1935 na tauaofia ai Molimau a Ieova i le tauaofiaga i Washington, D.C., U.S.A. O i inā na faailoaina atu ai e faapea ua amata ona aoaoina e Ieova “le motu o tagata e toatele” o “isi mamoe”—o tagata e matataʻu i le Atua, o ē o le a latou mauaina le ola e faavavau i luga o le lalolagi parataiso, e ala i le “oo mai” o le malo o le Atua.—Ioane 10:16; Faaaliga 7:9.

² Ua faamatala mai i le Faaaliga mataupu e 7 lenei mea e faapea: “Ua mavae atu” le faamaufaailogaina o le “lafu mamoe itiiti” o suli o le Malo, o le faitau aofai e 144,000, ona iloa atu ai lea o “le motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi,” ua iloa o loo laulaututu i latou i luma o le nofoalii o le Atua. Ua latou amanaia le pule aoao a Ieova e pei ona faia e auala i lana Keriso. Ma le fiafia lava ua latou faafetaia le mauaina o le faaolataga mai le Atua ma le Tamai Mamoe.  I le pei o se vaega e tasi, e lē faapea e ao ona feoti uma i latou, auā o i latou “ia o e o mai nai le puapuaga tele” e ulu atu i le tofi o le ola e faavavau i le lalolagi o le a faamamāina.—Faaaliga 7:4, 9, 10, 14; Luka 12:32.

3. (a) Ua avea moni ea le “toaitiiti” ma “toaafe”? (e) E mafai faapefea ona e auai i le faataunuuga o le Faaaliga 7:15-17?

³ Po ua e auai moni ea i totonu o lenei “motu o tagata e toatele” o tagata tapuai o aso nei? Po o oe ea o se tasi o le 4,000,000 ma ona tupu o i latou nei o loo ‘tuuina atu le auaunaga paia i le Atua’ i le lalolagi uma? E moni, o loo siomia pea lava oe e le lalolagi amioleaga ma le sauā a Satani, ma atonu e tatau ai ona e tumau i le tele o omiga i lou olaga i lea aso ma lea aso. Ae peitai afai o oe o se tasi o “mamoe” a le Alii, o lona uiga o loo e i lalo o le tausiga malupuipuia a le Atua. E te lē toe galala i le fia taumafa pe toe fia inu ona ua lē lava le tausiga faaleagaga. E lē manaomia foi ona e toe mataʻu i le toasā aasa o le Atua, auā o loo leoleoina oe e le Tamai Mamoe ma taʻitaʻiina oe i “puna o vai ola.” O lea, i se auala faafaatusa, ua e auai i le faataunuuga o le folafolaga e faapea: “E sōloiesea foi e le Atua loimata uma nai o latou mata.”—Faaaliga 7:15-17.

E FAAMANUIA E LE TUPU ANA “MAMOE”

4. O le ā le faiā a Iesu i lana “lafu mamoe itiiti”?

⁴ I taimi o le Tusi Paia, ma seia oo mai i o tatou aso, sa olioli tele ai se leoleo mamoe mai Sasae i se faiā sili ona vavalalata ma ana mamoe. Na te valaau taitoatasi i latou i o latou igoa, ma ua latou iloa lona leo ma sauni e tali atu a o ia taʻitaʻia i latou i totonu ma i fafo foi o le lotoā mamoe. I le Ioane mataupu e 10 na faamatalaina ai e Iesu lenei mea i le faataʻitaʻia muamua, o le faiā alofa i lo latou va ma le “lafu mamoe itiiti” o le 144,000 o soʻo faauuina, i le faapea mai: “O aʻu nei o le leoleo mamoe lelei; ua ou iloa aʻu mamoe, ua iloa foi aʻu e aʻu mamoe; pei ona silafia aʻu e le Tamā ma ou iloa le Tamā. Ou te tuuina atu foi loʻu ola e sui aʻi mamoe.” Ua avea i latou nei ma vaega o le “fanau . . . a Aperaamo,” lea e auala mai ai le faamanuiaga o “aiga uma” o le lalolagi.—Ioane 10:14, 15; Kenese 12:3; Kalatia 3:28, 29.

