Taualumaga Faaopoopo i Lesona

E talitonu Molimau a Ieova e tatau ona iai nisi mea e sili atu o le olaga na i lo le na o le suesue ma galue. O sina faamalositino ma faafiafiaga i taimi o le aʻoga ua saunia ai se malologa moomia ma le toe faafouina. Peitai atonu ua e matauina o le toatele o talavou Molimau e lē ʻauai i taualumaga faaopoopo i lesona ua faatulagaina e aʻoga. O se faamatalaga puupuu e mafai ona fesoasoani e te malamalama ai i a matou vaaiga i lenei mataupu.

Ua uma ona mulimulitaʻi aiga Molimau i se polokalama o taualumaga e autū i la latou tapuaiga. Ma ua faalaeiauina mātua ia faaaofia ai faafouina o le tino i lenei polokalama ua faaautū i aiga. I le fuafuaina o le vaavaaia e mātua o le faafouina o le tino ma faafiafiaga a a latou fanau, ma e masani ona ʻauai ma i latou, ua saunia ai le vaavaaiga manaomia.

E faatasitasi ni nai aiga Molimau i nisi taimi ia olioli i ituaiga eseese o faafiafiaga. E femalagaai foi i latou i ni nai taimi i tausaga taitasi e ʻauai i tauaofiaga tetele ua taʻua o fonotaga matagaluega ma tauaofiaga itumalo. Ua saunia e nei faigamalaga i nisi taimi avanoa e asiasi ai i fale mataaga, nofoaga o tala faasolopito ma isi nofoaga tāua faaleaganuu. I nei aufaatasiga e feiloai ai ma olioli Molimau talavou i mafutaga ma le toatele o isi talavou mai isi vaega o le atunuu o ē fetufaaʻi le sini e tasi ua ia i latou o le auauna i lo latou Atua, o Ieova.

Matou te manatu o se mea e matuā tāua le olioli o o matou talavou i lenei faatasiga mamā ma aogā, ae maise ona o le faasolo ina leaga tele o tulaga tau amio o le sosaiete a tagata i aso nei. E manatu mamafa Molimau a Ieova i le lapataiga a le Tusi Paia: “O le feoai ma e amio leaga e leaga ai amio lelei.” Ma, e pei ona matauina muamua, matou te taumafai e tausisi i le faamatalaga a Keriso i ona soʻo: “E le ni o le lalolagi outou.” (1 Korinito 15:33; Ioane 15:19) O nei mataupu silisili ua faatonutonuina ai le vaaiga a aiga Molimau faasaga i taualumaga faaopoopo i lesona i le aʻoga, e aofia ai mea nei:

 Taaloga: O toleniga o le tino, e pei o ia tatou te maua mai i taaloga, e lelei mo i tatou. Peitai i le faatulagaina i lona vaaiga tatau, ua faapea mai le Tusi Paia: “A ia e faamasani i le amio Atua. Auā e itiiti le aoga o le faamasani i la le tino; a o le amio Atua e aoga lea i mea uma lava.” (1 Timoteo 4:7, 8) E tusa ai ma lenei fautuaga, ua talisapaia e Molimau a Ieova le tāua o lesona faamalositino o loo faia i taimi o le aʻoga.

Ae peitai, i le taimi lava e tasi, ua manatu mātua Molimau ua faamamafa naʻuā e aʻoga taaloga i le tele o taimi. O lea la, i le toleniina o a latou fanau, latou te taumafai e faaitiitia le faamamafaina o le ausia o le manumalo i taaloga. Latou te faamoemoe o le a naunau a latou fanau talavou ia tulimataʻi galuega, e lē o ni tagata taaalo, ae peitai o ni faifeau a le Atua. O lea la, ua faamalosiauina e mātua Molimau a latou fanau ia faaaogā le tele o taimi pe a tuua aʻoga e tulimataʻi ai manaoga faaleagaga, na i lo le taʻutaʻua i se tasi o taaloga.

