Mataupu 4

Muamua le Faaumatiaga o le Lalolagi—Ona Filemu ai Lea

1-3. (a) O le ā le faaumatiaga o le lalolagi ua lapataia mai e taʻitaʻi o le lalolagi? (e) Ai se ā ua le faapena ai le mea ua faasino mai e le Tusi Paia o le faaumatiaga lena o le lalolagi na te faaulufaleina mai ai le manuia ma le saogalemu mo lenei lalolagi?

E TUSA ai ma valoaga o le Tusi Paia, a o lei mafai e le fanau a tagata ona olioli i se filemu tumau, e tatau ona aumaia muamua le faaumatiaga o le lalolagi. Ai se ā e tatau ai ona faapena? O le ā le pogai o le a auala mai ai le faaumatiaga valoia? Ma o le ā le iʻuga mo tagata soifua i luga o lenei paneta?

² E tatau ona tatou muai iloa o le faaumatiaga o le lalolagi, lea ua valoia e le Tusi Paia, e lē tutusa ma le mala faalekelope lea ua lapataia mai e nisi taʻitaʻi o le lalolagi, saienitisi, atoa ma isi. O le mala o loo latou tautala i ai o le a auala mai i se oge ua salalau atu i itu uma, i se faamaʻi, polusione po o se taua faaniukelea po o se tuufaatasiga foi o nei mea. Peitai o lea ituaiga o mala o le a lē mafai ai lava ona faalauleleia le auala mo le manuia tumau ma le saogalemu i luga o lenei paneta. Ai se ā e lē mafai ai?

³ Talu ai a lē o le faaleagaina o lenei paneta atoa mo mea faiola uma e ala i le polusione mai i se taua, o le a tuua ma sao ai tagata e lē sili ona lelei—a atonu e sili atu ona leaga—i lo e ua feoti. Atonu o le faasaoina o se tasi, e iʻu lava lea ona o se mea tupu fua, e ui lava ina o ē matitiva atonu o le a aofia i e o le a muai puapuagatia. O le ā se faamoemoe mautinoa o le a i a te oe ia aofia ai i ē o le a faasaoina mai sea mala i le lalolagi? E tusa lava pe e te aofia ai i ē o le a faasaoina, o le ā le faamoemoe o le a mafai ona  i a te oe faapea o le a lē toe foi le olaga i le tulaga lava e tasi o le feainaʻi e pei ona i ai nei?

O LE MEA UA VALOIA E LE TUSI PAIA UA AUMAI AI SE FAAMOEMOE

4. O ai o le a faaumatia i le faaumatiaga o le lalolagi o loo tautala i ai le Tusi Paia?

⁴ O le faaumatiaga o le lalolagi ua valoia e le Tusi Paia e filifilia ma fuafuaina lelei. E lē na o se mala e oo mai ona o “se faafaupuega o mea sese ua faia e tagata mai taimi anamuā lava.” Na i lo le aumaia o le oti i soo se tasi lē faavasegaina, o le a faamamāina ai le lalolagi mai i ē ua tatau i ai le faaumatiaga, o ē ua mafua ai ona i ai tulaga leaga ua i le lalolagi. O le a talafeagai lea ma le mataupu silisili tau atua ua i le Faataoto 2:21, 22:

“Auā o e amio saʻo, latou te mau i le nuu; ma e ua sao a latou amio, e faatotoeina ai i latou; a e vavaeeseina o e amio leaga ai le laueleele, e liaiina ai foi o e amio pepelo.”

5, 6. (a) O le ā o le a tupu i le lalolagi (laueleele) lava ia i le taimi o lenā faaumatiaga o le lalolagi? (e) I lenei tulaga, pe faapefea ona “e pei o ona po o Noa”?

⁵ O le ā la, o le a faaumatia? E toatele ua manatu ua valoia e le Tusi Paia se susunuina o le paneta atoa o le Lalolagi ma mea uma o i ai. Peitai e lē o le tulaga lena e i ai. Na fetalai Iesu lava ia: “Amuia ē agamalu, auā e fai mo latou tofi le nuu (le laueleele po o le lalolagi).” (Mataio 5:5) E mautinoa lava o lena “tofi” o le a lē na o se mea ua muina ma avea ma malala e leai se ola! Ua aumaia foi e le Tusi Paia le faamaoniga mautu a le Atua o le lalolagi o le a tumau e faavavau o se nofoaga e soifua ai le tagata.—Salamo 104:5 [103:5, Dy]; Isaia 45:18; Mataio 6:9, 10.

