1, 2. O ai e tatau i mātua ona saili atu i ai mo se fesoasoani i le tausia aʻe o a latou fanau?

“O LE fanau, o le tofi lea mai ia Ieova,” o le mea lena na faalauiloa mai e se matua loto talisapaia i ni tausaga e 3,000 ua tuanai. (Salamo 127:3) O le mea moni, o le olioli i le avea ma mātua o se taui tautele mai le Atua, o se taui e mafai ona maua e le toatele o tagata ua faaipoipo. Ae peitai, o i latou ua iai fanau e lē umi lava ae latou iloa, e lē gata i le olioli, ae o le avea ma mātua e iai ona tiute tauave.

² Ae maise lava i aso nei, o le tausia aʻe o le fanau o se galuega e ese le faigata. E ui i lea, e toatele ua latou faataunuuina ma le manuia lea tiute, ma ua faasino mai e le faisalamo faagaeeina le auala, i le faapea mai: “Afai e le atiina ae e Ieova le fale, e galulue fua i latou o e atiina ae.” (Salamo 127:1) O le tele o lou usitaia o faatonuga a Ieova, o le lelei foi lena o le ituaiga o matua o le a e iai. Ua faapea mai le Tusi Paia: “Ia e faatuatua ia Ieova ma lou loto atoa; a e aua le faalagolago i lou lava atamai.” (Faataoto 3:5) Po o e lotomalie ea e faalogo atu i fautuaga a Ieova a o e amataina lau galuega mo le 20 tausaga o le tausia aʻe o le fanau?

3. O le ā le tiute tauave ua iai i tamā i le tausia aʻe o le fanau?

³ I le tele o aiga i le lalolagi aoao, e manatu ai tamaloloa i le tausia aʻe o se tamaitiiti e faapea o le galuega autū lena a le fafine. E moni, o loo faasino atu le Afioga  a le Atua i le matafaioi a le tamā o le avea ma sē e aumaia tupe mo le tausia o le aiga. Peitai, ua faapea mai foi e iai tiute tauave a le tamā i le fale. Ua faapea mai le Tusi Paia: “Ia sauniuni i fafo lau galuega, ma ē teuteu ai i le vao; mulimuli ane, ona e faia lea o lou fale.” (Faataoto 24:27) I le silafaga a le Atua, o tamā ma tinā o ni paga e galulue faatasi i le aʻoaʻoina aʻe o le tamaitiiti.—Faataoto 1:8, 9.

4. Aisea e lē tatau ai ona tatou manatu i fanau tama faapea e sili atu i latou nai lo fanau teine?

⁴ E faapeī lou manatu i lau fanau? Ua taʻua i lipoti e faapea i Asia, “e masani ona lē fiafia mātua pe a fananau mai ni pepe teine.” O vaaiga tetee i teine ua lipotia mai le iai pea i Amerika Latina, e oo lava i totonu o “aiga lotu.” E ui i lea, o le mea moni, o teine e lē o ni fanau e faaletāua tele. Na faamatalaina e Iakopo,o se tamā iloga i aso anamua, lana fanau uma e aofia ai ni afafine foi na iai i lena vaitaimi e faapea, “o aʻu fanau ua foaiina mai e le Atua i lona alofa [ia te au].” (Kenese 33:1-5; 37:35) I se tulaga tutusa, na faamanuia e Iesu “tamaiti” (o tama ma teine) uma o ē na tuuina ane ia te ia. (Mataio 19:13-15) E mafai ona tatou mautinoa na ia faaatagia maia le silafaga a Ieova.—Teuteronome 16:14.

