Mataupu 9

O le Manuia ma le Saogalemu i le Lalolagi Aoao—O Se Faamoemoega Mautinoa

1, 2. Po o a tulaga, ua valoia mai e le Tusi Paia, e avea ai le lalolagi ma nofoaga e mau ai, e sili ona matagofie ma le faamalie loto?

E MAFAI ona avea lenei lalolagi ma nofoaga e mau ai e sili ona matagofie, faamalie loto, ma le ofoofogia—pe afai e faatumauina ma manumalo tulaga filemu moni ma le saogalemu i le lalolagi aoao. E ui lava ina faapea e le taitai lava ona faapena le tulaga ua i ai nei, ua valoia mai e le Tusi Paia, o le a avea le lalolagi ma aiga e sili ona matagofie mo le fanau a tagata, e mafai ai ona ola ma le fiafia atoatoa le aiga faaletagata i se olaga lelei.

² Po o a ea, na faamanuiaga ua folafolaina mai, ma pe e mafai faapefea ona tatou mautinoa o le a faataunuuina?

O LE FAAVAE MAUTU MO LE MAUTINOA

3, 4. (a) Po o a mea ua tatou aʻoaʻoina mai i le faamaoni o tulafono faavae o loo pulea le vateatea? (e) Po o ai na Ia Faia na tulafono ma po o a isi mea, ona o mafuaaga lelei, ua tatou faatuatua ma faalagolago i ai?

³ Ua i ai tulafono faavae o loo pulea ai le vateatea. O le tele o nei tulafono, ua tatou manatu māmā i ai. O le oso mai, ma le goto o le la, ma vaega o le masina atoa foi ma tau, o ia mea e alu ma sau i se gaoioiga e faamautu ai le olaga faaletagata. Ua faia e tagata kalena ma fuafua galuega mo tausaga e tele i le lumanai, ma le iloa lelei o gaoioiga a le la, ma le masina, ma paneta e mafai ona faalagolago i ai. Po o a ea, mea e mafai ona tatou aʻoaʻoina ma maua mai lenei mea?

⁴ O lē na Faia nei tulafono e faamaoni ia, e mafai ona tatou faalagolago i ai; o ana afioga ma ana galuega e faamaoni e mafai ona faalagolago i ai. Ona o Ia o lē na Faia le lagi ma le lalolagi, o lona suafa  ua fai ma faavae o folafolaga a le Tusi Paia e uiga i se faiga fou amiotonu. (Isaia 45:18, 19) I le olaga o se tasi i lea aso ma lea aso, e masani nisi taimi ona faalagolago i isi tagata—pei o tagata e aumai mea taumafa i le maketi e faatau atu, tagata ave tusi (meli), po o uo masani lelei. Pe e le tatau ea ona sili atu ona tatou faalagolago ma faatuatua i le Atua ma le mautinoa o le a faataunuuina ana folafolaga?—Isaia 55:10, 11.

5. Pe i ai ea, se manatu faapito i mea ua folafolaina mai e le Atua, tatou te masalosalo ai i le faataunuuga o ana folafolaga?

⁵ E moni, e masani lava ona iloa tino ua le faamaoni tagata ona o manatu faapito. Ae peitai, o folafolaga uma lava a le Atua i totonu o le Tusi Paia ua manino lelei ua faia mo lo tatou lelei, e le faapea ua faia ina ia faamalie se manatu faapito ua i a te Ia. E le manaomia e le Atua se mea mai i a te i tatou; e le faapea foi o lo tatou talitonu i ana Afioga o le a maua ai se lelei faapitoa o ni tagata manatu faapito. Ae peitai, e fiafia le Atua i ē ua faatuatua i a te ia, ona o lo latou alofa i a te ia ma lo latou talia ma le loto fiafia ona ala.—Salamo 50:10-12, 14, 15 [49:10-12, 14, 15, Dy].

6. Po o le ā le ituaiga o faatuatua ua fesoasoani mai le Tusi Paia ia tatou maua?

⁶ E le gata i lea, ua uunaia i tatou e le Tusi Paia ia faaaogā o tatou malosi faalemafaufau; na te le faatauanauina le faatuatua tauaso po o le talitonu e aunoa ma se mafuaaga. O le mea moni, ua faamatala mai faapea e le Tusi Paia le uiga o le faatuatua moni, “A o le faatuatua, o le faalagolago ma le mautinoa lea i mea ua faamoemoe i ai, o le faamaoniga manino lea o mea moni e ui lava ina lē o vaaia.” (Eperu 11:1, NW) I le Tusi Paia, ua aumaia ai e le Atua se faavae lelei ma le mausali mo le faatuatua. O le a matuā iloa tino ma mautinoa lena faavae pe ā faatuputeleina pea lo tatou malamalama ma le poto i le Afioga a le Atua, ma faamaonia i o tatou lava olaga, atoa foi ma le faataunuuga o ana valoaga.—Salamo 34:8-10 [33:9-11, Dy].

