1, 2. (a) O le ā le umi na fuafuaina e tumau ai le faaipoipoga? (e) E mafai faapefea ona faia faapena?

INA ua faatasia e le Atua le uluai tamaloa ma le uluai fafine i le faaipoipoga, sa lei iai se faamaoniga e faapea o le faatasiga o le a iai e mo na o sina taimi. Sa tatau ona faatasia Atamu ma Eva mo le olaga atoa. (Kenese 2:24) O le faatulagaga a le Atua mo se faaipoipoga e faamamaluina, o le faatasia lea o le tamaloa e toatasi ma le fafine e toatasi. E na o le agasala matuia i amioga lē tatau faaleituaiga e faia e se tasi o paaga po o laua uma ua saunia ai ni faavae faale-Tusi Paia mo talagā faaipoipoga ma le avanoa e toe faaipoipo ai.—Mataio 5:32.

² Pe mafai ea e ni tagata se toalua ona nonofo fiafia faatasi mo se taimi umi e lē mautinoa? Ioe, ma ua faaalia mai e le Tusi Paia vala tāua po o ki, e lua, e fesoasoani ina ia mafaia ai lenei mea. Pe afai e faaaogā uma e le tane ma le avā, o le a la maua ai le avanoa e oo atu ai i le fiafiaga ma le tele o faamanuiaga. O ā nei ki?

3. O ā ituaiga e tolu o alofa e tatau ona atiina aʻe e paaga faaipoipo?

³ O le ki muamua o le alofa. Seʻi mātau, e eseese ituaiga o alofa ua faaalia i le Tusi Paia. O le tasi o se alofa māfana totino mo se isi, o le ituaiga o alofa lea e iai i le va o uo vavalalata. (Ioane 11:3) O le isi o le alofa lea e tupu aʻe i le va o tagata o se aiga. (Roma 12:10) O le lona tolu o le alofa fetosinaai lea e mafai e se isi ona ia lagonaina mo se tasi o le isi ituaiga. (Faataoto 5:15-20) O le mea moni, o nei alofa uma e tatau ona atiina aʻe e  se tane ma se avā. Ae ua iai le ituaiga lona fa o alofa, e sili atu ona tāua nai lo isi.

4. O le ā le ituaiga lona fa o alofa?

⁴ I le uluai gagana o Tusitusiga Kerisiano Eleni, o le upu ua faaaogā mo lenei ituaiga lona fa o alofa o le a·gaʹpe. O lena upu ua faaaogā i le 1 Ioane 4:8, lea ua taʻu mai ai ia i tatou e faapea: “O le Atua, o le alofa lava ia.” Ioe, “ua tatou alolofa, auā na ia [o le Atua lea] muai alofa mai ia te i tatou.” (1 Ioane 4:19) E muai atiina aʻe e se Kerisiano lea alofa mo Ieova le Atua, ona sosoo ai lea mo uso a tagata. (Mareko 12:29-31) Ua faaaogā foi le upu a·gaʹpe i le Efeso 5:2, lea e taʻua mai: “Ia savavali i le alofa, faapei o Keriso foi na ia alofa mai ia i tatou, ua  na foai mai foi e ia ia te ia mo i tatou.” Na fetalai Iesu o lenei ituaiga o alofa o le a mātaulia ai ona soo moni: “O le mea lea e iloa ai e tagata uma lava o oʻu soo outou, pe afai ua outou fealofani [a·gaʹpe].” (Ioane 13:35) Seʻi mātau foi, le faaaogaina o le a·gaʹpe i le 1 Korinito 13:13: “O tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa [a·gaʹpe] lea.”

5, 6. (a) Aisea e sili atu ai le alofa nai lo le faatuatua ma le faamoemoe? (e) O ā nisi o mafuaaga o le a fesoasoani ai le alofa i le faatumauina o se faaipoipoga?

