Le Mafuaaga mo Lenei Polosiua

Ua lomia lenei polosiua e atiina aʻe ai le malamalamaga ma le felagolagomai i le va o Molimau a Ieova ma pule o aʻoga. O lo matou faanaunauga ia felagolagomai ma ē uma o loo galulue mo le manuia o polokalama faavae tau aʻoaʻoga o loo avanoa i totonu o aʻoga.

Ua mananao mātua o ē ua avea ma Molimau a Ieova ia saosaolaumea i se siomaga lelei mo gasologa o aʻoaʻoga. Ua latou mananao ia maua e a latou fanau iti le aogā sili e mafai ona maua mai i a latou aʻoaʻoga. Ma ua latou mananao foi ia iloa e faiaʻoga ma isi pule o aʻoga, o le a latou faia mea uma e mafai ona faia ma le talafeagai e fesoasoani ai ia faataulauina lenei mea.

Ua masani lava ona taʻuleleia Molimau a Ieova ona o a latou amio e sili ona lelei i so o se mea e mau ai. Ua matauina lo latou usiusitai i faipule silisili faalemalo. Ae peitai, atonu ua manatu nisi faiaʻoga o talavou Molimau e lē ni tagata galulue felagolagomai auā latou te lē auai i polokalama uma po o mea fai uma a le aʻoga. Peitai ane, o lenei mumusu e auai e lē faapea ona o talavou e fouvale pe teea va fealoaloai. O a latou gaoioiga ua faavae i luga o talitonuga mautu tau amio ma faaletapuaiga.

Matou te mananao ia faamasani pule aʻoga mai lenei polosiua i talitonuga o Molimau a Ieova e aafia ai le auai i taualumaga a le aʻoga. E faaopoopo i lena, matou te fia faamalamalama pe aiseā, ona o ia talitonuga, e lē auai ai talavou Molimau i nisi o polokalama ma taualumaga a le aʻoga e taatele i le tele o nofoaga i le lalolagi. I le taimi lava e tasi matou te fia faamanino atu faapea matou te lē o fuafua e faamalosia o matou manatu i isi.