O Se Finauga o Loo Aafia ai Oe
Mataupu 5
O Se Finauga o Loo Aafia ai Oe
1. Ai se ā ua faigata ai i tagata ona malamalama i le mafuaaga ua faatagaina ai e le Atua tulaga leaga i le fanau a tagata?
E UI lava ina i ai le faanaunauga taatele mo le filemu ma le saogalemu, peitai o le tala faasolopito o le tagata toetoe lava mai le amataga, ua faaleagaina pea lava e le toto masaa ma isi mea leaga. Talu ai ua faaalia e le Tusi Paia e inosia e le Atua ia ituaiga o mea, ai se ā la ua na lē avatua ai se taofiga i nei tulaga e oo mai i le taimi nei? Ma le mautinoa lava e lē faapea ona ua leai se naunau mai. O le Tusi Paia, faapea foi ma le matagofie o galuega faalelalolagi a aao o le Atua, ua aumaia ai le anoano o faamaoniga o lona alofa ma le naunau i le fanau a tagata. (1 Ioane 4:8) E sili atu ai lona tāua i mea uma lava, o le mamalu o le suafa o le Atua lava ia o loo aafia ai, talu ai ona o ia lava tulaga ua faapogai ai ona taʻuvaleaina o ia e tagata. O le ā la le mafuaaga atonu ua ia faapalepale ai i nei uiga lē toafilemu ma le saua mo le afe ma afe o tausaga?
2. (a) O fea i le Tusi Paia tatou te iloa ai pe ai se ā ua faataga umi ai pea e le Atua tulaga leaga? (e) O le ā ua faamaninoina o le tala a le Tusi Paia e uiga i a Atamu ma Eva o se mea moni o tala faasolopito?
2 Ua maua le tali i le tusi muamua o le Tusi Paia i le mea ua ia fai mai ai e uiga i a Atamu ma Eva. Ua lē na o se faamatalaga uiga lua lenei. O se mea moni lava faatala tuufaasolopito. Ua aumaia e le Tusi Paia ni faamaoniga tusitusia atoatoa o gafa amata atu i le uluai senituri o o tatou Aso Taatele seia toe foi atu i tua i le uluai tagata. (Luka 3:23-38; Kenese 5:1-32; 11:10-32) Ona o ia o le tatou augātamā, o lea ua maua ai tatou i se aafiaga mai i a Atamu. Ma o mea ua taʻu mai e le Tusi Paia i a i tatou e uiga i a te ia ua fesoasoani i a i tatou ia malamalama i tulaga o loo afaina ai o tatou olaga i aso nei.
3. O le ā le ituaiga o sauniuniga sa faia e le Atua mo le fanau a tagata i le amataga?
3 Ua faaalia e le Tusi Paia, o sauniuniga uma lava a le Atua mo le uluai ulugalii sa matuā lelei lava. Sa i a i laʻua mea uma mo se olaga fiafia—o se aiga pei se faatoaga i le mea sa taʻua o Etena, le anoano o mea taumafa eseese, o galuega faamalie loto, le faamoemoe o le vaavaai atu i le tuputupu aʻe o le laʻua aiga ma faatumu le lalolagi, ma le faamanuiaga a Le na Foafoaina i laʻua. (Kenese 1:28, 29; 2:8, 9, 15) O ai se tasi e mafai ona toe talosaga atu mo se isi mea?
4. (a) I lona foafoaga, i ā auala na ese ai le tagata mai isi mea ola faalelalolagi? (e) O le ā le auala sa avatu ai taʻiala moomia i a Atamu?
4 O faamaumauga faagaeeina i le Kenese ua faaalia ai sa i ai le tagata i se tulaga uiga ese lava i luga o le lalolagi. Na o le tagata lava na faia i “le faatusa o le Atua.” (Kenese 1:27) E ese ai na i lo manu, sa i a te ia le fatu ua i ai le atamai tau amio ma sa tuuina atu foi i a te ia le faitalia po o le saolotoga e filifili ai. O le pogai lena na faaauupegaina ai o ia i le malosi e fetuunaʻi ai le mafaufau ma faamasino ai. Ina ia taʻitaʻia le tagata, sa totoina e le Atua i a Atamu le atamai o le lotu fuatia ifo ina ia uaʻi atu ai o ia agaʻi i le lelei, pei o se tagata lelei atoatoa i le “faatusa” o Le na Foafoaina o ia. (Roma 2:15) E ese ai i nei mea uma lava, ae sa fetalai le Atua i lona atalii faalelalolagi, ma taʻu i a te ia le mafuaaga ua ia ola ai, le mea e tatau ona ia fai ma lē ua na saunia mea matagofie uma o loo siosiomia ai o ia. (Kenese 1:28-30) Pe faapefea la ona tatou faamatalaina tulaga leaga o loo i ai nei?