⁵ O le ā ua māfua ai ona sili atu lenei alofa a·gaʹpe nai lo le faatuatua ma le faamoemoe? Auā ua puleaina e mataupu silisili—mataupu silisili saʻo—ua maua i le Afioga a le Atua. (Salamo 119:105) O se naunautai lē manatu faapito mo le faia i isi o le mea ua saʻo ma lelei i le silafaga a le Atua, e tusa lava pe foliga mai o le tagata o loo faia i ai ua tatau ona ia mauaina pe leai. O sea alofa e mafai ai e paaga faaipoipo ona usitaia le fautuaga a le Tusi Paia: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai le Alii ia te outou, ia faapea foi outou.” (Kolose 3:13) O ulugalii faaipoipo e fealofani ua ia i latou ma ua latou atiina aʻe le “alofa naunau [a·gaʹpe] o le tasi i le tasi, auā o le alofa e ufiufi ai agasala e tele.” (1 Peteru 4:8) Seʻi mātau o le alofa e ufiufi ai mea sese. E lē faapea e lē toe faia se mea sese, auā e leai se tagata lē lelei atoatoa e mafai ona saʻoloto mai le faia o mea sese.—Salamo 130:3, 4; Iakopo 3:2.

⁶ Pe a atiina aʻe lena alofa o le Atua ma le alofa o le tasi i le isi e se ulugalii faaipoipo, o le a tumau ai ma fiafia le la faaipoipoga, auā “e le uma le alofa.” (1 Korinito 13:8) O le alofa o “le fusi lea e atoatoa ona lelei ai.” (Kolose 3:14) Pe afai ua e faaipoipo, e mafai faapefea e oe ma lau paaga ona atiina aʻe lenei ituaiga o alofa? Ia faitauina faatasi le Afioga a le Atua, ma talatalanoa i ai. Ia suesue i le faaaoaoga a Iesu o le alofa ma taumafai e  faataʻitaʻi ia te ia, ia manatunatu ma gaoioi e pei o ia. E lē gata i lea, ia auai atu i sauniga faa-Kerisiano, o iina o loo aʻoaʻoina ai le Afioga a le Atua. Ma ia tatalo atu mo le fesoasoani a le Atua ina ia faatupuina lenei ituaiga silisili ona tāua o le alofa, o se fua o le agaga paia o le Atua.—Faataoto 3:5, 6; Ioane 17:3; Kalatia 5:22; Eperu 10:24, 25.

7. O le ā le faaaloalo, ma o ai e tatau ona faaalia le faaaloalo i totonu o le faaipoipoga?

⁷ Pe afai o tagata e toalua ua faaipoipoina e matuā alofa lava le tasi i le isi, o le a ia i laua foi la le faaaloalo o le tasi i le isi, ma o le faaaloalo o le ki lona lua lea i se faaipoipoga fiafia. Ua faamatalaina le faaaloalo e faapea “o le manatunatu atu i isi, o le ava ia i latou.” Ua fautuaina e le Afioga a le Atua Kerisiano uma, e aofia ai tane ma avā: “Ia tausolomua ona ava o le tasi i le tasi.” (Roma 12:10) Na tusi mai le aposetolo o Peteru e faapea: “Ia faapea outou tane, ia nonofo faatasi ma [a outou avā] ma le poto, ia ava i le avā, auā o le ipu ia ua sili ona vaivai ia te oe.” (1 Peteru 3:7, LT ) Ua fautuaina le avā ina “ia ava o ia i lana tane.” (Efeso 5:33) Pe afai e te manao e ava i se tasi, e te agalelei atu i lena tagata, e te faaaloalogia uiga mamalu ma manatu faaalia o lena tagata, ma e te nofo sauni e faataunuu so o se manaoga talafeagai e manaomia mai ia te oe.

8-10. O ā nisi o auala o le a fesoasoani ai le faaaloalo ina ia avea le faatasiga o le faaipoipoga o se faatasiga mautū ma fiafia?

