Aʻoaʻoga i le Vasega

O se tasi vala e ono aafia ai le vaaiga a Molimau a Ieova i aʻoga e aofia ai le gasologa o aʻoaʻoga. O lea la, o faamatalaga o loo taʻua i inei ua fuafuaina e faateleina ai le malamalamaga ma le felagolagomai i le va o faiaʻoga ma mātua Molimau, talu ai ua matou talitonu o le tiute faapitoa lava a mātua le filifili o mea e aʻoaʻoina e a latou fanau.

Lotu ma Tatalo: E faaaofia i nisi aʻoga aʻoaʻoga faalotu i le potu aʻoga. I se tasi taimi na manaomia ai mātua i le Iunaite Setete e taʻu atu pe sa latou mananao e aʻoaʻoina a latou fanau i le lotu Katoliko, Porotesano po o Iutaia. O se tamaitiiti sa leʻi lesitalaina mo aʻoaʻoga faalotu sa tatau ona tuua le vasega ma faaauau ana aʻoaʻoga lē faalotu i se isi mea. Ae peitai, i le 1948, ona faapea mai ai lea o le Faamasinoga Sili a le atunuu:

“O le Uluai Teuteuga [o le Faavae] e faalagolago i luga o le manatu autū faapea o le lotu ma le malo e sili atu ona mafai ona ausia o la sini maualuluga pe afai e taitoatasi ma saoloto mai le isi i lana lava matafaioi. . . . ua faatuina e le Uluai Teuteuga se pa i le va o le Lotu ma le Setete lea e ao ona tausia pea le maualuga ma le malupuipuia.”​—McCollum v. Board of Education (1948).

Mulimuli ane, ia Iuni 17, 1963, na teena ai e le Faamasinoga Sili a le Iunaite Setete le faitauina o le Tusi Paia ma tatalo i aʻoga a le lautele. Sa faamatalaina faapea e le faamasino o Brennan lona taofi: “Mai le amataga, o le agaga o tulafono faavae o o tatou setete ma le malo tele . . . ia tuu i le faitalia a mātua aʻoaʻoga faalotu.”

E ioe Molimau a Ieova faapea o le tiute tauave a mātua le avatuina i a latou fanau o aʻoaʻoga faalotu. O lea la, pe a avatuina aʻoaʻoga faalotu i vasega, o le a talosaga mātua Molimau ina ia tuusaoloto mai a latou fanau. Afai o le aʻoaʻoga faalotu e aofia ai le faia o se sao i se tapuaiga lea ua matou manatu e lē faale-Tusi Paia, e pei o le ifo i faatusa, e lē faamaonia la e mātua Molimau lenei mea i lalo o so o se tulaga.

 I le isi itu, afai ua na o se suesuega i le vasega o lotu eseese po o le Tusi Paia, e leai se mea e tetee ai Molimau a Ieova. O lea, afai e fuafuaina e le aʻoga ni sui o lotu eseese e fai ni a latou lauga, e lē ina ia faaliliuina ai, peitai ua na o le faamatalaina i tagata aʻoga e uiga i na lotu, o le a faalogologo ma le faaaloalo tagata aʻoga Molimau. E faapena foi, pe a valaaulia Molimau a Ieova, latou te fiafia e avatuina lauga i vasega e faamatalaina ai o latou talitonuga faaletapuaiga.

I nisi aʻoga e faia ai le Tatalo a le Alii, po o Lo Matou Tamā, i se tulaga fai fai pea. E ui lava ina e taliaina e Molimau a Ieova lea tatalo, matou te lē ʻauai i lona taʻua pea lava pea i sauniga faalotu. Ona o lea le mafuaaga talu ai o le taimi lava lea na saunia ai e Iesu le tatalo faataʻitaʻi sa ia fautua ai faasaga i le “tāutu i a outou upu.” (Mataio 6:7, 8) O le isi mafuaaga matou te lē ʻauai ai ona e leai sa matou vaega i sauniga faalotu tuufaatasi.