5. (a) O le ā le faiā e sili atu ona fiafia o loo faasino i ai i le Ioane 10:16? (e) O ā faaeaga ua olioli ai nei “isi mamoe,” ma o le ā le faamanuiaga i le lumanai mo lenei vaega?

 ⁵ O lea la, o le ā le faiā a “le leoleo mamoe lelei” i aiga o tagata ia o le a ola e faavavau i luga o le lalolagi? O se faiā sili ona faamanuiaina! Auā ua faapea mai Iesu e uiga ia i latou:

“Ua ia te au foi isi mamoe e le o i lenei lotoā [a le “lafu mamoe itiiti”]; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.”

I aso nei, ua maimoaina ai se “motu o tagata e toatele” o “isi mamoe” a o fafagaina i latou faatasi ma le “lafu mamoe itiiti”—o i latou uma lava ua autasi i le usiusitai i le “leo” o lo latou leoleo mamoe i le talaʻiina “o lenei tala lelei o le malo . . . i le atu laulau uma, e fai ma molimau i nuu uma.” O le a e fiafia pe afai o oe o se tasi o i latou nei! (Ioane 10:16; Mataio 24:14) I lalo o le pule a le Malo, o le a faateleina ai le aofai o “isi mamoe” i le faitau piliona e ala i le toetutū o ē na maliliu i le lalolagi, a o agaʻi atu ina faamaeʻaina le fuafuaga a le Atua i le faaʻaināina o le lalolagi i tagata amiotonu.—Kenese 1:28.

6. Ua faaalia faapefea i le valoaga a Iesu po o afea o le a lauiloa ai “isi mamoe”?

⁶ O le lauiloa o “isi mamoe” i “le gataaga o le lalolagi o loo faaalia i le tala faatusa lea ua faaiʻuina ai e Iesu lana valoaga e uiga i le “faailoga” o lona faatasi mai. (Mataio 24:3) Ua ia faapea mai:

“Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale.” (Mataio 25:31-33)

 Talu ai ona e lē vaaia le Tupu mamalu ma ana agelu e mata faaletagata, e faapefea la ona ia tauaaoina le galuega o le vaevaeina?

7. (a) E faatonutonuina faapefea le galuega o le vaevaeina? (e) O le ā le mea e tatau ona e faia e te mauaina ai se faamasinoga manuia, ma aiseā?

⁷ O le au agelu paia latou te tuuina atu taʻitaʻiga i lena galuega. (Faaaliga 14:6-12; faatusatusa i le Galuega 8:26-29; 10:1-8) Ma i inei i le lalolagi, o ē o totoe o le “lafu mamoe itiiti,” o ē o loo taʻua i le Mataio 25:40, o “uso” o le Tupu, o loo taulamua i le talaʻiina o le “tala lelei.” E faamasinoina e le Tupu tagata e tusa ma lo latou tali atu i ona “uso” ma le feau o le Malo o loo latou folafolaina atu. O mea latou te faia i ona “uso” e manatu o ia, ua faapea lava ona faia ia te ia. O tagata o ē talia “uso” o le Tupu ma le agalelei o le a faamanuiaina. O oe ea o se tasi o i latou nei? O le mea moni, e tatau foi ona taliaina le feau o le Malo ma le loto atoa, ma avea ma auauna tuuina atu, ma papatisoina a Ieova, e faavae i le suafa o Iesu—auā “e leai lava se isi igoa ua iai le ola.”—Galuega 4:12; Mataio 25:35-40.