7. A o tatou suesueina folafolaga a le Tusi Paia mo faamanuiaga i le lumanai, po o a mea faapea e le tatau ona faaletonu ona tatou talitonu i ai?

 ⁷ Ua sili ona maoae faamanuiaga ua folafolaina mai e le Tusi Paia mo le lumanai i lo se mea e mafai ona ofoina mai e tagata. Ae peitai, o nei folafolaga e le faapea ua tatau ai ona tatou talitonu i mea ua lē tusa ma mea uma lava ua masani ai le tagata. E le faapea foi ua ese mai, i mea ua masani ona manao i ai le tagata. Sei manatunatu ma iloilo nisi o nei faamanuiaga e sili ona lelei, ma silasila i le moni ma le faamaoni o nei mea.

O LE LALOLAGI E AVEA MA AIGA PEI SE FAATOAGA

8, 9. (a) Po o le ā le manatu e tatau ona tuu i o tatou loto ma manatu e uiga i le upu “parataiso”? (e) Pe sa i ai ea se mea faapena i taimi ua mavae i luga o le lalolagi? (i) Pe faapefea ona faaalia mai o le fuafuaga a le Atua mo le Parataiso ia soo ai le lalolagi atoa?

⁸ I le manatu o tagata e toatele, o le upu “parataiso” ua faamatala mai ai se manatu o se mea e lē faalelalolagi, e lē o se mea moni. Ae peitai, o le upu “parataiso” e sau mai upu e tutusa lelei ma upu sa faaaogaina anamua (Eperu, par·des’; Peresia, pai·ri·dae’za; Eleni, par·ra’dei·sos), e faamatala mai ai mea moni sa i ai i lea taimi i luga o le lalolagi. Ua i ai i nei upu le manatu faavae o se ‘pāka matagofie’ po o se ‘faatoaga e pei o se pāka.’ I aso nei, pei lava o ona po anamua, e tele lava ni fanua faapena, ma o nisi o nei fanua o ni pāka tetele lava. Ma o le tagata ua i a te ia le naunau faanatura mo nei mea matagofie. Ua folafola mai e le Tusi Paia o le a oo mai le aso e avea ai lenei paneta atoa pei o se faatoaga e foliga pei o se pāka po o se parataiso.

⁹ Ina ua faia e le Atua le uluai ulugātagata, sa ia tuuina atu i a te i laua le Faatoaga o Etena, o lona uiga Parataiso o le Fiafia, e fai ma o la aiga. Ae peitai, sa lei fuafuaina ia faagataina le Parataiso ia tau lava o lena ogafanua e tasi. E pei ona faamatala mai e le Tusi Paia: “Ua faamanuia foi e le Atua ia te i laua, ma ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi,  ia faatoilalo i ai.” (Kenese 1:28; 2:8, 9) O loo aofia i lea le uiga ia faalauteleina tuaoi o le Parataiso ia soo ai le lalolagi atoa. E le faapea na soloiesea lena fuafuaga tau atua ona o le lē usiusitai o Atamu ma Eva. Ina ia faamaonia o le fuafuaga lava a le Atua ia avea le lalolagi ma Parataiso, sa folafolaina atu e Iesu Keriso i se tagata sa maliu i ona tafatafa, sa faaalia lona faatuatua i a Iesu o le Alo o le Atua, o le a maua e ia le avanoa e ola ai i se lalolagi Parataiso faapena. (Luka 23:39-43) Pe faapefea ona faataunuuina lenei mea?

10. I le Faaaliga 11:18, po o a mea ua fai ma faalavelave i le Parataiso, ua folafola mai le Atua o le a Ia aveesea?

¹⁰ Ua folafola mai e le Atua, i le “puapuaga tele” o loo sau, o le a ia aveesea mea uma lava ua fai ma faalavelave mo le faatuina o se parataiso faapena, i le faafanoina o ē ua faaleagaina ma faataumaoi le lalolagi ma le manatu faapito ina ia faamalie tuinanau faatamaoaiga, ma i latou uma lava o ē sii taua mataʻutia ma le faatafunaina ona o le fia maua le pule, atoa foi ma i latou uma lava ua faasaunoaina le lalolagi auā e leai so latou loto faafetai ma le faaaloalo i le faulaiga o mea alofa ua foaiina mai e le Atua.

