Mataupu 1

O le Filifiliga ua Fesagai ma i Tatou Uma

1-4. (a) Po o a tulaga ua e vaaia ua faaalia ai i a te oe le moomia tele o le i ai o le manuia ma le saogalemu moni? (e) I luga o le ā le faavae ua valoia ai e taʻitaʻi o le lalolagi faapea ua latou faamoemoeina se manuia tumau? (i) Afai ia aogā mo lou lava olaga soo se fuafuaga mo le manuia ma le saogalemu, o ā ituaiga o faafitauli e ao ona ia foia?

E MONI LAVA o oe, e pei foi o le toatele o tagata i aso nei, o loo e moomia le manuia ma le saogalemu. O tagata i soo se mea ua matuā vaivai, oono ma le lē mautonu ona o taua. Ua loa ona latou faanaunau atu i se mapusaga. Pe e te le olioli i le vaai atu i lenei lalolagi ua avea ma aiga matagofie, ma saogalemu mo e uma e mau ai?

² Ua i ai mafuaaga uma e talitonu ai o le mapusaga moomia ua leva ona faanaunau i ai, ua i ai nei i faitotoa? Mai le ā le puna?

³ O taʻitaʻi o le lalolagi i aso nei ua latou valoia ma le faatuatua le ulufale mai o se ‘faiga fou’ i le tala faasolopito o le lalolagi. Ua latou fai mai, o le faamataʻu mai o se taua a le lalolagi lautele ma se faaumatiaga faaniukelea ua tuanai. Ai se a? Auā ua latou faalauiloaina, faapea, o se suiga maoae i le va fealoaloai o malo malolosi o le lalolagi ua aumaia ai se taimi o le manuia ma le saogalemu e lei vaaia lava faapea muamua e le lalolagi. I a Ianuari o le 1973, sa saunoa ai se tagata lauiloa i mataupu fai o malo: “Ua tatou faia se laasaga tele agaʻi atu i le foafoaina i le lalolagi o se mea e lei iloa lava muamua e le lalolagi—o se fausaga o le manuia e mafai ona tumau, e le faapea o le a na o mo lo tatou taimi, a e mo tupulaga o le a o mai.”

⁴ O le fesili la: O le ā e manaomia ma ia faatinoina le manuia ma le saogalemu moni? Pe e mafai faapefea  ona malu puipuia ai lou ola? Ina ia faatinoina lea mea, pe e lē tatau ea ona matuā oo atu i lou lava nuu ma lou aiga ma foia faafitauli o loo matuā aafia tele ai oe? Pe ua le tatau foi ona foia faafitauli o le tuputupu aʻe o le solitulafono, ma le faaleagaina i vailaau oona, le mapuna aʻe o le tau o mea taumafa ma lafoga tetele, le salalau atu o le faaoonaina o le lalolagi ma le mou malie atu o sootaga faaleaiga? O le mea moni, a o faaauau pea le i ai o se tasi o nei tulaga, o le a fai pea ma tau faamataʻu i lou manuia ma lou saogalemu moni.

5-8. (a) I luga o le faavae o lou lava poto masani i le olaga, pe e te talitonu ea o le a foia e tagata na faafitauli? (e) O fea se isi mea atonu tatou te saili i ai mo se vaifofo? (i) Pe faapefea ona tulaga ese mai le Tusi Paia?

⁵ O tagata i aso nei ua latou ofoina mai le faamoemoe faapea latou te mafai ona faaleleia faafitauli tetele o loo pagatia ai le fanau a tagata. Ua latou fai mai, a tuusaolotoina mai mafatiaga mataʻutia o taua, latou te mafaia ona faatonutonuina le tamaoaiga, le suesuega mo le faaleleia atili o mea, ma le malosi faaletagata i le auala e sili atu ona lelei mo le sailiga o ni vaifofo mo mea nei e pei o le solitulafono, o maʻi, matelaina, mativa ma le leaga o fale e nonofo ai.

⁶ Pe e te talitonu i lenei mea? Pe i ai ea se faamaoniga mautu mai tausaga ua tuanai po o le taimi nei foi e faaalia ai e mafai e tagata ona aumaia ia vaifofo? O le ā ua faaalia e tala faasolopito o le tagata? O le a ua taʻu atu i a te oe i lou lava poto masani tau le soifuaga?

⁷ ‘Peitai, afai ua lē i tagata le vaifofo, o le a ua totoe nei?’ Atonu o le a e fesili ai. ‘O le a le filifiliga ua i a i tatou?’ A e ā le Atua? Ua i ai pea le mea moni lē mafaafitia, o le lalolagi ma mea ola o loo i ai ua aumaia ai se faamaoniga o se fuafuaga poto. (Eperu 3:4) O lea la, o fea e ulufale mai ai le Atua i lenei mataupu? Pe o manatu mai ea o ia i nei mea? Pe o le a auai ea o ia i mataupu fai a le tagata?

⁸ Ona o le vaai atu i le tulaga faalētonu, pe ua lē  alagā tatau ai ea si nou taimi e suesue ai pe o a fa le Tusi Paia i lenei mataupu? Atonu ua e iloa o le Tusi Paia o se tusi lea ua sili atu le tele o ona faaliliuga ma lona faasalalauina i le lalolagi atoa. * Ae pe sa e iloa ea o loo ia faamatalaina mataupu tonu lava o loo aafia tele ai tatou i lenei luasefulu o senituri?

