La Matou Vaaiga i le Lumanai

O se valoaga o le Tusi Paia e iai sona aafiaga loloto i la matou vaaiga i le olaga o loo maua lea i le Faaaliga 21:3 ma le 4. Ua faitauina faapea: “E ia te i latou [tagata] le Atua lava, . . . E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”

Ua faamatalaina soo e le Tusi Paia se lalolagi e sili atu ona lelei o foafoaga a le Atua. “A e faatalitali i tatou i le lagi fou ma le lalolagi fou, pei o lana [le Atua] na folafola mai, e mau ai le amiotonu.”​—2 Peteru 3:13; Salamo 37:9-11, 29; Isaia 11:6-9; 35:5, 6.

Ua talitonu Molimau a Ieova o le faataunuuina o lenei folafolaga ua na o lea le vaifofo i faafitauli o le fanau a tagata, e pei ona sa faasino mai e Iesu a o ia aʻoaʻo ona soʻo ia tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) I la matou talitonuga, o le Malo o le Atua o se pulega moni lava. (Isaia 9:6, 7) Ua na o lea le pulega na te mafaia ona fufulu ese mai le lalolagi tulaga uma e aumaia ai i tagata le atuatuvale, ma maua ai le filemu tumau.

O le uiga o le oo mai o le Malo o le Atua mo pulega malo uma i aso nei o loo taʻua mai lea i se tasi valoaga o le Tusi Paia: “E faatuina ai e le Atua o le lagi o le malo e le faaumatia e faavavau; o lea malo foi . . . na te tuʻimomomoina ma faaumatia ia malo uma lava, a o ia e tumau lava e faavavau.”​—Tanielu 2:44.

Talu ai ua matou mautinoa ua toe o se aga oo mai lenei suiga, ua talitonu o matou tagata talavou ua tonu ona sauniuni mo se galuega e faaauau mo le olaga atoa e ōgatasi ma o matou talitonuga i le moni o le Malo o le Atua. O lo matou sini autū o le taʻuina atu lea i tagata e uiga i le lumanai pupula o i luma. Ua matou matuā tepa taulaʻi atu i le mavae atu o faanoanoaga ma faalavelave o loo iai nei ma ia faasaoina e olioli ai i faamanuiaga ua teuina e le Atua mo ē o loo auauna ia te Ia. O le folafolaga mautinoa a le Atua: “O le a mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”​—1 Ioane 2:17.

 Vavae ese mai le Lalolagi

E pei ona atonu e faatalitalia e se tasi, sa iai foi le aafiaga mataʻina o lenei vaaiga i le lumanai, i uluai Kerisiano. Na mafua ai ona avea i latou ma tagata e ese mai, na vavae ese mai le lalolagi. E pei ona sa matauina e le tusitala o tala faasolopito o E. G. Hardy i lana tusi Christianity and the Roman Government: “Sa avea Kerisiano ma tagata ese ma ni tagata aumau i le lalolagi sa siomia ai i latou; o i latou o ni tagatanuu o le lagi; e lē mai le lalolagi nei le malo sa faatalitali i ai i latou. O le lē fia manatu i mataupu lautele ona o lea vaaiga sa avea lea mai le amataga o se tulaga mataʻina i le Faa-Kerisiano.”

Sa faamanino atu e Iesu o lo latou vavae ese mai o le a avea ma uiga matilatila o ona soʻo. “E le ni o le lalolagi i latou,” sa fetalai ai o ia. (Ioane 17:16; 15:19) E tusa ai ma lenei mataupu silisili, ua taumafai ai Molimau a Ieova ia ʻlē [avea] o ni o le lalolagi.’ O le mea moni, e lē faapea ai la, ua fautuaina i matou ia nonofo i ni nofoaga tuufua, e tapunia mai le lalolagi. Matou te naunau ma le faamaoni i le manuia o isi i le nuu ma aʻoga. E mananao o matou talavou ia saosaolaumea i gaoioiga fai a le vasega i se auala e fesoasoani ai.

Ae peitai, i le taimi lava lea e tasi, matou te talitonu o loo faamanino mai e le Tusi Paia e faapea “o le lalolagi uma o loo nofo toilalo i loo leaga.” (1 Ioane 5:19; Ioane 12:31; 2 Korinito 4:4) Ona o lea, matou te manatu mamafa i le āuga leaga e mafai ona maua e a matou fanau mai aafiaga o lenei lalolagi. E masani ona faalalelei e le lalolagi ituaiga o olaga matou te talitonu e lē aogā tau amio. Ma e aafia ai aʻoga. O lea, i le tele e mafai ai, ua mananao Molimau a Ieova ia ʻaloese a latou fanau mai ia aafiaga e lamatia ai.

[Faamatalaga faaopoopo i le itulau 6]

“O le a mavae atu foi le lalolagi . . . a o lē fai le finagalo o le Atua, e tumau lea e faavavau.”​—1 Ioane 2:17

[Ata i le itulau 7]

E mananao fanau Molimau e saosaolaumea i mea latou te mafaia i taualumaga a le vasega