11. (a) Po o le ā se mea sa tupu e tusa ma tala faasolopito, e faaalia mai ai o le toe fuataiina o le lalolagi ia avea ma parataiso, e lē faapea ua lē tusa ma le poto masani faaletagata? (e) Po o le ā le folafolaga o le faamanuiaga ua faamalosia ai lo tatou faatuatua?

¹¹ I lea taimi, o le a fuga mai le lalolagi atoa ma le matagofie; o le a faafouina ma faamamāina le ʻea, ma le vai, atoa foi ma le laueleele. O lenei toe faafoisia mai o le Parataiso e le faapea o se mea e le mafai ona talitonu i ai, po o se mea foi e le tusa ma le poto masani faaletagata. I aso anamua, ina ua toe foi mai le nuu o Isaraelu mai le tafeaga i Papelonia, sa toe faafoisia i latou e Ieova i lo latou lava laueleele. I le taimi na toe foi mai ai i latou, sa gaogao ma faatafunaina le laueleele. Ae peitai, ona o le faamanuiaga a le Atua ma a latou galuega, sa  vave ona liua le fanua, na mafua ai ona faapea ane ma le ofo o tagata sa nonofo va latalata: ‘Ua avea lea e pei o le faatoaga i Etena!’ O mea sa ola ai le laau tuitui ma le ogoogo, ua tupu aʻe ai ma le talaulau le perosi ma le atasi. Sa matā fua tele mai le laueleele, ma sa mou atu ai se faamataʻu ona o le fia ai ma le oge. (Esekielu 36:29, 30, 35; Isaia 35:1, 2; 55:13) O le mea sa faia e le Atua i lena ogafanua itiiti o Palesitina, ua ia folafola mai o le a ia faia i le kelope atoa, ina ia mafai e tagata uma lava o le a mau ai, ona olioli i le olaga fiafia i le Parataiso na ia saunia.—Salamo 67:6, 7 [66:7, 8, Dy]; Isaia 25:6.

FAAIʻUGA O LE MATIVA MA LE NOFO POLOGA I FAIGA TAU TAMAOAIGA

12. Po o ā mea tau galuega ma tau le tamaoaiga e tatau ona togāfitia, ina ia mafai ona tatou ola i se olaga fiafia moni.

¹² Ua lauiloa lava ua i ai i luga o le lalolagi lautele le mativa, atoa foi ma le nofo pologa i pulega o faiga tau le tamaoaiga. E lē mafai ona maua se olaga fiafia moni i le faiga fou a le Atua pe afai, e le togafitia ma faaleleia nei mea, pe afai e faia pea e le faitau miliona o tagata galuega e maua ai na o sina mea itiiti mo le tausiga o le ola, po o galuega faafiu tagata e avea ai le tagata ma totoga i totonu o se masini tele.

13-15. (a) Po o fea tatou te maua ai se faaaʻoaʻoga i le tala faasolopito e faaalia mai ai le finagalo o le Atua mo le tagata e uiga i lenei mea? (e) Pe sa faapefea ona avea lena fuafuaga ma fesoasoani mo le faatupuina o le saogalemu ma le olaga fiafia o tagata taitoatasi ma aiga taitasi?

¹³ O le finagalo o le Atua mo le tagata e uiga i lenei mea, ua faailoa mai i le ala sa ia pulea ma faatonutonu le nuu o Isaraelu anamua. Sa maua e aiga taitasi fanua e fai mo o latou tofi. (Faamasino 2:6) E ui ina faapea sa mafai ona faatau atu lenei fanua, ma sa mafai foi, ona faatau atu tagata e fai ma pologa pe afai e nofo aitalafu, sa saunia e Ieova se auala e puipui ai se tasi mai le faateleina o ona fanua, po o le faalevaleva foi ona faapologaina tagata. Pe faapefea?