8. O le ā le valaaulia ma folafolaga e mafai ona e auai?

⁸ Afai o oe o se tasi o “isi mamoe” a le Alii, i le ā e mafai ona e faamoemoe i ai? O le ā o le a iʻu i ai ona o lou usitai i le “leo” o lou “leoleo mamoe lelei” po o lou “tupu”? I le faaleoina atu o le faamasinoga, na faapea atu ai le Tupu i “mamoe” agamalu i lona itu taumatau o lona finagalo lelei: “O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.” Atonu e te mafai ona faamoemoe e auai i nei faamanuiaga o le Malo e maua mai lo tatou Tamā, a o ō atu ‘ē amiotonu i le ola e faavavau.’ (Mataio 25:34, 46) Ioe, e mafai ona e faamoemoe e te auai i le faataunuuina o le tele o folafolaga faavaloaga, e pei o le folafolaga i le Isaia, ua faapea mai e uiga ia Ieova:  “E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.” Atonu e lē o toe umi se taimi e taufaifai ai tagata amioleaga ia te oe. Auā ua faapea mai le folafolaga a le Atua, o ē uma lava e faamoemoe ia Ieova o le a lē pine ona ulufale atu i latou i totonu o se “faigaai” moni o mea lelei i se “lalolagi fou.” E te manao e te auai i lena “faigaai,” a ea?—Isaia 25:6-9; 66:22.

“ʻOTI” MA SAUĀGA

9, 10. (a) Aiseā e lē faigofie ai ona tuliloaina le amiotonu i aso nei? (e) O le ā le uiga e tatau ona ia te oe e faatatau i ē tetee, ma o le ā le fesoasoani e mafai ona e faatalitalia mai le Atua?

⁹ Atonu o le a lē faigofie mo oe le tuliloaina o laasaga o le amiotonu i nei “aso e gata ai.” Auā atonu o le a tauemu Satani ma ana au taufaasese ia te oe, a o latou faia la latou toe taumafaiga ia faaleagaina lenei lalolagi ma tagata o iai. (2 Peteru 3:3, 4; 2 Timoteo 3:1) Pe a e asiasi atu i ou tuaoi ma le feau o le Malo, atonu o le a e mauaina ai nisi o ē faaalia le uiga e pei o se ʻoti. Latou te faia lenei mea i le faaalia o le lē fiafia e faalogo pe lē faaaloalo, po o le matuā tetee mai lava.—Mataio 25:33, 42-45.

¹⁰ Ae ui i lea, ona o oe o se tasi o “mamoe” a le Alii, e lē tatau ai ona e taumafai e faamasino po o ai e avea ma “ʻoti.” E ao ona faia le faamasinoga e le Tupu, ae lē o ana “mamoe” i inei i le lalolagi. (Faatusatusa i le Roma 14:10-12.)  Ma, e ui lava ina atonu e te fetaiai ma teteega talu ai ona o le avea o oe ma sē folafola le “tala lelei,” o le a faamalosia oe e le Atua e fai lona finagalo, e pei ona faaalia e le aposetolo o Peteru i upu nei: “A o le Atua e ona le alofa tunoa uma lava, . . . ia faaatoatoaina outou e ia lava, ia faatumauina, ia faamalosia.” (1 Peteru 5:10; faatusatusa i le 2 Korinito 12:10.) Ua faapea foi, ona aumaia e le aposetolo o Paulo lenei faamafanafanaga matagofie: “Aua le faavaivai i le filigā [i le Malo], ia malosi le loto, ia auauna i le Alii [o Ieova]. Ia olioli i le faamoemoe, ia onosai i le puapuaga, ia finafinau i le tatalo.”—Roma 12:11, 12.