⁶ I le ō gatasi ma lenei manatu ua tautala ai le Tusi Paia i ē faasaoina ma o le a totoe i luga o le lalolagi pe a mavae le faaumatiaga. (Faaaliga 7:9, 10, 13, 14) Na fetalai Iesu Keriso “e pei o ona po o Noa e faapea foi pe a sau le Atalii o le tagata.” Ina ua oo le faaumatiaga faalekelope i le taimi o Noa sa i ai foi nisi na faasaoina.—Mataio 24:37; 2 Peteru 2:5, 9.

7. O le ā o le a oo atu i lona iʻuga i lena taimi?

 ⁷ O le mea la o le a faaumatia, o le faiga lea o mea a le lalolagi lautele na atiina aʻe e tagata i luga o le lalolagi—faatasi ai ma i latou uma lava e sapasapaia na i lo le vaavaai atu i le Atua ma lana pulega folafolaina mo le lalolagi. (Salamo 73:27, 28 [72:27, 28, Dy]) O le mafuaaga lea, na i lo le faaupuga “le gataaga o le lalolagi,” e pei ona maua i ni isi faaliliuga ua sili atu ona saʻo i o latou faaliliuina o le faaupuga mai le uluai gagana (Eleni) faapea “le gataaga o le vaitaimi” (NE), “le iʻuga o le taimi” (RO), “le faaiʻuga o le faiga o mea” (NW).—Mataio 24:3.

8. (a) Mai le ā le pogai o le a auala mai ai le faaumatiaga? (e) E tatau ona tupu lenei mea a o lei oo atu le faiga o mea a le lalolagi o i ai nei i le ā le tulaga?

⁸ O le puna o le faaumatiaga o le lalolagi o loo sau o le a—lē o tagata—ae o Ieova le Atua. O le tulaga mataʻutia o ona po nei i le polusione, le oge ma mea faapena ua tutupu mai ona o le faatalalē o le tagata, lona sese ma le iʻuvale o le a lē o mea ia e pogai ai le faaumatiaga. Ae o faamaoniga ia o le loto faapito ma le lē taulau aʻiaʻi o le faiga o mea a le lalolagi i le taimi nei. Ua na ona aumaia ai o le mafuaaga tatau mo Ieova le Atua na te aveesea atoatoa ai lena faiga o mea. Ua ia folafolaina o le a ia faia lea gaoioiga a o lei oo ina matuā lafotuina lenei faiga o mea a le lalolagi po o faaumatia o ia e ia lava. (Faaaliga 11:17, 18) Ae pe o lenei ea ituaiga o gaoioiga mataʻutia o le a pau lea o le auala?

LE MAFUAAGA E TATAU AI ONA FAAMUTAINA LENEI FAIGA O MEA A LE LALOLAGI MO LE OO MAI O LE MANUIA MONI

9, 10. Pe faapefea i tala faasolopito o le tagata ona faaalia le manaomia o se mea e sili atu le mataʻutia na i lo le na o se faaleleia o le faiga o mea a le lalolagi o i ai nei?

⁹ Atonu e foliga mai i nisi o le a nā ona faia lava e le Atua o ni suiga i le faiga o mea a le lalolagi o i ai nei, na i lo le faaumatiaina atoatoa. Peitai ua  faaalia e le Tusi Paia ua silafia lelei lava e le Atua o lenei faiga o mea a le lalolagi ua i tala atu o se tulaga e mafai ai ona toe faaleleia.

¹⁰ Sei e iloilo mo oe lava le selau ma selau o suiga ua uma ona faia e tagata i le gasolo mai o senituri. Ia mafaufau i ituaiga o faiga malo eseese ua atiina aʻe e tagata—setete faaitumalo, malo faatupu, malo temokarasi, malo komunisi ma malo pulea e tagata lautele e oo foi i faiga malo pulea e tagata tautalatasi. Ia manatua pe ua faafia ona aveesea ma toe faatulaʻi mai taʻitaʻi ma faiga malo a e suia ese malo fou—e auala i faiga palota, faoā o le pule, ala i fouvalega—peitai e aunoa lava ma se vaifofo tumau mo faafitauli o le fanau a tagata. E oo lava i tagata naunau faamaoni o loo taumafai ia faalelei mea tau le tagata, ua latou iloa ua taofia a latou taumafaiga e le faiga o mea a le lalolagi o loo saisaitia ai foi latou. E pei lava ona sa iloaina e se taʻitaʻi atamai o aso anamua, i ni taumafaiga a le tagata lava ia, “o le mea ua piopio e le mafaasaʻoina.”—Failauga 1:14, 15.

