Mataupu 12

Faaaloalo i le Pule e Tāua mo le Olaga Manuia

1-3. (a) O le ā ua fesoasoani i le faasalalauina atu o le tetee i le pule i o tatou aso? (e) O ā auala eseese ua faaalia ai lenei manatu? (i) O fea ua faalogoina ai le āfaina?

UA I AI le agaga o le tu toatasi o loo sosolo atu i le lalolagi i o tatou aso. Ae maise lava i a i latou na fananau mai talu mai le Taua II a le Lalolagi, ua i ai le tetee i le pule. Ai se a? O se tasi o mea, ua matauina ma ua afaina ai o latou matua i omiga tetele sa lei faapea ona i ai muamua, e le gata i lea, a e faapea foi ma faiga fiamalosi ma le iʻuvale a i latou o avea ma taʻitaʻi. Ua faatupuina i a i latou se vaaiga nenefu agaʻi i le pule. O le mea lea, ina ua oo ina avea le toatele o i latou ma matua, sa latou lei totoina i a latou fanau le faaaloalo i le pule. Ua faapena foi ona lē fesoasoani uiga lē faamasinotonu o loo vaaia e fanau mo le faaleleia o mataupu. O le iʻuga la, ua matuā taatele le fouvale faasaga i le pule.

² O lena fouvalega ua faaalia i auala eseese. O ni isi taimi ua faaalia i le faia o ni ituaiga o laʻei e faasino mai ai le tetee i “tulaga talia” tau laʻei. Atonu foi po o le faasausili agaʻi i leoleo i luma o le lautele, pe oo foi lava i faiga saua ma le faamasaa toto. Peitai ua lē faapea ua faamuta ai i mea ia. E oo lava i tagata ua latou lē faia nei uiga i luma o le lautele, pe toafia ua latou le amanaia po o lo latou solia tulafono ma isi faatonuga pe afai latou te le malilie i ai, pe ona o le latou iloa foi e faigata ona faia mea o loo manaomia e lea tulafono?

³ O lenei tulaga ua matuā afaina ai lava le faagasologa i totonu o aiga, i totonu o aʻoga, i nofoaga o galuega ma fesootaiga ma ofisa o le malo. Ua faatoateleina atili tagata o ē lē mananao e taʻu atu e se tasi  i a i latou le mea e fai. Ua latou aapa atu i le mea ua latou talitonu i ai faapea o le saolotoga e sili atu. I le faafesagai ma lenei tulaga, o le ā lau mea o le a fai?

4. O le mea tatou te faia i lenei mataupu, ua faaalia ai o tatou manatu i le ā le finauga?

⁴ E mautinoa o lou auala o le a faasino mai ai ma le lē alofia le mea o e tu ai i le va feagai ai ma le finauga e uiga i le amiotonu o le pule aoao a Ieova i le vateatea. Pe o e vaavaai moni atu ea i a Ieova o ia o le Puna o le manuia moni ma le saogalemu? Pe o le a e saili atu ma faatatauina i lou olaga le mea ua fai mai ai lana Afioga? Pe o e ō faatasi ea ma i latou o le fanau a tagata o ē ua taʻitaʻi seseina e Satani ma talitonu ai faapea e tatau i a i latou lava ona faia a latou faaiʻuga e uiga i le mea lelei ma le mea leaga?—Kenese 3:1-5; Faaaliga 12:9.

5. (a) O le ā ua masani ona iʻu i ai le mulimuli i le taʻiala a tagata o ē ua folafola mai le “saʻolotoga”? (e) Pe faapefea le saʻolotoga o le tagata o lē na te fai le finagalo o le Atua?