5. (a) O le ā se manaoga faigofie na tuu atu e le Atua i le tagata, ma mo le ā le mafuaaga? (e) Ai se ā na aafia tatau ai faamoemoega mo le olaga i le lumanai o le tagata?
5 Ua faaalia e le faamaumauga faale-Tusi Paia se mataupu na lāgā—se mataupu lea ua aafia ai tatou uma taitoatasi i le taimi nei. Na auala mai lenei mataupu i ni taualumaga na tuputupu aʻe, a o lei leva lava ona mavae le foafoaga o le uluai tane ma le fafine. Sa tuuina atu e le Atua i le tagata le avanoa e faaalia ai lona talisapaia alofa o Lē na Foafoaina o ia i lona usitai i se manaoga faigofie. O lea manaoga ua lē faapea ai ua leai se mafaufau po o ni vaivaiga o le tagata e tatau ona taofiofia. Ae sa aafia ai se mea sa lelei i a te ia lava e tatau ma talafeagai—o le ʻaia o mea ai. E pei ona fetalai atu e le Atua i le tagata: “O laau uma o i le faatoaga e te ʻai ai; A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:16,17) O lenei manaoga e lei faapea na aveesea ai mai le tagata soo se mea e moomia mo le olaga; sa mafai e ia ona ʻai i isi laau uma lava o le faatoaga. E ui i lea o faamoemoega mo lona olaga i le lumanai se matuā aafia moni ai lava, ma ua tatau ai lava. Ai se ā? Auā o Lē na taʻuina atu lena poloaiga o le Puna lava ia ma Lē Faatumauina le ola o le tagata.
6, 7. (a) Se manū e mafai e o tatou uluai matua ona ola e faavavau pe ana la gaoioi ia talafeagai ma le ā le mataupu faavae moni e uiga i le pulega? (e) Ai se ā sa tatau ai i a Atamu ona faaosofia e usitai i le Atua?
6 E le o le fuafuaga a le Atua ia oti le tagata. E lē o i ai se taʻua o le oti i a Atamu vagana le faasalaga mo le lē usitai. Sa i luma o tatou uluai matua le faamoemoe matagofie o le ola e faavavau i le aiga filemu pei se paka. Ina ia mafai ona oo atu i lea tulaga, o le ā sa manaomia mai i ā i laʻua? Pau lava le mea ia la iloa lelei o le lalolagi o loo la ola ai e ā le Atua lea, Lē na Faia, ma ona Lē na Foafoaina, o le Atua lava la le Pule moni o lana foafoaga. (Salamo 24:1, 10 [23:1, 10, Dy] Sa tatau lava ma le mautinoa i a te Ia lenei o lē na tuuina atu mea uma sa i a te ia i le tagata, e oo lava i le ola, ona maua le talisapaia usiusitai i soo se manaoga lava atonu na te tuuina atu i le tagata. E ui i lea o lea usiusitai e lei faamalosia. E tatau ona faaosofia e le alofa.—1 Ioane 5:3.
7 Na lei taulau ona faaalia e Atamu o lea alofa. Pe sa faapefea ona oo mai lenei mea?
O LE AMATAGA O LE TETEE I LE PULEGA TAU ATUA
8. (a) O fea ua faaalia mai e le Tusi Paia na amataina ai le tetee i le pulega a le Atua? (e) Ai se ā ua alagā tatau ai ona talitonu i le malo o agaga?
8 Ua faalia e le Tusi Paia o le tetee i le pulega a le Atua sa uluai amata e lē i luga o le lalolagi, ae i le nofoaga o agaga, le nofoaga lea e lē vaaia e mata o le tagata. Pe e tatau ea i a i tatou, e pei o le toatele o isi, ona masalosalo i le i ai o lena nofoaga talu ai ona e lē vaaia e i tatou? E leai; e lē onomea lea manatu. E lē mafai ona vaaia le kalave, faapea foi le matagi. Peitai e mafai ona faalogoina o la āuga. E faapea foi la āuga o le malo faaleagaga ona matauina. “O le Atua o le agaga lava ia,” ma o ana galuega o le foafoaga o loo siomia ai tatou. Afai tatou te talitonu i a te ia, o le a faamalosia foi tatou e talitonu i le malo po o le nofoaga o agaga. (Ioane 4:24; Roma 1:20) Peitai o ai isi e aiināina lena nofoaga?