11. O le ā atonu e fai ma iʻuga fiafia o le amio lelei a Kerisiano?

¹¹ O lau auaunaga faamaoni ma au talosaga filigā ia Ieova, faatasi ma lau amio faa-Kerisiano e fai ma faaaʻoaʻo, e mafai ona iʻu i le avea o nisi o ē na aliali muamua mai o pei ni “ʻoti” a ua liua e pei ni “mamoe.” O le onosai, ma le amio faaaloalo a avā Kerisiano e masani lava ona taulau i le tosina mai ai o tane lē talitonu “a e leai se upu.” (1 Peteru 3:1, 2) Ma le mautinoa lava, tatou te lē mananao e vaai atu i tagata o “o atu . . . i le sala e faavavau,” peitai, na i lo lena, e tatau ona tatou mananao e fesoasoani ia i latou ina ia faamatuuese atu uiga pei ni ʻoti, ina ia latou maua ai le ola e faavavau.—Mataio 25:41, 46.

“MAMOE” FAAMAONI E TAUSI LE FAAMAONI

12. Ua faapefea ona felagolagomai “uso” o le Tupu ma “mamoe” i ona po nei?

¹² E tatau ona mātauina faapea o “mamoe” o le tala faatusa a Iesu sa latou matuā taumafai ina ia fesoasoani atu i “uso” o le Tupu a o mamaʻi i latou ma iai foi i le falepuipui. Ma i nisi vaega o le lalolagi o aso nei, o le lē lava o mea e manaomia ma sauāga, maʻi ma faafalepuipuiga o ni mea ia ua oo i le “lafu mamoe itiiti” peitai e faapena foi i “isi mamoe” o ē o loo auauna pea ma le matuā faamaoni ma le autasi ma i latou.  Mo se faaaʻoaʻoga, i le vaitaimi mai le 1933 e oo i le 1945, ina o faia e le pule Nasi o Hitila lana taumafaiga mo le pulea o le lalolagi, na oo atu ai Molimau a Ieova i sauāga matuitui—muamua i atunuu faa-Nasi-Fascist ma mulimuli ane ai i atunuu uma sa fetauai. E toatele i latou o le “lafu mamoe itiiti” ma “isi mamoe” a le Alii, na fasiotia. Peitai na ofoofogia lo latou manumalo i le taofimauina o lo latou faamaoni i le Tupu ma lona malo!

13, 14. O le ā le faaeseesega ua matuā mātauina i le va o amioga a lotu a Kerisinetoma ma amioga a Molimau a Ieova?

¹³ O le matuā ese mai o le tulaga o lotu faagutugutulua a Kerisinetoma mai le faamaoni o Molimau a Ieova i lalo o omiga, ua masani lava ona talanoa i ai tagata tusitala o talafaasolopito. Mo se faaaʻoaʻoga, i le tusi o le A History of Christianity, na faasalalauina i Lonetona, i Egelani, i le 1976, na muai fai mai ai Paul Johnson e uiga i le lotu Katoliko ma le lotu faa-Evagelia i Siamani a Hitila, e faapea: “O nei lotu e lua, i o la tulaga masani, na matuā lagolago atu i lea faigamalo. Sa tali aloaia e epikopo Katoliko ‘le faamamafaga fou ae malosi, i luga o le pule i le setete o Siamani’; na taʻu atu e Epikopo Bornewasser i talavou Katoliko i Trier Cathedral e faapea: ‘I o tatou ulu e faaea i luga ma laasaga maumaututū, ua tatou ulu atu ai i le malo fou ma ua tatou sauni e tautua ia te ia i le malosi atoatoa o o tatou tino ma o tatou ola.’ Ia Ianuari 1934, na feiloai ai Hitila ma taʻitaʻi e toasefulu ma le lua o le lotu faa-Evagelia, ma ina ua uma lenei feiloaiga sa latou . . . tuuina atu ai se faasilasilaga aloaia lea na faatautoina ai taʻitaʻi o le Lotu Faa-Evagelia i Siamani e faamautuina ai le maliega atoatoa o lo latou faamaoni e aunoa ma nisi lava tuutuuga i le Malo Lona Tolu ma lona taʻitaʻi.’”