11-13. (a) O le ā ua taofia tagata mai le faia o suiga i le faiga o mea a le lalolagi o i ai nei mo le lelei o le fanau uma a tagata? (e) O lea la, pe o le ā le tele atonu e oo atu i ai le faataʻitaʻia o le suiga?

¹¹ O aai o le lalolagi, mo se faataʻitaʻiga, ua mala i faafitauli, peitai ua lē mafai e tagata ona sola ese mai ai ma toe aumai se amataga fou. Ua faapena foi ona moni i faiga faaletamaoaiga ma galuega a le lalolagi. O le manatu faapito ma le loto atunuu ua taofia ai soo se suiga mo le lelei o le fanau a tagata i lona aotelega.

¹² O lea la, o le faiga atoa o mea a le lalolagi ua pei o se fale ua fausia i luga o se faavae leaga ona o le leaga o fuafuaga ma le leaga o mea fai fale. O le ā le aoga o le taumafai e toe fetuunai meāfale pe toe faafou ma toe faaleleia le fale? A o tu pea le fale, o le a faaauau pea faafitauli ma o le a faaauau pea ona faasolo atu ina pala le fale. E tasi lava le mea e ao  ona fai o le talepeina lea i lalo a e toe fausia se isi fale i luga o se faavae lelei.

¹³ Sa faaaogaina foi e Iesu se faaaʻoaʻoga tali faapena i lona faapea atu “E le utufia foi le uaina fou i fagu paʻu tuai.” O le a pāpā fagu paʻu tuai mai uaina fou. (Mataio 9:17) O le mea lea sa ia lei taumafai ai e toe faatuina le faiga o mea a Iutaia lea sa ia soifua ai, ae sa ia talaʻia le malo o le Atua, na o lea le faamoemoe mo le manuia ma le saogalemu. (Luka 8:1; 11:2; 12:31) E faapea foi i o tatou aso, o le a lē na ona tau fonofonoina pe tau faatulagaina e Ieova le Atua le faiga o mea a le lalolagi o i ai nei, auā e leai se aoga tumau e maua mai ai.

14. Pe o le faia ea o tulafono fou o le a uunaia le naunau ai o tagata i le amiotonu?

¹⁴ Ua faamamafaina e le Afioga a le Atua le upu moni, e lē mafai ona faatulafonoina le amiotonu i loto po o fatu o tagata. Afai e leai se alofa mo le mea saʻo e tusa lava po o le ā le tele o tulafono e lē mafai ona oo i fatu o tagata. I le Isaia 26:10 ua tatou faitau i ai: “E alofagia le ua amio leaga, a e le aʻoaʻo lava o ia i le amiotonu; o le nuu o i ai le amiotonu e agafaapiopio ai o ia, na te le manatua foi le mamalu o Ieova.”—Ia faatusatusa Faataoto 29:1.

15, 16. Pe faapefea i le leai o se alofa moni i le amiotonu i le vaega a tagata e toatele ona faaalia i le latou tali atu i le finagalo o le Atua?

¹⁵ O le mea moni lava, o le toatele o tagata e sili i a i latou le nofo ai pea i lenei faiga o mea e ui lava ina iʻuvale ma amio leaga—na i lo le liliu atu i le amiotonu ma gauai atu i le pulega mai le Atua. E ui lava ina vaaia pea le iʻuvale ma le tau faaoleole o ana faiga faalemalo, le lē aogā o ana faigā tauia, le pepelo o lotu a le lalolagi ma le faamaoniga manino o le poto maoae o ana faiga faasaienisi ua na ona faatupuina ai o faafitauli e sili atu le tele i lo mea na te foia—e ui i na mea uma, a e toatele lava ua teena pea le vaai atu i le Atua ma lona malo o le pogai moni o le manuia ma le saogalemu. Ua pei lava o tagata Isaraelu  ia na fetalai ai le Atua: “Ua vavalo le au perofeta i mea pepelo, ua pule foi le au faitaulaga ma le usiusitai ia te i latou; ua loto foi loʻu nuu ina ia faapea; ia, se a se mea tou te faia i ona iuga?”—Ieremia 5:31; Isaia 30:12, 13.

