Mataupu 14

Faaaloalo i le Mea Alofa o le Ola

1, 2. Ai se ā e tatau ai ona tatou faaalia le faaaloalo loloto i le mea alofa o le ola?

O LE faaaloaloga loloto i le mea alofa o le ola o le faavae lea mo le manuia moni ma le saogalemu. Peitai o lea faaaloaloga, ma le faanoanoa lava, ua le maua i le toatele o tagata. E pei lava ona lausilafia, e mafai e tagata ona aveesea le ola i le fasiotia; peitai e leai se tagata na te mafai ona faafoisia mai le ola pe a mavae atu.

² E tatau ona tatou faaalia o se matāfaioi paia le faaaloalo i le ola. I a te ai? I Lē ua Aumaia le ola, ia lea ua faapea mai le fai salamo: “Auā o loo ia te oe,” o Ieova le Atua lea, “le puna o le ola.” (Salamo 36:9 [35:10, Dy]) Ua tatou nofo aitalafu i a te ia i o tatou ola, e le gata ona o ia na foafoaina le tagata, ae ua ia faatagaina foi le fanau a tagata e fanafanau e oo mai i le taimi nei ma ua ia saunia foi auala mo le faatumauina o le ola. (Galuega 14:16, 17) A e sili atu i lena, sa ia faia i lona Alo ina ia avea ma Lē na te toe Faatauina mai po o Le na te Togiolaina le aiga o le tagata, i lona faatauina lea i le toto o lona soifua tāua. (Roma 5:6-8; Efeso 1:7) O le iʻuga ua na faasalafa atu nei i a i latou uma o ē latou te taliaina, le faamoemoe matagofie o le olaga i lana faiga fou amiotonu. O se mea lena tatou te manaomia moni lava, a ea? I le vaai atu i nei mea uma lava, pe e le tatau ea ona tatou matuā faaaloalo ma talisapaia le mea alofa a le Atua o le ola? Pe e mafai faapefea ona tatou faia?

3. Pe faapefea i se tasi e matamata i faiga saua e fai ma ana fiafiaga, ona afaina ai lona manatu agaʻi i le ola?

³ Mo se mea e tasi, afai tatou te manatu mamafa e uiga i le faaalia o le faaaloalo i le ola, o lona uiga o le a tatou lē auau faatasi ma e ua fai mo a latou faafiafiaga le fafagaina o o latou mafaufau i polokalama o loo faasilisilia faiga saua. O le talia o faiga  saua o se mea “fiafia” ua mafua ai i le toatele ona loto malosi e aunoa ma se faalogona agaʻi i puapuaga o le tagata ma le faamutaina o le ola. Ua latou aʻoaʻo ia ola mo na o le taimi nei, ma e itiiti lava se popole ua latou faaalia mo lo latou lava lelei i le lumanai atoa foi ma isi. Peitai afai tatou te faaalia le loto faafetai i le agalelei o le Atua ma le faamoemoe ua ia foai mai, o le a tatou teena la lea ituaiga o agaga. O lona uiga o le a tatou faatupuina le talisapaia mo le ola o se mea alofa mai le Atua. O lenei mea o le a afaina ai le auala ua tatou faaaogaina ai o tatou lava olaga, o o tatou uiga agaʻi i isi tagata, e oo lava foi i le tatou vaaiga i ē e lei fananau mai.

FAAALOALOINA O LE OLA O E E LEI FANANAU MAI

4. (a) O le ā le taimi e faasolo atu ai le ola i le fanau a se tasi? (e) O le ā ua na faaalia pe naunau le Atua i le olaga faatagata a o lei fanau mai?

⁴ O le malosi e faasolo atu ai le ola o se faaeaga matagofie, ua tuuina mai e le Atua. O lena ola ua faasoloina atu, e lē i le taimi e fanau mai ai, ae i le taimi o le afuafua o le maʻitaga. E pei ona fai mai le Encyclopaedia Britannica, o le taimi lena, “o le amataga lena o le tala faasolopito o le olaga o se tagata, se tagata maʻoti lava ua i ai le ola.” Ua faapea foi la, i le naunau mai o le Atua i le olaga o le tagata ona amataina, a o lei fanau mai. Sa tusia e le fai salamo o Tavita, lona fai atu faapea i le Atua: “Na e ufiufi ia te au i le manava o loʻu tinā....Na silasila mai ou fofoga i oʻu tino uma ina o afuafua; ua tusia foi uma lava i lau tusi.”—Salamo 139:13-16 [138:13-16, Dy]; Failauga 11:5.