⁵ Soo se tasi na te faatagaina se mea ua “lauiloa” e pulea ona mafaufauga o le a faigofie lava ona faaseseina. (Ieremia 8:6) Peitai o le poto saʻo i le Tusi Paia o se puipuiga malu lea. Na te mafai ona puipuia oe i lou fesuiaʻia o le tasi tulaga leaga i le isi tulaga leaga talu ai lou faalogo i tagata, i latou ia ‘e ui lava ina o loo folafola mai se saolotoga, ae o loo fai foi i latou ma pologa i le iʻuvale.’ O le mulimuli i le taʻitaʻiga a ia tagata o le a na ona tuuina ai foi ma oe i le tulaga pologa. (2 Peteru 2:18,19) O le saolotoga moni faatoa maua lava i le aʻoaʻoina ma le faia o le finagalo o le Atua. O lana tulafono o le “tulafono o le saʻolotoga ua atoatoa ona lelei.” (Iakopo 1:25) Ua lē faasāsāina tatou e Ieova e aunoa ma se manaomia, ma siʻosiʻoina tatou i ni tulafono e leai ni sini aoga. Ae na te saunia le ituaiga o taʻiala e mafai ai e se tagata ona faafiafiaina i le manuia ma le saogalemu e maua mai ona o le va fealoaloaʻi matagofie ma le Atua ma uso a tagata. Pe e lē o lena ea le mea o e manao ai?

6, 7. (a) O ai o loo i ai i le tulaga e sili ona lelei na te faia ai se mea e uiga i le faaaogā seseina o le pule i lenei faiga o mea? (e) Pe sa faapefea ona faaalia e Iesu le mea e tupu i tagata o ē taumafai latou te aveina le tulafono i o latou lava lima?

 ⁶ Ua silafia e le Atua e sili atu i soo se tasi, le tele ua oo i ai le iʻuvale ma le faaaogāseseina o le pule i lenei faiga tuai o mea. Ma ua aumaia lana fetalaiga, e tusa lava po o le ā le maualuluga o tulaga o i ai latou ua mafua ai omiga ae o le a ia valaauina latou uma e tala mai e uiga i a latou amio. (Roma 14:12) I le taimi atofaina a le Atua, o le a “vavaeeseina o e amio leaga ai le laueleele, e liaiina ai foi o e amio pepelo.” (Faataoto 2:22) Peitai o le a lē iʻu i se lelei tumau mo i tatou pe afai o le a tatou le onosai ma tauaveina le tulafono i o tatou lava lima.—Roma 12:17-19.

⁷ I le po na faalataina ai ma pueina o ia i le faatoaga o Ketesemane, sa faamamafa atu e Iesu lenei mea i ona aposetolo. Ona a tulaga sa i le nuu, aofia ai ma le i ai o manu ai vao, sa masani ai lava ona tauaveina auupega e tagata Iutaia, ma i lea lava taimi, e lua ni pelu sa i ai i aposetolo o Iesu. (Luka 22:38) O le ā le mea na tupu? Ina ua latou vaai atu i le faapioina mataga o le faamasinoga tonu—se taumafaiga lea e pueina Iesu e aunoa ma se mafuaaga amiotonu ma i le lafi i lalo ifo o le pouliuli—sa faataalise ona sei aʻe e le aposetolo o Peteru o lana pelu ma tipi ese le taliga o se tasi o tagata sa i ai. Peitai sa toe faafoisia e Iesu le taliga ma fetalai atu i a Peteru: “Ina toe sulu ia o lau pelu i lona faamoega; auā o i latou uma o e tago i le pelu, e oti latou i le pelu.” (Mataio 26:52) E toatele tagata, e oo foi i o tatou aso, se manū e mafai ona faasaoina mai le oti lei manaomia pe a na latou mulimuli i lenei fautuaga.—Faataoto 24:21, 22.

VAAIGA TATAU I PULE FAALELALOLAGI

8. (a) E pei ona taʻua i le Roma 13:1,2, pe faapefea ona vaai Kerisiano agaʻi i taʻitaʻi o le lalolagi? (e) O le ā le uiga o le faamatalaga faapea ‘ua faatuina i latou i o latou tulaga faatatau e le Atua’?