⁸ O i latou e mananao e olioli i se faaipoipoga fiafia latou te faaalia le faaaloalo mo a latou paaga e ala i le “aua neʻi taitasi ma vaavaai i [a latou] lava mea, a ia taitasi ma vaavaai i mea a [a latou paaga].” (Filipi 2:4) Latou te lē manatunatu i mea lelei mo na o i latou lava—o se manatu faapito lena. Nai lo lea, latou te manatunatu foi i mea e sili ona lelei mo a latou paaga. O le mea moni, latou te ave le faamuamua i manaoga o a latou paaga.

 ⁹ O le faaaloalo o le a fesoasoani i paaga faaipoipo ina ia amanaia e iai eseesega i manatu. E lē fetaui le faatalitalia o tagata e toalua ina ia tutusapau o la manatu i mea uma. O se mea atonu e tāua i le tane atonu e lē faapena le tāua i le avā, ma o se mea e fiafia i ai le avā atonu e lē o le mea lena e fiafia i ai le tane. Ae tatau ia i laua uma ona faaaloalo le tasi i manatu ma filifiliga a le isi, o le itu taulia ia talafeagai nei mea ma tulafono ma mataupu silisili a Ieova. (1 Peteru 2:16; faatusatusa i le Filemoni 14.) O le isi manatu, e tatau ia i laua uma ona faaaloalo le tasi i le tulaga mamalu o le isi e ala i le lē avea o le tasi e fai ma taulaʻiga o faaupuga po o ni tausuaga e faamaasiasi ai i luma o tagata pe i le na o i laua lava.

¹⁰ Ioe, o le alofa i le Atua ma le alofa o le tasi i le isi ma le faaaloalo loloto o le tasi i le isi, o ki na e lua e matuā tāua i se faaipoipoga manuia. E mafai faapefea ona faatatauina atu i nisi o vala e sili atu ona tāua o le olaga faaipoipo?

11. E tusa ai ma le Tusi Paia, o ai e ulu i le lio o le faaipoipoga?

¹¹ Ua taʻu mai e le Tusi Paia ia i tatou e faapea ina ua foafoaina le tamaloa, sa tuuina atu i ai uiga o le a avea ai o ia ma ulu o se aiga manuia. I lena tulaga, o le a faatino ai e le tamaloa le tiute tauave i luma o Ieova mo le lelei faaleagaga ma le faaletino o lana avā ma le fanau. O le a tatau ona ia faia faaiuga paleni lelei e atagia atu ai le finagalo o Ieova ma avea ai ma faaaoaoga lelei o le amio Atua. “O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foi o le ulu ia o le ekalesia.” (Efeso 5:22, 23) Peitai ane, ua fai mai le Tusi Paia e iai foi lē ua avea ma ulu o le tane, o Lē e iai lana pule i le tane. Na tusi le aposetolo o Paulo: “A ou te loto ina ia outou iloa, o le ulu o tane taitoatasi o Keriso lea, o le  ulu o le avā o le tane lea, a o le ulu o Keriso o le Atua lea.” (1 Korinito 11:3) O le tane atamai na te aʻoaʻoina le auala e faatinoina ai le tulaga ulu e ala i le faataʻitaʻi atu i lona lava ulu, o Keriso Iesu.

12. O le ā le faaaoaoga matagofie na faataatia e Iesu mo le faaalia o le gauai ma le faatinoina o le tulaga ulu?

¹² E iai foi lē ua avea ma ulu o Iesu, o Ieova lea, ma e gauai atu ma le faaaloalo o ia ia te Ia. Na fetalai Iesu: “Ou te le usiusitai i loʻu lava loto, a o le finagalo o le na auina mai aʻu.” (Ioane 5:30) Maeu se faaaoaoga ua silisili ona lelei! O Iesu o “le ulumatua o mea uma lava ua faia.” (Kolose 1:15) Ua avea o ia o le Mesia. Sa fuafuaina o le a avea o ia ma Ulu o le faapotopotoga o Kerisiano faauuina ma o le Tupu tofia o le Malo o le Atua, e sili aʻe nai lo agelu uma. (Filipi 2:9-11; Eperu 1:4) E ui lava i lena tulaga maualuga ma na faamoemoega sili, ae a o avea Iesu ma tagata, sa lē inainā, sa lē taofiofi mamau i ona manatu, pe soona pulepuletutū. Sa lē o ia o se tagata e pule sauā, i le faamanatu atu pea i ona soo e tatau ona latou usiusitai mai ia te ia. Sa agaalofa ma mutimutivale lagona o Iesu, ae maise lava i ē sa mafatia. Na ia fetalai: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.” (Mataio 11:28-30) Sa avea o se fiafiaga le auaumea faatasi ma ia.

