Mataupu 10

Sa Tu aʻe se Malo Faatagafai

1. O le ā le tele o le tuputupu malosi aʻe o le “tala lelei” i taimi anamua?

I LE fetaiai ai ma sauāga aupito sili ona faalealofa, sa faaauau pea ona tuputupu malosi aʻe le faapotopotoga Kerisiano ma faalauteleina. Sa faaauau pea ona “fua mai ai foi le fua” i le lalolagi uma, e le upu moni o le tala lelei e uiga i le malo o le Atua e ala i le Mesia. A o oo atu le au talaʻi o le Malo i oganuu fou, sa tagiauē o ē tetee mai faapea “o tagata nei o e ua faatupu le fouvale i le lalolagi uma, ua latou oo mai foi i inei.”—Kolose 1:5, 6; Galuega 17:6.

2. O ā taumafaiga na fai e le Tiapolo ia taofia ai le salalau atu o le upu moni, ae aiseā na ia lē taulau ai?

² Ae ui i lea, o le ā e mafai e tagata vaivai ona fai e taofia ai le salalau atu o le upu moni? Ua taʻu mai e talafaasolopito e faapea i uluai senituri e tolu T.A., na aumaia ai e le au Kaisara o le Emepaea o Roma ni osofaiga eseese se 10 o sauāga i uluai Kerisiano, ae na iʻuvale uma lava ia taumafaiga. O i latou sa mulimuli i tulaga aao o Iesu sa “mausali [i latou] i le faatuatua,” sa mumusu i latou e faagutugutulua, e ui lava ina sa taumafai lena “leona tagi,” o le Tiapolo lea, ina ia lafoina le toatele o i latou i luma o ni leona moni, pe faataumaoia i latou i le oti.—1 Peteru 5:8, 9; faatusatusa i le 1 Korinito 15:32; 2 Timoteo 4:17.

3. Aiseā e ao ai ona e ofu i le “ofutau atoatoa mai le Atua”?

 ³ Talu ai sa masani ona lē taulau osofaiga tuusaʻo a le Tiapolo, na ia toe saili ai e maileia soʻo o Iesu i togafiti e sili ona faalilolilo. Sa siosiomia i latou e se lalolagi faamaualuga, e amio lē mamā, e soona faatāuaina faafiafiaga, ma sa faaaogā atoa e Satani nei mea i lona taumafai ia faaliliu ese i latou mai le auaunaga i le Atua. Sa latou manaomia ona “tutumau” e pei ona taʻua faatolu e Paulo i le Efeso 6:11-18, ina o ia faamatalaina le “ofutau” faaleagaga “mai le Atua” e ao ona latou faaaogāina. Pe o e ofu ea i lenei “ofutau atoatoa mai le Atua”? E tatau ona e ofu ai ina ia mafai ona e tali atu i tofotofoga o nei “aso e gata ai.” (2 Timoteo 3:1-5) Ma sa manaomia e Kerisiano i le uluai senituri lea ofutau. Aiseā ua tāua ai ona faia faapea?

4. I le uluai senituri, o ā upu moni faavae o le Malo na oo ina malamalama i ai Kerisiano?

⁴ O lo latou faatuatua e mamā ma faigofie. I lena taimi o i latou uma o ni Kerisiano sa faauuina e le agaga, o ē na faatalitalia se toetu i le lumanai i “le malo e faavavau o lo tatou Alii o lo tatou Faaola lea o Iesu Keriso.” (2 Peteru 1:11; 1 Korinito 15:50) Pe ā ma le tausaga e 96 T.A., ina ua maua e le aposetolo ua toeaina o Ioane le Faaaliga e ala i le faagaeega tauatua, na latou malamalama ai i lo latou faitau aofai o se “lafu mamoe itiiti” e 144,000. I le auaufaatasia o ni ‘tupu ma faitaulaga’ lagolago faatasi ma Keriso i le lagi, o le a latou pule ai i luga o le lalolagi mo tausaga e 1,000. Sa faaalia ia Ioane faapea pe a “mavae” ona aoaoina le 144,000 o Isaraelu faaleagaga, ona faailogaina lea o se “motu o tagata e toatele” e lē mafaitaulia o tane ma fafine faamaoni e “mai atu nuu uma, ma aiga, ma nuu, ma gagana eseese.” O se vasega lenei o le a sao mai le “puapuaga tele” faaiʻu i luga o le lalolagi e avea ma faavae o le sosaiete o tagata o le a olioli i faamanuiaga faameleniuma i lalo o le pule a le Malo.—Luka 12:32; Faaaliga 7:4, 9-17; 20:1-6; 21:1-5.