⁸ Ina o tusi atu i Kerisiano i Roma, sa faagaeeina  le aposetolo o Paulo e le Atua e talanoaina pe faapefea ona latou amio aʻi i le va feagai ai ma pule faalelalolagi. Sa ia faapea atu: “Ia usiusitai tagata uma i faipule silisili; auā e leai se pule pe a le [faatagaina] mai le Atua; o pule uma lava o loo fai nei, ua faatuina [i o latou tulaga faatatau] e le Atua. O lenei, o le na te tetee i le pule, ua tetee e ia i le sauniga a le Atua; o e tetee foi e sala lava i latou.” (Roma 13:1, 2) Pe o le uiga ea o lenei mea faapea sa tuuina e le Atua nei taʻitaʻi faalelalolagi i tulaga pule? Ua tali mai manino le Tusi Paia, E Leai! (Luka 4:5, 6; Faaaliga 13:1, 2) Peitai ua i ai latou ona o lana faatagana, ma o le ‘tulaga faatatau’ ua latou nofoia i le faagasologa o le tala faasolopito o le tagata sa fuafuaina lea e le Atua. O le ā lea tulaga?

9. Afai ua auai ofisa i faiga sese, pe e mafai faapefea ona tatou faaaloalo i a i latou?

⁹ O le mau faatoa uma ona taʻua o loo fai mai o se tulaga “silisili.” O lea ua lē tatau ai ona faaalia le lē migao i ofisa po o pule o le malo. O tulafono ua faamalosia e i latou e lē tatau ona faalēamanaia. E lē faapea o le a e faaviivii ai i ia tagata, pe e te faamaonia foi soo se faiga iʻuvale atonu o le a latou aafia ai. Peitai ua tatau le faaalia o le faaaloalo ona o le tulaga ua latou tutu ai.—Tito 3:1, 2.

10. Pe faapefea ona manatu agaʻi i le totogia o lafoga, ma ai se ā?

¹⁰ I le fuafua tele, ua iloa ai ua galulue tulafono faalelalolagi mo le lelei o tagata. Ua latou fesoasoani e faatumauina le sologa lelei ma faamaonia foi sina puipuiga mo le tagata ma mea totino a tagata taitoatasi. (Roma 13:3, 4) E le gata i lea, ua masani lava ona saunia e malo ala tetele, puipuiga mo le soifua maloloina, fale tinei mū, aʻoaʻoga ma isi auaunaga e aogā mo tagata. Pe o le a totogia ea latou ona o ia galuega? Pe e tatau ea ona tatou totogia lafoga? O se fesili lenei o ni isi taimi ua o mai faatasi ma faalogona malolosi ona o le maualuluga o lafoga ma le faaaoga sesesooina o tupe a le lautele. I le taimi foi  o le galuega talaʻi faalelalolagi a Iesu, sa i ai ni uiga faalemalo foi i lenei fesili. Peitai sa lei manatu Iesu ua tatau ona teena le totogia o lafoga ona o tulaga lē lelei sa i ai. I lona taʻua o le tupe na faia e le Kaisara Roma, fai mai ia: “O lenei, o mea a Kaisara, ia outou avatu ia Kaisara; a o mea a le Atua ia avatu ia i le Atua.” (Mataio 22:17-21; Roma 13:6, 7) I lona silafia lelei o iʻuga e faigofie ona tutupu aʻe, o lea sa lei faamaonia ai e Iesu le manatu e avea tagata taitoatasi ma tulafono i a te ia lava.

11, 12. (a) Pe faapefea ona faaalia i mau ua talanoaina o loo i ai le tasi pule e tatau ona mafaufau i ai? (e) O le ā o le a e faia pe afai o le a aumaia e pule faalelalolagi ni faatonuga e feteenaʻi ma le finagalo o le Atua, ma ai se ā?