9. O le a ua fai mai ai le Tusi Paia e uiga i le lumanai o le fanau a tagata ma malo?

⁹ E toatele tagata ua faalogo o loo valoia mai ai se faaumatiaga o le lalolagi o loo fotuai mai, ma atonu ua faavevesia ai latou. Peitai e toaitiiti lava ua iloa le mea o fai mai ai e uiga i le taimi o le a oo mai ai lea faaumatiaga atoa ma valoaga e uiga i le olaga i luga lava o lenei lalolagi mulimuli ane ai. (Mataio 24:21, 22; 2 Peteru 3:11-13) Atonu ua latou tatalo mo le ‘malo o le Atua ia oo mai.’ Peitai e toaitiiti e toaitiiti lava ua iloa o loo tautala le Tusi Paia faapea o lena malo o se pulega moni lava, le malo lea ua toeitiiti nei ona suia faiga faalemalo uma a tagata o loo i ai.—Tanielu 2:44.

10. O a nisi o eseesega i le va o mea ua fai mai ai le Tusi Paia, o le a faia e le malo o le Atua ma mea ua fai mai ai taʻitaʻi o tagata o le a latou faia?

¹⁰ E i ai se eseesega mamao i le va o le manuia ma le saogalemu ua faaali mai e le Tusi Paia o le a aumaia e le malo o le Atua ma le tulaga e pei ona folafolaina mai e taʻitaʻi o tagata o o tatou aso. I aso nei ua talanoaina e tagata le faaitiitia o auupega e ala i feagaiga o le filemu. A e ese ai le Tusi Paia ua faapea mai, e toeitiiti ona aumaia e le Atua le iʻuga o auupega uma ma aveeseina aa autū o le pogai o taua. O le saogalemu ua folafolaina mai e le Atua e le mai na o taua i le va o malo o tagata. Ae o le saogalemu mai fili o soo se ituaiga, i soo se mea, ina ia le toe i ai soo se tasi e nofo ma le mataʻu i le ao po o le po. (Mika 4:3, 4) Ua naunau tagata i aso nei ia aumaia le amioleaga i lalo o se pulega lelei, peitai o le fuafuaga faalauiloaina a Ieova ia matuā tafi eseina e oo lava i pogai o le amioleaga ma liaiina ese manatu ma tulaga uma na amataina ai le amioleaga. (Salamo 37:8-11  [36:8-11, Douay Version, Katoliko]; Kalatia 5:19-21) Ua talanoa malo i le agaʻi i luma o suesuega faafomaʻi ma le faaleleia o le tausiga o tagata mamaʻi ma e ua matutua. Peitai ua faamatalaina e le Tusi Paia le auala o le a aumaia ai e le malo o le Atua le soifua lelei atoatoa ma le tumau, ioe e oo lava i le manumalo i luga o faafitauli o le ola matua ma le oti. (Faaaliga 21: 3, 4) I lalo ifo o le ituaiga o pulega e pei ona faamatalaina e le Tusi Paia, o le a avea le galuega a se tasi ua sili atu le uigā na i lo lena o le maua mai ai o tupe ma mea totino—o le a avea ai le olaga ma mea ua tumu i uiga lelei, ua faatumulia i fuafuaga, ma aumaia ai le loto malie moni. Auā ia manatua, e tusa lava po o le a le totogi o ē maua, o le ā se fiafia o le a i a te oe pe afai ua pāsia lau galuega, pe afai foi ua e atuatuvale ma e aunoa ma se faalogona moni ua e faia se mea mautu i le olaga?—Roma 8:19-21; Isaia 65:21-23.

11. I le filifilia pe tuuina lo tatou faatuatuaga i tagata po o i mea ua folafolaina mai e le Tusi Paia, o ā fesili e lelei ona tatou fesili ai i a i tatou lava?

¹¹ O le a e sili i a te oe? O le fea e te talitonu ua na ofoina mai le manuia ma le saogalemu moni? I le o faatasi ma le manatu ua talia e le lalolagi i le uiga lautele, pe ua e mauaina ai ea le mea moni o loo e manaomia i le olaga? Afai e te faatagaina oe e auai i se mea o loo taatele i le taimi nei, pe atonu ea o le a e maua ua e faatuatua i se manuia pepelo, se saogalemu taufaaoleole o le a tuua ai oe, e le gata ua olegia, ae ua faapea foi ona i ai i se tulaga mataʻutia? I le isi itu, pe e mafai ea ona e faalagolago i luga o mea ua folafola mai e le Tusi Paia o se mea e mafai ona e talitonu i ai, e mafai ona faatinoina o se mea moni lava?

12. Ai se ā ua aogā tele ai mo i tatou le suesueina faatasi o tali i nei fesili?

¹² O le filifiliga ua fesagai nei ma i tatou taitoatasi e lē faatauvaa sona iʻuga. O o tatou lava ola ua tu i se tulaga faalētonu. O le mea moni lava la, o le tali i fesili ua lagā e moomia ai la tatou suesuega loloto.

[Faaopoopoga i lalo]

[Fesili mo le Suʻesuʻega]

 [Ata atoa i le itulau 4]