13, 14. O le a faatinoina faapefea e se tane alofa lona tulaga ulu, i le faataʻitaʻi atu ia Iesu?

¹³ O le tane o loo faanaunau mo se aiga fiafia, e lelei pe a ia manatunatu i uiga matagofie o Iesu. O se tane lelei e lē inainā ma fia tautalatasi, i le faaaogā sese o lona tulaga ulu e pei o se sasa e pule malosi ai i lana avā. Nai lo lea, e alofa ma faamamalu atu ia te ia. Pe afai sa “loto maulalo” Iesu, ua sili atu ai la ona alagātatau  i le tane lona faia faapea auā, o ia e lē pei o Iesu, e na te faia mea sese. Pe a ia faia, e na te manaomia le loto malamalama o lana avā. O lea la, o le tane e lotomaulalo na te taʻutino ana mea sese, e ui lava ina faafaigata ona taʻu atu upu e pei o le, “Ou te faamalie atu; e saʻo lava oe.” O le a faafaigofie i le avā ona faaaloalo i le tulaga ulu o se tane e agamalu ma lotomaulalo nai lo sē e faamaualuga ma lotomaaa. I le tali mai foi i ai, o le avā faaaloalo e faatoese foi pe a ia faia se mea sese.

¹⁴ Ina ua foafoaina le fafine, sa tuuina atu i ai uiga matagofie e mafai ona ia faaaogā e saosaolaumea atu ai i se faaipoipoga fiafia. O se tane atamai o le a ia talisapaia lenei mea ma lē faalotovaivaiina lana avā. E toatele fafine e mātele atu ina tele o latou uiga alofa ma le magafagafa, o uiga e manaomia i le tausia o se aiga ma i le faapelepeleina o faiā faaletagata. E masani lava, o le fafine e sili atu lona tomai i le teuina lelei o le fale ma ua avea le fale o se nofoaga e fiafia e nofo ai. O le “avā amio lelei” ua faamatalaina i le Faataoto mataupu e 31 e tele ni ona uiga matagofie ma ni ana taleni e sili ona mataina, ma ua matuā aogā na mea i lona aiga. Aisea? Auā “ua faatuatua” atu le loto o lana tane ia te ia.—Faataoto 31:10, 11.

15. E mafai faapefea e se tane ona faaalia i lana avā le alofa ma le faaaloalo faapei o Keriso?

¹⁵ I nisi aganuu, ua soona faamamafa ai le pule a le tane, e oo ai lava la i le fesili atu ia te ia ua manatu i ai o se lē faaaloalo. Atonu e feutagai o ia ma lana avā i se tulaga e toetoe lava pei o le faiga o se pologa. O sea faatinoina sese o le tulaga ulu e iu ai i se faiā leaga e lē gata i lo la va ma lana avā ae faapea foi i le va ma le Atua. (Faatusatusa i le 1 Ioane 4:20, 21.) I le isi itu, o nisi tane ua latou lafoaia le avea ma taʻimua, i le tuu atu lea i a latou avā e puleaina le auaiga. O le tane o lē gauai atu ma le talafeagai ia Keriso e na te lē faaaogaseseina lana avā ma aveesea ai uiga mamalu o le avā. Nai lo lea, e  faataʻitaʻi le tane i le alofa faataulagaina totino o Iesu ma faia e pei ona sa fautua mai ai Paulo: “O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai o ia e ia e fai mona sui.” (Efeso 5:25) Sa alofa tele Keriso Iesu i ona soo lea na iu ai ina maliu o ia mo i latou. O se tane lelei o le a ia taumafai e faataʻitaʻia lena uiga lē manatu faapito, i le sailia o mea lelei mo lana avā, nai lo le pulepuletutū i ai. Pe a gauai atu se tane ia Keriso ma faaalia le alofa ma le faaaloalo faapei o Keriso, o le a uunaia ai lana avā e gauai atu ia te ia.—Efeso 5:28, 29, 33.