¹⁴ Sa faia lenei mea i fuafuaga o le Tulafono sa ia foaiina mai i lona nuu. O lona fitu o tausaga o le nofo pologa o le ‘tausaga lena o le faasaolotoga’ ma soo se  tagata Isaraelu na nofo pologa e tatau ona faasaolotoina. E le gata i lea, o lona limagafulu o tausaga o se tausaga o le “Iupeli” mo le nuu atoa, o le tausaga lena e “talaʻi ai le saolotoga i lo outou nuu i e nonofo ai uma lava.” (Teuteronome 15:1-9; Levitiko 25:10) Soo se fanua faaleaiga sa faatauina atu, sa toe faafoi atu i lē e ona le fanua i le amataga, ma sa faasaolotoina uma lava i latou sa nofo pologa, e ui lava e lei atoa le fitu tausaga. O se taimi fiafia lena e toe faatasia ai le aiga, ma o se ‘amataga fou’ lena i le olaga tau le tamaoaiga. O le mea lea, e leai se fanua e mafai ona faatau atu e le toe maua, ae peitai, o le faatau atu e peiseai o se ‘lisi,’ o le a faamutaina i le tausaga Iupeli.—Levitiko 25:8-24.

¹⁵ O nei fuafuaga ua fai ma fesoasoani sili ma le matagofie mo le faatumauina o le tamaoaiga o le nuu ma le manuia ma le saogalemu o aiga taitasi. I le tausisi i nei mea, sa leoleoina ai le nuu mai le paʻū atu i le tulaga faanoanoa e pei ona tatou vaaia i le tele o atunuu i ona po nei, ua na o le lua vasega o tagata, o ē ua matuā faamauoloaina, ma ē ua matuā matitiva. O faamanuiaga i tagata taitoatasi ua avea ma mea e faamalosia ai le nuu, auā e leai se tasi e tatau ona taʻu faatauvaaina, pe faatigaina ona o tulaga leaga tau le tamaoaiga. I ona po o le nofoaiga a le Tupu o Solomona, o lē sa faamoemoe ma faalagolago i a Ieova mo le poto ma le atamai, fai mai le faamatalaga: “Sa nonofo ma le filemu o Iuta ma Isaraelu; e taitasi ma nofo i lalo o lona vine, ma lalo o lona mati.” (1 Tupu 4:25 [3 Tupu 4:25, Dy]) I aso nei, e toatele tagata ua le mafai ona faaaogā le latou poto agavaa ma le loto galue, auā ua apilitia i latou i totonu o se faiga tau le tamaoaiga, e le mafai ona o ese mai ai, ua latou auauna atu ma faia le manao o se tasi tagata, po o se vaega laitiiti o tagata. I lalo o le tulafono a le Atua, sa faia fuafuaga ina ia fesoasoani i le tagata sogāsogā ia faaaogā atoa lona poto ma le malosi mo le lelei ma le faafiafiaina o tagata uma lava. O lenei faaaʻoaʻoga, ua aumai ai i a te i tatou se faatusa o le fua o le saolotoga ma le manatu  tauaogaina ma le taualoaina o le a maua e i latou o le a ola i le faiga fou a le Atua.

16. E uiga i le olaga ma tulaga tau le tamaoaiga o tagata taitoatasi, po o a mea o le a saunia e le malo o le Atua mo i tatou uma lava ua ola i lalo o lana pulega.

¹⁶ O le a iloa tino le matuā faataunuuina o le valoaga i le Mika 4:3, 4 i le lalolagi aoao. O tagata naunau i le filemu, e ola i lalo o le pule amiotonu a le Atua, “e taitasi ma nofo i lalo o lona vine, ma lalo o lona mati; e leai foi se na te faamatau mai; auā ua faapea ona tulei mai ai le siufofoga o Ieova o ʻau.” E leai se tasi e mau i lalo o le pule a le malo o le Atua e nofo i se oganuu matagā, ma le tu palapalā, po o fale ua tele naua tagata e nonofo ai. O le a maua o latou lava fanua ma o latou lava fale. (Isaia 65:21, 22) Ua leva ona folafolaina mai e le tupu, o Iesu Keriso, ‘o ē agamalu e fai mo latou tofi le lalolagi,’ ma ua i a te ia le ‘pule uma lava i le lagi ma le lalolagi’ e faataunuu ai lenei folafolaga.—Mataio 5:5; 28:18.

SOIFUA MALOLOINA MA LE OLA E TUMAU PEA

17-19. (a) Pe faapefea ona faailoa mai o le soifua malolo ma le ola faafualoa o ni manaoga faanatura o le fanau a tagata? (e) Po o a mea moni e uiga i le olaga o le tagata ma laau, ua foliga mai ai ua ese lava le puupuu o le ola o le tagata? (i) Po o le a le uiga tau le fāiʻai o le tagata, e faaalia faapea e talafeagai lelei e talitonu faapea na faia le tagata e ola e faavavau?