 LE APOSETASI SILI

5, 6. (a) O ā mau e faaalia ai, i lea foi taimi, sa faaaogā ai e le Tiapolo se osofaiga e sili ona poto? (e) I se faaupuga e tasi, o le ā lena mea?

⁵ O le ā la, le ala poto o osofaiga a le Tiapolo? I le toe tepa atu i tua i le nuu lē faatuatua o Isaraelu, na lapataia e le aposetolo o Peteru e faapea: “Sa i ai foi i le nuu o perofeta pepelo, e pei ona i ai ia te outou, o aʻoaʻo pepelo, latou te faatupuina faalilolilo o vaevaega e fano ai, . . . O le matapeapea foi e fai ai outou e i latou ma mea faatau i a latou upu pepelo.” (2 Peteru 2:1, 3) O nei faiaʻoga pepelo a lotu vavaeese, faatasi ma a latou aʻoaʻoga faalotu faatagafai na amata ona aliali mai i le iʻuga o le uluai senituri, auā pe tusa o le tausaga e 98 T.A. na tusi mai ai le aposetolo o Ioane e faapea: “Faapei ona outou faalogo ai foi o loo sau le anetikeriso, o loo i ai nei foi anetikeriso e toatele. . . . Na latou o ese ia i tatou, a e lei ni o tatou i latou.”—1 Ioane 2:18, 19.

⁶ Na lapatai le aposetolo o Paulo e faatatau i aʻoaʻoga pepelo e uiga i le “aso o Ieova,” i lona lua o ana tusi faakanona, i le 51 T.A. Sa ia tusi mai: “Aua neʻi faasese se tasi ia te outou i se togafiti e tasi; auā e le oo mai lena aso, seia muai ona taunuu o le teteʻa ese, ma ia faaalia mai o le tagata o le agasala, o le tagata lea o le malaia.” O ai lenei “tagata o le agasala”? E ao ona faasino i taʻitaʻi lotu aposetate o ē ua agasala, auā ua latou manatu o i latou o Kerisiano, ua latou “le iloa le Atua” ma “ua le anaana i le tala lelei a lo tatou Alii o Iesu Keriso.” (2 Tesalonia 1:6-8; 2:1-3) E mafai faapefea la e sea vasega aposetate ona manu aʻe i totonu o le faapotopotoga Kerisiano?

7. Na faapefea ona maileia nisi soʻo o Iesu, ma o le ā le iʻuga?

 ⁷ A o ola pea aposetolo a Iesu Keriso, sa gaoioi i latou o se taofiofiga i le faaofiina mai o aʻoaʻoga pepelo, peitai ua leva ona galue le “mea lilo a le amio leaga” “e pei o le galuega a Satani,” ma sa lauiloa i lona lua o senituri. E ui lava na faamatala atu e Iesu e uiga i ona soʻo i lona faapea atu, “o outou uma o le au uso,” ae o se manatu fiasili faaletagata i nisi na maileia ai i latou e le Tiapolo. Na latou amata ona faia se faaeseesega i le va o le au failotu ma le aulotu. Na faapea ona auauaʻi malie aʻe ai ona tutupu tulaga o mea na valoia mai e le aposetolo o Paulo e faapea: “Auā e oo i ona po latou te le mafafai ai ona talia o le mataupu e ola ai, a e tusa ma o latou lava tuʻinanau, latou te faapotopoto ai aʻoaʻo mo i latou, ina ua feū o latou taliga; latou te liliu ese foi o latou taliga i le upu moni.”—2 Timoteo 4:3, 4; 2 Tesalonia 2:6-10; Mataio 23:8.

8. (a) O ā mafuaaga autū e lua o aʻoaʻoga pepelo? (e) Ua faamatala mai faapefea e tusi encyclopedias le faaleagaina o le Faa-Kerisiano?

⁸ O fea la na liliu i ai o latou taliga? Na liliu atu i aʻoaʻoga na mapuna aʻe mai le amataga o le lotu sese i Papelonia anamua, ma le poto faafilosofia o tagata Eleni, o mea sa lauiloa i le lalolagi sa pulea e Roma i na ona po. E pei ona tautala i ai le M’Clintock and Strong’s Cyclopædia e faapea: “O le faigofie o le Tala Lelei na faaleagaina; o faiga faalialia vale ma sauniga sa amataina; o mamalu faalelalolagi ma faamanuiaga faaopoopo na faaee atu i faiaʻoga o le Faa-Kerisiano, ma o le malo o le Keriso na faaliliuina i se malo o lenei lalolagi.” Ma i lenei mea ua faaopoopo mai ai le Encyclopædia Britannica e faapea: “Atonu e leai se mea na sili ona faaleagaina atoatoa ai le Faa-Kerisiano na i lo le taliaina o faiga faapaupau ma uputuu ia e matuā faapaupau moni, po o mea foi na tali tutusa ma faiga faapaupau. Sa leʻi mafai e faiga faapaupau ona tetee atu ma le manuia i le Faa-Kerisiano, ae sa tele naunau ni mea ua ia faia e faaleagaina ai, ma i ni auala lē mafaitaulia na ia faavaivaia ai lona tulaga mamā.”