 ¹⁴ O lea, e tusa ai ma le toaitiiti o ē sa fai mai o i latou o ni Kerisiano, lea na ia taʻua faapea “sa mausalī i latou i a latou mataupu silisili,” na faaauau ona faapea mai le tusitala: “O tagata sili ona lototetele o Molimau a Ieova, o ē sa folafolaina atu ma le lē fefefe a latou aʻoaʻoga e tetee i ai talu mai lava le amataga ma sa faapea ona latou puapuagatia ai. Sa latou teena so o se galulue felagolagomai ma le setete faa-Nasi lea na latou taʻusalaina o se mea matuā matagā. . . . E toatele na faasalaina i le oti ona o le mumusu e avea ma fitafita . . . ; a lē o lena, na iʻu ai i latou i Dachau po o falemaʻi o tagata e leaga mafaufau. E tasi vae tolu na matuā fasiotia moni lava; e ivasefulufitu pasene o i latou na puapuagatia i nisi sauāga eseese. Sa na o i latou lava le vaega Kerisiano sa faaaloalogia e Himmler.”

15. (a) O le ā sou lagona e uiga i le tusi e pei o lea ua i inei? (e) O le ā le taumafaiga a Satani i le vaitaimi o le Taua Lona Lua a le Lalolagi, ma o le ā le faamaoniga o lona lē taulau?

¹⁵ E lē ona o i latou o ni tagata e tetee i taua (po o pacifists), ae peitai o ni Kerisiano solitu e lagolagoina le malo o le Atua o le a oo mai, o ni Molimau talavou na feagai ma le faafalepuipuiina ma le fasiotia na i lo o le lepetia o lo latou faamaoni, e pei lava ona faamaonia atu e se ‘tusi mulimuli lava’ e pei o le tusi lea ua faapea ona faaalia i inei. I le lalolagi atoa, e tusa lava pe sa nonofo i latou i atunuu na autasi e iai Siamani, Italia ma Iapani (Axis) po o atunuu foi na soo faatasi ina ia tetee atu i na malo (Allied) sa matuā fasiina ai, sasaina, faafalepuipuiina ma faasauā ai i “uso” o le Tupu ma a latou aumea pei ni “mamoe.” Peitai na latou manumalo i la latou taua faaleagaga. Sa leʻi mafai e le Tiapolo ona lepetia lo latou faamaoni i le Malo. E pei o Iesu o lē na muamua atu ia i latou, sa faamaonia i latou lava “e le ni o” le lalolagi a Satani.—Ioane 15:19.

LE POLOKALAMA TAUAʻOAʻOGA O LE MALO

16, 17. (a) O le ā le polokalama tauaʻoaʻoga ma le galuega faalauteleina ua tatalaina nei? (e) O ā iʻuga o lenei galuega e tatau ona matāuina?

¹⁶ O le Peresitene o le Olo Matamata, o J. F. Rutherford, na maliu i le tausaga e 1942, ona sui ane ai lea o Nathan H. Knorr. E leʻi pine ae ona faatūina Aʻoga o le Faiva Faatiokarate i totonu o faapotopotoga uma lava a Molimau a Ieova, ma sa lē mafuafuaina le aogā o nei aʻoaʻoga i le toleniina o tane ma fafine o Molimau e tautatala atu i le feau o le Malo i se auala e sili ona uigā ma faatalitonuina ai isi. I le gasologa o tausaga, e anoanoai tusi aʻoga na saunia mo nei aʻoga. Sa leʻi faatalalē le galuega faamisionare.  Ia Fepuari 1, 1943, na faavaeina ai le Aʻoga Faale-Tusi Paia a le Olomatamata o Kiliata i le Setete o Niu Ioka. Mai le tele o atunuu o le lalolagi, na aumaia ai le faitau afe o faifeau galulue sauatoa (po o “paeonia”) i le Iunaite Setete o Amerika, na aʻoaʻoina ma aauina atu i latou “i le lalolagi uma” e talaʻi atu “lenei tala lelei o le malo.”—Mataio 24:14; Roma 10:18.