9. O ā ituaiga o peresona e i ai agelu?
9 E faitau miliona peresona agaga, o agelu, na faia a o lei i ai le tagata. (Salamo 103:20 [102:20, Dy]) O i latou uma nei na foafoaina e lelei atoatoa; e aunoa ma se faanaunauga leaga i soo se tasi. Ae, pei lava o le foafoaga mulimuli ane ai a le Atua o le tagata, sa tuu atu foi i a i latou le faitalia saoloto. O le mea lea sa mafai ai e i latou ona filifili se auala o le faamaoni po o le lē faamaoni i le Atua.
10, 11. (a) Pe faapefea ona i ai i se mea agaga lelei atoatoa se faalogona le uaʻi atu e faia se sese? (e) O lea, pe sa faapefea e se tasi o agelu ona avea ma Satani?
10 Peitai o le fesili ua fesiligia e le toatele o tagata: Pe faapefea, ona o ni meaola lelei atoatoa, one mafaia e soo se tasi o i latou ona i ai se faalogona ia faia se sese? Ua tatou iloa e i tatou lava i o tatou olaga le tupu aʻe o se mea ua faafesagai ai tatou ma ni tulaga e ao ina uia—o ni isi e lelei, o ni isi foi e leaga. E lē faapea ona ua i a i tatou le atamai e iloa ai avanoa leaga, o le a leaga ai tatou, a ea? O le fesili moni lava: I luga o le ā le auala o le a taulai i ai o tatou mafaufau ma o tatou fatu? Afai o le a tatou taofi mau mafaufauga i mea leaga, o le a taʻaina la tatou e faatupuina tuinanau leaga i o tatou fatu ma o lenei tuinanau o le a iʻu lava ina uunaia tatou e faia mea leaga. Ua faapena ona faamatalaina ai e le tusi tala o le Tusi Paia o Iakopo le auala ua fanau mai ai le agasala. “A ua taitasi ma faaosoosoina, pe a tosina ma maileia i lona lava tuʻinanau; pe a to le tuʻinanau ona fanau mai ai lea o le agasala; a matua le agasala ona fanaua mai ai lea o le oti.”—Iakopo 1:14, 15.
11 Ua faaalia e le Tusi Paia e i ai se tasi o atalii agaga o le Atua na ia faatagaina tuʻinanauga sese e faatupuina i a te ia. Sa ia vaaia se avanoa e mafai ai e le foafoaga faaletagata a le Atua ona gauaʻi atu i a te ia na i lo le Atua, ma ua manino lava sa amata loa ona ia momoo atu i sina vaega o le tapuaiga o loo tuuina atu i le Atua. (Luka 4:5-8) I le gaoioi la e tusa ma lona tuinanau sa avea ai loa o ia ma se tetee atu i le Atua. Mo lena mafuaaga, ua taʻua ai o ia i le Tusi Paia o Satani, o lona uiga o Lē tetee.—Iopu 1:6.
12. O le ā le faavae lelei e talitonu ai i le i ai o Satani?
12 E moni lava, i lenei luasefulu senituri o le manao i mea faitino, o se talitonuga i se peresona agaga e pei o Satani ua lē taatele. Peitai ane, o lenei lava tulaga o le taatele po o le lauiloa sa leʻi avea lava ma taʻiala moni i le upu moni. Mai i a i latou o e suesueina faamaʻi, sa i ai se vaitaimi na le taatele ai le manatu o le iloiloina o siama le vaaia, peitai o le vaitaimi nei ua matuā iloaina ona auga. O le mea moni, a na faapea o le tulaga taatele po o le lauiloa o se taʻiala tonu e ola ai, se manū ua ese mamao le tulaga e i ai le lalolagi na i lo le mea ua i ai nei. O Iesu Keriso, o ia foi na afio mai le nofoaga o agaga, sa mafai ona ia saunoa ma le pule i le olaga i ina. Sa ia faasino moni lava i a Satani o se peresona agaga, ma o ana gaoioiga e mafai ona aumaia faaosoosoga mataʻutia i olaga o tagata. (Ioane 8:23; Luka 13:16; 22:31) Na o le taliaina lava o le i ai o lenei agaga Tetee o le a mafai ai ona tatou malamalama i le amataga o tulaga leaga i luga o lenei lalolagi.