Aʻoaʻoga tau Feusuaiga Faaleituaiga: O le soifua maloloina ma le tumamā faaletino o ni mataupu ua loa ona aʻoaʻoina i aʻoga i le lautele. Ua matou talisapaia o nei aʻoaʻoga ua fesoasoani tele i le aʻoaʻoina o le tāua o le mamā, puipuiga mai faamaʻi, tausia o le fanau, tiute tauave i aiga ma isi mea faapena. Peitai i aso nei ua saunia foi e le tele o aʻoga ni aʻoaʻoga tuusaʻo i mataupu tau feusuaiga faaleituaiga, e aofia ai auala e faaaogāina e puipuia mai ai i maʻitaga, pule i le tino, tauatane ma tauafafine, ma le faapaʻū tama.

E masani ona saunia aʻoaʻoga i feusuaiga faaleituaiga e aunoa ma ni taʻitaʻiga tau amio. O le mea moni, e lē o se mea e lē masani ai le faitioina e faiaʻoga lava latou o ausiaga tau amio a le Tusi Paia. O lea la, e popole tele mātua Molimau e uiga i mea o loo aʻoaʻoina i vasega o aʻoaʻoga tau feusuaiga faaleituaiga.

O se tasi tusi e faaaogāina i nisi o aʻoga, ua faaulutalaina Dreng og pige, mand og kvinde (Tama ma le Teine, Tamaloa ma le Fafine), ua faapea mai, “E tatau i tagata taitoatasi ona iai le aiā e faamalieina ai ona manaoga tau feusuaiga e tusa lava po o le ā le matua, ituaiga ma le auala o faaaogāina​—pe a lē afaina ai le aiā a isi.” O lea la, e tusa ai ma feusuaiga ma manu, ua faapea mai lenei tusi: “I lenei atunuu [o Tenemaka], . . . ua tusa ai ma le tulafono le faamalieina o tuinanauga tau feusuaiga i lenei auala.” Peitai, o le Tulafono a le Atua ia Isaraelu sa faapea: “Ai se tasi la te momoe ma se manu, ia fasiotia lava ia.”​—Esoto 22:19.

 E pei ona sa faamamafaina muamua, ua taumafai Molimau a Ieova ia mulimuli i mataupu silisili tau amio a le Tusi Paia ma ia faagoto i totonu o a latou fanau. O lea, latou te lē mananao ia mauaina e a latou fanau aʻoaʻoga tau feusuaiga faaleituaiga mai ia i latou e lē faaaloalo i nei mataupu silisili. O lea la, afai e lagona e mātua Molimau ua aʻoaʻoina a latou fanau i manatu po o ata vaaia, lea e solia ai mataupu silisili o loo aʻoaʻoina i le aiga, e ono mafai ona latou talosagaina ia tuusaoloto mai a latou fanau mai vasega o aʻoaʻoina ai feusuaiga faaleituaiga.

Saienisi ma le Evolusione: E naunau tele Molimau a Ieova i le saienisi. Ua latou matuā faaaloaloina saienitisi magafagafa o ē ua fai so latou sao tele i lo tatou malamalamaga i le lalolagi o siomia ai i tatou. Matou te uunaia a matou tagata talavou ia suesue i vala eseese o le saienisi, talu ai o le a fesoasoani lenei i le faateleina o lo latou talisapaia mo le atamai ma le mana o Lē Na Foafoaina i tatou.

Peitai e lē o mea uma ua taʻua o saienisi o ni mea moni. E iai foi manatu lē faamaonia (theories), e pei o le evolusione, lea ua masani ona tuuina mai o se mea moni faasaienisi. Ua faalauiloa e le evolusione o le uluai meaola na mafua mai i le mea e leai se ola. Ma, ina ua faatupulaia lena meaola, ona suia lea o mea na tupuga mai ai ma felefele solo seia maua ai meaola uma, e aofia ai tagata uma ua soifua i le lalolagi.