16. O ā uiga e tatau i se avā ona faaalia i lana faiā ma lana tane?

¹⁶ I se taimi ina ua uma ona foafoaina Atamu, “ua fetalai mai foi Ieova le Atua, E le lelei ina toatasi o le tagata; ou te faia sona fesoasoani e tatau ma ia.” (Kenese 2:18) Na foafoaina Eva e le Atua ina ia avea o se “fesoasoani,” ae lē o sē faatavā atu. Sa lei fuafuaina le faaipoipoga ina ia pei o se vaa e lua ona kapeteni o loo tauvā. Sa tatau i le tane ona faatinoina le tulaga ulu agaalofa, ma sa tatau i le avā ona faaalia le alofa, le faaaloalo, ma le lotomalie e gauai.

17, 18. O ā nisi o auala e mafai ai ona avea se avā o se fesoasoani moni i lana tane?

¹⁷ Ae peitai, o se avā lelei e sili atu nai lo le na ona gauai. E taumafai o ia ina ia avea o se fesoasoani moni, ia lagolagosua i lana tane i faaiuga e faia e le tane. O le mea moni, e faigofie i le avā lena mea pe a malie o ia i faaiuga a le tane. Ae tusa lava foi pe na te lē malie i ai, o lana lagolagosua malosi atu e mafai ona fesoasoani i le faaiuga a le tane ia maua mai ai ni iuga e sili atu ona manuia.

¹⁸ E mafai e le avā ona fesoasoani atu i lana tane ina ia avea o se ulu lelei i isi vala. E mafai ona ia faaali atu lona talisapaia o taumafaiga a le tane i le avea ma taʻimua, nai lo le faitio i ai ma faia le tane i se tulaga e  manatu ai o ia e lē taitai mafai ona ia faamalieina lana avā. I le feutagai ma lana tane i se auala saʻo, e tatau ai i le avā ona manatua o le “loto agamalu ma le filemu, o le mea tau tele lava lea i luma o le Atua,” ae lē i le na o le vaaiga a lana tane. (1 Peteru 3:3, 4; Kolose 3:12) Ae faapefea pe afai e lē talitonu le tane? E tusa pe talitonu le tane pe leai, ae ua faalaeiauina e le Tusi Paia avā ina ia “alolofa atu i a latou tane, ia alofa atu i a latou fanau, ia faautauta i latou, ia amio mamā, ia tausi lelei i o latou aiga, ia agalelei, ia usiusitai atu i a latou lava tane, ina neʻi upuleagaina le afioga a le Atua.” (Tito 2:4, 5) Pe afai e aliaʻe mai mataupu e aafia ai le loto fuatia ifo, e foliga mai o le a faaaloalo se tane lē talitonu i le tulaga o lana avā pe afai e taulimaina le mataupu i le “agamalu ma le ava.” O nisi tane lē talitonu ua mafai ona “maua i latou i le amio lelei a avā, a e leai se upu, pe a latou vaai ane i a [latou] amio mamā ma le faaaloalo.”—1 Peteru 3:1, 2, 15; 1 Korinito 7:13-16.