13. Pe sa faapefea ona talanoa Satani ma le fafine o Eva, ma ai se ā i lena auala?
13 O le faamaumauga faagaeeina i le Kenese mataupu e 3 ua faamatalaina ai lona sagaʻi atu i lana taumafaiga ia faamalieina lona tuinanau sese. I le faatoaga o Etena, sa ia alu atu i le fafine o Eva, peitai sa ia faia i se uiga taufaasese ina ia natia o ia. Sa lei vaaia o ia e mata o Eva, ma o le taimi foi lea e lei i ai sona sui faalelalolagi e mafai ona ia galue mai ai; o lea la ua faaalia ai e faamaumauga sa faafaigaluegaina e Satani se manu ua masani lava ona vaaia e lenei ulugalii—o se gata lea. Ma le mautinoa lava i lona faaaogaina o le mea ua tatou taʻua i aso nei o le tautala ae lē foliga mai le tagata lava lea o loo tautala, ua ia faafoliga mai ai o ana upu e mapuna aʻe lea mai i lenei mea faiola, e fetaui lelei ma ona uiga faanatura o le atamai e tusa ma le tulaga na ia manao e faia ai.—Kenese 3:1; Faaaliga 12:9.
14. O le ā na fai atu ai Satani i ā Eva, ma o le a le faamoemoe manino?
14 Na i lo le faia o sana ofo tuusaʻo i le fafine ina ia vaai atu i a te ia o lana pule, sa sailia muamua e Satani e totō se tulaga masalosalo i lona mafaufau i le fesili atu: “E moni ea na fetalai mai le Atua lua te le aai i laau uma o le faatoaga?” O lona uiga moni e tusa lava na ia fai atu: ‘O se mea lava e faanoanoa ai ina ua fai atu le Atua e aua e te lua aai i laau uma o le faatoaga.’ I lea faamatalaga ua ia aumai ai se faaiʻuga faapea, atonu ua taofia e le Atua se mea lelei. Sa tali Eva i lona taʻua o le faasaaga a le Atua e aofia ai na o le laau e tasi, faapea foi ma le taʻua o le oti o le a aumaia e le lē usiusitai. I lea tulaga, sa taumafai loa Satani na te faaitiitia le faaaloalo i le tulafono a le Atua i le faapea atu: “Lua te le oti lava. Auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.” (Kenese 3:1-5) I le fesagai ma se tulaga faapena, o le a se manū e te faia?
15. (a) Ai se ā na paʻū malaia ai Eva i a Satani? (e) O le ā na faia e Atamu?
15 Ua faaalia e faamaumauga a le Tusi Paia na faatagaina e Eva o ia e taaina atu i lona tuinanau manatu faapito, ma na ia aina ai le fua o le laau na faasaina e le Atua. Mulimuli ane, i lalo o lana faatauanauga na faapea ai foi i lana tane o Atamu ona ai ai, ma filifilia ai ia tutu faatasi ma ia na i lo Lē na Faia o ia. O le a na iʻu i ai?—Kenese 3:6; 1 Timoteo 2:14.
16. O lea la, o le ā ua mafua ai le solitulafono ma le sauā, faapea foi faamaʻi ma le oti, ua faailogaina ai le i ai o le tagata talu mai le taimi o Atamu?
16 Na palasi atu le aiga atoa o le tagata i le agasala ma le lē lelei atoatoa. Ua le mafaia nei e Atamu ona faasolo atu le lelei atoatoa ua le o toe i a te ia nei i ana fanau. E pei lava o le faia o ni kopi o se mea mai se ata o loo leaga foi ia—o le a faapena ona leaga uma ai lava kopi. O lea ua fanau mai ai fanau uma lava a Atamu i le agasala, faatasi ma le vaivaiga tuufaasolo agai i le loto faapito. (Kenese 8:21) O lenei le uiga, i le lē faaleleia, ua taʻitaʻia atu ai i le gaoi, toso teine, fasioti tagata ma isi leaga uma lava ua aveesea ai le manuia ma le saogalemu mai le fanau a tagata. O lenei foi tuufaasologa o le agasala ua iʻu ai i faamaʻi ma le oti.—Roma 5:12.