¹⁷ Maeu le ofoofogia o iʻuga na maua i lenei tauiviga tauaʻoaʻoga i le lalolagi atoa! A o tatou agaʻi atili atu i tausaga talu mai le 1990, o le aofaiga o tagata o ē tagofia le areto ma le uaina i le Faamanatuga faaletausaga o le maliu o Iesu, ua faapea ona faailoa mai ai lo latou faamoemoe o le aufaatasi ma ia i lona malo faalelagi, ua paʻū i lalo i le 10,000,  a o faamaeʻaina ma le faamaoni e le toatele o “uso” o le Tupu o latou olaga i le lalolagi. Peitai o le aofai o isi e faatasi ai, o ē o iai le naunautaiga e ola e faavavau i luga o le lalolagi o ni tagatanuu o le Malo, ua oso i luga aʻe o le 11,000,000. I totonu o le sili atu i le 69,000 faapotopotoga o Molimau a Ieova i le lalolagi i aso nei, o loo faia ai e le “motu o tagata e toatele,” o “isi mamoe,” le vaega sili ona tele o le galuega molimau. Maeu le matagofie o lou avanoa o le avea ma se tasi o i latou nei!

18. (a) Ua faapefea e le “auauna faamaoni ma le mafaufau” ona faaauau pea i lana auaunaga? (e) O le ā le galuega tāua e mafai nei ona e auai i ai?

¹⁸ E ui lava ina faaitiitia lo latou numera, ae e faaauau pea ona taʻimua le vaega totoe faauuina o le “lafu mamoe itiiti” a Iesu, le vasega o le “auauna faamaoni ma le mafaufau,” i le galuega a le Malo. (Mataio 24:45-47) Ina ia faataunuuina lenei mea, e galue lea vasega e auala i se vaega pule, o se fuafuaga e tutusa lava ma lea sa iai i le faapotopotoga Kerisiano i le uluai senituri. (Galuega 15:6; Luka 12:42-44) I le maliu o N. H. Knorr i le 1977, na avea ai Frederick W. Franz, ma peresitene lona fa o le Sosaiete o le Olo Matamata ina ua 83 tausaga o lona soifuaga. Ma ia Iulai 1, 1979, na atoa ai le 100 tausaga o le mekasini lava ia o Le Olomatamata faa-Peretania! Sa maeʻa ai le senituri talu ona molimau atu lenei mekasini i le Malo. Ioe, e auala i lomiga ma upu e tautalagia, ua folafolaina atu ai “lenei tala lelei” o le Malo ua faavaeina i le lalolagi uma e fai ma molimau. Po o oe ea o se tasi o loo auai i lenei faaeaga o le faia o le galuega e mulimuli atu ai i le faaaʻoaʻoga na tuuina mai e Iesu? E pei ona apoapoai mai Paulo:

“O lenei, o ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.”—Eperu 13:15.

19. (a) O ā laasaga na faamalosia e Paulo, e aafia ai le “loto” ma le “gutu”? (e) O ā fesili talafeagai ma lenei taimi ua fesiligia i inei, ma e faapefea ona e tali atu i ai?

 ¹⁹ Sa folafolaina e le aposetolo o Paulo i se tasi tusi faapea: “Auā o le loto e talitonu ai, e oo mai ai le amiotonu; a o le gutu e taʻutino ai, e oo mai ai le ola.” (Roma 10:10) Pe e te faatuatua ea i le “tala lelei,” lea e taulaʻi tonu nei i le malo o le Atua, na faavaeina i le lagi talu mai le 1914? O e ‘faia ea se taʻutinoga i tagata lautele mo le faaolataga,’ a o e tatalo mo le malo o le Atua ia “oo mai” ma le malosi uma na te faaumatiaina ma aveesea ai le faalapotopotoga a Satani mai lenei lalolagi? O e maelega ea e taʻu atu i le ‘lautele ma lea fale i lea fale’ faamanuiaga o le Malo lea o le a faasalafaina atu i tagata uma i le toe o se aga nei ona faataunuu lea o le finagalo o le Atua “i le lalolagi, e pei ona faia i le lagi”? O e lagolagoina ea ma le faamaoni le vasega o ē faauuina o le “auauna faamaoni ma le mafaufau” o Kerisiano moni a o latou taʻimua pea i le alagaina atu o le feau o le Malo “i le lalolagi uma . . . i tuluiga o le atu laulau,” ma i le ‘faia o nuu uma lava ma soʻo, papatiso atu ma aʻoaʻo atu ia i latou’?—Mataio 6:10; 24:14, 45-47; 28:19, 20; Galuega 5:42; 20:20; Roma 10:18.