9. (a) O ā talitonuga taatele ua mapuna aʻe mai le aʻoaʻoga faapea o le solu o le tagata e ola pea? (e) Ua faapefea ona faaalia e le Tusi Paia e sese ia aʻoaʻoga?

 ⁹ O ā nisi o nei faiga uputuu ma faiga faapaupau? E matilatila lava le aʻoaʻoga a le fai filosofia Eleni o Palato faapea e lē mafai ona oti le solu o le tagata. E manaomia e sea talitonuga ona faapea e tatau ona alu le solu i se isi mea pe a oti le tagata, i se manuia silisili i le lagi, i se pulekatolio mo le faamamāina po o se afi i seoli mo le faapuapuagatiaina e faavavau. Ua lē taitai ona talafeagai lenei ma mau o le Tusi Paia e pei o le Salamo 146:4; Failauga 9:5, 10; Mataio 10:28 ma le Roma 6:23.

MAFUAAGA O LE FAA-KATOLIKO

10, 11. (a) O le ā ua taʻutino mai e Katinale Newman e uiga i le tele o aʻoaʻoga a lana Ekalesia? (e) Talu ai ona ua ia faapea mai o faiga e masani ai ma aʻoaʻoga a le Lotu “e faapaupau uma lava o latou mafuaaga,” e mafai moni ea la ona aloaia nei aʻoaʻoga faapea e paia?

¹⁰ I ana tusi o Essays and Sketches sa faaalia mai ai e le katinale Katoliko Roma o lona 19 o senituri, o John Henry Newman, le mafuaaga o le tele o aʻoaʻoga a lana Ekalesia, i le faapea mai: “O le mea uigaese, ua taliaina i ona itu uma lava o lenei:—O le vaega tele o mea ua masani ona taliaina e fai ma upu moni faa-Kerisiano, e maua lea i filosofia a tagata ma lotu faapaupau i o latou vaega faavae po o isi vaega o iai. Mo se faataʻitaʻiga, o le aʻoaʻoga o se Tolutasi e mafai ona maua uma i nuu i Sasae ma Sisifo; e faapea foi i le sauniga o le faamamāina; atoa foi ma tu i faiga o taulaga. O le aʻoaʻoga o le Upu Tauatua o le aʻoaʻoga a Palato; o le aʻoaʻoga o le Liutino tagata ua maua mai Initia.” O lea, i se tali atu i se tagata faitio na finau mai e faapea, “O nei mea ua maua i faiga faapaupau, o lea la, e lē o ni faiga faa-Kerisiano,” ua faapea mai ai le katinale: “Ua ese o matou manatu auā matou te fia faapea atu, ‘o nei mea o loo maua nei i le lotu Faa-Kerisiano, o le mea lea e lē o ni faiga faapaupau.’” Peitai o o latou mafuaaga e mai aʻoaʻoga faa-Papelonia ma aʻoaʻoga faa-Eleni na iai lava a o leʻi amataina le lotu Katoliko Roma. E lē gata i lea, e lē o maua foi na aʻoaʻoga i le Afioga a le Atua, le Tusi Paia.

 ¹¹ E faapea o le aposetasi sili na toe foi atu i lotu faapaupau ina ia maua a latou aʻoaʻoga ma a latou sauniga, ua faamaonia atili lea manatu i faamatalaga a Katinale Newman i lana tusi The Development of Christian Doctrine, o loo ia tusia ai e faapea: “Na suia e Konesetatino foliga masani o le lotu fou [o le Katoliko Roma] ina ia foliga mai e pei o mea sa masani ai tagata faapaupau i a latou lotu, ina ia faigofie ai ona taliaina e i latou lea lotu fou.” O lea, ina ua uma ona lisiina atu le tele o faiga masani a lana lotu, sa taʻutino atu loa le katinale e faapea o nei faiga “e faapaupau uma lava o latou mafuaaga, ma sa faapaiaina na mea uma lava ina ua taliaina i totonu o le Ekalesia.” Ae pe e mafai ea e aʻoaʻoga pepelo ona “faapaiaina,” pe faia ia paia?