¹¹ E ui i lea, e tatau lava ona matau mai, i le tali atu a Iesu sa ia faaalia o le malo faalelalolagi ua lē na o lea le pule e tatau ona mafaufauina. O “faipule silisili” ua lē faapea ua sili aʻe i le Atua po o e tutusa foi ma ia. Ae ua ‘faatutuina i latou i o latou tulaga faatatau e le Atua.’ (Roma 13:1) O le latou pule e i ai le mea e faamuta ai, e lē faasauatoa. Ona o lea mea, ua masani ai pea ona fesagai Kerisiano ma se faaiʻuga faigata. O se faaiʻuga foi lea e tatau ona e faia. Pe a faatonuina e taʻitaʻi o pulega, e tatau ona tuuina atu i a i latou mea tau le Atua, o le ā le mea o le a e fai? Afai o le a latou faasaina se mea ua faatonuina e le Atua, o ai o le a e usitai i ai?

¹² I le filifilia e aposetolo o Iesu Keriso latou te sapasapaia le pule aoao a Ieova, sa latou faaali atu ma le faaaloalo peitai ma le taofi mau i lo latou tulaga i sui o le faamasinoga maualuga i Ierusalema: “Pe tonu i luma o le Atua, ona ma faalogo ia te outou, a e ma te le faalogo i le Atua, ina filifili ia outou. Auā ma te le mafaia ona le tautala i mea ua ma vaai i ai ma faalogo i ai. . . . E tusa ona sili o lo matou anaana i le Atua i lo matou anaana i tagata.” (Galuega 4:19, 20; 5:29) Atonu o le a faatulafonoina e pulega faalemalo a tagata pe toafia e faatagaina ona faapotopoto  faatasi; atonu foi o le a latou faasaina ni isi sauniga lautele faapitoa. Ua lē o manaomia e le Afioga a le Atua ia faapotopoto ona tagata i aofiaga tetele mo le tapuaiga, ua le o faapea mai foi na o le tasi le auala tatau e faafesootaia ai isi tagata ina ia talanoa i a i latou e uiga i le finagalo o le Atua. I le isi itu, afai o le gauaʻi atu i tulafono faalemalo o le a fai ma mea o le a faigata ai ona faataunuuina avega tauave ua tuuina mai e le Atua, o le ā le mea o le a fai? O ai na te mafai ona teena le mea saʻo e ao ona fai o le ‘usiusitai lea i le Atua o le pule na i lo i tagata’?

13, 14. (a) O le ā le faaeteetega e tatau ona tatou i ai ia aua neʻi solia tulafono faalelalolagi ona o ni mafuaaga totino? (e) Ia faasino mai i le Tusi Paia mafuaaga mo lenei mea?

¹³ Ua matuā ese mamao lava lenei mai le agaga faapito tu toatasi e fai na o mea e foliga mai e lelei ai se tasi, ae ua le faia mea o loo manaomia e le tulafono. E moni, mai le vaaiga faaletagata, e i ai ni isi tulafono e foliga mai e le tatau, ma aumai ai ni saisaitiaga lē talafeagai. Peitai pe ua magalo ai ea se tasi i lona lē amanaia o le tulafono? Pe o le ā le taunuuga pe afai o le a usiusitai tagata uma i na o tulafono ua latou manatu e lelei ai i latou? O le a na ona oo atu ai i le fenuminumiaʻi a lautele.

¹⁴ E i ai se tulaga mataʻutia tele i le lē amanaiaina e se tasi o le pule, ma faia na o mea ua ia malie i ai ona e foliga mai o le a oo loa lava se faasalaga. E ui lava ina atonu o le lē faautagia o le tulafono o le a amata mai pe na o ni nai mea iti, ae o le lē faasalaina o se tasi atonu o le a lē toe fefe ai ma faia solitulafono tetele, seia oo lava ina faamautuina i lona ala leaga. E tusa ai ma lenei mea, fai mai le Failauga 8:11: “Aua ua le vave faaootia le sala i le amio leaga, o le mea lea ua matuā naunau ai loto o tagata e fai mea leaga.” O le ā le mafuaaga moni mo le usiusitai i le tulafono? Pe e na ona o le fefe ea  i le faasalaga o le lē usiusitai? E uiga i se Kerisiano, e ao lava ona i ai se mafuaaga e sili atu lona malosi—le mafuaaga lea sa taʻua e le aposetolo o Paulo o se mafuaaga “tatau” ma o le faanaunauga lea mo se loto fuatia ifo mamā. (Roma 13:5) Afai o le a aʻoaʻoina le loto fuatia ifo o se tasi ia talafeagai ma le Tusi Paia, ua na iloa afai o le a ia sailia le ala o le aunoa ma le tulafono o lona uiga “ua tetee e ia i le sauniga a le Atua.” E tusa lava pe iloa e isi tagata ola pe leai foi mea o loo tatou faia, ae ua silafia lava e le Atua, ma lo tatou faamoemoega mo le ola i le lumanai e faalagolago lea i a te ia.—1 Peteru 2:12-17.