O le ʻauai i taaloga ua fuafuaina, matou te talitonu, o le a faaalialia ai talavou Molimau i aufaatasiga lē mamā. Matou te lagona foi faapea o le agaga tauva i taaloga faaonaponei​—le manatu ʻo le manumalo o le TOE MEA AUPITO SILI lea’​—e iai ni taunuuga e lamatia ai. O lea la, pe a faalogoina e Molimau talavou le manaoga mo le faafouina faaopoopo o le tino, ua faamalosiauina i latou e o latou mātua ina ia sailia ia ituaiga o faafouina o le tino faatasi ma o latou uso talitonu, ioe, “faatasi ma i latou o e valaau i le Alii ai le loto mamā.”​—2 Timoteo 2:22.

Taʻitaʻi Faalaeiau ma Tausala: I taualumaga o taaloga o le tiute tauave a taʻitaʻi faalaeiau, o le taʻitaʻia lea o le au maimoa i viiviiga lē taupulea mo se aʻoga. Latou te uunaia foi tagata ia tapuai i tagata taʻutaʻua ma taʻitaʻia i latou i le tulai mo le pese a le aʻoga. Ua manatu Molimau a Ieova ua lē talafeagai ona faia faapea. E faapena foi lo matou lagona, o le avea o se Molimau talavou o se tausala o le a solia ai mataupu silisili o le Tusi Paia ua faaalia ai le lē talafeagai o le faaviiviia o tagata.​—Roma 1:25; Galuega 12:21-23.

 Siva a Aʻoga: E pei o taaloga, e mafai foi ona avea le siva o se taualumaga mamā ma aogā mo le soifua maloloina. Ua iai faamaoniga na faamaonia e Iesu Keriso, talu ai sa ia taʻua siva o se vaega o se faafiafiaga tatau i lana faataʻitaʻiga i le atalii faamaumau oa. (Luka 15:25) Ae peitai, atonu ua e matauina e masani ona lē ʻauai talavou Molimau i siva e lagolagoina e le aʻoga, e pei o siva faapitoa mo vasega muamua po o vasega faaiʻu. Aiseā?

O le mafuaaga autū ona o le siomaga lē lelei e masani ona iai i le sootaga ma siva a aʻoga. E masani ona taumafaina ai le tapaa, faaaogāseseina o le ʻava malosi, faaaogāina o fualaau oona faasaina, faapea ma amioga leaga tele faaleituaiga. O lea, o se tagata e ʻauai i nei siva e toetoe a lē mafai ona alofia le miomiō faatasi ma nei aumea lē mamā. O lea, e tusa ai ma le fautuaga e tulimataʻi taualumaga “faatasi ma i latou o e valaau i le Alii ai le loto mamā,” o le tu la a Molimau a Ieova le taumamao ai mai siva a aʻoga.

Tuugatala: I taimi e lata mai nei ua avea tuugatala ma tulaga taatele o faafouina o le tino i le tele o atunuu. E oo lava i le au talavou laiti i le va o le sefulu tolu ma le sefulu fitu tausaga le matutua ua masani ona fai tuugatala. E mafai ona vaaia i latou i le aʻoga o uu lima, feasogi, po o le faia o nisi mea e sili atu. E lē talitonu mātua Molimau ua tatau mo a latou fanau o ē e leʻi ausia le matua e tatau ai ona faaipoipo, ona tuua na o i laua ma se isi o le isi ituaiga ma faia amioga e masani ona faia i tuugatala.