¹⁷ E ui i lea, e le mafai ona faatupuina e nei mea le manuia ma le saogalemu moni i lou olaga, pe afai o le a i ai pea maʻi, ma le olaga toeaina ma le oti e faanenefu ai le lumanai. Po ua lē talafeagai ea le faamoemoe mo le faasaolotoina mai nei mea ma manaoga faaletagata? E moni lava, e le faapea, ua le talafeagai ma le natura o le tagata, ia fia maua lenei mea auā ua faaalu ma faaaogā e tagata o latou olaga, ma tupe lē ma faitaulia e saili ni togafiti e faataunuu ai nei manaoga.

¹⁸ E leai lava, o le faamoemoe mo le soifua maloloina ma le ola e tumau pea ua talafeagai ma manatu lelei. Pe o se mea lelei ea, ina ua aulia e tagata se tulaga matua, ua maua le iloa lelei o le tele o mea ma le poto masani ma le agavaa e faia ni galuega  aogā, mulimuli ane ona oti i latou? A o i le isi itu, o loo i ai laau ua ola e sili atu i le afe ma afe tausaga. O lenei, pe e tatau ea i le tagata, o le ua tuuina atu i ai le poto ma le mafaufau, ia na ona ola i sina vaega o le taimi e ola ai laau e leai se poto, po o se mafaufau? Pe e le tatau ea ona sili atu le umi o lona olaga?

¹⁹ Fai mai le tusi ua taʻua o le Science Year i le tausaga e 1967 o tagata popoto i le mataupu o le olaga toeaina “ua avea pea le olaga toeaina ma mataupu lilo,” i a te i latou. Ua ofo ma fememeaʻi foi saienitisi popoto i le fāiʻai o le tagata auā ua iloa tino ua faia ma le fuafuaga ia tuuina i totonu le faulaiga o faamatalaga toetoe lava leai se gataaga. E pei ona fai mai se alii suesue i le olaga o manu ma laau o Isaac Asimov o le fāiʻai “na te mafaia ona teuina soo se aʻoaʻoga ma faamanatu soo se mea e tuuina i ai e le tagata—e sili atu i le faapiliona le faateleina o mea ua mafaia nei.” O lona uiga, o lou fāiʻai na te mafaia ona teu soo se faamatalaga e le gata i mea sa e aʻoaʻoina i lou olaga i tausaga e fitusefulu po o le valusefulu, a e mafai foi ona faateleina e sili atu i le afe miliona. E le tioa ua galala le tagata i le fia maua o le poto ma le malamalama, ma le faanaunauga ia aʻoaʻo ia iloa ona faia ma faataunuu galuega. Ae peitai, ua taofia o ia ona o le puupuu o lona olaga. Po o se manatu lelei ea ma le tonu faapea o le tagata ua i a te ia lena fāiʻai, o se totoga uiga ese ma le ofoofogia, ua na o sina vaega itiiti ma le faatauvaa ua ia faaaogaina? Pe e le o se manatu ea e sili ona lelei ma le tonu, e pei ona faaalia mai e le Tusi Paia, na faia le tagata e Ieova le Atua ma le fuafuaga ia ola e faavavau i luga o le lalolagi, ma sa tuuina atu i a te ia se fāiʻai ua matuā lelei lava mo lena fuafuaga?

20. Po o a fa a le Tusi Paia i le folafolaga a le Atua i mea o le a ia faia mo le fanau a tagata e uiga i fua o le agasala, atoa foi ma le oti?