19. Ae faapefea pe a faatonuina e le tane lana avā ina ia solia le tulafono a le Atua?

¹⁹ Ae faapefea pe a faatonu e le tane lana avā e faia se mea ua faasaina e le Atua? Pe a tupu lena tulaga, e tatau i le avā ona ia manatua o le Atua o lona Pule silisili lea. Na te faaaogaina le faaaoaoga na faia e le ʻau aposetolo ina ua faatonuina i latou e pule o le malo ina ia solia le tulafono a le Atua. Ua faamatala mai e le Galuega 5:29 e faapea: “Ona tali atu lea o Peteru ma le ʻau aposetolo ua faapea atu, ʻE tusa ona sili o lo matou anaana i le Atua i lo matou anaana i tagata.’”

20. O le ā le vala tāua lea e manaomia ai le alofa ma le faaaloalo?

²⁰ O le alofa ma le faaaloalo o mea manaomia na i le isi foi vala o le faaipoipoga—o fesootaiga. O se tane e alofa o le a talanoa ma lana avā e faatatau i galuega a le avā, o ona faafitauli, o ona manatu i mataupu eseese. E manaomia e le avā lenei uaʻi atu. O se tane na te  faaalu se taimi e talanoa ai i lana avā ma faalogologo lelei atu i mea o loo fai mai ai, e faaalia ai lona alofa ma lona faaaloalo i lana avā. (Iakopo 1:19) E faitio mai nisi avā e faapea e itiiti lava sina taimi latou te talatalanoa ai ma a latou tane. O se tulaga faanoanoa lena. E moni, i nei taimi o le tele o mea e fai, atonu e faigaluega ai tane mo ni taimi uumi, i fafo atu o le aiga, ma o tulaga tau i le tamaoaiga atonu o le a iu ai ina faigaluega foi nisi avā. Ae manaomia mo se ulugalii faaipoipo ona faaavanoaina se taimi mo i laua lava. Pe a lē faia faapea, e ono ola fia tutoatasi ai le tasi mai le isi. E mafai ona taʻitaʻia atu i faafitauli matuia pe a la lagona se uunaiga malosi e saili atu ni a la faauooga faapelepele i fafo atu o le faatulagaga o le faaipoipoga.

21. O le a faapefea i le tautala talafeagai ona fesoasoani i le tausia pea o se faaipoipoga fiafia?

²¹ E tāua le auala e fesootai ai avā ma tane. “O upu matagofie, . . . e suamalie i le loto, ma le mea e malolo ai ivi.” (Faataoto 16:24) E tusa lava pe talitonu le paaga pe leai, ae e faatatauina lava iinei le fautuaga a le Tusi Paia: “Ia le aunoa a outou upu ma le alofa, ia faamāi i le masima,” o lona uiga, ia logolelei. (Kolose 4:6) Pe afai sa feagai se tasi ma se aso faigata, o ni nai upu agalelei, ma le alofa faapelepele mai lana paaga e mafai ona tele sona aogā. “O le upu ua fai faatatauina, o moli auro ia i ato ario togitogi faamamanuina.” (Faataoto 25:11) O le leo ma upu e filifilia e tāua tele. Mo se faaaoaoga, e ono faapea atu se tasi i se uiga ita, ma le pulepuletutū: “Tapuni le faitotoa lena!” Ae maeu le sili ona “faamāi i le masima” upu, ua fai atu i se leo mālū, ma le malamalama, “Seʻi e tapuni atu lava le faitotoa, faamolemole.”

22. O ā uiga e manaomia e ulugalii ina ia tausisia ai fesootaiga lelei?

²² O fesootaiga lelei e olaola pe a iai upu e faia atu i se uiga tauagafau, o foliga ma tāga e fiafia, le agalelei, le loto malamalama, ma le agavaivai. O le galulue mamafa ina ia tausisia fesootaiga lelei, o le a lagona uma ai e le tane  ma le avā le saʻoloto e faailoa atu o la manaoga, ma e mafai ona avea ai i laua ma puna o faamafanafanaga ma fesoasoani o le tasi i le isi i taimi o tiga ma mafatiaga. Ua faalaeiau mai le Afioga a le Atua: “Ia faamafanafana i e loto iti.” (1 Tesalonia 5:14) O le a iai taimi e loto mafatia ai le tane ma taimi e faapena ai foi le avā. E mafai ona la talanoa “faamafanafana,” i le faalaeiauina e le tasi o le isi.—Roma 15:2.