15. (a) O le ā e tatau ona taʻitaʻia se tasi i lona uiga agaʻi i se faiaʻoga po o se tasi e pule i le galuega? (e) I lenei auala ua tatou alo ese ai mai le faatosinaga a le agaga o ai?

¹⁵ Ua faapena foi le saʻo o lenei mea e uiga i le manatu o se tagata talavou agaʻi i lana faiaʻoga, ma le uiga foi o se tagata matua i le pule o lana galuega faalelalolagi. O le mea moni e toatele o isi tagata i o tatou tafatafa o loo faia mea sese, e lē tatau ona avea lea ma pogai tatou te faia ai mea sese. Pe e iloa e le faiaʻoga po o le pule o le galuega mea tatou te fai pe leai foi, e leai se mea o i ai. O le fesili ua faapea, O le ā le mea saʻo? O le ā le mea e malie i ai le Atua? O faiaʻoga e masani lava ona avea o sui o malo faalelalolagi, o sui lava ia o “faipule silisili,” ma e tatau i ai le faaaloalo. Ma e uiga i ē ua fai ma pule i a tatou galuega faalelalolagi, ua fautua mai le Tusi Paia: “Ia . . . taumafai ona faafiafia i ai [i latou] i mea uma lava, . . . ia faaalia e i latou (o e fai galuega) ua latou faamaoni aiai, ina ia viia ai i mea uma lava talu o i latou le mataupu a le Atua lo tatou Faaola.” (Tito 2:9, 10) O le faia faapena, ua tatou faaalia ai ua tatou le palasi atu i le faatosinaga a Satani, o lē e ona le agaga, “o loo matuā galue nei i e ua faalogogata.” Na i lo lena, ua tatou faia se fesoasoani moni i le va fealoaloaʻi filemu ma o tatou uso a tagata.—Efeso 2:2, 3.

LE PULE I TOTONU O LE AIGA

16. O le ā le manaoga mo le olaga solo lelei o se aiga o loo faaalia i le 1 Korinito 11:3?

¹⁶ O le tasi vaipanoa e moomia tele ai va fealoaloaʻi filemu o le liʻo lea faaleaiga. Ua tele naua le leai o lenei va fealoaloaiga, ma iʻu ina malepelepe ai aiga—ma i le tele lava o tulaga, ua taapeape ai. O le ā e mafai ona faia ina ia faaleleia lenei tulaga? O le faavae moomia o le faaaloalo lea i le fuafuaga a Ieova o le tulaga ulu. E pei ona tusia i le 1 Korinito 11:3 ua faapea le faasologa o lena fuafuaga: “O le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea.”

17. (a) E tusa ma le tulaga ulu, o le ā le tulaga o le tane? (e) O le a le faaaʻoaʻoga matagofie na faataatia e Keriso e uiga i le tulaga ulu faaletane?

