Lou Manatu i Amioga Tau Tane ma Fafine—Aiseā e Tāua?
Mataupu 13
Lou Manatu i Amioga Tau Tane ma Fafine—Aiseā e Tāua?
1-3. (a) Pe faapefea ona faaalia e le Tusi Paia o le feusuaiga i le va o le tane ma le fafine e i ai le faamaoniga tau atua? (e) Pe e mo le lelei ea o le tagata e auai i le lē taofiofia o le faaaogaina o ona malosi o faiga faaulugalii?
E I AI tagata ua i ai le taofi faapea ua le faamaonia e le Tusi Paia mea uma lava e i ai se faiā ma le tulaga tau tane ma fafine. Peitai ua lē o le mea lena ua fai mai ai le Tusi Paia. Ina ua tuanai le taʻuina mai o le foafoaga a le Atua o le uluai tane ma le fafine, sa faamatalaina atili mai e le Tusi Paia: “Ua faamanuia foi e le Atua ia te i laua, ma ua fetalai atu le Atua ia te i laua, ia fanafanau ia, ma ia uluola, ma ia tumu ai le lalolagi.”—Kenese 1:27, 28.
2 O le feusuaiga la i le va o le tane ma le fafine ua i ai le faamaoniga tau atua. Peitai pe o le a latou faia ea e aunoa ma ni mutaaga? Pe o se manatu faapena ea o le a iʻu ina tatou maua ai i lea le fiafiaga sili mai le olaga? Pe o le a aumaia ai ea le manuia moni ma le saogalemu mo i tatou lava ma e o loo siomia i tatou?
3 O faiga faaulugalii o se tasi lea o mataupu ua faaaogaseseina e pei lava o isi mataupu faaletagata. O le taumafa o se mea lelei ma e tatau mo le ola; peitai o le taumafa tele na te faaleagaina le soifua maloloina ma faapuupuuina le soifuaga o se tasi. O le moe foi e tāua tele peitai a sili atu o le a lē faataunuuina ni isi fuafuaga o le olaga, ma e mafai foi ona faavaivaia ai le tino. E pei lava ona lē maua le fiafiaga moni o le olaga mai le taumafa tele, le onā ma le paiē, ua faapena foi ona lē maua lea mai le lē taofiofia o malosi o uiga faaulugalii o se tasi. O le poto masani faaletagata i le faitau afe o tausaga ua aumaia ai se faamaoniga i lenei mea. Pe e tatau ea ona tatou sailia e ala i lo tatou faia o nei mea ma lagona ai ona tigā O loo i ai se auala e sili atu ona lelei.
4. O le ā e tatau ona uunaia tatou e sapasapaia tulaga a le Atua e uiga i faiga faaulugalii?
4 Ua aumaia e le Afioga a le Atua se vaaiga fuafua tatau e uiga i faiga faaulugalii o le a puipuia ai lo tatou fiafiaga i le taimi nei ma i le lumanai. E ui i lea, e lē na o lo tatou lava manuia ma le saogalemu, peitai, e sili atu ona tāua ona o lo tatou faaaloalo i Le na Foafoaina i tatou. E tatau lava ona tatou saili ia aʻoaʻo ma pipii mau atu i ana tulaga e tusa ai ma le faaaogaina o nei mea uma e pei ona ia tuuina i le fanau a tagata. Pe o tatou tuuina moni ea tatou lava i lana itu i le finauga o loo aafia ai le amiotonu o lana pulega? I lena foi mataupu o le a tatau lava ona tatou lolo atu i lona atamai sili ma le pulega a le Silisili ese i le vateatea aoao.—Ieremia 10:10,23.
IA PAIA LE FAAIPOIPOGA I TAGATA UMA
5. O le ā ua fai mai ai le Tusi Paia e uiga i le auai i soo se feusuaiga faaulugalii i fafo atu o le faaipoipoga?
5 Ua lapatai mai le Tusi Paia: “Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.” (Eperu 13:4) O lenei, e tetee le Atua i tagata ua auai i feusuaiga faaulugalii i fafo o le liʻo o le faaipoipoga. Ua talafeagai lelei lea ma le mea moni, ina ua saunia e le Atua le paaga mo le uluai tane, sa faaalia e le Atua o lona finagalo ia avea le tane ma lana avā ma “tino e tasi,” i le fusi e tumau o le auau faatasi. I ni tausaga e fa afe mulimuli ane ai, sa faaalia e le Alo o le Atua ua lei lafoaia e Lona Tamā lenei tulaga. (Kenese 2:22-24; Mataio 19:4-6) Ae pe o lea ea tulaga ua faia fua ma faasāsā ai tatou? Pe ua taofia ai ea se mea lelei mai i a i tatou? Sei o tatou vaai.