20. O le ā se faaeaga sili e mafai ona e olioli ai nei?

²⁰ E mafai ona e olioli i se faaeaga matagofie i aso nei i le ‘tuuina atu o le auaunaga paia i le ao ma le po i luma o le nofoalii o le Atua.’ I lea lava foi taimi ua e sauni ai e fai oe ma se tasi o le “motu o tagata e toatele” o ē o le a fai ma o latou tofi le ola e faavavau i luga o le lalolagi o le a faamamaluina. (Faaaliga 7:9-17) Peitai muamua lava e tatau ona “oo mai” le Malo e tauina le taua ia Amaketo! O le ā o le a uiga i ai Amaketo mo tagata ma lo tatou lalolagi?

[Fesili mo le Suʻesuʻega]

[Pusa i le itulau 159]

SOLITU E OO I LE OTI

I le vaitaimi o le taua lona lua a le lalolagi, sa toatele molimau talavou a Ieova na maliliu ona o lo latou solitu. O le tusi o loo taʻua i lalo, e pei o se tusi mai se aofaiga o ‘tusi mulimuli’ na tusia e ia Molimau lototetele i o latou aiga. Na tusia e Marcel Sutter e 23 tausaga le matua, o Alsace-Lorraine, i ni nai itula a o lumanai ai le vavaeesea o lona ulu i se ulaogo i le falepuipui i Torgau, i Siamani, ia Aokuso 1942.

“Oʻu mātua ma tuafāfine peleina,

“Pe a outou maua lenei tusi, o le taimi lea ua ou lē o toe ola ai. Toe lava o ni nai itula o totoe ona oo mai loa lea o loʻu oti. Ou te talosaga atu ia te outou ia faamalolosi ma lototetele; aua tou te fetagisi, auā ua ou manumalo. Ua ou faamaeʻaina oʻu laasaga ma tausia le faamaoni. Tau ina ia fesoasoani mai Ieova ia te aʻu seʻi oo i le iʻuga. Ua toe nei o se vaitaimi puupuu o loo tatou va ai ma le oo mai o le malo o lo tatou Alii o Iesu Keriso. O le a lē pine ona tatou toe fevaaiai lea o le tasi ma le isi i se lalolagi sili atu ona lelei i le filemu ma le amiotonu. Ou te olioli i le manatu i lena aso, talu ai ona o le a lē toe iai se oi. Maeu le ofoofogia o le a iai! O loo oʻu faanaunau mo le filemu. I nai nei lava toe itula o loo oʻu manatunatu ai ia te outou ma e lagona i loʻu loto sina faanoanoa itiiti ona o le manatu o le a lē mafai ona ou sogi e faatofa atu ai mo outou. Peitai e ao lava ona tatou onosai. Ua lata mai lava le taimi o le a viia ai e Ieova lona lava Suafa ma faamaonia ai i ana foafoaga uma ua na o ia lava le Atua moni. O lea ua ou manao nei e tuuina atu atoa oʻu itula o totoe ia te ia, o lea o le a faaiʻuina laʻu tusi ma ou te faapea atu tofa seia tatou toe feiloai i se taimi lata mai. Ia viia lo tatou Atua o Ieova! Faamanuia atu faatasi ma oʻu alofaaga mafana,

“O lo oulua atalii ma le tuagane pele,

O Marcel”