12, 13. (a) I lalo o ā tulaga ma o le ā foi le faagaeega na naunau i ai Konesetatino i le lotu Katoliko Roma? (e) O le ā ua faaalia ai pe sa avea Konesetatino ma Kerisiano i lona loto?

¹² Ua faasino atu i inā e le katinale ia Konesetatino le Sili, le emeperoa o Roma o le senituri lona fa. O le ā sa naunau i ai Konesetatino i le lotu? I tausaga ina ua mavae lona osofaia o Roma i le 312 T.A., na faalauiloa atu ai e Konesetatino e faapea, i le afiafi po a o leʻi amata lana osofaiga, na ia vaaia ai le faaaliga o se koluse mumū, faatasi ma le matua e faapea “E Ala i Lenei, ia Manumalo.” O le mea la lenei na ia tusia i luga o lona fuʻa. Na ia taliaina faavae mo le lotu Katoliko Roma atonu ina ia mauaina ai le lagolagosua i le uunaia atili o ana lava fuafuaga faapolotiki. Ma na ia soofaatasia ai i totonu o le faiga o lotu “Kerisiano” talitonuga faapaupau ia sa pele pea i lona loto.

¹³ Ua faapea mai le Encyclopædia Britannica e uiga ia Konesetatino: “Atonu sa tumau pea le malosi o talitonuga faapaupau i lena tagata,  ma toetoe lava ina uma ai lona ola, sa ia taofia pea le tele o faiga uputuu faapaupau. . . . Sa onomea ia Konesetatino ona taʻua faapea e Sili, ona o lona aogā i mea na ia fai na i lo o ona uiga totino. Ina ua tofotofoina i tulaga tauamio, o le mea moni lava, sa matuā maualalo lona tulaga pe a faatusa ia i latou uma o ē na faatatau i ai le taʻu [“Sili”] anamua po o aso faaonaponei.” Ua faaalia lena mea, i lana amioga leaga auā na ia fasiotia nisi o lona lava aiga. O lona taʻu faapaupau, “Pontifex Maximus,” na mulimuli ane ona tuuina atu i pope o le Lotu Katoliko Roma.

14. Pe sa fai moni pope o Roma ma sui o le malo o le Atua, ma aiseā ua e tali mai ai faapea?

¹⁴ Ina ua agaʻi mai i Tupulaga i le va o le 500 ma le 1500 T.A. (Aso o le Pogisa), sa pule ai pope o Roma e pei lava o tupu o le lalolagi. Sa latou leʻi faatali mo Keriso ia faatuina lana pulega faameleniuma mai le lagi. Sa latou mananao i se “malo” i lena taimi mo lo latou lava lelei ma o latou manatu faapito. Ua faamatala mai e le Encyclopædia Britannica lea tulaga i upu nei: “O se tasi o uluai mafuaaga o le faaleagaina o le Faa-Kerisiano, o le taumafai lea ia faaliliuina le malo faa-Kerisiano o le Atua i se pulega vaaia e se tagata, ona fai ai lea o le lalolagi ma tofi o tagata paia i se auala faalelalolagi.” E lētioa ona mananao tagata loto faamaoni ia fai se finauga ma sea “faaleagaina o le FaaKerisiano”! Ae ui lava i lea, o le Sailiiliga Faalelotu sauā, i le susunuina i le laau lava ia na sili atu i le 30,000 tagata na fasiotia ai, sa umi sina taimi o faia ina ia taofia ai pea i latou o ē tetee. Ae sa leʻi tumau ai faapea!

AE FAAPEFEA LE FAA-POROTESANO?

15. (a) Pe na avea moni ma ā le Toe Fuataiga i le Lotu Porotesano? (e) O le ā le auala o loo saisaitia ai Lotu Porotesano e oo mai i o tatou aso nei?

¹⁵ I le aoauli, i le aso 31 o Oketopa, 1517, na tutuʻiina ai e le patele  Katoliko Roma o Matini Luteru ni faamatalaga lagolagoina se 95 o teteega i le faitotoa o le falesa i Wittenberg, i Siamani. Na amata ai loa i lea le Toe Fuataiga i le Lotu Porotesano. Ae ui i lea, na i lo o le toe faafoisia mai o aʻoaʻoga mamā faa-Kerisiano ma le auaunaga paia i le Atua, sa oo ina mafuli tele atu le Toe Fuataiga i le uiga faapolotiki. O le mauaina o atunuu sa faia i le tauina o taua faalotu, e pei o le Taua i Tausaga e 30 mai le 1618-1648 i Europa, lea na maliliu ai le faitau miliona o tagata. O le tele o atunuu na faatutuina a latou lotu faalesetete, ma sa faaauau pea e ia lotu ona aʻoaʻoina aʻoaʻoga autū o le Lotu Katoliko, e pei o le ola pea o le solu (soul), o le faapuapuagatia i le afi i hele, o le Tolutasi, o le papatisoga mo pepe ma isi lava mea e tele. Ua latou tumau pea i saisaitiaga a nei aʻoaʻoga a le aposetasi sili ua oo mai lava i nei aso.