5. O ā manatunatuga e tatau ona puleaina ai le filifiliga a se ulugalii i le telē o so la aiga e fai?

⁵ Po o se uiga masani ea i lou atunuu le faatalitalia o se fafine ina ia fanauina mai se fanau i le toatele na te mafaia? E moni, o le aofai o le fanau a se ulugalii faaipoipo e fai, o le la filifiliga totino lena. Ae faapefea pe afai e lē maua e mātua mea e fafaga, faalavalava, ma faaaʻooga ai se fanau toatele? E mautinoa, e tatau i le ulugalii ona manatunatu i lenei itu a o filifili i le telē o so la aiga e fai. O nisi ulugalii o ē ua lē mafaia ona tausia uma a latou fanau, ua latou tuu atu i tauaiga le tiute tauave ina ia tausia aʻe nisi o le fanau. Pe logo lelei ea lenei faiga? E leai. Ma e lē tuusaunoaina ai mātua mai la latou tiute tauave i a latou fanau. Ua faapea mai  le Tusi Paia: “Afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua.” (1 Timoteo 5:8) O ulugalii magafagafa e taumafai e fuafua le toatele o o latou “aiga” ina ia mafai ona latou ʻtausi i ē o loo mau ma i latou.’ Faamata e mafai ona latou faatinoina le faiga mo aiga fuafuaina ina ia faataunuu ai lenei tulaga? O lena foi mea o se filifiliga totino, ma afai e filifili ulugalii faaipoipo i lenei auala, o le filifiliga la i le auala e taofia ai le fanau o se mataupu totino foi. “E taitasi ma ave i lana lava avega.” (Kalatia 6:5) Ae peitai, o le faiga tau aiga fuafuaina e aafia ai so o se ituaiga o faapaʻūtama, e lē talafeagai ma mataupu silisili o le Tusi Paia. O Ieova le Atua o “le puna o le ola.” (Salamo 36:9) O lea la, o le faaumatiaina o se ola ina ua uma ona afuafua o le a faaalia ai le matuā lē faaaloalo mo Ieova ma ua tutusa lena ma le fasioti tagata.—Esoto 21:22, 23; Salamo 139:16; Ieremia 1:5.

6. O afea e tatau ona amata ai le aʻoaʻoina o se tamaitiiti?

⁶ Ua faapea mai le Faataoto 22:6: “Aʻoaʻo ia i le tama e tusa ma lona ala.” O le aʻoaʻoina o le fanau o le isi lea tiute tele faamātua. Ae o afea e tatau ona amata ai lena aʻoaʻoga? I le amataga lava. Na taʻua e le aposetolo o Paulo e faapea, na aʻoaʻoina Timoteo “mai lava a o tama meamea.” (2 Timoteo 3:15, NW) O le upu Eleni ua faaaogā iinei e mafai ona faasino atu i se pepe laititi pe oo lava foi i se tamaitiiti e lei fanau mai. (Luka 1:41, 44; Galuega 7:18-20) O lea la, na maua ai e Timoteo aʻoaʻoga mai lava a o matuā laitiiti o ia—ma ua tonu ma tatau ai. O le tama meamea, o le taimi sili ona lelei lea e amata ai le aʻoaʻoina o se tamaitiiti. E oo lava i se pepe laitiiti e galala o ia mo le poto.

7. (a) Aisea e tāua ai le atiina aʻe e mātua uma e toalua o se faiā vavalalata ma le pepe? (e) O le ā le faiā na iai i le va o Ieova ma lona Alo pele e toatasi?

⁷ Ua faapea mai se tasi tinā: “I le taimi muamua na  ou vaaia ai laʻu pepe, sa ou matuā alofa lava ia te ia.” O le faalogona lava lena o le toatele o tinā. O lena lagona māfana manaia i le va o le tinā ma le pepe e tuputupu aʻe a o la faaaluina faatasi ni taimi ina ua fanau mai. O le faasusuina e faaopoopo atu i le mauaina o lena faalogona vavalalata. (Faatusatusa i le 1 Tesalonia 2:7.) O le opoopoina e le tinā o lana pepe ma talanoa atu i ai e matuā tāua i le faamalieina o manaoga tau faalogona o le pepe. (Faatusatusa i le Isaia 66:12.) Ae faapefea le tamā? E tatau foi ia te ia ona atiina aʻe se fesootaiga vavalalata ma lana tamaitiiti fou lea ua fanau mai. O Ieova lava ia o le faaaoaoga o lenei tulaga. I le tusi o Faataoto, ua tatou iloaina ai le faiā a Ieova ma lona Alo pele e toatasi, o lē sa faamatalaina mai i se tasi o ana fetalaiga e faapea: “O Ieova e ona lava aʻu, o le amataga o lona ala . . . na fai foi aʻu mona fiafia i lea aso ma lea aso.” (Faataoto 8:22, 30; Ioane 1:14) I se uiga faapena, e atiina aʻe e se tamā lelei se faiā māfana, ma le alofa ma lana tamaitiiti mai lava i le amataga o le olaga o le tamaitiiti. Ua faapea mai se matua: “Ia faaalia atu le tele o le alofa. E lē taitai lava ona oti se tamaitiiti i le tele i ai o ni fusi ma ni kisi.”