6. O le ā ua faaalia ai o le tulafono a le Atua faasaga i le mulilua e mo lo tatou lelei?
6 O le mulilua ua solia le tulaga tau atua, ma ua folafola mai e le Atua e “vave foi ona fai o aʻu ma molimau” i le faamasinoga faasaga i ē mulilulua. (Malaki 3:5) O fua leaga o feusuaiga faaulugalii ma se tasi i fafo atu o le faaipoipoga ua faamamafaina ai le atamai o le tulafono a le Atua. O le mulilua ua auala mai ai le lepetia o le faatuatua ma le lē talitonu o le tasi i le tasi. Ua mafua ai le lē saogalemu ma faaleagaina ai le filemu tau le faaipoipoga. O le ita ma le loto mafatia ona o lea tulaga ua masani ona oo atu ai i le tatalaga o faaipoipoga. Ua puapuagatia fanau a o latou vaavaai atu i le malepelepe mai o latou aiga. I le iloiloina o nei mea, pe e te le ioe ea o le faalēaogāina e le Atua o le mulilua e mo lo tatou lelei? Ua faaalia e lana Afioga soo se tasi e i ai le alofa moni i le tuaoi o le a na lē faia le mulilua.—Roma 13:8-10
7. Ia faamatala pe o le ā le uiga o le faitaaga e pei ona taʻua ai i le Tusi Paia.
7 E pei ona ua tatou matauina, ua faaalia foi e le Tusi Paia le faamasinoga a le Atua faasaga i e faitaaga. O le ā moni lava le “faitaaga”? A o faaaogaina e le Tusi Paia lenei fuaitau e aofia ai feusuaiga a ē lei faaipoipoina ma e mulilulua, ae peitai e i ai sona uiga e sili atu. O le upu mo le “faitaaga” (fornication) sa faaaogaina ina ua tusia faamatalaga a Iesu ma ona soo, o le upu Eleni lea o le por·neiʻa. Ua maua mai le upu lenei i le upu autu lava e tasi e pei o le fuaitau faaonapo nei o le “pornograghy” po o tusiata leaga. Sa faaaogaina le por·neiʻa i taimi o le Tusi Paia e faamatalaina ai ituaiga uma lava o feususaiga e le tusa ai ma le tulafono. (The Vocabulary of the Greek New Testament, e Moulton and Milligan) E lē gata i le faia o auala e masani ai feusuaiga i le va o tagata e lei faaipoipoina, a e aofia ai foi ma faiga e lē masani ai. Ma o lea ua fai mai ai foi se tasi tusi o le por·neiʻa “e mafai foi ona uiga o le ‘amioleaga e lē faalenatura, (le masani ai)’ . . . faasotoma.”
8. O ā mafuaaga malolosi na lapataia ai e le aposetolo o Paulo Kerisiano ia “taumamao ma le faitaaga”?
8 Ina o lapatai atu i ona uso Kerisiano ia “taumamao i le faitaaga,” sa avatu e le aposetolo o Paulo ni mafuaaga malolosi e tatau ai ona fai, i lona faapea atu: “Aua neʻi sopo tapulaa se tasi, ma agaleaga i lona uso i lenei mea; auā o le Alii na te taui atu ma sui i nei mea uma, . . . Auā e lei valaauina i tatou e le Atua ia amio leaga, . . . O lenei, o lē faaleaoga mai, ua ia le faaleaoga i tagata, a o le Atua.”—1 Tesalonia 4:3-8.
9, 10. (a) Ai se ā ua masani ai ona taofi le tagata mai le faaipoipoina faaletulafono, e ui lava o loo mau faatasi ma se tasi o le isi ituaiga? (e) E tusa lava po o le faitaaga o se maliliega a le toalua, ae pe faapefea ona leaga ma solia ai fua le āiā tatau a isi?