“PAPELONIA LE AAI TELE”

16, 17. (a) O le ā le uiga o iai i le Ieremia 51:6 mo i tatou i aso nei? (e) Na faapefea ona avea le lotu a Papelonia ma mea e faavaomalo i lona tulaga aoao?

¹⁶ O faiga masani a lotu sese e lē gata ai i tagata o ē fai mai o i latou o ni Kerisiano. Ua lapataia i tatou e le perofeta o Ieremia e faapea:

“Ina sosola ia outou ai totonu o Papelonia, ia taitasi ma faasaoina lona ola.” (Ieremia 51:6)

Ua iai i lenei mea se uiga mo i tatou i aso nei. E oo lava i aso o Ieremia, sa logologoā le leaga o Papelonia i a latou faiga matagā faalotu ma le tele foi o o latou atua. Ae peitai o le Papelonia o aso nei e faalevaomalo i lona tulaga aoao. Na faapefea ona oo mai lenei mea?

¹⁷ Na mulimuli mai i le lolo o ona po o Noa, o Papelonia lea sa iai le tagata amioleaga o Nimarota,  “o lē malosi foi o ia i tuli manu i luma o Ieova,” na amata ona fausia aʻe se aai faalemalo ma atonu foi o le olo faalotu lea na oo atu lona maualuga i le lagi. Na faamaasiasi e Ieova a latou fuafuaga i le faaeseeseina o gagana a tagata ma faataapeapeina ai i latou “i le lalolagi uma.” Ae peitai na latou ō lava ma a latou lotu pepelo. O le aa lena na tatupu aʻe ai le tele o lotu a le lalolagi.—Kenese 10:8-10; 11:1-9.

18. Mai le ā le malo faatagafai e ao ona tatou sosola ese ai, ma e ao ona sosola atu i fea?

¹⁸ E pei ona ua tatou matauina, na soofaatasia e Konesetatino lena lotu sese i totonu o aʻoaʻoga faa-Kerisiano ina o ia faataatiaina le faavae mo le lotu Katoliko Roma. O lenei mea, na iʻu ina avea ma puna o le tele o aʻoaʻoga o le Faa-Porotesano. E iai foi ni aa o lotu lē “Kerisiano” o le lalolagi ia Papelonia anamua. A tuufaatasi la, o lona uiga o lotu a Kerisiano pepelo ma lotu e lē “Kerisiano” ua faia aʻe ai se emepaea o lotu sese a le lalolagi. O le malo faatagafai lea na faasino i ai e le aposetolo o Ioane e faapea o “Papelonia le aai tele . . . o le aai tele lea, e i ai le pule [faalotu] i tupu o le lalolagi.” (Faaaliga 17:5, 18) O lea, ina ia “taitasi ma faasaoina lona ola,” ua fautuaina lelei ai i tatou ia sosola ese ma le “malo” faatagafai faa-Papelonia, ioe, ia sola atu i le malo o le Atua!

[Fesili mo le Suʻesuʻega]

[Pusa i le itulau 95]

E OSOFAIA E SATANI AUAUNA A LE MALO O LE ATUA I—

● Osofaiga tuusaʻo o sauāga—e ala i aiga o ē ua sese o latou talitonuga, o malo po o pulega, ma tagata lotu

● Faaosoosoga i amioga lē mamā i olaga lē pulea i aso nei

● Le uunaiina o manatu faamaualuluga i tulaga, tamaoaiga, lanu, ma atunuu

● Taumafaiga e uunaia ai i latou e avea ma ē alolofa i mea faafiafia ae leai se alofa i le Atua—ua matuā aafia i latou i faafiafiaga

● Le faamuamuaina o aʻoaʻoga o le lē talitonu i le Atua, ma le faaevolusione

● Le suiseseina o le Faa-Kerisiano moni e ala i le malo aposetate faatagafai o Kerisinetoma

● Le faatutūina aʻe o faiaʻoga pepelo e faatupuina ai masalosaloga i Kerisiano moni ma faatogafitia ai le faavaivaia o i latou

E MAFAI ONA TATOU FAATOʻILALOINA LE LALOLAGI A SATANI E ALA I LO TATOU FAATUATUA