O LE FINAUGA NA LĀGĀ
17, 18. (a) Ina ia malamalama i le mafuaaga o le faapalepale umi o le Atua e uiga i lenei tulaga, o le ā le finauga tāua e tatau ona talisapaia? (e) O le ā tonu lava le finauga na lāgā?
17 I le malamalamaga o nei mea moni, ua toe taliu atu ai o tatou mafaufau i le fesili na uluai lāgā. Ai se ā ua faapalepale ai le Atua i lenei tulaga, ma tuu ai pea e tuputupu aʻe seia oo i le tele ua i ai nei? E mafua ona o le lafo na lāgā ma ona āuga i luga o le vateatea aoao. Pe faapefea ona moni o lenei mea?
18 I lana faafinauga faapea o le tulafono a le Atua i a Atamu ua lē lelei mo le tagata, ma o lona luʻiina o le mea na fetalai ai le Atua e oo ane ona o le lē usiusitai, ua aumaia ai e Satani se faafesili i le pulega a le Atua. Sa ia lei fesiligia le mea moni o le Atua o le pule. Peitai o le finauga na lāgā e Satani e taulai tonu lava lea i le saʻo o le pulega a Ieova ma le amiotonu o Ona ala. I se uiga faaʻoleʻole, sa finau atu Satani faapea o le a sili ona lelei mo le tagata pe afai e gaoioi lava ia tu toatasi, ma faia ana lava faaiʻuga na i lo lona usitai atu i le taʻitaʻiga a le Atua. (Kenese 3:4, 5) Peitai o le mea moni lava o le faia faapena e le tagata o le a mulimuli ai o ia i le taʻitaʻiga a le fili o le Atua.
19. (a) O le ā se tasi mea na aafia i le finauga ma o fea o faaalia ai lea mea i le Tusi Paia? (e) Pe faapefea ona aafia ai tatou i lenei finauga?
19 E i ai se tasi mataupu na aafia ai. Talu ai le luʻitau faasaga i a te ia o nei mea na ia faia i Etena, o le ā o le a faia nei e isi? Mulimuli ane i ona po o le tagata o Iopu, sa fai aloaia ai e Satani se tuuaiga faapea o i latou o auauna i a Ieova, ua latou le faia ona o se alofa i le Atua ma lana pulega, peitai ona o manatu faapito, talu ai o loo aumaia e le Atua mea uma mo i latou. Ua manatu Satani, afai o le a tuuina i lalo o omiga e leai lava se tasi o le a faamaonia o se lagolago faamaoni o le pulega aoao a Ieova. Sa faapena ona tuuina ai le faamoni ma le faatuatuaina o galuega ola fai mafaufau uma i le lagi ma le lalolagi i se tulaga faafesili. O le mea lea ua aafia ai oe i le finauga.—Iopu 1:8-12; 2:4, 5.
20, 21. I le tolopoina o le faaumatiaga o ē na fouvale, o le ā le avanoa na tuuina atu e Ieova i ana foafoaga e aofia ai agelu ma tagata?
20 I le faafesagai ma lenei ituaiga o luʻi, pe o le ā o le a fai nei e Ieova? E faigofie lava ma tatau i a Ieova ona faaumatia Satani, Atamu ma Eva i le taimi o le fouvalega i Etena. O le a faaalia ai le mana silisili ese o Ieova. Peitai pe o le a taliina ai ea fesili ua mapuna aʻe nei i mafaufau o tagata uma na faia e le Atua o ē o matauina nei taualumaga? O le manuia ma le saogalemu e faavavau o le vateatea e moomia ai le taliina atoatoa o nei fesili, i le taimi e tasi ia aua lava nei toe lāgā. E le gata i lea, o le faatuatuaina ma le faamaoni o le foafoaga fai mafaufau a le Atua, ua i ai nei i se tulaga faafesili. Afai latou te alolofa moni i a te ia, o le a latou mananao la e taliina e i latou lava lenei moliga pepelo. Ua naunau Ieova e tuu atu i a i latou le avanoa e faia ai lea lava mea ma ia faaalia le tulaga moni o loo i ai o latou fatu e uiga i lana pule aoao. Ma le tasi foi mea, o lona faatagaina o Atamu ma Eva e aumaia ni fanau (e ui lava ina lē atoatoa ona lelei), ua ia taofia ai le soloiesea o le aiga o le tagata e lei fananau mai—le aiga lea ua aofia ai tatou uma lava o ola mai nei. O lea tulaga ua avatu ai i nei tagata le avanoa e filifili ai mo i latou lava pe latou te usiusitai i le pulega tau atua. O lena filifiliga ua faafesagai nei ma oe!