9 O lē ua faia le faitaaga ua na ‘faaleagaina ma solia fua le āiā tatau a isi.’ Ua moni lea mo se faataʻitaʻiga, i ē ua nonofo faatasi a e lei faaipoipoina faaletulafono. Ai se ā ua latou faia ai faapena? Ua masani lava ona faia ina ia mafai ai ona lafoai le nonofo faatasi i soo se taimi latou te mananao ai. Ua latou le avatu ai i a latou paaga i lea faiga tulaga puipuia sa tatau ona maua pe a na faaipoipo. A e faapefea pe afai o i laʻua uma ua faia le faitaaga ua la malilie uma ma loto faatasi i ai? Pe ua tumau ea ona la faaleagaina ma solia fua le āiā tatau a isi? Ioe, e moni lava.
10 O se tasi o mea, soo se tasi lava e auai i le faitaaga ua i ai sana vaega i le faaleagaina o le loto fuatia ifo o le tasi tagata faapea foi ma soo se tulaga mamā ma le Atua. O le faitaaga foi ua faaumatia ai le avanoa o le isi tagata e ulu atu i se faaipoipoga ma se amataga mamā. Atonu foi o le a ia aumaia le lē migao, taʻuvalea ma le mafatiaga i aiga o le tasi tagata faapea foi ma lona lava aiga. O le a mafai foi ona ia faaleagaina le mafaufau, lagona ootia ma le tino maloloina o le tasi. O gasegase afi mataʻutia ua masani lava ona tutupu mai ona o nei feusuaiga amioleaga. A o paʻu atu le mamafa o le agasala i luga a lē ua mafua ai sea leaga, ae ua faapea lava i a i laʻua uma ua aafia ai ona aofia tutusa i le agasala.
11. Ai se ā ua leai ai se mafuaaga mo soo se tasi e talitonu ai o le a faatagaina e le Atua le faitaaga?
11 O le tuinanau mai faalogona ootia atonu o le a faapogai ai ona faatauasoina tagata i nei leaga. Peitai, pe e te talitonu ea o le a faasopolia pe lē amanaia e le Atua i lana amiotonu, lenei lē faautagia e aunoa ma ni faalogona o āiā tatau a isi? Ua moomia e le Afioga a le Atua le alofa o se tasi i lona tuaoi e pei o ia lava ma ia āva, ae le o le faatauvaaina pe tuulafoaia, le paia o le fuafuaga o lana faaipoipoga.—Mataio 22:39; Eperu 13:4.
12. (a) O le ā ua faaalia ai le silafaga a le Atua i le faatauatane? (e) O le tulafono a le Atua o le faasaina o le faatauatane ua puipuia ai tatou faasaga i le ā?
12 A e ā faatauatane? E pei ona ua tatou vaaia, o lenei amioga ua aofia i lalo o le upu por·neiʻa (“faitaaga”), sa faaaogaina e Iesu ma ona soo. Sa faaaogaina e le soo o Iuta lena upu ina ua taʻua e ia feusuaiga lē masani ai a tamaloloa o Sotoma ma Komoro. (Iuta 7) O le faatauatane i ina na aumaia ai ni tulaga e sili ona leaga na mafua ai le “alalaga leo tetele” ma iʻu ai ina faaumatia e le Atua na aai ma ē na mau ai. (Kenese 18:20; 19:23, 24) Pe ua suia ea le silafaga a le Atua talu mai lena taimi? E leai. Mo se faataʻitaʻiga ua aumaia i le 1 Korinito 6:9,10 “ē tauatane” faatasi ma ē o loo faaauau pea ona faia isi amioleaga, e lē fai mo i latou tofi le malo o le Atua. E le gata i lea, i le faamatalaina o iʻuga e oo i tagata o ē ua le ava i o latou tino i le faia o amioga ‘le mamā’ po o le faaaogaina i “faiga e lē masani ai,” ua tusia e le aposetolo o Paulo faapea “ina ua mu i lo latou femanaoai; o tane ua fefaiai latou i mea e masiasi ai, ua tauia foi i latou i o latou lava tino e tusa ma lo latou sese.” (Roma 1:24, 27) Ua le gata ina palasi latou ia i le faafanoga a le Atua, ae ua latou maua foi le “taui” iʻuvale i le mafaufau ma le tino. Mo se faaaʻoaʻoga i aso nei ua salalau tele le gasegase leaga e maua (syplilis) i e tauatane. O le tulaga maualuga ua faatuina mai e le Afioga a le Atua, ua puipuia ai tatou mai nei mea leaga, na i lo le taofia ai o se mea lelei mai i a i tatou.