²⁰ Ua faaalia mai e le Tusi Paia i le amataga, sa i ai i le tagata le avanoa mo le ola e faavavau, ae  peitai, sa mou ese lea avanoa ona o le fouvale; o le mea lea ua “oo mai . . . le agasala i le lalolagi i le tagata e toatasi [o Atamu], o le oti foi ona ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) Ua talafeagai lenei mea ma mea ua masani ai tagata, auā o le agasala ma le oti ua lavea ai le fanau a tagata i le lalolagi aoao. E ui i lea, o loo i totonu o le Tusi Paia le folafolaga a le Atua faapea, i le toe fuataiina o le Parataiso, “e leai foi se toe oti, po se faanoanoa, po o se aue, e leai foi se toe puapuaga.” (Faaaliga 21:3, 4; 7:16, 17) Ua taʻutino mai ma le manino o le fuafuaga a le Atua mo le fanau a tagata ia maua le ola e faavavau, e leai ni tiga o le agasala. (Roma 5:21; 6:23) E le gata i lea, ua folafolaina mai faapea o faamanuiaga i le faiga fou a le Atua o le a faaavanoaina mo miliona ma miliona o tagata ua maliliu. Pe faapefea ona faia lea mea? Pe a toe faatūtūina mai e ua oti, ioe, pe a faagaogaoina le tuugamau taatele o le fanau uma a tagata. Sa valoia mai e Iesu Keriso ma le mautinoa lenei lava mea: “Auā e oo mai le aso e faalogo ai i lona leo o i latou uma ua i tuugamau, ma latou o mai ai.”—Ioane 5:28, 29.

21, 22. Pe ai se a e le o se mea faia fua le faamoemoega mo le toe faafoisia mai o le soifua malolo atoatoa lelei?

²¹ I ona po nei ua gaosia e saienitisi faafomaʻi “vailaau fai-vavega” ma ua latou faia ni tipiga uiga ese ma le ofoofogia, o se mea i senituri ua mavae sa manatu e le mafai ona faia. Pe e tatau ea ona tatou masalosalo faapea o Lē na Faia le tagata na te le mafaia ona faia mea e sili atu ona lelei ma le matuā ofoofogia mo le toe faafoisia mai o le soifua malolo ma le malosi i tagata loto faamaoni, e oo foi i le toeaina o le a suia—e faia nei mea e aunoa ma se falemaʻi, po o se potu tipitipi ma totoga ua faia e tagata? Ona o lona alofa mai, ua foaiina mai e le Atua i a te i tatou faamaoniga e iloa tino ai o nei faamanuiaga e le o se faamoemoega ua faia fua.

²² Sa Ia tuu atu i lona Atalii le mana ma le malosi, a o i ai o ia i luga o le lalolagi ina ia faia galuega  mamana o le faamaloloina. Ua faamautinoaina ai tatou e nei galuega e leai se vaivaiga, po o se pona po o se ila, po o se maʻi e le mafai ona faamaloloina e le mana o le Atua. Ina ua tagi ma aioi mai se tagata sa lilofia lona tino i le lepela i a Iesu ia faamaloloina o ia, sa paʻi atu Iesu ma le loto alofa i lena tagata ma faapea atu: “Ina mamā ia oe.” Ma e pei ona fai mai le tala faasolopito, “Ona mamā loa lea o lona lepela.” (Mataio 8:2, 3) Sa lei faia e Iesu nei mea i se nofoaga tuufua, ua natia mai le vaaiga a tagata. Fai mai le tusi tala faasolopito o Mataio Levi faapea: “Ona o mai ai lea ia te ia o le motu o tagata e toatele, ua ia te i latou o e pipili, o e tauaso, o e gūgū, o e mumutu, atoa ma nisi e toatele, ua latou tuu atu ia i latou i vae o Iesu; ona faamalolo ai lea e ia o i latou. Ona taufaiofo ai lea o le motu o tagata . . . ona latou vivii atu ai lea i le Atua o Isaraelu.” (Mataio 15:30, 31) Sei e faitau lava i le tala i le Ioane 9:1-21 o se faaaʻoaʻoga o le moni ma le faamaoni o se tala tusia faasolopito e uiga i se faamalologa sa faia. O nei mea ua molimau i ai tagata e toatele, e aofia se fomaʻi, o le fomaʻi o Luka.—Mareko 7:32-37; Luka 5:12-14, 17-25; 6:6-11; Kolose 4:14.

23, 24. Pe ai se a e tatau ai ona talitonu e mafai, ma o le a toe faatūtūina mai ē ua oti i lalo o le pulega a le malo o le Atua?

²³ Ona o mafuaaga faapena, e le tatau ai ona tatou lē talitonu i le folafolaga manino a le Tusi Paia “o le a toe tutū mai e ua oti.” (Galuega 24:15) Ua mafai e tagata ona faamauina le leo ma foliga ma gaoioiga o se tasi i sina fasi lipine po o se lipine televise, mulimuli ane a mavae tausaga e tele talu ona maliu o ia, e mafai ona toe faia ni kopi. Pe e le tatau ea, i Le na Foafoaina le tagata, o le na te iloa vaega ninii o le tino o le tagata, ona mafai ona faia mea e sili atu? Afai o masini ua faia e tagata ua mafai ona teu ma faasoasoa ai le piliona o faamatalaga, pe e le tatau ea ona mafai e le Atua ona manatua ma le tonu uiga o tagata taitoatasi ina ia toe faatūtūina i latou i le ola?—Iopu 14:13.