21 O lea la, na i lo le tuuina atu loa lava o le faasalaga oti i Etena, sa faatagaina e Ieova ē na fouvale ina ia i ai mo sina taimi. Sa tulia Atamu ma Eva mai Etena, ia feoti a o lei mavae le afe tausaga. (Kenese 5:5; ia faatusatusa Kenese 2:17 faatasi ma le 2 Peteru 3:8) O Satani foi o le a faaumatia i le taimi atofaina, pei lava o ia o se gata ua tuʻimomomoina lona ulu.—Kenese 3:15; Roma 16:20.
O LE MEA UA FAAALIA I LE MAVAE ATU O LE TAIMI
22, 23. (a) E uiga i le pulega, o le ā ua faia e Satani ma le fanau a tagata i le vaitaimi ua faatagaina atu e le Atua? (e) O le ā ua faaalia e le tala faasolopito o le tagata i le ono afe tausaga ua tuanaʻi e uiga i malo latou te taumafai e lē amanaia le Atua?
22 O le ā ua iʻu i ai le taliaina e le Atua o le luʻi e uiga i le saʻo o lana pule aoao? Pe ua aogā ea i le tagata lava ia lona faalogologo i le fili o le Atua ma taumafai na te pulea ana lava mataupu? O loo faatagaina pea lava Satani na te atiina aʻe au o “agaga leaga,” ma faamaopoopoina atu latou i ‘malo ma pulega ma taʻitaʻi ma pule o le lalolagi.’ (Efeso 6:11, 12) Ua tuuina atu i le fanau a tagata le avanoa latou te taumafai ai e fai soo se ituaiga o faigā malo uma latou te iloa. Sa lei faatagaina e Ieova na o ni nai tupulaga laitiiti ia oo mai ma mou atu ma taofia loa taumafaiga a le tagata a o lei tino mai iʻuga moni. E oo lava i le senituri ua mavae atu ua vave tele. O le taimi lena sa faatoa ulu atu le tagata i le “vaitaimi o le poto maoae” ma faatoa amata ona faia ni folafolaga tetele i ni mea ua na mafaia nei ona faataunuuina.
23 Peitai i le taimi nei, pe e manaomia ea se isi senituri ia iloa ai pe o le a le iʻuga o le tu toatasi o le tagata mai le Atua? E oo lava i tagata lausilafia i matata tau upufai o malo ma le poto faasaienisi ua latou faamaonia faapea e tusa ai ma le talitonuga ua mafuli atu i ai le toatele i le taimi nei, o le lalolagi ma le olaga o i ai ua fesagai nei ma se tulaga mataʻutia o le faaleagaina. Ua mautinoa lava e lē manaomia e le Atua le faatagaina o se faatamaiga atoatoa ina ia mafai ai ona faamaonia le lē taulau aʻiaʻi o le pule tu toatasi a le tagata. Faatasi ma le faamatalaga o le ono afe tausaga o loo aumaia ai le molimau i iʻuga o malo e taumafai e lē amanaia le Atua, ua iloa ai e lē taitai ona mafaia e tagata—po o agaga fouvale ona faapea mai ua lei lava le taimi na i a i latou e faamaonia ai le latou luʻi. Ua faaalia e mea moni e leai lava se malo e tu ese mai le Atua na te mafaia ona aumai le manuia ma le saogalemu moni mo le fanau uma a tagata.
24. O le ā toeitiiti nei faia e faaavanoaina ai le ala mo le pulega amiotonu o le lalolagi e le Alo o le Atua?
24 E pei ona o le a tatou iloa mulimuli ane, a o lei taitai ona oo mai lea taimi, sa faailogaina ma le fetaui lelei e Ieova le Atua le tupulaga lenei o le a ia faamamāina ai le vateatea aoao mai fouvalega uma faasaga i lana pulega tau atua. E lē gata ina o le a faaumatia ai le tagata amio leaga e faavavau, peitai o Satani foi ma ana temoni o le a taofiofia i se tō e lē gata, o le a le toe mafai ona faatosina i mataupu a tagata po o agelu. O le tatalaina lenei o le auala i le pulega amiotonu o le lalolagi e le malo o le Alo o le Atua. I totonu o le vaitaimi lea o le afe tausaga, o le a faaleleia e lena malo mea leaga uma na aumaia i le faitau afe o tausaga o le pulega loto faapito a le tagata. O le a na toe faafoisia lenei lalolagi i le matagofie faaparataiso ma aumaia le fanau a tagata usiusitai i le lelei atoatoa e pei ona sa olioli ai i Etena.—Faaaliga 20:1, 2; 21:1-5; 1 Korinito 15:25, 26.