TALIAINA O LE SILAFAGA A LE ATUA E UIGA I LE TATALA O FAAIPOIPOGA
13. O le ā le tāua o le mataupu o le faamaoni o se tasi i lana tautoga tau le faaipoipoga?
13 “Ou te ʻinoʻino i le alei.” O le auala lena ua faaalia ai e Ieova le Atua lona faalogona malosi pe a aʻoaʻia latou o ē “faaoleole” i a latou paaga tau faaipoipoga. (Malaki 2:14-16) Ua aumai e lana Afioga le anoano o fautuaga e fesoasoani ai i tagata ina ia manuia latou faaipoipoga ma taumamao ai ma le tiga o le tatalaina o faaipoipoga. Ua faamanino mai foi o le silafaga a le Atua agaʻi i le faamaoni o se tasi i lana tautoga tau i le faaipoipoga o se matafaioi paia.
14, 15. (a) O le ā le mafuaaga tatau e tasi ma na o lea e fai ma faavae e tatalaina ai faaipoipoga? (e) Pe o lea “faitaaga” o le a solofua ai le noataga o le faaipoipoga? (i) I lalo o ā tulaga ua faatagaina e toe faaipoipo ai?
14 Ua faamamafaina lea e le mea moni na o le tasi lava le faavae ua na faamaonia e tatalaina ai le faaipoipoga. Sa faaalia e lona Alo lenei mea: “Ou te fai atu foi ia te outou, Ai se faatea i lana avā, a o lei mulilua (faitaaga) [por·neiʻa] ia, ma fai avā i se tasi, ua mulilua ia.” (Mataio 19:9; 5:32) O le por·neiʻa e pei ona ua tatou vaaia, e faatatau lea i ituaiga o amio leaga uma lava faafeusuaiga i fafo atu mai i le liʻo o le faaipoipoga, e tusa lava pe o auala e masani ai pe o auala foi e lē masani ai.
15 Afai ua agasala le paaga a se tasi i lea ituaiga o le “faitaaga” i aso nei, pe o le a solofua ai loa le noataga o le faaipoipoga? E leai, o lē o loo mamā e mafai ona filifili pe o le a faamagalo lē ua agasala pe leai. Afai ua tonu o le a tatalaina le faaipoipoga, o le a faamutaina la faaletulafono le faaipoipoga i le iloa lelei e le Kerisiano o pulega tatau a malo faalelalolagi, ma faia ai ma le faamaoni e tusa ai ma le tulafono. (Roma 13:1, 2) Afai loa ua uma lelei taualumaga uma, ua mafai loa ona toe faaipoipo. Peitai ua fautua mai le Tusi Paia o le toe faaipoipoina e tatau lava i le na o se isi Kerisiano, se tasi lea ua i ai moni lava “i le Alii.”—1 Korinito 7:39.
16. I atunuu e leai ni tulafono e faatagaina ai le tatalaina o faaipoipoga i soo se mafuaaga, pe faapefea ona faaalia e molimau Kerisiano a Ieova le faaaloalo e tatau ai i le tulafono a le Atua e uiga i lenei mataupu?
16 A e faapefea pe afai ua lē faatagaina lava e tulafono a le atunuu le tatalaina o faaipoipoga mo soo se faavae, e oo lava i feusuaiga amio leaga? E mafai la e lē o mamā ona taumafai e maua se tatalaga i se atunuu e taga ai. Ae, atonu e i ai tulaga o le a lē mafai ai. Peitai atonu e i ai lava ni tulaga e tetea ai faaletulafono i le atunuu o se tasi ma e tatau la ona sailia lena. Po o lē fea lava le tulaga, o lē o loo mamā e mafai ona vavaeese mai lē ua agasala ma faaalia faamaoniga maumaututu faale-Tusi Paia mo le tatalaga o le faaipoipoga i toeaiina o ē o auauna i se tulaga e pei o ni faamasino i le faapotopotoga a molimau Kerisiano a Ieova i lea lava atunuu. Afai la o le a filifili ia lea mulimuli ane ai e toe faaipoipo, o le a lē gaoioi la le faapotopotoga e aveese o ia mai le faapotopotoga faapea o se mulilua, pe afai ua faamauina sana faamatalaga tusia i le faapotopotoga. O lenei faamatalaga e tatau ona i ai se tautoga o le faamaoni i lana paaga o i ai nei ma ioe ia faia se tusi faamaoni faaletulafono tau le faaipoipoga, pe a oti lē sa faaipoipo i ai muamua e tusa ma le tulafono. E ui i lea, o lea tagata o le a palasi lava i a te ia nisi faafitauli atonu o le a oo mai i le lalolagi i fafo atu o le faapotopotoga. Auā ua le masani ona iloa e le lalolagi e sili aʻe le tulafono a le Atua i tulafono a tagata, ma ia tulafono faaletagata ua i ai na o se pule faalētumau.—Ia faatusatusa Galuega 5:29.