23, 24. O le a faapefea ona fesoasoani le alofa ma le faaaloalo pe a iai ni mea e lē malilie faatasi i ai? Aumai se faaaoaoga.

²³ O paaga faaipoipo o loo la faaalia le alofa ma le faaaloalo o le a lē manatu i mea uma la te lē malilie faatasi i ai e faapea o se luʻi tele. O le a la tauivi ina ia lē “faaonoono” le tasi i le isi. (Kolose 3:19) E tatau ia i laua uma ona manatua o “le tali filemu e liliueseina ai le ita.” (Faataoto 15:1) Ia faaeteete ina ia lē taʻufaatauvaaina pe taʻuleagaina se paaga o lē o loo sasaa mai ona lagona moni. Ae ia manatu i na faaleoga o se avanoa lea e maua ai le malamalamaga moni i manatu o le isi. Ona taumafai faatasi lea e foia feeseeseaiga ma maua ai se faaiuga e loto gatasi uma i ai.

²⁴ Seʻi manatu i le taimi na fautua atu ai e Sara i lana tane, o Aperaamo, se vaifofo i se faafitauli ae sa lei fetaui ma lagona o Aperaamo. Peitai, na fetalai atu le Atua ia Aperaamo: “Ia e usiusitai i ai i lana upu.” (Kenese 21:9-12) Na faia e Aperaamo, ma na faamanuiaina ai o ia. E faapena foi pe afai e faatulai atu e le avā se manatu e ese mai le mea o loo i le mafaufau o lana tane, ae ao i le tane ona tau lava ina faalogo atu. I le taimi lava e tasi, e lē tatau i se avā ona puleaina le talanoaga ae tatau ona faalogo i le mea o loo tatau i lana tane ona fai mai ai. (Faataoto 25:24) Auā pe afai o le tane po o le avā e maumauai lava i le faia o mea i lana auala i taimi uma, o se lē alofa lena ma se lē faaaloalo.

25. O le a faapefea i fesootaiga lelei ona saosaolaumea i le fiafiaga i vala e sili ona māfana o le olaga faaipoipo?

²⁵ O fesootaiga lelei e tāua foi i feusuaiga a se ulugalii.  O le manatu faapito ma le leai o se pulea totino e mafai ona matuia le faaleagaina ai o lenei faiā e sili ona māfana i le faaipoipoga. O fesootaiga saʻoloto, ma le onosai, e manaomia tele. Pe afai e saili uma i laua ma le lē manatu faapito mo le lelei o le isi, ona seāseā lea avea feusuaiga o se faafitauli matuia. I lenei vala ma isi foi vala, ia “aua le saili se tasi i lona lava lelei, a ia taitasi ma saili i le lelei o le isi.”​—1 Korinito 7:3-5; 10:24.

26. E ui lava o faaipoipoga uma e iai taimi e lagilelei ai, e iai foi taimi e loulouā ai, ae faapefea i le faalogo atu i le Afioga a le Atua ona fesoasoani i ulugalii faaipoipo ina ia maua ai le fiafiaga?

²⁶ Maeu se fautuaga matagofie ua ofoina mai e le Afioga a le Atua! E moni, o faaipoipoga uma lava o le a iai taimi e lagilelei ai, e iai foi taimi e loulouā ai. Ae afai e gauai atu paaga i le finagalo o Ieova, e pei ona faaalia mai i le Tusi Paia, ma atiina aʻe le la faiā i le alofa ma le faaaloalo e faavae i mataupu silisili, e mafai ona la mautinoa o le a tumau ma fiafia le la faaipoipoga. Ona la faamamaluina ai lea, e lē gata o i laua lava ae faapea foi i Lē na Amataina le faaipoipoga, o Ieova le Atua.