5. Ai se ā ua lē lelei ai faafinauga ua aumaia ona o se taumafaiga ia taʻuamiotonuina ai le faapaʻu tama?

⁵ I ona po nei, ua faamutaina ma le loto i ai olaga o le faitau miliona o tamaiti e lei fananau mai e ala i le faapaʻū tama. Pe e tonu ma saʻo ea lea? O ni isi ua finau mai o le pepe e lei fanau, e leai sona malamalama talisapaia o le mea taʻua o le ola, ma e le mafai ona ola e vavaeesea mai le manava. Ae peitai e faapena foi ona moni i se pepe fou faatoa fanau  mai. I le fanau mai e leai lava sona malamalama e uiga i le olaga, e le mafai foi ona ola pea e aunoa ma le tausiga faasolo atoa a matua po o isi. O sela ola fausia i totonu o le manava i le taimi o le afuafuaga ua i ai avanoa uma e tatau ai ona oo ina avea ma pepe pe afai e le faalavelavea. O le aveesea o le ola o se pepe fou ua fanau mai, ua vaaia o se solitulafono i le toeitiiti lava o atunuu uma o le lalolagi. E oo lava i pepe e fananau mai e lei atoa masina, e matuā faia lava ni taumafaiga tetele ina ia faasaoina. Ai se ā la e lē tatau ai foi ona vaaia o se solitulafono i soo se tasi le aveesea o le ola o le pepe e lei fanau mai, ma taofia ai lona tuputupu aʻe ma fanau mai? Ai se ā e vaai ai i le ola e paia ina ua tuua le manava a e lē faapena foi ina o i totonu o le manava?

6. Pe faapefea ona faasino mai e le Tusi Paia le silafaga a le Atua agaʻi i le aveeseina ma le loto i ai o le ola o se tama itiiti e lei fanau mai?

⁶ O le mea tāua po o le ā ua fai mai ai le Atua Le Aumai ai le ola, ae le na o le vaaiga a tagata i le mataupu. E tāua tele i a Ieova le Atua le ola o le tama itiiti e le fanau, e le tatau ona taalo i ai. Sa ia avatu se tulafono faapitoa lava i a Isaraelu anamua mo le puipuia o le ola o le tama itiiti e lei fanau mai. Afai e manuʻa se fafine tō ona o se tauiviga a ni tamaloloa se toalua ma iʻu ai ina fafano lona maʻitaga, sa aumaia la i lenei tulafono faasalaga malolosi (Esoto 21:22, 23) Ua aliali mai nei la o le aveesea ma le iloa lelei o le ola o se tama itiiti e lei fanau mai ua sili atu lona leaga. E tusa ai ma le tulafono a le Atua, soo se ola lava o se tagata ua aveeseina ma le loto i ai, o lē ua na faia sa faasalaina i le oti o se fasioti tagata. (Numera 35:30, 31) Ua tausia pea e le Atua e oo mai i le taimi nei lea vaaiga tāua mo le ola.

7. A tatou faaaloalo i le finagalo o le Atua e uiga i le ola o se tama itiiti e lei fanau mai, e faasaga i ā mea ua puipuia mai ai i tatou?

⁷ O le faaaloalo loloto i le finagalo o le Atua e uiga i le ola o le tama itiiti e lei fanau mai, ua galue mo le lelei moni. I lona tuuina atu o le avega tauave atoa i matua mo le ola o le pepe e lei fanau mai, ua ia saunia auala e taofiofi ai feusuaiga lē faatuaʻoia ma ona āuga  leaga—o le gasegase afi, maʻitaga lei manaomia, tamaiti o le pō, aiga malepelepe ma le mafaufau mafatia ona o le loto fuatia ifo lē mamā. E fesoasoani lenei i le filemu o le aiga i le taimi nei ma o se fesoasoani tāua i lo tatou mauaina o faamanuiaga i le lumanai.