Kalapu i Aʻoga: O tagata aʻoga e tai tutusa mea e manatu i ai atonu e mananao ia fetufaai nei manatu o ni tagata o kalapu i le aʻoga. Ae peitai, e masani lava, o mafuaaga autū mo nei kalapu e mo taualumaga tau vafealoai. Ma ua matauina o le ʻauai faatasi o ni vaega faapitoa o tagata aʻoga i nei taualumaga e masani ona taʻitaʻiina ai i faiga lē mamā tau amio. Ona o lenei mea e ono mafai ona tupu, ua matou lagona e tatau ona faia ma le faaeteete se iloiloga a o leʻi ʻauai i se kalapu a le aʻoga.

 O fesili tāua nei o le a mafaufauina e Molimau talavou ma o latou mātua e faapea: Pe o taualumaga a le kalapu e gata mai i taimi o aʻoga? Pe pulea ma vaavaaia ma le faaeteete e le aʻoga? O le avea ea ma se tasi o le kalapu o le a manaomia ai le taimi pe a tuua le aʻoga, ae semanū e sili atu ona lelei pe a faaaluina i gaoioiga faaleaiga po o faalefaapotopotoga? I le iloiloga mulimuli la, o le tiute tauave a mātua Molimau le filifili o kalapu po o faalapotopotoga a aʻoga, pe afai e iai, o le a latou faatagaina a latou fanau e ʻauai i ai.

Tala a Aʻoga: E leai se mea e tetee ai Molimau a Ieova i na o le faatinoina o tala. O se isi vaega tāua o polokalama o a matou tauaofiaga o tala faale-Tusi Paia. Ae peitai, e iloilo e mātua Molimau nisi o vala a o leʻi filifilia pe faatagaina a latou fanau e fai se sao i se tala a le aʻoga. Mo se faaaʻoaʻoga, E talafeagai mea o faaataina i le tala ma mataupu silisili o le Tusi Paia? O le a lē fai se sao e talavou Molimau i se tala e faatagaina ai tulaga tau amio e taʻusalaina e le Tusi Paia. E lē gata i lena, e iai le taimi e aafia ai i faataʻitaʻiga, ma aumea leaga e ono mafai ona iai. O lea la, i le filifilia pe o le a fai se sao e talavou Molimau i se tala, o le a manatunatu ma le faaeteete i ai o latou mātua i nei vala uma.

Le Toto ma Isi Foai: I lea taimi i lea taimi e talosagaina ai tamaiti aʻoga i le tele o aʻoga ia faia ni foai i se tasi mafuaaga po o se isi. I nisi taimi e talosaga ai mo le toto e faaaogāina i tuiga toto. Ae peitai, o lo matou malamalamaga i le faatonuga a le Tusi Paia ia “taumamao . . . ma le toto” e lē tatau ai ona taumafaina po o le faaaogā i so o se isi auala. O lea la, i le avea o se mataupu tau le lotofuatiaifo, matou te lē tuuina atu ai pe taliaina le toto.​—Kenese 9:4-6; Levitiko 17:10-14; Galuega 15:19, 20, 28, 29.

Ona o mafuaaga na uluai talanoaina i lenei polosiua, afai e iai se talosaga mo se tupe ina ia faalauteleina ai se fuafuaga faapolotiki pe faatatau i se aso malolo faalotu po o se aso faamanatu faalotu, o le a lē saosaolaumea i ai Molimau a Ieova. Matou te lē ʻauai foi i ni lūlū, taaloga petipeti po o so o se gaoioiga faapea tau petipetiga. Peitai ane, e iai nisi vaipanoa e fai ai se filifiliga totino pe saosaolaumea e tusa ai ma tulaga o iai. Mo se faaaʻoaʻoga, afai e iai sē o loo latou aʻooga faatasi ua lavea po ua gasegase ma fai ai se saoga tupe e faatau ai se teu fugalaau po o se isi meaalofa, latou te fiafia e fai so latou sao i ia ituaiga foai pe afai e iai se tupe e fai ai faapea.​—Galuega 20:35.

[Faamatalaga faaopoopo i le itulau 22]

“O le feoai ma e amio leaga e leaga ai amio lelei.”​—1 Korinito 15:33