8. O le ā le faagaoioiga faalemafaufau e tatau i mātua ona tuuina atu i pepe i se vave e mafai ai?

⁸ Ae tele atu isi mea e manaomia e pepe. Mai lava i le taimi e fananau mai ai, ua sauniuni ai o latou faiʻai e mauaina ma faaputu faamatalaga, ma o mātua o le puna autū o lenei mea. Seʻi fai ma faaaoaoga, o le gagana. Ua taʻua e tagata suesue e faapea, o le lelei e aʻoaʻoina ai e se tamaitiiti le tautala ma le faitau ua “manatu i ai e fesootai vavalalata atu i le tulaga moni o uluai fesootaiga a le tamaitiiti ma ona mātua.” Ia talanoa atu ma faitau atu i lau tamaitiiti mai lava i lona pepe ma faasolo mai ai. O le a vave ona ia manao ai e faataʻitaʻi ia te oe, ma e lē umi o le a e aʻoaʻoina ai o ia e faitau. E foliga mai o le a mafai ona ia faitau a o lei ulu atu i  aʻoaʻoga. O le a sili ona aogā lena mea pe afai o loo tou nonofo i se atunuu e tau leai ni faiaʻoga ma ua tumu saisai potu aʻoga.

9. O le ā le sini e sili ona tāua e manaomia e mātua ona manatua?

⁹ O le popolega sili o mātua Kerisiano o le faamalieina o manaoga faaleagaga o le la tamaitiiti. (Tagai i le Teuteronome 8:3.) Faatasi ai ma le ā le sini? Ina ia fesoasoani i le la tamaitiiti e atiina aʻe se uiga totino faapei o Keriso, o lona uiga, ia faaofuina i “le tagata fou.” (Efeso 4:24) O lenei tulaga la te manaomia ai ona iloiloina meafaigaluega fetaui mo le fausia aʻe, ma auala fetaui e fausia aʻe ai.

10. O ā uiga e manaomia e le fanau ona atiina aʻe?

¹⁰ O le tulaga lelei o se fausaga e faalagolago tele i ituaiga o meafaufale sa faaaogā i le galuega. Na faapea mai le aposetolo o Paulo, o meafaufale e sili ona lelei mo le fausia aʻe o uiga totino faa-Kerisiano o ʻauro, ario, ma maa tāua.’ (1 Korinito 3:10-12) O nei mea ua fai ma sui o uiga e pei o le faatuatua, le atamai, le faautauta, le faamaoni, le faaaloalo, ma le talisapaia alofa mo Ieova ma ana tulafono. (Salamo 19:7-11; Faataoto 2:1-6; 3:13, 14) E mafai faapefea e mātua ona fesoasoani i le la fanau mai lava i uluai vaitaimi o le avea ma tamaiti ina ia atiina aʻe nei uiga? E ala i le mulimuli atu i se faatulagaga ua leva lava ona otooto mai.

11. Na faapefea e mātua Isaraelu ona fesoasoani i a latou fanau ina ia atiina aʻe uiga totino i le amio Atua?

¹¹ A o toeitiiti lava ulufale atu le nuu o Isaraelu i le Nuu Folafolaina, na fetalai atu ai Ieova i mātua Isaraelu: “Ia i ai foi i lou loto o upu nei ou te fai atu ai ia te oe i le aso nei. Ia e matuā aʻoaʻo soo ai i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi.” (Teuteronome 6:6, 7) Ioe, e  manaomia e mātua ona avea o ni faaaʻoaʻo, o ni uo, o ni ē fesootai atu, ma o ni faiaʻoga.

12. Aisea e matuā tāua ai le avea o mātua ma faaaoaoga lelei?

¹² Ia avea o se faaaʻoaʻo. Muamua, na fetalai Ieova: “Ia i ai foi i lou loto o upu nei.” Ona ia faaopoopo mai lea: “Ia e matuā aʻoaʻo soo ai i lau fanau.” E tatau la ona muamua iai uiga amio Atua i le loto o le matua. E tatau i le matua ona alofa i le upu moni ma ola aʻe ai. O iina loa faatoʻā mafai ai ona ia pāʻia le loto o le tamaitiiti. (Faataoto 20:7) Aisea? Auā e sili atu ona taaʻina le fanau i mea latou te vāai i ai, nai lo mea latou te faalogo i ai.—Luka 6:40; 1 Korinito 11:1.