FAAALOALO MO LOU LAVA OLA

8. Ai se ā e tatau ai ona tatou faaalia le faaaloalo i le finagalo o le Atua i le auala ua tatou tausia ai o tatou tino?

⁸ E faapefea le auala o e tausia ai lou lava tino, o le ā o e faia i lou lava olaga? Ua fai mai ni isi tagata, ‘E lei i ai sau filifiliga i lou fanau mai. Faitalia lava la aʻu ma laʻu mea e fai i loʻu olaga. O le a ou faia soo se mea lava ou te manao ai.’ Peitai pe e tatau ea ona faatalosagaina se mea alofa ina ia talisapaia e lē o le a mauaina? E lē faafitia le lelei o le olaga lava ia; ae ona o le leaga o tagata ma le lē lelei atoatoa, ua pogai ai ona aveeseina mai le olaga le tele o ona fiafiaga. E le mafai ona tuuaia le Atua mo lenei mea; ua ia folafola o le a na faasaʻoina mea leaga i le pulega o lona Malo. O lea, a o tatou ola, e tatau ona tatou faia i se auala e faaalia ai le faaaloalo i lona finagalo ma lana fuafuaga.—Roma 12:1.

9. O le ā ua fai mai ai le Tusi Paia e uiga i le ʻai tele ma le onā?

⁹ O se tasi o auala e mafai ona tatou faaalia ai lenei talisapaia o le lē faaatuatuvale lea i mea e ʻai ma mea e inu. O le ʻai tele ma le onā ua taʻusalaina e le Atua. (Faataoto 23:20, 21) I le isi itu, e pei lava ona lelei le ʻai faatatau, e faapea foi i le faaaogaina o le ava ona lelei pe a fai fuafua. Ua faaalia lenei i le tele o mau i le Tusi Paia.—Teuteronome 14:26; Isaia 25:6; Luka 7:33, 34; 1 Timoteo 5:23.

10. (a) Pe faapefea ona faaalia e le tagata onā lona lē faaaloalo i le ola? (e) E pei ona faaalia i le 1 Korinito 6:9, 10, ai se ā e tāua ai le alo ese mai le onā?

¹⁰ O lea la, e lē o le inu ae o le onā ua taʻuleagaina e le Tusi Paia. Ma ua i ai se mafuaaga lelei. O le onā e faaleagaina ai le tino, faavaleaina ai tagata ma e mafai ona avea ai foi latou ma tulaga mataʻutia i isi. (Faataoto 23:29-35; Efeso 5:18) E mafai ona faapuupuua le ola, ma e masani lava ona oo atu ai i le maʻi  o le ate fefete. I le na o le Iunaite Setete lava ia, atonu pe iva miliona tagata ua aliaʻi mai ai uiga o le ava, o le aofai o le tupe le iloa i tausaga taitasi i totogi sa tatau ona maua, i faalavelave faafuasei, tausiga faafomaʻi ma soligātulafono ua fuafuaina e sili atu i le 750 miliona talā. O le tau o aiga ua malepelepe, olaga faaleagaina ma mafatiaga faaletagata ua “le mafai ona fuafuaina.” (The Pharmacological Basis of Therapeutics, 1970, itu. 291) O le mea lea, e le o se mea e teʻi ai le faapea mai o le aposetolo o Paulo: “Aua neʻi faaseseina outou; o e faitaaga, . . . ma e onā ma e agatele, ma e fao mea, e le fai mo latou tofi le malo o le Atua.”—1 Korinito 6:9, 10.

11. Pe e alagā tatau ea le taumafai e sola ese mai faafitauli totino i le inu tele i le ava?

¹¹ E moni o ni isi ua latou lagona āuga faigata o tulaga o le lalolagi. I ona taua, soligātulafono, siitaʻi o le tau o mea ma le mativa, o ona uunaiga ma omiga ua fesoasoani i le faateleina o faafitauli totino faifai pea. Peitai e leai se lelei e maua mai ai i le taumafai e sola ese mai nei tulaga e ala i le tago tele i nei mea e afaina ai. O le a na o le faateleina ai o faafitauli mo le tagata lava ia ma isi, ae a o ia faia faapena o le a ia faaumatia ai foi lona mamalu ma le sini o lona soifuaga.

12. Ai se ā ua liliu atu ai le toatele o tagata i le faaaogaina o vailaau oona?

¹² Ua faateleina le numera o tagata ua liliu atu i vailaau oona i le latou taumafaiga e sosola ese mai faafitauli o le olaga. E moni e tele vailaau e i ai so latou faaaogaina faafomaʻi. O tagata e mamaʻi atonu latou te manaomia lo latou faaaogaina e fesoasoani ai ina ia toe faafoisia mai le malosi. A e faapefea le faaaogaina o vailaau e lē o aafia ai se togafitiga o se maʻi, na ona faia e se tasi ia maua ai se faalogona pei o fai miti pe po o le foliga mai pei ua lē iloa se mea? Pe faapefea ona afaina ai le ola o lē o faaaogaina?