25. (a) Ai se ā o le a tatalaina ai Satani ma ana temoni i le iʻuga o le afe tausaga? (e) O le ā le iʻuga o le a oo i ai?
25 I le iʻuga o lena pulega o le afe tausaga, ua faamatalaina e le Tusi Paia o le o tatalaina mai le fili o le Atua ma ana temoni mai le mea sa taofiofia ai latou, mo sina taimi puupuu. Ai se ā? Ina ia maua ai e i latou uma o ola i lea taimi le avanoa ma le faaeaga o le avatuina o le tali faaiʻu i le finauga luʻitau na lāgā, ma faaali ai lo latou loto atoa ma le faamaoni i le pule aoao a Ieova le Atua. E le mafaitaulia i latou o le a o mai i le toetu. Mo le toatele o latou, o se avanoa muamua lenei ua latou maua e faaali ai lo latou tuutoina atu ma lo latou alofa mo le Foaʻiola o Ieova le Atua i lalo o le tofotofoga. Ma e oo foi i a i latou na tutumau i tofotofoga i taimi ua mavae a o lei lelei atoatoa ma i ai i totonu o tulaga leaga o lenei faiga o mea, o le a mafaia i lea taimi i le lelei atoatoa faaletagata ma i nofoaga e pei lava ona sa i Etena. O le finauga o le a pei lava o lea na i Etena—Pe o le a latou sapasapaia o ni tagata taitoatasi le pule aoao a Ieova i le usiusitai faamaoni ma le faatuatua le toe lepetia i lona finagalo faaalia. Ua naunau Ieova e fai mo ia na o tagata o e ua i ai le alofa e uunaia ai lea tuutoina atu. O i latou e mananao e au ma le fili o le Atua ma ana temoni i soo se taumafaiga iʻuvale a i latou nei ina ia toe faalavelavea le filemu o le vateatea a le Atua, o le a saoloto latou e faia lena filifiliga. Peitai ona o lea teena o le malo o le Atua o le a tatau ai loa le faaumatiaga, ma i lea taimi o le a faataalise ona sau lea e pei o se afi mai le lagi. O e fouvale uma, agaga ma tagata, o le a faaumatia loa e faavavau.—Faaaliga 20:7-10.
26, 27. Pe faapefea e le tauaaoina e Ieova o mataupu ona galue moni mo le lelei o i tatou uma taitoatasi?
26 E moni, mo le faitau afe o tausaga ua matuā mafatia le fanau a tagata i le tele o mea faigata. Peitai ua mafua lea tulaga ona o le filifiliga a le uluai tagata, a e lē o le Atua. Ua onosai pea le Atua i le faalumaina o ia ma ua ia faapalepale pea i mea na te inosia i lenei taimi atoa. Peitai le Atua, o lē ua tusa i a te ia le ‘afe o tausaga ma le aso e tasi,’ na te mafai ona silasila mamao atu i mataupu o le a aliali mai ma o le a galue lea mo le lelei o ana foafoaga fai mafaufau. E pei ona tusia e le aposetolo faagaeeina: “E le faatuai mai le Alii o Ieova i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi a ia oo uma i le salamo.” (2 Peteru 3:9) A na leai le onosai ma le faapalepale o le Atua o le ā le avanoa i le faaolataga o le a maua e soo se tasi o i tatou i aso nei?
27 E ui i lea, e lē tatau ona tatou manatu faapea sa na o le nofonofo le mea na faia e le Atua i le ono afe tausaga ua mavae, ma faapea sa na ona ia faatagaina le amio leaga e tuputupu a e lei faia sana gaoioiga e ia lava. E pei ona o le a tatou vaaia, ua faaalia e mea moni le sese o lena taofi.
[Fesili mo le Suʻesuʻega]