13. I le uaʻi atu i a latou fanau, e mafai faapefea e mātua Kerisiano ona faataʻitaʻi i le faaaoaoga a Iesu?

¹³ Ia avea o se uo. Na fetalai atu Ieova i mātua i Isaraelu: ʻIa e talanoa i lau fanau pe a e nofo i lou fale ma pe a e savali i le ala.’ O lenei mea e manaomia ai le faaalu o se taimi ma le fanau e tusa lava po o le ā le tele o mea o loo faia e mātua. E foliga mai na lagona e Iesu sa tatau ona faaaluina sona taimi mo tamaiti. I aso mulimuli o lana faiva, “ona . . . au mai lea o tamaiti ia te ia, ina ia paʻi ane o ia ia te i latou.” Sa faapeī le tali atu a Iesu? “Ona siitia lea e ia o i latou i ona lima, . . . ma faamanuia ia te i latou.” (Mareko 10:13, 16) Seʻi faaāta i le mafaufau, o lea sa lalata ane lava le taimi e maliu ai Iesu. Peitai, sa ia faaaluina lava lona taimi ina ia uaʻi atu i na tamaiti. Maeu se lesona matagofie!

14. Aisea e aogā ai mo mātua ona faaalu so la taimi ma le la tamaitiiti?

¹⁴ Ia avea o sē fesootai atu. O le faaaluina o se taimi ma lau tamaitiiti o le a fesoasoani ia te oe e fesootai atu ai ia te ia. O le tele lua te fesootai ai, o le lelei foi lena o le a e mautinoa ai po o faapeī le tuputupu aʻe o ona uiga totino. Ae ia manatua, o le fesootai e sili atu i le tau ina talanoa. Na faapea mai se tinā mai Pasili: “Sa tatau ona ou atiina aʻe le tomai o le faalogologo, le faalogologo atu ma loʻu loto atoa.” Na iu lelei lona onosai ina ua  amata ona tatala mai lagona o lana tama tama ia te ia.

15. O ā manaoga e tatau ona manatua pe a oo mai i taimi o faafiafiaga ma tafaoga?

¹⁵ E manaomia e tamaiti “ona po e ʻataʻata ai . . . ma ona po e sasaa ai,” o se taimi mo faafiafiaga ma tafaoga. (Failauga 3:1, 4; Sakaria 8:5) O faafiafiaga ma tafaoga e aogā tele pe a olioli faatasi ai mātua ma le fanau. O se mea moni e faanoanoa ai, ona i le tele o aiga ua faauiga ai faafiafiaga ma tafaoga i le matamata i le televise. E ui e iai nisi polokalame o le televise e ono faafiafiaina ai, ae o le tele lava ua faaleagaina ai amioga lelei, ma o le matamata i televise ua tele ina tineia ai fesootaiga i se aiga. O lea la, aisea tou te lē faia ai ma lau fanau se mea  e faatupu ai uiga sogasogā? Ia pepese, faia ni taaloga, auaufaatasi ma uo, asiasi atu i nofoaga mananaia. O na gaoioiga e faamalosia ai fesootaiga.

16. O le ā e tatau i mātua ona aʻoaʻo atu i le la fanau e uiga ia Ieova, ma e tatau faapefea ona la faia?

¹⁶ Ia avea o se faiaʻoga. Na fetalai Ieova: “Ia e matuā aʻoaʻo soo ai [nei upu] i lau fanau.” Ua taʻu mai e le aotelega o manatu ia te oe po o ā mea e ao ona aʻoaʻo atu ma e faapefea ona e aʻoaʻo atu. Muamua, “ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa.” (Teuteronome 6:5) Ona sosoo lea, “Ia e matuā aʻoaʻo soo ai [nei upu].” Ia tuuina atu faatonuga ua fuafua e faatupuina aʻe ai se alofa mai le loto atoa mo Ieova ma ana tulafono. (Faatusatusa i le Eperu 8:10.) O le upu “matuā aʻoaʻo soo,” e uiga i le faifai pea o le aʻoaʻo atu. O lona uiga la, ua taʻu mai e Ieova ia te oe e faapea, o le auala autū e fesoasoani atu ai i lau fanau ina ia faatupuina aʻe se uiga totino amio Atua o le talanoa atu lea ia te ia i se faavae lē motusia. E aofia ai i lenei mea le faia o se suesuega faale-Tusi Paia e lē aunoa ma i latou.