²⁴ O lenei, ua foaiina mai e Ieova le Atua ma le  agaalofa i a te i tatou faamaoniga mo le faamalosiaga o tatou faatuatua i se faamoemoe faapena e maʻeu lona ofoofogia. Sa ia foaiina atu i lona Alo le malosi ma le mana ina ia faia ai e ia se faaaʻoaʻoga itiiti, o mea o le a ia faia i se fuafuaga lautele i le taimi o lana pulega amiotonu i le lalolagi. Sa faatuina e Iesu tagata oti, ma sa masani lava ona faia i luma o le vaaiga a tagata. O le tamaloa o Lasalo, o le sa ia faatuina e latalata i le aai o Ierusalema, sa amata ona nanamu ma pala lona tino auā sa fai sina umi talu ona oti o ia. O le mea lea, ua iloa tino o le faamoemoe o le toe tutu ua faavaeina i se faavae mautu ma le mausali.—Luka 7:11-17; 8:40-42, 49-56; Ioane 11:38-44.

O LE MALOSI O LE LALOLAGI E TAUSIA SE AOFAI O TAGATA E TOATELE

25, 26. Pe ā toe faatūtūina mai ē ua oti, pe o le a i ai lava ea se nofoaga e mau ai tagata taitoatasi?

²⁵ Pe e mafai ea ona saunia e lenei paneta nofoaga lelei ma le mafana mo lenei aofai o tagata e toatele o le a iʻu i le toe faatūtūina mai o e ua oti? I le tausaga e 1960 na fai mai Dr. Albert L. Elder, o le peresitene o le American Chemical Society:

“E sili atu i le 5000 tausaga i le tala faasolopito faaletagata na oo ai le faitau aofai o tagata o le lalolagi i le 1.1 piliona i le tausaga e 1820. I le senituri na sosoo ane, sa faaluaina le faitau aofai. O lenei taimi, ua i ai le aofai o le 2.8 piliona ma e mafai ona maua le 3 piliona i uluai tausaga o le vaitaimi mai le 1960 e oo i le 1969 [ma sa faapena ona maua]. O le mea lea, a e lei atoa le 50 tausaga, o le aofai o tagata ua faateleina ua tusa ma le aofai sa i ai i le uluai 50 senituri.”

²⁶ O le mea lea, o i latou o loo ola i aso nei, o se vaega tele o le aofai o tagata na ola i le vaitaimi atoa o le tagata i le lalolagi. O le mea moni, i le tausaga e 1966 sa faapea mai ai: “Ua taumateina faapea e tusa o le 25 pasene o le aofai o tagata na ola i le lalolagi, o loo ola nei.” O le faavae lenei e mafai ai ona taumateina faapea o le aofai atoa o tagata i le tala faasolopito faaletagata ua tusa ma le 14,000,000,000. O le fanua o le lalolagi e sili atu i lo le 36,000,000,000 eka. O lona uiga, e sili atu i lo le  lua ma le afa eka mo le tagata e tasi. O lea la, e le gata ona lava le laueleele mo le faiga o mea taumafa, o le a maua foi le avanoa mo vao matua, ma mauga, ma isi mea, e aunoa ma se faalavelave o le fepiitaʻi i le lalolagi parataiso. E tatau foi ona manatua, fai mai le Tusi Paia o le a lē faasaoina tagata uma lava o loo ola i aso nei, ina ia ola i lena faiga fou.

27. Pe e mafai ea e le lalolagi ona fua mai, ma lava mea taumafa mo nei tagata uma lava?

²⁷ Ae peitai, pe e mafai ea, ona fua mai e le lalolagi mea ai ina ia lava mo nei tagata e toatele? Fai mai saienitisi i aso nei e mafai ona faia, e tusa ma tulaga o mea i aso nei. Ua tala mai e le mekesini o le Time (Iulai 13, 1970) o le Faalapotopotoga o Faatoaga ma Mea Taumafa a Malo Aufaatasi “ua latou manatu faapea e mafai e faatoaga o le lalolagi ona fafaga le 157 piliona o tagata.” Ia manatu, e sili atu lena i le aofai taumateina o tagata na ola i le vaitaimi atoa o le tagata i le lalolagi.