E lē talitonu Molimau a Ieova ua moni lenei faamatalaga. Matou te lē talitonu foi e na o le fitu aso faaletino taʻi luasefulufa itula o le foafoaga. Matou te talitonu o le uluai tane ma le fafine na foafoaina e le Atua, e pei o isi ituaiga o mea faiola uma. O lea, afai e talanoaina i vasega manatu lē faamaonia e uiga i tupuaga o mea faiola, matou te talisapaia pe afai e faaaloaloina e faiaʻoga talitonuga ua faavae i le Tusi Paia a talavou Molimau. O le mea moni, matou te lagona o nei talitonuga ua ōgatasi ma mea moni faasaienisi, ia o le a fiafia talavou Molimau e talanoa ai ma oe.

 Aʻoaʻoga tau Musika ma Tusigā Ata: E lē talitonu Molimau a Ieova e iai se mea e sese ai aʻoaʻoga lava ia tau musika ma tusigā ata. Peitai ane, e lē fai se sao a talavou Molimau i so o se ituaiga o aʻoaʻoga tau musika ma faatonuga o tusigā ata i le fesootaiga ma aso malolo faalotu po o le faaleatunuu. Pe a oo mai i le faia o se sao i polokalama a le aʻoga o aʻoaʻoga tau musika, e iai vala o le a manatunatu i ai e talavou Molimau ma o latou mātua.

Mo se faaaʻoaʻoga, o le a latou iloilo po o fea ma i lalo o ā tulaga o mauaina ai aʻoaʻoga, faapea foi ma le ituaiga o musika e taina. Afai e aofia ai i aʻoaʻoga le faia o se sao i se faaili pu atonu e faatalitalia e tātā i mafutaga e iai ni sootaga faapolotiki po o faalotu, e lē mafai la ona fai se sao e se tasi o Molimau a Ieova. E oo lava i taimi o faataʻitaʻiga, o le a leai se sao a tagata aʻoga Molimau i le taina o vii o fuʻa po o pese e fesootaʻi ma aso malolo faalotu pe faaleatunuu. O se tasi mea e manatu i ai o le aofaiga o le taimi o le a aafia ai, ma pe o le a faalavelave ai i sauniga faa-Kerisiano ma taualumaga faaleaiga.

Aʻoaʻoga i Fetauaiga: I nisi aʻoga ua avatu ai i tagata aʻoga toleniga faafitafita. Peitai ane e mananao Molimau a Ieova ia avea i latou ma nisi o ē o fai mai ai le Tusi Paia: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” (Isaia 2:4) O lea la, ua talosagaina ai Molimau a Ieova ina ia tuusaoloto mai i latou mai vasega e toleniina ai faafitafita i aʻoga.

Ua faapea mai foi le Tusi Paia: “Afai e mafaia, i le tele e faalagolago ai ia te outou, ia outou nonofo fifilemu ma tagata uma.” (Roma 12:18, NW) O le faatatauga o nei mataupu silisili i o matou olaga e aafia ai foi o matou lagona faasaga i isi ituaiga o fetauaiga. E aofia i nei tomai o fetauaiga, e pei o le judo, karate ma le kendo, faapea foi le faipelega ma piiga. E ui lava e mafai ona taʻua nei taualumaga o taaloga, ae matou te vaai i le faia o se sao i ai o ni toleniga mo le fuafuaga o le fetauaiga po o le faaleagaina ai o isi. O lea la, e lē fai se sao e Molimau a Ieova i ia taualumaga o fetauaiga. E ui ina talosagaina talavou Molimau ia tuusaoloto mai le faia o so latou sao i ia mea, ae latou te felagolagomai ma le fiafia i le tele e mafai ai i isi polokalama o aʻoaʻoga tau faamalositino i taimi o aʻoga.

[Faamatalaga faaopoopo i le itulau 28]

Matou te faalaeiau a matou tagata talavou e suesue i vala eseese o le saienisi

[Ata i le itulau 26]

Ua faatulafonoina e faamasinoga le tatau ona tuuina atu o aʻoaʻoga faalotu i le faitalia a mātua