17. O le ā atonu e manaomia e mātua ona atiina aʻe i le la tamaitiiti? Aisea?

¹⁷ O le toatele lava o mātua latou te iloa o le tuuina atu o faamatalaga i le loto o se tamaitiiti e lē faigofie. Na uunaia e le aposetolo o Peteru ona uso Kerisiano e faapea: “Faapei o tama meamea faatoa fanau mai ia naunau outou i le suāsusu e le suia o le upu.” (1 Peteru 2:2, LT) O le faaupuga “ia naunau” ua faaalia ai e toatele e lē masani ona galala mo meaʻai faaleagaga. Atonu e manaomia e mātua ona sailia auala e faatupu aʻe ai lena naunau i le loto o le la tamaitiiti.

18. O ā nisi o auala tau aʻoaʻo atu a Iesu ua faalaeiauina mātua ina ia faataʻitaʻi i ai?

¹⁸ Na pāʻia e Iesu loto e ala i le faaaogā o tala faatusa. (Mareko 13:34; Luka 10:29-37) O lenei auala tau aʻoaʻo atu e faapitoa lava ona aogā i tamaiti. Ia aʻoaʻo atu mataupu  silisili o le Tusi Paia e ala i le faaaogā o tala e logoleleia ma faafiafia loto, atonu o tala na e maua i le lomiga o Laʻu Tusi o Tala o Le Tusi Paia. * Ia faaaofia ai le fanau. Ia tuu atu ina ia latou faaaogā o latou mafaufau sogasogā e tusi ai ata ma faatino mai ai ni tala faale-Tusi Paia. Na faaaogā foi e Iesu fesili. (Mataio 17:24-27) Ia faataʻitaʻi i lana auala a o faagasolo la outou suesuega faaleaiga. Nai lo le tau ina taʻu atu i ai le tulafono a le Atua, ia fai atu fesili e pei o le, Aisea na aumaia ai e Ieova ia i tatou lenei tulafono? O le ā o le a tupu pe a tatou tausia? O le ā o le a tupu pe a tatou lē tausia? O fesili faapena e fesoasoani i se tamaitiiti ina ia fefulisai ona manatu ma iloa ai o tulafono a le Atua e aogā ma lelei.—Teuteronome 10:13.

19. Pe afai e mulimuli atu mātua i mataupu silisili o le Tusi Paia i feutagaiga ma a latou fanau, o ā aogā sili o le a olioli ai le fanau?

¹⁹ I le avea o se faaaʻoaʻo, se uo, o sē fesootai atu, ma o se faiaʻoga, e mafai ai ona e fesoasoani atu ai i lau tamaitiiti mai lava i ona uluai tausaga ina ia fafau aʻe se faiā totino vavalalata ma Ieova le Atua. O lenei faiā o le a faalaeiauina ai lau tamaitiiti ina ia fiafia i le avea ma se Kerisiano. O le a ia tauivi ai e ola aʻe e talafeagai ma lona faatuatua e tusa lava pe fetaiai ma omiga ma tofotofoga mai aumea. Ia fesoasoani atu pea ia te ia ina ia ona talisapaia lenei faiā tautele.—Faataoto 27:11.

20. O le ā le aoaiga, ma e tatau faapefea ona faatinoina?

²⁰ O aoaiga o le aʻoaʻoina lea e faasaʻo ai le mafaufau ma le loto. E manaomia lava e tamaiti na mea i taimi uma. Ua fautuaina e Paulo tamā ina “ia tausi atu [i a latou fanau] i aoaiga ma apoapoaiga a le Alii.” (Efeso 6:4) E tatau i mātua ona aoai atu i le alofa, e pei lava ona faia e Ieova. (Eperu 12:4-11) O aoaiga e faavae aʻe i le alofa e mafai ona faaoo atu e ala i le fetalanoaai. I lea,  ua faatonuina ai i tatou ina ia “faalogologo i mea e aʻoaʻo atu.” (Faataoto 8:33) E ao faapefea ona avatu aoaiga?