13. O ā āuga mai nisi o nei vailaau ua maua e lē na te faaaogaina, ma o ā la ua faasino mai e mataupu silisili o le Tusi Paia e uiga i lo latou faaaogaina?

¹³ E toatele tagata i aso nei ua latou sailia fiafiaga  i lo latou faaaogaina o vailaau “malolosi” e i ai le heroin ma le cocaine po o isi foi ituaiga e faavalea ai le mafaufau e pei o le LSD. O ni isi foi ua foloina fualaau o amphetamine ma barbiturate. O le ā le iʻuga? O le latou faaaogaina o nei vailaau ua faigofie ai lava ona oo atu i le lē mafai ona pulea i latou lava, ma ua aliali mai ai āuga e pei ona vaaia i tagata onanā. (1 Korinito 6:9, 10: Faataoto 23:33) Ua masani ona iloa lelei le mataʻutia tele o nei vailaau e oo lava i le toatele o loo latou faaaogaina. I le aai o Niu Ioka, mo se faaaʻoaʻoga, o le mafuaaga taʻimua o le maliliu o tagata i le va o le 18 ma le 35 tausaga o le faaaogaina o le heroin. Paga se lē amanaia o le mea alofa o le ola!

14, 15. E ui lava ina taatele le manatu e lē afaina le marijuana, ai se ā ua lē faaalia ai e i latou e ulaina le faaaloalo moni mo le mea alofa o le ola?

¹⁴ A e ā le faaaogaina o marijuana (marihuana) lea ua masani ona manatu i ai faapea, e lē o se vailaau e afaina ai? E mafai foi ona mataʻutia i ni auala eseese. O se tasi auala ua tusia e le U.S. Department of Health, Education, and Welfare. Ua faamatalaina ai faapea, “o e ua faaaogaina se tasi o vailaau ua faasaina atonu o le a fesootai o ia ma ituaiga eseese o vailaau e ala i ē o loo latou faatau mai ai ma isi foi o latou faaaogaina.” Ua faapena foi se lipoti sa lomia i le U.S. News & World Report o Fepuari 1, 1971, i lalo o le ulutala, “Suesuega Lata mai nei i le Marijuana,” fai mai, “ua i ai faamaoniga, o tagata o e ua faalagolago i vailaau ona o mafuaaga tau amioga—i le talitonuga o le a faasaolotoina ai latou mai le popole ma le atuatuvale—o le a faigofie ona latou faasolo atu i vailaau e sili aʻe le malolosi.”

¹⁵ Peitai, e tusa lava pe le tupu lea mea, ae o le ulaina o le marijuana lava ia e mafai ona mataʻutia, e ui lava ina eseese manatu, ae o se tulaga mataina lenei ua faaalia e se tasi suesuega: “E mafai i le lava o ni fologa malolosi ona faapogaia ni uiga teʻiteʻivale e ui lava na o se taimi puupuu—ua faaalia mai tulaga o le mafaufau i uiga e pei o le foliga pepelo,  faaoleole, valea, atuatuvale ma le fefe.” Ua faapea mai foi lea lava lipoti, o le faaauau pea o le faaaogaina o marijuana o le a mafua ai le faaleagaina o vaega o le tino e pei o le “ate, faaleagaina o itu tino e maua mai fanau, faaleagaina o le faiai ma faalavelave tau le mānava.” I le vaai atu i nei tulaga faigata, pe ua faaalia ea e se tasi o faaaogaina marijuana le faaaloalo mo le mea alofa o le ola?

16. O ā isi tulaga mataʻutia e mafai ona oo i se tasi ona o le faaaogaina o vailaau, ma pe faapefea ona afaina ai lo tatou manatu i le mataupu?