ALO ESE MA LE ATAMAI I UIGA LE MAMA UMA MA LE TUINANAU TAU FEUSUAIGA
17. Ia faamatala mai i le Tusi Paia, tulaga e tatau o feusuaiga faaulugalii i olaga o tagata faaipoipoina.
17 Ua i ai le tulaga tatau ma le manino lelei o le feusuaiga faaulugalii i olaga o tagata ua faaipoipoina. Ua saunia e le Atua lenei auala e maua mai ai fanau, atoa foi ma le mauaina ai e matua o le lagona loto malie. (Kenese 9:1; Faataoto 5:18,19; 1 Korinito 7:3-5) E ui i lea sa ia lapatai mai faasaga i le faaaogaseseina o lenei mea alofa.
18, 19. (a) Ai se ā ua le tatau ai i Kerisiano ona faia le taalo i ona lava totoga sā po o le faaaogaseseina ina ia faamalieina ai lava lona tuinanau? (e) O le ā e mafai ona fesoasoani i se tasi ia alo ese ai i lea faiga?
18 Talu ai le faamamafaina i ona po nei o le tulaga tau ituaiga, o le toatele o tagata talavou ua faaosofia lo latou tuinanau tau feusuaiga a o lei oo atu i le tulaga e faaipoipo ai. O le mea ua iʻu i ai, o nisi o i latou ua sailia le faamalieina e ala i lo latou faagaeetia e i latou lava o o latou totoga sa. O lenei mea o le taalo lea i le totoga sa po o le faaaogaina sese foi seia oo ina faamalieina ai lava lona tuinanau. Pe o se mea tatau ma le poto lea e ao ona fai?
19 Ua fautua mai le Tusi Paia: “Ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeapea, (o le ifo i tupua lava lea).” (Kolose 3:5) Pe ua ‘fasiotia ea e se tasi ona itu tino o e le lalolagi e uiga i tuinanau leaga’ i lona taalo i ona lava totoga sa? E leai lava, ae ua na ona ia faagaeetia ai o lona manaoga i feusuaiga. Ua ia ati aʻe se faanaunauga i gaoioiga e lei oo ina tatau mo ia, ma o lea la ua ia faamalieina ai lenei faanaunauga i se auala lē mamā. (Efeso 4:19) Ua uunaia malosi e le Tusi Paia le tagata lena e taumamao i mafaufauga ma amioga o le a taʻitaʻi atu ai i ia ituaiga o faalavelave, ma e tatau ona ia suia lea tulaga i galuega mamā, ma e tatau foi ona ia pulea lelei ia lava. (Filipi 4:8; Kalatia 5:22, 23) Afai o le a taumafai maumauai e faia lenei mea, o le a mafai la ona alo ese mai lenei faaaogaseseina o le tino o le tagata lava ia, ma o le a manuia ai i le mafaufau, faalogona ootia ma le itu faaleagaga.
20. O le ā ua faaalia ai e lē tatau i le tane ma le avā ona faagaloina ni isi uiga e tatau ona taofia i le la faigaaiga faaleulugalii?