¹⁶ E ui lava ina atonu o le a e iloa e faigata ona malamalama i lenei mea, ae ua e vaaia lava e oe le lē amanaia e tagata o faamaoniga uma o se mea faapitoa e lē lelei. E lē taumate ua e vaaia tagata o ē o loo tausia pea ni faiga po o ni amioga ua latou iloa lelei lava e faaleagaina ai o latou lava soifua maloloina ma lo latou saogalemu atoa ma o latou aiga, ma ua latou teena foi taumafaiga uma faaletagata e fesoasoani ai i a i latou ia suia. Peitai afai e teena e tagata le fautuaga ma le taʻiala a le Atua, o le a sili atu lava ona mataʻutia. O tagata latou te faia lea mea ua faaalia latou te lē mananao i le upu moni ma le amiotonu. O lea ua fai mai ai le Tusi Paia i a i latou ia: “Ua faaalia mai foi le toasa o le Atua mai le lagi i le amio faalematau ma le amioleaga uma lava a tagata, o e taofi i le upu moni ma le amioletonu . . . auā o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana lava lea e faavavau ma lona Atua; o lea foi ua le mautali ai i latou.” (Roma 1:18-20) I le ituaiga o tagata lava lea, sa fetalai Iesu: “Auā ua mafiafia loto o lenei nuu, ma ua faalogo gata o latou taliga i faalogo, ua moeiini foi o latou mata; neʻi vaai o latou mata, ma faalogo o latou taliga, ma lagona o latou loto ma liliuina i latou, ma ou [le Atua] faamaloloina i latou.”—Mataio 13:15.

17. Afai e moni e le fiafia le Atua i le aumaia o le faaumatiaga i luga o le fanau a tagata, ai se ā la o le a ia faia ai?

¹⁷ Ua saʻo ai lava, le i ai o le taimi e muta ai le onosai ma le alofa tunoa o le Atua. Afai e lē o lea, o fea la o le a i ai lona alofa i ē amiotonu? E lē mafai ona ia liliu ese ona taliga i le latou alaga mo le laveaiina mai le faapuapuagatiaina ua aumaia e le amioleaga i luga  o lenei lalolagi. (Luka 18:7, 8; Faataoto 29:2, 16) O lea la o tulaga ua i ai e manaomia ai le faaumatiaga o le lalolagi; ua latou malilie ia fai faapena e le Atua pe afai o le a maumauaʻi ma le moni i le mea saʻo ma le faamasinoga tonu ma faaalia ai le aga alofa mo ē foʻi o ē alolofa i le mea ua saʻo. E ui i lea ua lē o se mea faapea e fiafia ai le Atua le aumaia o le faaumatiaga i luga o le fanau a tagata. E pei ona ia fai mai: “O loo fetalai mai le Alii o Ieova, Ou te fiafia ea i le oti o le ua amio leaga? ou te le fiafia ea pe a liliu ese i lona ala ia ola ai o ia? . . . o lenei, liliu mai ia outou tou te ola ai.”—Esekielu 18:23, 32.

18. O le ā le tau e tatau ona totogia e togiolaina ai tagata o ē alolofa i le mea ua saʻo mai le lē saogalemu?

¹⁸ O le faaumatiaga o i latou o loo nonofo pea ma lenei faiga o mea a le lalolagi, o le tau lea e tatau ona totogia ina ia togiolaina mai i latou o ē alolofa i le mea ua saʻo, mai le lē saogalemu ma le puapuagatia. Ua talafeagai lea ma le mataupu silisili a le Tusi Paia. “E fai ma togiola mo lē amiotonu lē ua amio leaga.”—Faataoto 21:18, ia faatusatusa Isaia 43:1, 3, 4.