¹⁶ O loo i ai se isi mafuaaga malosi o le alo ese mai le faaaogaina o vailaau ina ia maua ai se uiga pepelo faapea o loo lelei. E mafai ona latou tatalaina le auala mo se tasi e oo atu ai i lalo o le tausiga a temoni. O le toatele o ē faaaogaina vailaau ua latou faamaonia e i latou lava o le faaaogaina o vailaau e masani ona o mai faatasi ma aafiaga o le faia o mea lilo. O lenei sootaga o vailaau ma mea lilo ua lē o se mea fou. O ē faitogafiti faataulāitu i aso ua mavae sa faaogaina vailaau. Ua matauina e Vine’s Expository Dictionary of New Testament Words: “I faiga faataulāitu, o le faaaogaina o vailaau, e tusa lava pe vaivai pe malosi, sa masani lava ona o mai faatasi ma le pulea o se tasi e se malosi faatemoni atoa ma le talosaga atu i mana lilo . . . ina ia faaofoina ai le ua alu atu i le taulāitu i mana tetele ma le faalilolilo ua i a te ia.” O nei faamatalaga ua faia i le fesootaiga ma le upu Eleni ua aumaia o le “faiga faataulāitu” (phar·ma·kiʻa, o lona uiga moni, “faiga tau vailaau”) i le Kalatia 5:20. (Ia tagaʻi foi i le Faaaliga 9:21; 18:23.) O lea i aso nei, e pei lava o aso ua mavae, e mafaia e vailaau one tuuina atu se tasi i le faatosinaga a temoni. Pe faapefea la i soo se tasi e manao e avea ma auauna faamaoni a Ieova ona tuu atu o ia i lea tulaga mataʻutia ona o sina faalogona malie i se taimi puupuu?

17, 18. (a) O ā isi fua leaga ua auau faatasi ma le faaaogaina o vailaau? (e) O lea, pe faapefea ona vaai molimau Kerisiano a Ieova i le faaaogaina o vailaau?

¹⁷ E pei ona ua lau silafia, o le faaaogaina o vailaau o se fesootaiga lē motusia lea ma solitulafono ma le  lepetia o amio lelei i le fanau a tagata. O le faatauina o vailaau lē faatagaina o le alagatupe sili lea o le soligatulafono faalapotopoto o tagata. E toatele tagata ua pulea e vailaau ua latou gaoi ma osofai fale ina ia maua mea e lagolagoina ai latou amioga. O isi ua liliu atu i le talitane. Ua faitau afe aiga malepelepe ina ua pulea se tasi o le aiga e vailaau. O tinā totō ua faasolo atu i a latou pepe le malosi o vailaau, o nisi taimi e feoti pepe a o feagai ma le tiga. Ma i le tele o atunuu, o le i ai i se tasi ma le faaaogaina o nei vailaau mataʻutia mo ni mafuaaga e lē tau le soifua maloloina, e lē faatagaina e le tulafono.—Mataio 22:17-21.

¹⁸ Pe e te manao ea ia i ai sau vaega e fai i se mataupu o loo auau faatasi ma na fua leaga uma? E le mananao ai molimau Kerisiano a Ieova! Latou te le manaomia se vaega i le faaaogaina o vailaau mo ni fiafiaga tetele po o le sola ese ai mai tulaga moni. E maualuga lo latou manatu i le ola ma latou mananao ai ia faaaogaina o latou olaga i se auala ua talafeagai ma le finagalo o le Atua.

FAAAOGAINA O TAPAA MA MEA FAAPENA

19. Ai se ā e ulu atu ai le faaaloaloga mo le mea alofa o le ola i le manatu o se tasi agaʻi i le faaaogaina o tapaa, fua o le betel ma lau o le laau o le coca?

¹⁹ Ua sili atu le taatele o le faaaogaina o tapaa i aso nei ma, i ni isi atunuu ua faaaogaina le fua o le betel ma lau o le laau ua taʻua o le coca. E ui ina faaaogaina e le faitau miliona o le lalolagi, ae o nei mea uma taitasi ua iloa e leaga mo le tino, ma i ni isi tulaga, e faaleagaina ai foi le faiʻai. Ua fai ma mataupu a malo le lapatai mai e uiga i le tapaa ma ona fesootaiga ma faamaʻi e pei o le kanesa o le mama, maʻi fatu, ma isi maʻi leaga. Pe ua faaalia ai ea le faaaloalo i le mea alofa o le ola i le faaaogaina o nei mea e sili ona leaga?

20, 21. (a) Pe o le mea moni ona ua le taʻusalaina e le Tusi Paia nei ituaiga o amioga i o latou igoa, po o le uiga ea la ua saʻo? (e) O ā mataupu silisili o le Tusi Paia ua faaalia ai o nei amioga ua leai se nofoaga i le olaga o le tagata o loo naunau i le faia o le finagalo o le Atua?