¹⁷ Ia matau mai ua amataina le faamatalaga i le tulaga o le tane, ua lē muamua faasino i lona tulaga ulu, ae o le taulaʻi atu lea i le mea moni, i le fuafuaga o mea a Ieova, o loo i ai se tasi e tatau i le tane ona vaavaai atu i ai mo le faatonuina, se tasi lea o lana faaaʻoaʻoga e tatau ona ia mulimuli ai. O Keriso o le ulu ia o le tane, ma i ana faiā ma lana faapotopotoga, lea ua faatusaina i le faatoanofotane, ua faataʻitaʻia e Keriso le auala o le a manuia ai tulaga ulu faaletane. O lana faaaʻoaʻoga matagofie na faaosofia ai ni tali fiafia mai ē na mulimuli i a te ia. Na i lo le avea o ia ma pule saua ma fia fai faatonuga i a i latou, sa faaalia pea e Iesu le “agamalu ma le loto maulalo,” ma sa maua ai e ē na mulimuli i a te ia le malologa mo o latou agaga. (Mataio 11:28-30) Pe sa ia taʻu faatauvaaina ea latou ona o latou vaivaiga? Na i lo lena sa ia faataatia i lalo lona ola ina ia faamamāina a latou agasala. (Efeso 5:25-30) Maeu le manuia o se au aiga e i ai se tane ua taumafai ma le naunau e mulimuli i lena faaaʻoaʻoga!

18. (a) O ā auala e mafai e le avā ona faaalia ai na te faaaloalogia le pule a lana tane? (e) Pe faapefea ona faaalia e fanau lo latou faaaloalo i matua, ma ai se ā?

¹⁸ Pe a i ai le tulaga ulu faapena i le aiga, o le a lē faigata i le fafine ona uaʻi atu i lana tane. Ma o  le usiusitai o fanau i o latou matua o le a sili ona lelei. Peitai e tele foi ni mea e mafai e le avā ma le fanau ona fesoasoani ai mo le fiafiaga o le aiga. O le filiga i le tausia o mea tau le fale, atoa foi ma le talia o faaiʻuga a lana tane ma galue ina ia faataunuuina, ua faaalia ai e le avā faamaoniga ua i a te ia le ‘faaaloalo loloto i lana tane.’ Pe ua moni ea lena i lou aiga? (Efeso 5:33; Faataoto 31:10-15, 27, 28) Ae, e uiga i tamaiti, afai ua i ai le fiafia e usiusitai i le tamā ma le tinā, o lona uiga ua faaalia ai lo latou ava i o latou matua, ma o le mea lena e manaomia e le Atua. (Efeso 6:1-4) Pe e te le ioe ea o le a sili atu le filemu, ma o le a tele le faalogona saogalemu totino i se aiga faapena na i lo se aiga ua lē maua ai se faaaloalo i le pule?

19. Pe afai e na o oe i le aiga o loo taumafai e taʻitaʻia e le Afioga a le Atua, e ā la?

¹⁹ E mafai ona e fesoasoani ia avea lou aiga ma nofoaga faapena. Pe filifili isi tagata o le aiga e sapasapaia ala o Ieova pe leai foi, e mafai lava e oe ona e faia. O isi o le aiga atonu o le a latou tali leleia lau faaaʻoaʻoga matagofie. (1 Korinito 7:16; Tito 2:6-8) E tusa lava pe latou te le faia, ae o le mea ua e faia o le a tulaʻi mai o se faataʻitaʻiga o lou faatuatua i le tonu lelei o ala o le Atua ma e lē o se mea faatauvaa lena.—1 Peteru 3:16, 17.

20, 21. (a) Pe faapefea ona faaalia e le Tusi Paia o le pule a le tane ma matua e lē atoatoa? (e) O lea, faatasi ma le ā le filifiliga atonu o le a fesagai ma se avā Kerisiano po o fanau talitonu, ma o le ā e tatau ona uunaia ai latou?

²⁰ Ia teu i le mafaufau o le fausaga atoa o le pule i le aiga e pogai lea mai le Atua. O le mea lea ua le mafai ai ona tuuesea o ia mai le mataupu, a ea? O lea ua poloaiina ai avā ia usiusitai i a latou tane e “pei ona tatau i le Alii.” Ma ua poloaʻia foi tamaiti ia usiusitai i o latou matua “auā o le mea malie lea i le Alii.” (Kolose 3:18, 20) O le uiga o lenei mea, o le pule a le tane i luga o le avā ma le pule a matua i luga o fanau, o se pule faalēatoa. Afai o le tane po  o matua e lē talitonu, e le taumate o lenei manatu o le a lē fiafia i ai i latou i le taimi muamua. Peitai e galue moni lava mo lo latou lelei, auā o le a fesoasoani i lē talitonu ia atili ai ona faatuatuaina ma faaaloalogia.