28. Pe ai se a e le avea ai le ola e faavavau o tagata ma faalavelave e tupu ai le toatele naua o tagata i luga o le lalolagi?

²⁸ E tatau lava ona tatou mataulia le fuafuaga a le Atua i le amataga sa faaali atu i le uluai ulugatagata faapea e tatau ona la ‘faatumu le lalolagi ma faatoilaloina,’ ma ia faalauteleina tuaoi o Etena ia soo ai le lalolagi atoa. (Kenese 1:28) O lona uiga, e le faapea o le a matuā lolofia le lalolagi i tagata, ae peitai, o le a faatumuina i se tulaga lautele, e lelei ma le logomalie, i se tulaga e mafai ai ona ‘faatoilaloina’ ai le lalolagi ia avea ma pāka i le kelope atoa pei o le uluai aiga o le tagata sa pei o se pāka. O lea la, o lenei poloaiga tau atua ua faaalia mai ai, i le mana o le Atua ma lona taimi tuupoina o le a faamutaina le malosi e fanau tama i le fanau a tagata. E le o se mea faigata lena i le Atua, auā na ia foaiina atu i le tagata le malosi e fai fanau.

29, 30. (a) Po o le a le mea e tupu i le fiafia o se tasi ona o lona va feagai ma isi tagata? (e) Pe faapefea ona tatou iloa e uiga i ē o le a maua le ola e faavavau i le faiga fou a le Atua, e na o tagata i latou o e ua faia moni ni mea lelei mo latou uso a tagata e uiga i le filemu ma le saogalemu?

²⁹ E ui lava ina faapea e mafai ona e nofo i mea  matagofie, ma maua le manuia faaletino, ma faia galuega e fiafia ai, ma maua sina lelei o le soifua malolo, e le faapea o le a mautinoa ona e maua le fiafia e faavavau. O loo i ai tagata i aso nei ua i a te i latou nei mea, ae peitai, ua le fiafia i latou. Pe ai se ā? Ona o lo latou va fealoaʻi ma tagata, atonu o nei tagata ua manatu faapito, ma le faamisa, ma le tala pepelo, po o le loto ʻinoʻino. O le fiafia e faavavau i le faiga fou a le Atua o le a maua, ma faateleina mai le suiga o uiga o tagata i le lalolagi atoa. O lo latou alofa ma le ava ma le migao i le Atua ma lo la latou tau sailiili ia faataunuu ana fuafuaga, o le a fua mai ai le manuia faaleagaga. Afai e aunoa ma nei uiga, o le a faalēaogaina tamaoaiga faaletino, e leai se faamalie loto, e leai lava sona aogā.

³⁰ E sili atu i le mauaina o mea faaletino, e maua le loto fiafia mai le mafutaga faatasi ma tagata agalelei, loto maulalo, loto fealofani, o ni tagata e mafai ona e faatuatua ma alofa i ai, ma ua latou manatu faapena foi i a te oe. (Salamo 133:1 [132:1, Dy]; Faataoto 15:17) O le alofa i le Atua, e faamausali ai le alofa i lē lua te tuaoi, o le a fai lena ma faafiafiaga i le olaga i Lana faiga fou amiotonu. O i latou o le a faamanuia e le Atua i le ola e faavavau, o ni tagata ua faamaonia lo latou alofa i a te Ia, ma lo latou alofa i o latou uso a tagata. O le avea o tagata faapena ma ou tuaoi, ma uo, ma tagata faigaluega faatasi, o le a ē mafaia ona maua le manuia moni ma le saogalemu ma le fiafia e faavavau.—1 Ioane 4:7, 8, 20, 21.

31. Afai tatou te naunau moni ia ola i le faiga fou a le Atua, po o le a e tatau ona tatou faia nei?

³¹ Talu ai ua tatalaina ma ofoina mai i a te oe se faamanuiaga e sili ona lelei faapena, o le ala aogā ma le atamai e tatau ona faia, ia saili ia iloa po o le a le mea e tatau ona faia ina ia maua lena faamanuiaga. O le taimi lenei, e tatau ai ona taʻitaʻiina lou olaga ia talafeagai ma o gatasi ma ala amiotonu ua tuuina mai e le Atua i totonu o lana Afioga e tatau ona faia e tagata o le a faasaoina i le “puapuaga tele” o loo sau.—2 Peteru 3:11-13.

[Fesili mo le Suʻesuʻega]