²⁰ Atonu o le a fai mai se tasi o nei mea ua o foafoaga  a le Atua. E moni, peitai e faapena foi le teve ma le masoā. O nei laau e tai foliga tutusa ae o le teve e sili atu ona mataʻutia mo le ola o le tagata ma e mafai ona mafua le oti pe a na aiina. O se isi foi atonu o le a fai mai ua le taʻua faapitoa pe taʻusalaina e le Tusi Paia ia ituaiga o amioga. E leai, peitai e pei ona tatou iloa, e tele naunau mea ua le taʻusalaina faapito e le Tusi Paia ae ua mautinoa lava lo latou leaga. E leai lava se mea o le Tusi Paia ua faasaina faapitoa mai ai le lafoina o au otaota i tuāfale o lou tuaoi. E ui i lea, o le poloaiga ia e “alofa atu i lē lua te tuaoi, ia pei o oe lava ia te oe” ua tatau ona lava mo soo se tasi o i tatou e iloa ai le sese tele o lena faiga.—Mataio 22:39.

²¹ I le 2 Korinito 7:1 ua fai mai le Afioga a le Atua i a i tatou, “ia tatou faamamā ia te i tatou i mea e leaga ai le tino atoa ma le agaga, ia faaatoatoaina lo outou faapaiaina i le mataʻu i le Atua.” Mo se mea ia “paia” o lona uiga ia “pupula, mamā, lē pologā, lē iʻuvale.” Ua tausia e Ieova ia lava i le mamā ma le saoloto mai le iʻuvale, e lē mafai ona ia faamaulaloina o ia e gaoioi i se uiga lē paia. Ua tatau ai lava le faatalitalia e le Atua o le tatou tumau pea e ‘paia atoatoa’ i le telē e mafai ona oo i ai tatou o ni tagata ola. (Roma 12:1) E le gata i lea, ua ia finagalo foi ‘ia tatou alolofa atu i a te ia ma o tatou loto atoa, le agaga atoa, le manatu atoa, ma le malosi atoa,’ a e faapefea ona mafai e se tasi lenei mea pe afai o auai i faiga e faaleagaina ai lona tino, faaleagaina lona soifua maloloina ma faapuupuuina lona soifuaga?—Mareko 12:29, 30.

22. O le ā e mafai ai e se tagata ona momotu ese mai amioga leaga atonu o taofia ai o ia?

²² E ui lava ina foliga mai ua ‘saisaitia’ se tasi i le tasi po o le sili atu foi o nei amioga, a e mafai lava ona ia foia lea tulaga ma saoloto mai ai. O le poto e uiga i le Atua ma ana fuafuaga matagofie ua aumaia ai se uunaiga malosi e mafai ai ona faia faapena. E mafai e se tagata ona ‘toe fuataiina manao o lona loto.’ (Efeso 4:23) O le a tatalaina i lenei se auala fou o  le olaga, le auala lea o le a oo atu ai fiafiaga totino ma o se viiga i le Atua.

23. (a) O le ā le faaaogaina e tasi o le toto sa faamaonia e le Atua i lana tulafono i a Isaraelu? (e) Ai se ā e tatau ai ona tatou manatunatu ma le faaeteete i le finagalo o le Atua i lenei mataupu ona o le uiga o na taulaga?

²³ E tatau foi ona manatunatu i o tatou toto pe a tatou talanoa i le ola. Ua faia e le Atua le toto o le tagata ma manu, ma faatusa o le ola. Ua faaalia lenei i le tulafono na ia avatu i a Noa ma ona atalii, o e ua tatou tupuga uma mai ai, ma i lana tulafono mulimuli ane ai i le nuu o Isaraelu. E pau lava le faaaogaina o le toto na faamaonia e le Atua i ina, o le osia ai lea o taulaga na ofoina atu i le fata faitaulaga e tusa ma ana faatonuga. (Kenese 9:3, 4; Levitiko 17:10-14) O na taulaga uma sa faaataina ai le taulaga e tasi a le Alo o le Atua, lea na ia sasaa atu lona toto ola e fai ma sui o le fanau uma a tagata. (Eperu 9:11-14) O lenei mea i a te ia lava, ua tatau ai ona tatou manatunatu ma le faaeteete i le finagalo o le Atua i lenei mataupu.