20 O le mea ua fai mai ai le Tusi Paia e uiga i le ‘le mamā, tuinanauga faaituaiga, manaoga e tiga ai’ e faatatau i Kerisiano uma, o e nofofua ma e ua faaipoipo. E moni ua i le tane ma le avā le āiā faale-Tusi Paia ma faaletulafono e auai i feusuaiga faaleulugalii ma ia la fiafia foi ona o lo la faia faapena. Peitai, pe o lona uiga ea o le a leai lava ma se taofiofia? Ua matuā tetee lava le Afioga a le Atua i se manatu faapena, e pei o le mea moni ua uunaia Kerisiano uma e ati aʻe le pulea o le tagata lava ia. (2 Peteru 1:5-8) Sa lei manaomia e le tusitala faagaeeina o le Tusi Paia ona faamatala atu i tagata faaipoipo le auala faanatura po o le auala e masani ai, e faafeiloaia ai e totoga faafanau tama o le tane ma le avā le tasi i le isi. O faiga faatauatane ua manino lava ua le mafai ona mulimuli i lenei auala e masani ai. O lea la o tauatane ma tauafafine ua latou faaaogaina isi auala o faiga aiga e faamalie ai logona ua taʻua e le aposetolo o “manao e masiasi ai” ma ‘amio leaga.’ (Roma 1:24-32) Pe ua tatau ea i ulugalii faaipoipoina ona faaaʻoaʻo i nei ituaiga a faiga aiga faatauatane i la laʻua lava faiā faalefaaipoipoga ma saoloto ai mai le silafaga a le Atua i le faaalia o le ‘tuinanau i mea e maasiasi ai’ po o ‘manaoga e tiga ai’?
21. O le ā le avanoa ua tatala atu i se tasi i le taimi nei e tusa lava po o le ā le tulaga sa i ai lona olaga i le taimi ua mavae?
21 I le iloiloina o le mea ua fai mai ai le Tusi Paia, atonu o le a iloa e se tasi o ona mafaufauga sa i ai i nei mataupu sa faatonutonuina e tagata o e pei ona fai mai le Tusi Paia “ua latou le lagona se mea.” Peitai e mafai ona fai se suiga. E mafai e se tasi ona “ofu i le tagata fou” faatasi ma le fesoasoani a le Atua, lea ua faatonutonuina e tusa ai ma le amiotonu moni. (Efeso 4:17-24) I lenei auala ua ia faaalia ai, e moni lava lona faapea mai o loo ia manao e fai le finagalo o le Atua.
O LOU MANATU UA AFAINA TELE AI LOU MANUIA MA LOU SAOGALEMU
22. O ā lelei o le a oo mai loa lava i a i latou o ē faatatauina le fautuaga o le Afioga a le Atua e uiga i feusuaiga mamā?
22 O le faatatauina moni lava o le fautuaga o le Afioga a le Atua e uiga i feusuaiga mamā e lē mamafatū. Sei e faatusatusa fua o le auala ua otooto mai e le Tusi Paia ma le tulaga maualuga a le lalolagi, o tatalaga faaipoipoga, ona aiga malepelepe, tamaiti lē pulea, le talitane, le saua ma le fasioti tagata ona o feusuaiga. (Faataoto 7:10, 25-27) Maeu le manino lelei o le atamai o le Afioga a le Atua! O le teena o le mafaufau faalelalolagi e faavae i luga o tuinanauga faapito ma le matapeapea, ma o le aumaia o ou mafaufauga ia talafeagai ma le fautuaga a Ieova, o le a faamalosia atili lou fatu i moomooga saʻo. Ma o le a suia le tulaga o le fiafiaga o feusuaiga lē mamā, i lou olioli i le loto fuatia ifo mamā ma le filemu tumau o lou mafaufau. O le a faamalosia noataga tau faaipoipoga ma tau le aiga a o tupu aʻe le fefaatuatuai o le ulugalii ma le faaaloalo mai le la fanau.
23. Pe faapefea i le vaaiga a se tasi i le tulaga tau ituaiga ona fesoasoani i le “faailogaina” mo le faasaoina atu i le “lalolagi fou” a le Atua?
23 Ma ia aua lava neʻi melea le mea moni o loo aafia ai o lou faamoemoe mo le ola e faavavau. O le amio mamā faale-Tusi Paia o le a fesoasoani e sili atu i le na o lou soifua maloloina i le taimi nei. (Faataoto 5:3-11) O le a avea ma vaega o le faamaoniga o lou faanoanoa moni i mea inosia ua faia e tagata o ē ua tala pepelo mai e talitonu i le Atua. Ma ua “faailogaina” ai oe mo le faasaoina atu i le “lalolagi fou” a le Atua, lea o le a mau ai ē amiotonu. Maeu la le tāua o lou ‘faia o le mea sili i le taimi nei ina ia maua mai e le Atua o oe ua le ponā ma e lē mataʻuleagaina ma i le manuia.’—Esekielu 9:4-6; 2 Peteru 3:11-14.
[Fesili mo le Suʻesuʻega]