IʻUGA AOGA

19. O ā pa vaeloto i le filemu o le lalolagi o le a aveesea e le faaumatiaga o lenei faiga o mea?

¹⁹ O le ā o le a iʻu i ai mai le faaumatiaga o le faiga o mea a le lalolagi o i ai nei ma e o lagolagoina? O le a aumaia ai le pulega amiotonu i le lalolagi lautele lea o le a galulue faatasi ai ma le autasi e na faasaoina, e lē i se tauvaga loto faapito. O le a soloia le fevaevaeai faava-o-malo ma tuaoi tau upufai o malo. O le a soloia papupuni e uiga i le tau o mea ma lafoga. O le a mavae atu foi le mamafatū o tupe faaalu i faiga faafitafita. O le a mou atu foi le pā vaeloto i le va fealoaloai o loo taofia ai le fanau a tagata mai le auau faatasi pei o se aiga i luga o le lalolagi. O le itu e sili ona tāua lea i nei mea uma, ona o tagata uma o le a ola ai i lea taimi o le a tautala le tasi i le tasi i le ‘gagana mamā  e tasi’ o le upu moni, ma tapuai ai i Le na Foafoaina i latou i le “agaga ma le upu moni,” e lē toe fevaevaeai i latou i faiga lotu faataulāitu, uputuu ma talitonuga faalotu faia i manatu o tagata.—Sefanaia 3:8,9 [Sophonias 3:8,9, Dy]; Ioane 4:23, 24, NW.

20. E pei ona faasinoina mai e le Salamo 72, o le ā le tulaga o le a i ai i le lalolagi lautele?

²⁰ I le malo o le Atua e ala i lona Alo o Iesu Keriso o le a pulea atoa le lalolagi, o le a vaaia ai le faataunuuga o le salamo anamua o le Tusi Paia i le uiga e sili mamao atu lona tele na i lo aso o Isaraelu anamua: “O lana nofoaiga e tupu olaola mai ai le ua amiotonu; e manuia tele ai, seia leai se masina. E pule foi o ia e pau mai i le tasi sami e oo atu i le tasi sami; e pau mai le vaitafe e oo atu i tuluʻiga o le lalolagi.”—Salamo 72:7, 8 [71:7, 8, Dy].

21. Pe o le a faapefea ona lelei mo le laueleele lava ia le oo mai o le faaumatiaga o le lalolagi?

²¹ O le a aogā foi mo le laueleele lava ia le oo mai o le faaumatiaga o le lalolagi. O le a lē toe faaleagaina ma pisia e le au faapolusione matapeapea ma ē sauā faatamaʻia mea. O vaituloto, vaitafe ma vasa faapea foi ma le ʻea, o le a maua le mapusaga mai le otaota uma ua sasaa atu i ai ma o le a lē pine a e faamamāina i latou. Ma o lea o le a faaalia ai e le Atua na te lei lafoaia lana uluai fuafuaga ina ia i ai se paneta pei se faatoaga mamā ua faatumulia i tagata o ē ua atagia mai ai uiga matagofie o Lē na Foafoaina i latou.—Kenese 1:26-28; Isaia 45:18; 55:10, 11.

22. Pe faapefea i le aumaia o lea ituaiga o faaumatiaga, ona o gatusa pea ma le avea o le Atua ma ‘Atua o le Filemu’?

²² O lea, o le aumaia e le Atua o le faaumatiaga o le lalolagi ua lē tetee lea i lona faapea o ia o le ‘Atua o le filemu,’ e lē tetee foi i lana tupu faa-Mesia o Iesu, faapea o le “Alii o le Filemu.” Talu ai ona o le la naunau i le filemu ma le faamasino tonu, ua la faia ai lenei gaoioiga ia toe faafoisia mai le lalolagi i le tulaga mamā ma le amiotonu.—1 Korinito 14:33; Isaia 9:6, 7.

23, 24. Afai tatou te mananao ia olioli i se lumanai manuia ma le saogalemu, o le ā le mea tāua e tatau nei ona tatou faia taitoatasi?

 ²³ I le tulaga la taitoatasi, o le ā le mea e mafai ona tatou fai? Sa faaalia e Iesu Keriso o i latou e lē faautagia faatonuga a le Atua na aʻoaʻoina e Iesu, ua ati aʻe o latou lava faamoemoega totino mo le lumanai i luga o le “oneone” ma o lea ati aʻe o le a lē mafai ona lavātia afā malolosi o teteega. Sa ia faaalia le manaoga tāua tele o le ati aʻe o ō tatou faamoemoe i luga o le usiusitai i le Afioga a le Atua pe a tatou mananao ia maua se lumanai manuia ma le saogalemu.—Mataio 7:24-27.

²⁴ Ae ai se ā ua faatali ai pea le Atua e oo mai i le taimi nei i le faia o le gaoioiga mo le faamutaina o le amio leaga ma le puapuagatia? Ua talia foi e le Tusi Paia lenei fesili ma faaalia le mea sa faia e le Atua i senituri uma ua mavae i le galueaiina o lana fuafuaga.

[Fesili mo le Suʻesuʻega]