24. O le ā ua fai ai le Galuega 15:28, 29 e uiga i le manatu e tatau ona i Kerisiano agaʻi i le faaaogaina o le toto?

²⁴ Pe o tumau pea le faamalosia o le tulafono a le Atua e uiga i le faaaogaina o le toto, i Kerisiano moni? Ioe, e pei ona faaalia i le faamatalaga aloaʻia sa faia e aposetolo ma isi toeaiina o le faapotopotoga Kerisiano i le uluai senituri. Sa latou tusia i lalo o le taʻitaʻiga a le agaga o le Atua: “Auā ua lelei i le Agaga Paia ma i matou nei, ia le faaee atu se tasi avega ia te outou, na o nei mea e tatau; ia faamamao outou i mea e fasia mo tupua, ma le toto, ma mea titina [o lona uiga, ua lē faamasaaina ai le toto], ma le faitaaga; afai tou te taumamao ma nei mea, e lelei ai outou. Ia outou manuia.”—Galuega 15:28, 29.

25. I ā faiga ua faaalia ai e le lalolagi le lē amanaia o le finagalo o le Atua e uiga i le toto?

²⁵ Peitai e toatele tagata i aso nei ua faaalia le lē amanaia atoatoa o le finagalo o le Atua e uiga i lenei itu tāua o le olaga. Ua latou faaaogaina le toto ma le lē faatuaoia i mea taumafa, i faiga faafomaʻi, e oo lava i le paluina faotasi ma isi mea o loo faatau atu  i pisinisi, e aofia ai ma faalelei eleele. Ae, pe lē o uiga ea ia o se lalolagi ua tumu i le lē amanaia o le mea alofa o le ola? E ui i lea, afai tatou te talisapaia ma le naunau le ola ma lo tatou nofo aitalafu i le Atua, o le a tatou lē faatuatuanaʻia la lona finagalo pe faatiga i a te ia i le solia o ana poloaiga ua faaalia.

26, 27. Aiseā ua lē faaalia ai le faaaloalo moni i le mea alofa a le Atua o le ola, e se tasi ua taumafai e faasaoina lona ola o i ai nei i lona lē usiusitai i le Atua?

²⁶ O lea, e ui lava ina e tatau ona tatou popole i lo tatou soifua maloloina ma saili ia puipuia o tatou ola o se mea alofa mai le Atua, ae e i ai lava mutaaga faapitoa e tatau ona matauina. Sa faamaninoina e le Alo o le Atua lenei mea ina ua ia faapea mai: “O lē faapelepeleina i lona ola, e faamāumau e ia i ai; a o lē ʻinoʻino i lona ola i lenei lalolagi, e leoleo ai e ia e oo i le ola faavavau.”—Ioane 12:25.

²⁷ O le ā le uiga o lena mea? O lona uiga, afai o se fesili ia oti ona o le usiusitai i le Atua po o le lē usiusitai i a te ia ina ia faasaoina ai le ola o se tasi o i ai nei, o le auauna moni a le Atua o le a sili i a te ia le oti i lo le lē usiusitai. Sa mafai e Iesu ona sola ese mai le oti i le lē usiusitai i le Atua, peitai sa na lei faia faapena. Ma o tagata foi sa muamua mai i a te ia sa faaalia foi lea lava tuutoina atu lē gausia i le finagalo o le Atua. (Mataio 26:38, 39, 51-54; Eperu 11:32-38) Sa latou lei faatagaina lo latou olaga i le taimi nei e faalavelavea ai lo latou agavaa mo le ola e faavavau.

28. Mo le ā ua tatou sauniuni i ai i le faatupuina o le talisapaia o le manatu o le Tusi Paia agaʻi i le ola?

²⁸ Pe o le auala ea lena o ē manatu ai foi oe e uiga i le ola? Pe ua e talisapaia ea, mo se olaga ia i ai uiga moni, e ao lava ina e ola ai e talafeagai ma le finagalo o le Atua? O le faatupuina o lena manatu i le taimi nei o se vaega lena o le sauniuniga mo le olaga i le faiga fou a le Atua. Maeu le saogalemu ma le malu puipuia o le a faalogoina e se tasi i lena vaitaimi, i soo se mea ma soo se taimi, i le iloa lelei o ē uma lava o loo ola i le lalolagi o loo i ai le faaaloalo moni i le mea alofa a le Atua o le ola.

[Fesili mo le Suʻesuʻega]