21. O ā mataupu silisili e tatau ona manatua e mātua pe a aoaiina a latou fanau?

²¹ E manatu nisi mātua, o le aoaiina o a latou fanau e aofia ai le tau lava ina talanoa atu ia i latou i ni leo taufaamataʻu, le matuā otegia o i latou, po o le oo foi ina faalumaluma atu ia i latou. Ae peitai, i lena lava mataupu, ua lapatai mai ai Paulo: “O outou tamā foi, aua neʻi tou faaonoono atu i a outou fanau.” (Efeso 6:4) Ua faalaeiauina Kerisiano uma ina ia “agamalu i tagata uma . . . ia aoai atu ma le agamalu i e o finau mai.” (2 Timoteo 2:24, 25) O mātua Kerisiano, e lē gata ina latou iloaina le manaomia ona latou maumauai, ae taumafai foi e manatua nei upu pe a aoaia a latou fanau. Peitai, i nisi taimi, o le fetalanoaai ua lē lava lena, ma atonu e manaomia sina faasalaga.—Faataoto 22:15.

22. Pe afai e manaomia ona faasalaina se tamaitiiti, o le ā e ao ona fesoasoani atu ia te ia ina ia ona malamalama i ai?

²² E eseese tamaiti, e eseese foi ituaiga o aoaiga e manaomia ai. O nisi e lē ʻfaasaʻoina i le tau o ni upu.’ Mo i latou na, o le tuuina atu i ai o se faasalaga mai lea taimi i lea taimi mo le lē usiusitai e ono faasaoina ai le ola. (Faataoto 17:10; 23:13, 14; 29:19) Peitai, e tatau ona malamalama le tamaitiiti i le pogai ua faasala ai o ia. “O le sasa ma le aoaiga e tupu ai le poto.” (Faataoto 29:15; Iopu 6:24) E lē gata i lea, o le faasalaga e iai ona tapulaa. Na fetalai atu Ieova i lona nuu: “Ou te aoai faatatau foi ia te oe.” (Ieremia 46:28e) E matuā lē o taʻua lava i le Tusi Paia ni sasa faamoʻamoʻa ona o le ita po o le matuā fasi, lea e totoulia ma oo lava ina manuʻa ai se tamaitiiti.—Faataoto 16:32.

23. O le ā e tatau ona mafai e se tamaitiiti ona ia iloa pe a faasalaina o ia e ona mātua?

²³ Ina ua lapataia e Ieova lona nuu e faapea o le a ia aoaia i latou, na ia muai fetalai atu: “Aua e te fefe . . . auā ou te ia te oe.” (Ieremia 46:28a) I se tulaga tutusa,  o aoaiga faamātua, i le po o le ā lava le ituaiga e talafeagai, ae e lē tatau ona tuua ai se tamaitiiti ma ni faalogona ua teena o ia. (Kolose 3:21) Nai lo lea, e tatau ona lagona ai e le tamaitiiti, ua tuuina atu le aoaiga ona o loo ʻfaatasi atu ia te ia’ lona matua e alofa ia te ia.

24, 25. O le ā le faamataʻuga matagā ua manaomia ona puipuia mai ai tamaiti i aso nei?

²⁴ E toatele tagata matutua ua toe tomānatu i taimi a o laiti o ni taimi fiafia. Latou te manatua se lagona māfana o le saogalemu, se faamautinoaga e faapea o le a tausia i latou e o latou mātua e tusa lava po o le ā e tulai mai. E mananao mātua ina ia iai i a latou fanau lena lagona, peitai i le lalolagi i aso nei ua matuā leaga amioga, ua sili atu ai ona faigata nai lo le mea sa masani ai le tausia saogalemu o le fanau.

