La Matou Fuafuaga i le Olaga

I le amataga, o le a fesoasoani le faia o sina faamatalaga puupuu e uiga i Molimau a Ieova ma la matou fuafuaga i le olaga. O i matou o se ʻau Kerisiano faavaomalo o ē ua mafai ona maua i le sili atu i le 200 atunuu i le lalolagi aoao. O le auala matou te tapuai ai i le Atua e aafia ai la matou vaaiga ma uiga atoa o le olaga.

Talu ai ua matou mautinoa o le Atua o se peresona moni, matou te manatu ai e matuā tāua le faatumauina o se faiā vavalalata, totino ma ia o lo matou Tamā. (Mataio 6:9) Faatasi ai ma nisi mea, e aofia i lenei le iloaina o ia i lona suafa. Ua faapea mai le Tusi Paia i le Salamo 83:18: “Ina ia iloa e i latou, o oe, e ou le suafa o Ieova, na o oe lava o le Silisili ese i le lalolagi uma.”

I le avea o ni Kerisiano, matou te taumafai foi e faafetaui o matou olaga i le faaaʻoaʻoga a le Alo o le Atua, o Iesu Keriso. I le faapea o ia o se tagata sa lausilafia lona aʻoaʻoina lelei e faamaonia lena mai le atamai o ana aʻoaʻoga. Peitai sa faaaogā e Iesu lona poto mo le lelei o isi ae ia lē maua ai se tulaga mautu tautupe po o le lauiloa tele ai. O le mea silisili i lona olaga o lana auaunaga i le Atua: “O laʻu mea e ʻai,” ua fetalai mai ai Iesu, “ia ou faia le finagalo o le na auina mai aʻu, ma faaiu lana galuega.”​—Ioane 4:34.

O lo matou lagona foi lena. Ina ia faia faapena, e tāua tele ai i Molimau i le lalolagi aoao se aʻoaʻoga lelei. Matou te faamalosiau i o matou talavou ia faalautele a latou vaaiga i mea​—ia maua le poto ma le malamalamaga i o latou siomaga ma uiga o le olaga. I lenei itu ua latou faitau, ma masani ai ona faaaogā i a latou mea aʻoga, la matou mekasini o le Awake! o loo ufitia uma ai matātā o le poto faaletagata. Ua faaaogāina foi e nisi faiaʻoga lenei mekasini i le saunia o a latou mataupu faaleaʻoga.

O le toleniina faaleaʻoaʻoga o loo maua e a matou tamaiti ua fesoasoani i le toatele o i latou ia faatupuina ai lo latou agavaa e fai ai mea. Ua matauina lenei mea e le Journal of Personality i lana lipoti i se suesuega i Ausetalia e uiga i le “agavaa e faia ai mea” o tamaiti e 12 tausaga le matutua. Ua faapea mai tagata suesue: “Ae maise lava, o le toatele lē mafaatusalia o tamaiti e agavaa sili e faia ai mea, o Molimau a Ieova.” Ua mafai ona talafeagai lelei lenei ma le mea moni faapea e faamalosiau le tapuaiga a Molimau i tamaiti ia faaaogā o latou agavaa faalemafaufau.

E ui ina naunau talavou Molimau i se aʻoaʻoga lelei, ae latou te lē sailia aʻoaʻoga ma le manatu e maua ai le mamalu po o le lauiloa. O lo latou sini autū mo le olaga ia auauna o ni faifeau iloga a le Atua, ma latou te talisapaia aʻoaʻoga o se fesoasoani mo lea itu. O lea e masani ona latou filifili ai faasologa o mataupu e aogā mo le lagolagoina o i latou i le lalolagi faaonaponei. O le mea lea, e toatele atonu latou te aʻoaʻoina ni mataupu faalegaluega po o le auai i se aʻoga tau i galuega. Afai la o le a tuua aʻoga latou te faanaunau ia maua ni galuega o le a faatagaina ai i latou e uai atu i la latou galuega autū, le faiva faa-Kerisiano.

 Vaaiga i le Tusi Paia

E pei ona mafai ona e talisapaia mai mea muamua, e sili atu ona matuā manatu mamafa Molimau a Ieova i le Tusi Paia o se taʻiala i aso fai soo na i lo le toatele. Latou te matuā talitonu faapea “o Tusi Paia uma lava e mai le Agaga o le Atua ia.”​—2 Timoteo 3:16.

E tusa ai ma na upu, matou te talitonu o mea uma o faamauina i le Tusi Paia e saʻo ma e tatau ona taʻitaʻiina ai le olaga o se Kerisiano. O le iuga, atonu o le a matuā ese ai vaaiga a se talavou Molimau e faatatau i nisi o mea fai a le aʻoga mai vaaiga a se tagata aʻoga o lē na te lē manatu mamafa i aʻoaʻoga a le Tusi Paia. O le a talanoaina e lenei polosiua gaoioiga fai a le aʻoga e aafia ai ma taumafai e fesoasoani ia te oe ia e malamalama pe aiseā ua tu ai Molimau a Ieova i lo latou tulaga e tusa ai ma ia gaoioiga fai.

Talu ai, e pei ona atonu e iloa, o le Tusi Paia ua lauiloa o se tusi o valoaga, matou te mananao la ia e manatunatu i āuga o le faatuatua i ana valoaga ua iai i uiga o Molimau agaʻi i le aʻoga.

[Ata i le itulau 4]

E faatāuaina e Molimau i le lalolagi aoao se aʻoaʻoga lelei

[Ata i le itulau 5]

Ua faaaogā o se taʻiala i aso taitasi