²¹ Ioe, afai o le a faatonu atu le tane ia faia e lana avā se mea o le a lē pei “ona tatau i le Alii,” o lona uiga o le mea o le a na faia o le a faataʻitaʻia ai pe moni e “mataʻu i le Atua” o ia pe leai foi. (Failauga 12:13) Ua faapena foi tamaiti, a oo loa ina lava lo latou matutua e malamalama ai ma usiusitai i le Afioga a le Atua, afai la e lē auai o latou matua i lo latou faanaunauga e auauna i a Ieova, e tatau la i fanau ona filifili pe o le a faamaonia lo latou faamaoni i le Atua, po o le au faatasi ma matua lē faamaoni. O latou faamoemoega mo le ola e faavavau o loo aafia ai. (Mataio 10:37-39) E ui i lea, o fanau faapenei, e tatau lava ona usiusitai latou i “mea uma” e ese mai o latou uluai tiute tauave i le Atua, e tusa lava pe o le a faia ai ma mea latou te lē fiafia i ai. (Kolose 3:20) O le faia faapena, atonu o le fesoasoani ai foi i o latou matua ia talia fuafuaga a Ieova mo le faaolataga. Afai o le uunaiga o se tasi, e lē o se lē usiusitai ua fanau mai i le agaga fia tu toatasi, ae o le agaga o le faamaoni i a Ieova ma ona ala amiotonu, o lona uiga o le mea ua ‘matuā finagalo malie i ai le Alii.’

I TOTONU O LE FAAPOTOPOTOGA KERISIANO

22, 23. (a) O le ā ua faia e ovasia Kerisiano mo sui o le faapotopotoga? (e) O lea, o le ā le uiga e tatau ona tatou faaali atu i a te i latou e pei ona fai mai ai le Eperu 13:17?

²² O le agaga lava lea o le faamaoni i a Ieova ua tatau ona atagia mai i o tatou manatu agaʻi i lana faapotopotoga Kerisiano ma i latou o loo tausia ona mea. Ua saunia e Ieova ovasia i totonu o le faapotopotoga latou te leoleoina le “lafu.” Latou te le maua se totogi mo le latou galuega, peitai ua latou tuuina atu  latou lava ona o le naunau moni mo le lelei o latou uso ma tuafafine Kerisiano. (1 Tesalonia 2:8,9) Ua latou fesoasoani i le faapotopotoga ina ia tauaveina le galuega faapitoa ua faatuatuaina atu i ai, o le talaʻia lea o le tala lelei o le malo o le Atua. A e faapea foi, ma le naunau mo le solo lelei o tagata taitoatasi uma o le faapotopotoga, ua latou fesoasoani i a i latou ia e aʻoaʻoina ma faatatau mataupu silisili o le Tusi Paia i o latou olaga i aso taitasi. Ma, afai e i ai se tasi o le faapotopotoga, e ui lava ua na iloa mea e manaomia e le Atua, ae ua ia faaauau pea ma le iloa lelei le faia o ni mea sese matuiā, o ovasia la, ua i ai lea avega tauave, o le a latou vaai ua faateaina lea tagata, ma o le a faapea ona puipuia isi uma o le faapotopotoga mai lana faatosinaga iʻuvale.—1 Korinito 5:12, 13)

²³ I le talisapaia o lenei fuafuaga alofa a Ieova ina ia faamautinoaina le agaga o le filemu i ona tagata, ua tatau lava ona tatou faautagia le fautuaga o loo maua i le Eperu 13:17, fai mai: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.”

24, 25. (a) Pe faapefea mea o loo aʻoaʻo atu e toeaiina ona faatosina ai le ala tatou te manatu ai i a i latou? (e) O afea ma o fea e tatau ai ona tatou faatatauina mea ua tatou aʻoaʻoina mai le Tusi Paia? Aiseā?