²⁵ O se tasi o faamataʻuga matagā na amata ona tuputupu aʻe i tausaga e lei leva atu, o le faaleagaina lea o fanau i faiga faaleituaiga. I Meleisia, sa faafa ona faateleina le faitau aofai o le faaleagaina o tamaiti i faiga  faaleituaiga i se vaitaimi e sefulu tausaga. I Siamani, e tusa ma le 300,000 tamaiti ua faaleagaina i faiga faaleituaiga i tausaga taitasi, ae i se atunuu i Amerika i Saute, e tusa ai ma se tasi suesuega, o le fua faatatau o le fuainumera faaletausaga e 9,000,000, ua matuā faateʻia ai! O le mea matautia, ona o le vaega tele o nei tamaiti ua faaleagaina i faiga faaleituaiga i o latou lava aiga, e tagata latou te iloa ma latou faatuatuaina. Peitai e tatau i fanau ona iai so latou puipuiga malosi mai o latou mātua. E mafai faapefea ona avea mātua o ē puipui mai?

26. O ā nisi o auala e mafai ona tausia ai le saogalemu o le fanau, ma e mafai faapefea e le poto ona puipuia se tamaitiiti?

²⁶ Talu ai ua faaalia e le mea na tupu e faapea o tamaiti o ē itiiti so latou malamalama i faiga faaleituaiga, ua sili le faigofie ona lolo atu i ē o loo faaleagaina tamaiti i nei faiga, o se tasi la o laasaga tele tau puipuiga o le aʻoaʻoina lea o le tamaitiiti, e tusa lava po o loo laitiiti pea. O le poto e mafai ona saunia ai se puipuiga mai “le ala leaga; ai le tagata ua tautala i mea faapiopio.” (Faataoto 2:10-12) O le ā lea poto? Le poto i mataupu silisili faale-Tusi Paia, i mea ua saʻo ma sese i mea tau amioga. O le poto foi e iloa ai faapea, e faia e nisi tagata matutua mea leaga ma e lē tatau i se tamaitiiti ona usiusitai atu pe a faaosooso mai e tagata le faia o ni gaoioiga lē talafeagai. (Faatusatusa i le Tanielu 1:4, 8; 3:16-18.) Aua le faamutaina le faia o na faatonuga i se taimi e tasi. O le toatele o tamaiti latou te manaomia ona aʻoaʻo atu pea i latou seia oo ina latou manatua lelei. A o matutua aʻe teisi le fanau, o le a faaaloalogia ma le alofa ai e le tamā le aiā tatau a lona afafine e faia ai nisi o ana gaoioiga tau o ia lava, ma e faapena foi i le tinā i lana tama tama—ona faamausalīina atili ai lea o le lagona o le tamaitiiti i le mea e fetaui ma saʻo. Ma o le mea moni, o se tasi o puipuigamalu e sili ona lelei e teena ai faiga leaga faapena o le vaavaaiga sili lea a oulua o ni mātua.

27, 28. O ai le Puna silisili o fesoasoani mo mātua pe a latou fesagai ma le luʻi o le tausia aʻe o se tamaitiiti?

²⁷ E moni lava, o le aʻoaʻoina o se tamaitiiti a o tama meamea o se luʻi, peitai e lē manaomia e mātua talitonu ona faafetaiaia na o i latou le luʻi. I tuā i aso o Faamasino, ina ua iloa e le tagata e igoa ia Manoa e faapea o le a avea o ia o se tamā, ona ia ole atu ai lea ia Ieova mo taʻiala i lona tausia aʻe o lona atalii. Na tali mai Ieova i ana tatalo.—Faamasino 13:8, 12, 24.

²⁸ I le tulaga talitutusa i aso nei, a o tausi aʻe e mātua talitonu a latou fanau, e mafai foi ona latou talanoa atu ia Ieova i le tatalo. O le avea ma matua o se galuega faigata, peitai e iai taui tetele. Ua faapea mai se ulugalii Kerisiano i Hawaii: “E 12 tausaga e faatinoina ai lau galuega, a o lei oo atu i na tausaga matautia o le talavou. Peitai afai e te galue mamafa e faatatauina mataupu silisili faale-Tusi Paia, o lona uiga la o se taimi e selesele mai ai le olioli ma le filemu, o le taimi lea latou te filifili ai e mananao e auauna atu ia Ieova mai o latou loto.” (Faataoto 23:15, 16) Pe a faia e lau tamaitiiti lena filifiliga, o le a faalaeiauina ai foi la oe e faalauiloa mai: “O le fanau, o le tofi lea mai ia Ieova.”