²⁴ Peitai o le tuuina atu o le ‘usiusitai i ē o loo taʻimua,’ e lē faapea na ona fai e faafiafia ai le tagata. Ua faamamafaina e le Tusi Paia o le mafuaaga autu ua tatau ai i nei ovasia po o toeaiina le faaaloalo ona o mea o loo latou aʻoaʻo atu, o “le afioga a le Atua.” (Eperu 13:7; 1 Timoteo 5:17) Ma e uiga i lena afioga, fai mai le Eperu 4:12, 13: “Auā o loo ola le afioga a le Atua, o loo matuā galue foi, o loo sili foi lona maai i pelu uma o faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i  manatu ma filifiliga o le loto; e le lilo foi se tasi mea ua faia i ona luma, a ua taatia fua ma ua aliali mai o mea uma lava i lana silafaga, tatou te taʻu atu ia te ia a tatou amio.”

²⁵ O lena “afioga a le Atua” ua faaalia moni ai lava pe o le ā o loo i totonu o le tagata. Ua faaalialia ai le eseesega o lona faafoliga mai ma le uiga moni o loo pulea o ia i le tautala ma le gaoioi e pei ona ia faia ai. Afai e i ai moni sona faatuatua i le Atua, ma ua uunaia e le faanaunauga moni e faafiafia Le na Foafoaina o ia, o le a lē mafai la ona ia see atu i le faia o se mea leaga pe afai o le a lilo atu mai le vaaiga a toeaiina o le faapotopotoga. O le a na lē auai foi i nisi amioga e lē faale-Tusi Paia, e tusa lava pe lē o ni sese mataʻutia e mafai ai ona faateaeseina se tasi mai le faapotopotoga. O lona faanaunauga e lē ina ia agasala, ae ina ia faaatagia mai “le mamalu o le Atua.” (Roma 3:23) I le isi itu, afai e i ai se tasi na te taliaina māmā soo se fautuaga ua maua i le Afioga a le Atua, e tatau ona suesueina ma le faaeteete lava po o le ā moni lona manatu i le Atua. Pe ua avea ea ia pei o lena tagata ua fai mai le Salamo 14:1 [13:1, Dy]: “Ua—lei fai atu i le lautele, ae ua—fai ifo le tagata valea i lona loto, E leai se [Ieova]”?

26, 27. (a) Ai se ā ua tāua ai le manatu mamafa i ‘tuleiga uma a Ieova’? (e) Pe faapefea ona aafia o tatou olaga pe a tatou faaalia le faaaloalo i le pule?

²⁶ Ina o faaosoosoina e le Tiapolo, sa faasilasila atu ma le malosi e Iesu Keriso: “E tatau ona ola le tagata . . . i afioga uma ua tulei mai le fofoga o Ieova.” (Mataio 4:4, NW) Pe e faapena le malosi o lou lagona e uiga i le mataupu? Pe e te talitonu o fetalaiga uma lava a Ieova e tāua ma e leai se fetalaiga e lē amanaia? Ua lē lava le usiusitai i nisi o mea e faafinagaloina e Ieova a e manatu māmā i nisi faapea, e lē tāua. E tatau ona tatou filifili i le va o ni mea e lua, a lē o le tatou sapasapaia o le amiotonu o le pule aoao a Ieova, o lona uiga ua tatou uia le itu a  le Tiapolo o le finauga, i le faataatia o la tatou lava faatulagana o le mea ua lelei ma le mea ua leaga. Amuia i latou o loo faaalia lo latou naunau moni i le tulafono a Ieova.—Salamo 119:165 [118:165, Dy].

²⁷ O le ituaiga o tagata ia ua lē maileia i le agaga fevaevaeai o le lalolagi. Ua latou le auai foi i amioga mataga a i latou ua lē amanaia uiga tau amio. O le faaaloalo loloto i a Ieova ma ona ala amiotonu ua avatu ai se tulaga mautu i o latou olaga.

[Fesili mo le Suʻesuʻega]